ဆီးကျိတ်ကြီးခြင်း (Benign Prostatic Hyperplasia – BPH) ကြောင့် ဖြစ်ပွားသော ဆီးလမ်းကြောင်းဆိုင်ရာ ရောဂါလက္ခဏာများကို ကုသရာတွင် ယခုအခါ သမားရိုးကျ ခွဲစိတ်ကုသမှုများအပြင် ပိုမိုဆန်းသစ်သော ကုသမှု နည်းလမ်းများစွာ ပေါ်ပေါက်လာပြီ ဖြစ်ပါသည်။ ဆီးကျိတ်ကြီးခြင်း သည် ခဏခဏ ဆီးသွားချင်ခြင်း၊ ဆီးစီးဆင်းအား ပျော့ခြင်း သို့မဟုတ် ဆီးကုန်အောင် စွန့်ထုတ်ရ ခက်ခဲခြင်း စသည့် ဝေဒနာများကို ဖြစ်ပေါ်စေပြီး နေ့စဉ်လူနေမှုဘဝကို အနှောင့်အယှက်ဖြစ်စေနိုင်ပါသည်။ ဆေးပညာ နည်းပညာ တိုးတက်လာသည်နှင့်အမျှ ဆရာဝန်များအနေဖြင့် ဆီးကျိတ်၏ အရွယ်အစား၊ ရောဂါလက္ခဏာများနှင့် လူနာတစ်ဦးချင်းစီ၏ စုစုပေါင်း ကျန်းမာရေး အခြေအနေပေါ် မူတည်၍ သင့်တော်ရာ ကုသမှု နည်းလမ်းများကို အကြံပြု ကုသပေးနိုင်ပြီ ဖြစ်ပါသည်။
ဆီးကျိတ်ကြီးခြင်းကြောင့် နေ့စဉ်လူနေမှုဘဝကို ထိခိုက်လာသောအခါ အသက်အရွယ် ရင့်ကျက်လာသည်နှင့်အမျှ ဆီးကျိတ်သည် တဖြည်းဖြည်း ကြီးထွားလာတတ်ပြီး ယင်းအခြေအနေကို ဆီးကျိတ်ကြီးခြင်း (Benign Prostatic Hyperplasia – BPH) ဟု ခေါ်ဆိုပါသည်။ ဆီးကျိတ် အရွယ်အစား ကြီးထွားလာသည်နှင့်အမျှ ခန္ဓာကိုယ်ပြင်ပသို့ ဆီးများကို သယ်ဆောင်ပေးသည့် ဆီးပြွန်ကို ဖိမိသွားပြီး ဆီးသွားရ ပိုမိုခက်ခဲလာစေနိုင်ပါသည်။
ဆီးကျိတ်ကြီးခြင်း (BPH) သည် ကင်ဆာမဟုတ်သော အခြေအနေတစ်ခုဖြစ်ပြီး ဆီးကျိတ်ကင်ဆာ ဖြစ်ပွားနေခြင်းကို မဆိုလိုပါ။ သို့သော် ဆီးကျိတ်၏ အပြောင်းအလဲများကြောင့် ဖြစ်ပေါ်လာသော ဆီးလမ်းကြောင်းဆိုင်ရာ ရောဂါလက္ခဏာများသည် နေ့စဉ် လူနေမှုဘဝ၊ သက်တောင့်သက်သာရှိမှုနှင့် အိပ်စက်ခြင်းတို့ကို အနှောင့်အယှက် ဖြစ်စေနိုင်ပါသည်။
ရောဂါလက္ခဏာများသည် တစ်ဦးနှင့်တစ်ဦး မတူညီဘဲ ကွဲပြားနိုင်သော်လည်း လက္ခဏာရပ်များမှာ ဆီးစတင်သွားရန် ခက်ခဲခြင်း၊ ဆီးစီးဆင်းအား ပျော့ခြင်း၊ ခဏခဏ ဆီးသွားချင်ခြင်း၊ ညဘက်တွင် မကြာခဏ ဆီးထသွားရခြင်း သို့မဟုတ် ဆီး မကုန်ဘဲ ကျန်ရစ်သလို ခံစားရခြင်းတို့ ပါဝင်ပါသည်။
ဆီးကျိတ်ကြီးခြင်းအတွက် ခေတ်မီ ကုသမှု နည်းလမ်းများ လူနေမှုပုံစံ ပြောင်းလဲခြင်းနှင့် သောက်ဆေးများ (ဥပမာ – Alpha-blockers နှင့် 5-alpha reductase inhibitors) သည် အမျိုးသားများစွာတွင် ခံစားရသည့် BPH ရောဂါလက္ခဏာများကို သက်သာစေနိုင်ပါသည်။ သို့သော် ယင်းကုသမှုများဖြင့် လုံလောက်သော သက်သာရာ မရရှိပါက ဆရာဝန်များအနေဖြင့် အခြားသော ကုသမှု နည်းလမ်းများကို စတင်စဉ်းစားရလေ့ရှိပါသည်။ ခေတ်မီ BPH ကုသမှုများတွင် ထိခိုက်ဒဏ်ရာ သက်သာစေသော နည်းလမ်းများနှင့် အဆင့်မြင့် ခွဲစိတ်ကုသမှု နည်းပညာများ ပါဝင်ပြီး ဆီးကျိတ်၏ အရွယ်အစား၊ ရောဂါလက္ခဏာ ပြင်းထန်မှုနှင့် လူနာတစ်ဦးချင်းစီ၏ ကုသမှုဆိုင်ရာ ရည်မှန်းချက်များပေါ် မူတည်၍ သင့်တော်ရာကို ရွေးချယ်နိုင်ပါသည်။
ဆီးကျိတ်ကြီးခြင်းအတွက် ဒဏ်ရာအနည်းဆုံး ကုသမှုများ ယနေ့ခေတ်တွင် သမားရိုးကျ ခွဲစိတ်ကုသမှုများအပြင် ဆီးကျိတ်ကြီးခြင်းကို ကုသနိုင်သည့် ရွေးချယ်စရာ နည်းလမ်းများစွာ ပေါ်ပေါက်နေပြီဖြစ်ပါသည်။ ဒဏ်ရာအနည်းဆုံး ကုသမှုနည်းလမ်းများသည် သမားရိုးကျ ခွဲစိတ်မှုများကဲ့သို့ ဆီးကျိတ်တစ်ရှူးများကို ဖြတ်ထုတ်ရန် မလိုဘဲ ဆီးလမ်းကြောင်းဆိုင်ရာ ရောဂါလက္ခဏာများကို သက်သာစေပါသည်။
ဤကုသမှုများသည် ခွဲစိတ်မှု မပြုလုပ်ဘဲ ဆီးကျိတ်ကြီးခြင်းကို ကုသလိုသူများ သို့မဟုတ် တစ်ရှူး အများအပြား ဖယ်ရှားခြင်းကို မလိုလားသူများအတွက် အခြားသော နည်းလမ်းကောင်းများကို ပေးစွမ်းနိုင်ပါသည်။ အသုံးများသော နည်းလမ်းများတွင် UroLift စနစ်၊ ဆီးကျိတ် သွေးကြောပိတ် ကုသမှု (PAE) နှင့် Rezūm Water နည်းပညာတို့ ပါဝင်ပါသည်။
UroLift စနစ် (UroLift System) ဆီးကျိတ်တစ်ရှူးများကို ဖြတ်ထုတ်သည့် ရှေးရိုးစွဲ နည်းလမ်းများနှင့် မတူဘဲ UroLift သည် ဆီးကျိတ် အရွယ်အစား အနည်းငယ်မှ အသင့်အတင့်သာ ကြီးထွားနေသော လူနာများအတွက် အထူးသင့်တော်ပါသည်။ ဤကုသမှုသည် ကြီးထွားနေသော ဆီးကျိတ်တစ်ရှူးများကို ဆီးပြွန်နှင့် အကွာသို့ “မ”တွန်းဖယ်ပေးခြင်းဖြင့် ဆီးလမ်းကြောင်းကို ပွင့်သွားစေပါသည်။ သေးငယ်သော ကိရိယာလေးများ (Implants) ကို အသုံးပြု၍ ဆီးကျိတ်တစ်ရှူးများကို ထိုနေရာ၌ စွဲကပ် ထိန်းထားပေးခြင်းဖြင့် ဆီးသွားရ လွယ်ကူစေကာ BPH ကြောင့် ဖြစ်ပေါ်လာသော ဆီးလမ်းကြောင်းဆိုင်ရာ ရောဂါလက္ခဏာများကို သက်သာစေပါသည်။
UroLift သည် ဆီးကျိတ်တစ်ရှူးများကို ပျက်စီးမှုမရှိဘဲ ဆီးစနစ် လုပ်ဆောင်ချက်ကို တိုးတက်ကောင်းမွန်စေပါသည်။ ယင်းကုသမှုသည် ဆီးစီးဆင်းအား ပျော့ခြင်း၊ ဆီးစတင်သွားရန် ခက်ခဲခြင်းနှင့် ဆီး မကုန်ဘဲ ကျန်ရစ်သကဲ့သို့ ခံစားရခြင်း စသည့် ရောဂါလက္ခဏာများကို သက်သာစေရန် ကူညီပေးနိုင်ပါသည်။
ဆီးကျိတ်တစ်ရှူးများကို ဖြတ်ထုတ်ခြင်း မပြုဘဲ UroLift က ဆီးလမ်းကြောင်းကို မည်သို့ ပွင့်သွားစေသည်ကို လေ့လာကြည့်ရှုနိုင်ပါသည်။
UroLift ၏ ရရှိနိုင်သော အကျိုးကျေးဇူးများ-
ဆီးကျိတ်တစ်ရှူးများကို ပျက်စီးမှုမရှိစေခြင်း- UroLift သည် ဆီးကျိတ်တစ်ရှူးများကို လှီးဖြတ်ခြင်း သို့မဟုတ် ဖယ်ရှားခြင်း မပြုဘဲ ဆီးပြွန်နှင့် အကွာသို့ တွန်းဖယ်ပေးပါသည်။သေးငယ်သော ကိရိယာလေးများ အသုံးပြုခြင်း- UroLift သည် ဆီးကျိတ်တစ်ရှူးများကို ဆီးပြွန်မှ ကင်းဝေးစေရန်နှင့် ဆီးစီးအား တိုးတက်ကောင်းမွန်စေရန် သေးငယ်သော Implants လေးများကို ထည့်သွင်းပေးပါသည်။မြန်ဆန်စွာ ပြန်လည်ကောင်းမွန်ရေးကို အထောက်အကူပြုခြင်း- ထိခိုက်ဒဏ်ရာ သက်သာစေသော ဤကုသမှုကြောင့် လူနာများစွာသည် နေ့စဉ်လူနေမှုဘဝသို့ လျှင်မြန်စွာ ပြန်လည်ဝင်ရောက်နိုင်ပါသည်။နေ့စဉ် လှုပ်ရှားဆောင်ရွက်မှုများကို အထောက်အကူပြုခြင်း- ဆီးလမ်းကြောင်းဆိုင်ရာ ရောဂါလက္ခဏာများ သက်သာလာခြင်းသည် လူနာများအား နေ့စဉ်လူနေမှုဘဝကို ပိုမို သက်တောင့်သက်သာ လုပ်ဆောင်နိုင်စေရန် ကူညီပေးပါသည်။
ဆီးကျိတ် သွေးကြောပိတ် ကုသမှု ( Prostatic Artery Embolization – PAE) ဆီးကျိတ် သွေးကြောပိတ် ကုသမှု (PAE) သည် ကြီးထွားနေသော ဆီးကျိတ်သို့ သွေးထောက်ပံ့ပေးနေသည့် သွေးကြောများကို ဦးတည်ကုသသည့် ထိခိုက်ဒဏ်ရာ သက်သာစေသော ကုသမှု နည်းလမ်းတစ်ခု ဖြစ်ပါသည်။ ကုသမှုပြုလုပ်စဉ်အတွင်း ဆရာဝန်များသည် သွေးကြောအတွင်းသို့ သေးငယ်သော ပိုက်ပျော့ (Catheter) ကို ထည့်သွင်းပြီး သွေးကြောများအတွင်းသို့ အမှုန်အမွှားလေးများကို ထည့်သွင်းကာ ဆီးကျိတ်သို့ သွေးစီးဆင်းမှုကို လျှော့ချပေးပါသည်။ ထိုသို့ သွေးထောက်ပံ့မှု လျော့နည်းသွားခြင်းက ဆီးကျိတ်ကို သေးငယ်ကျုံ့ဝင်သွားစေပြီး ဆီးပြွန်ပေါ်ကျရောက်နေသော ဖိအားကို သက်သာစေကာ BPH ရောဂါလက္ခဏာများကို တိုးတက်ကောင်းမွန်စေပါသည်။
ဆီးကျိတ်ကြီးခြင်းအတွက် PAE ကုသမှု နှင့် သွေးထောက်ပံ့မှုကို ဦးတည်ပိတ်ဆို့ခြင်းဖြင့် ဆီးကျိတ်ကြီးထွားမှုကို မည်သို့ လျှော့ချပေးသည်ကို လေ့လာကြည့်ရှုနိုင်ပါသည်။
PAE ၏ ရရှိနိုင်သော အကျိုးကျေးဇူးများ-
ဆီးကျိတ် အရွယ်အစားကို သေးငယ်စေခြင်း- PAE သည် ဆီးကျိတ်သို့ သွေးစီးဆင်းမှုကို လျှော့ချပေးသဖြင့် အချိန်ကြာလာသည်နှင့်အမျှ ဆီးကျိတ်ကြီးထွားမှုကို သေးငယ်သွားစေနိုင်ပါသည်။တစ်ရှူးများကို တိုက်ရိုက် ဖယ်ရှားရန် မလိုခြင်း- PAE သည် ဆီးကျိတ်တစ်ရှူးများကို လှီးဖြတ်ထုတ်ယူရန် မလိုဘဲ ဆီးကျိတ်ကြီးထွားမှုကို လျှော့ချပေးပါသည်။ပိုက်ပျော့ အသုံးပြု၍ ကုသခြင်း- သွေးကြောအတွင်းသို့ ထည့်သွင်းထားသော သေးငယ်သော ပိုက်ပျော့မှတစ်ဆင့် ဆရာဝန်များက ကုသမှု ပေးစွမ်းခြင်း ဖြစ်ပါသည်။ဆီးလမ်းကြောင်းဆိုင်ရာ ရောဂါလက္ခဏာများကို သက်သာစေခြင်း- ဆီးကျိတ်ကြီးထွားမှုကို လျှော့ချပေးခြင်းဖြင့် ဆီးလမ်းကြောင်း ပိတ်ဆို့မှုနှင့် ဆက်စပ်နေသော ရောဂါလက္ခဏာများကို တိုးတက်ကောင်းမွန်စေနိုင်ပါသည်။
Rez ū m ရေခိုးရေငွေ့အပူသုံး ကုသမှုနည်းလမ်း (Rez ū m Water Vapor Therapy) Rezūm ရေခိုးရေငွေ့အပူသုံး ကုသမှုသည် ရေခိုးရေငွေ့ (ရေနွေးငွေ့) မှ ရရှိသော သဘာဝ အပူစွမ်းအင်ကို အသုံးပြု၍ ဆီးစီးဆင်းမှုကို ထိခိုက်စေသည့် ဆီးကျိတ်တစ်ရှူးများကို လျှော့ချပေးသည့် နည်းလမ်းဖြစ်ပါသည်။ ကုသမှုပြုလုပ်စဉ်အတွင်း ဆရာဝန်များသည် ကြီးထွားနေသော ဆီးကျိတ်ဧရိယာများအတွင်းသို့ ရေနွေးငွေ့ အနည်းငယ်စီ ထည့်သွင်းပေးပြီး ကုသထားသော တစ်ရှူးများသည် အချိန်ကြာလာသည်နှင့်အမျှ တဖြည်းဖြည်း သေးငယ်ကျုံ့ဝင်သွားပါသည်။ ဤကုသမှုသည် ဆီးလမ်းကြောင်း ပိတ်ဆို့မှုကို ဖြစ်စေသည့် တစ်ရှူးများကို လျှော့ချပေးခြင်းဖြင့် BPH ကြောင့် ဖြစ်ပေါ်လာသော ဆီးလမ်းကြောင်းဆိုင်ရာ ရောဂါလက္ခဏာများကို သက်သာစေပါသည်။ ရောဂါလက္ခဏာများ တိုးတက်ကောင်းမွန်လာမှုသည် ကုသမှု ပြုလုပ်ပြီးပြီးချင်း ချက်ချင်းမဟုတ်ဘဲ သပ္တပတ် အနည်းငယ်အတွင်း တဖြည်းဖြည်း ဖြစ်ပေါ်လာလေ့ရှိပါသည်။
ဆီးကျိတ်ကြီးခြင်းအတွက် Rezūm ကုသမှု သည် ဆီးကျိတ်တစ်ရှူးများကို လျှော့ချရန်နှင့် ဆီးလမ်းကြောင်းဆိုင်ရာ ရောဂါလက္ခဏာများကို တိုးတက်ကောင်းမွန်စေရန် ရေခိုးရေငွေ့ နည်းပညာကို မည်သို့ အသုံးပြုသည်ကို လေ့လာကြည့်ရှုနိုင်ပါသည်။
Rez ū m ၏ ရရှိနိုင်သော အကျိုးကျေးဇူးများ-
ကြီးထွားနေသော ဆီးကျိတ်တစ်ရှူးများကို သီးသန့် ဦးတည်ကုသနိုင်ခြင်း- Rezūm သည် ရေခိုးရေငွေ့ စွမ်းအင်ကို အသုံးပြု၍ ဆီးလမ်းကြောင်း ပိတ်ဆို့မှုကို ဖြစ်စေသည့် သီးသန့် ဆီးကျိတ်တစ်ရှူး အစိတ်အပိုင်းများကို ကုသပေးပါသည်။ဆီးကျိတ် ပိတ်ဆို့မှုကို လျှော့ချပေးခြင်း- သီးသန့် ဦးတည်ထားသော ဆီးကျိတ်တစ်ရှူးများကို အချိန်ကြာလာသည်နှင့်အမျှ သေးငယ်သွားစေခြင်းဖြင့် ဆီးစီးဆင်းရန် နေရာပိုမို ရရှိစေပါသည်။ပြင်ပ ခွဲစိတ်ဒဏ်ရာ မရှိခြင်း- ဆရာဝန်များသည် ခွဲစိတ်ဒဏ်ရာ ပြုလုပ်ရန် မလိုဘဲ ဆီးလမ်းကြောင်းမှတစ်ဆင့် ကုသမှုကို ပေးစွမ်းပါသည်။အခြားသော ကုသမှု ရွေးချယ်စရာတစ်ခု ဖြစ်ခြင်း- Rezūm သည် BPH ဝေဒနာရှင် အမျိုးသားများအတွက် သောက်ဆေးဖြင့် ထိန်းချုပ်ခြင်းနှင့် ပိုမိုကျယ်ပြန့်သော ခွဲစိတ်ကုသမှုများအကြား အခြားသော ကုသမှု ရွေးချယ်စရာ နည်းလမ်းတစ်ခုကို ပေးစွမ်းပါသည်။
ဆီးကျိတ်ကြီးခြင်းအတွက် ခွဲစိတ်ကုသမှု နည်းလမ်းများ ဆီးကျိတ်ကြီးထွားမှုကြောင့် ပြင်းထန်သော ဆီးလမ်းကြောင်း ပိတ်ဆို့မှုများ ဖြစ်ပေါ်လာသည့်အခါ ခွဲစိတ်ကုသမှုများသည် ကြီးမားနေသောတစ်ရှူးများကို ဖယ်ရှားပေးနိုင်ပြီး ဆီးစီးဆင်းမှုကို တိုးတက်ကောင်းမွန်စေပါသည်။ ဤခွဲစိတ်ကုသမှုများသည် ဆီးကျိတ်ကြီးခြင်းကြောင့် ဖြစ်ပေါ်လာသော ရောဂါလက္ခဏာများကို ပိုမို တိုက်ရိုက်ကျကျ ဖြေရှင်းရန် လိုအပ်သည့် အမျိုးသားများအတွက် ထိရောက်သော ရွေးချယ်စရာ နည်းလမ်းတစ်ခု ဖြစ်ပါသည်။
HoLEP လေဆာကုထုံး (Holmium Laser Enucleation of the Prostate) HoLEP သည် BPH အတွက် အထိရောက်ဆုံးနှင့် ရလဒ် အခိုင်မာဆုံး ခွဲစိတ်ကုသမှု နည်းလမ်းတစ်ခုအဖြစ် သတ်မှတ်ထားပြီး အရွယ်အစား မည်မျှပင် ကြီးမားသော ဆီးကျိတ်များအတွက်မဆို အသုံးပြုနိုင်ပါသည်။ HoLEP သည် ဆီးစီးဆင်းမှုကို ပိတ်ဆို့နေသည့် ဆီးကျိတ်တစ်ရှူးများကို ဖယ်ရှားရန် Holmium လေဆာစွမ်းအင်ကို အသုံးပြုပါသည်။ ကုသမှုပြုလုပ်စဉ်အတွင်း ဆရာဝန်များသည် လေဆာကို အသုံးပြု၍ ကြီးထွားနေသော ဆီးကျိတ်တစ်ရှူးများကို ဘေးပတ်ဝန်းကျင်မှ သီးသန့်ခွဲထုတ်ကာ ပိတ်ဆို့နေသော တစ်ရှူးများကို ဆီးလမ်းကြောင်းမှတစ်ဆင့် ဖယ်ရှားပေးပါသည်။
ဆီးကျိတ်ကြီးခြင်းအတွက် ခွဲစိတ်ကုသမှု နည်းလမ်းတစ်ခုအနေဖြင့် HoLEP သည် ဆီးစီးဆင်းမှု ပိုမိုကောင်းမွန်စေရန် ကြီးထွားနေသောဆီးကျိတ်တစ်ရှူးများကို Holmium လေဆာစွမ်းအင်ဖြင့် ဖယ်ရှားပေးပါသည်။ ဤကုသမှုသည် ပြင်ပခွဲစိတ်ဒဏ်ရာများ မပြုလုပ်ဘဲ ဆီးကျိတ်ကြီးခြင်းကြောင့် ဖြစ်ပေါ်လာသော ပိတ်ဆို့မှုများကို သက်သာစေရန် ကူညီပေးပါသည်။
ဆီးကျိတ်ကြီးခြင်းအတွက် HoLEP ခွဲစိတ်ကုသမှုအကြောင်း နှင့် ဆီးလမ်းကြောင်းဆိုင်ရာ ရောဂါလက္ခဏာများ တိုးတက်ကောင်းမွန်စေရန် ပိတ်ဆို့နေသော ဆီးကျိတ်တစ်ရှူးများကို လေဆာနည်းပညာက မည်သို့ ဖယ်ရှားပေးသည်ကို အသေးစိတ် ဆက်လက်ဖတ်ရှုနိုင်ပါသည်။
HoLEP ၏ ရရှိနိုင်သော အကျိုးကျေးဇူးများ-
ကြီးထွားနေသော ဆီးကျိတ်တစ်ရှူးများကို ဖယ်ရှားပေးခြင်း- HoLEP သည် ဆီးစီးဆင်းမှုကို ပိတ်ဆို့နေသော ကြီးထွားနေသည့် တစ်ရှူးများကို တိုက်ရိုက် ဖယ်ရှားပေးပါသည်။သိသိသာသာ ကြီးမားနေသော ဆီးကျိတ်များကို ကုသနိုင်ခြင်း- HoLEP သည် ဆီးလမ်းကြောင်း ပိတ်ဆို့မှုကို ဖြစ်စေသည့် ဆီးကျိတ်တစ်ရှူးများကို ဖယ်ရှားပေးပါသည်။လေဆာနည်းပညာကို အသုံးပြုခြင်း- Holmium လေဆာစွမ်းအင်သည် ကုသမှုပြုလုပ်စဉ်အတွင်း ဆီးကျိတ်တစ်ရှူးများကို သီးသန့်ခွဲထုတ်ရန်နှင့် ဖယ်ရှားရန် ဆရာဝန်များကို ကူညီပေးပါသည်။ဆီးလမ်းကြောင်းဆိုင်ရာ ရောဂါလက္ခဏာများကို တိုးတက်ကောင်းမွန်စေခြင်း- ပိတ်ဆို့မှုကို ဖယ်ရှားပေးခြင်းဖြင့် ဆီးစီးဆင်းမှုနှင့် ဆီးအိမ်အတွင်း ဆီးကုန်အောင် စွန့်ထုတ်နိုင်မှုကို ပိုမိုကောင်းမွန်စေရန် ကူညီပေးနိုင်ပါသည်။
ဆီးကျိတ်ကြီးခြင်းအတွက် နောက်ဆုံးပေါ် ကုသမှု နည်းလမ်းမှာ မည်သည်နည်း။ ဆေးပညာ တိုးတက်လာမှုများသည် ဆီးကျိတ်ကြီးခြင်း ခံစားနေရသော အမျိုးသားများအတွက် ကုသမှု ရွေးချယ်စရာများကို ပိုမို ကျယ်ပြန့်လာစေပါသည်။ ယနေ့ခေတ်တွင် ဆရာဝန်များသည် လူနာတစ်ဦးချင်းစီ၏ အခြေအနေနှင့် ကုသမှုဆိုင်ရာ ရည်မှန်းချက်များကို ထည့်သွင်းစဉ်းစားရင်း ဆီးလမ်းကြောင်းဆိုင်ရာ ရောဂါလက္ခဏာများကို ထိန်းချုပ်ကုသရန် ထိခိုက်ဒဏ်ရာ သက်သာစေသော နည်းလမ်းများနှင့် အဆင့်မြင့် ခွဲစိတ်ကုသမှု နည်းပညာများကို အသုံးပြုလျက် ရှိကြပါသည်။
UroLift စနစ်၊ ဆီးကျိတ် သွေးကြောပိတ် ကုသမှု (PAE) နှင့် Rezūm ရေခိုးရေငွေ့အပူသုံး ကုသမှုကဲ့သို့သော နောက်ဆုံးပေါ် ရွေးချယ်စရာများသည် ဆရာဝန်များအား ဆီးလမ်းကြောင်းဆိုင်ရာ ရောဂါလက္ခဏာများကို မတူညီသော ချဉ်းကပ်ပုံများဖြင့် ကုသနိုင်ရန် ကူညီပေးပါသည်။ HoLEP နည်းလမ်းသည် ခွဲစိတ်ကုသမှု လိုအပ်သော လူနာများအတွက် ကြီးထွားနေသော ဆီးကျိတ်တစ်ရှူးများကို ဖယ်ရှားပေးပြီး ဆီးစီးဆင်းမှု ပိုမိုကောင်းမွန်စေရန် လေဆာနည်းပညာကို အသုံးပြုပါသည်။
ဆီးကျိတ်ကြီးခြင်းအတွက် နောက်ဆုံးပေါ် ကုသမှု နည်းလမ်းသည် လူတိုင်းအတွက် နည်းလမ်းတစ်ခုတည်းကို သတ်မှတ်ရွေးချယ်ခြင်း မဟုတ်ဘဲ လူနာတစ်ဦးချင်းစီနှင့် အကိုက်ညီဆုံးဖြစ်မည့် ကုသမှုပုံစံကို ရှာဖွေပေးခြင်းပေါ်တွင် အဓိက အလေးထားပါသည်။ ဆရာဝန်များသည် သင့်တော်သော ကုသမှု အစီအစဉ်တစ်ခုကို ရေးဆွဲရန်အတွက် ရောဂါလက္ခဏာများ၊ ဆီးကျိတ် အရွယ်အစားနှင့် အောက်ခံကျန်းမာရေး အခြေအနေစသည့် အချက်အလက်များကို အသေးစိတ် စိစစ်သုံးသပ်ကြပါသည်။
ဆီးကျိတ်ကြီးခြင်းကို ခွဲစိတ်စရာ မလိုဘဲ ကုသနိုင်ပါသလား။ ကုသမှု ရွေးချယ်စရာများသည် သမားရိုးကျ ခွဲစိတ်ကုသမှုများအပြင် ပိုမို ကျယ်ပြန့်လာသောကြောင့် လူနာများအတွက် ဆီးလမ်းကြောင်းဆိုင်ရာ ရောဂါလက္ခဏာများကို ထိန်းချုပ်ရန် ရွေးချယ်စရာများစွာ ရရှိလာပြီ ဖြစ်ပါသည်။ ဆရာဝန်များသည် ဆီးကျိတ်တစ်ရှူးများကို တိုက်ရိုက် လှီးထုတ်ရန် မလိုဘဲ BPH ရောဂါလက္ခဏာများကို ကုသပေးနိုင်သည့် ထိခိုက်ဒဏ်ရာ သက်သာစေသော နည်းလမ်းများ အပါအဝင် ခွဲစိတ်ရန် မလိုသော ဆီးကျိတ်ကြီးခြင်း ကုသမှု ချဉ်းကပ်ပုံများကို အသုံးပြုနိုင်ပါသည်။
UroLift စနစ်၊ ဆီးကျိတ် သွေးကြောပိတ် ကုသမှု (PAE) နှင့် Rezūm ရေခိုးရေငွေ့အပူသုံး ကုသမှုတို့သည် BPH ရောဂါလက္ခဏာများကို ထိန်းချုပ်ရန် မတူညီသော နည်းပညာများကို အသုံးပြုကြပါသည်။ UroLift သည် ဆီးကျိတ်တစ်ရှူးများကို ဆီးလမ်းကြောင်းနှင့် အကွာသို့ တွန်းဖယ်ပေးပြီး Rezūm က ရေခိုးရေငွေ့ စွမ်းအင်ဖြင့် ပိုပိုလျှံလျှံ တစ်ရှူးများကို လျှော့ချပေးကာ PAE က ဆီးကျိတ်သို့ သွေးစီးဆင်းမှုကို လျှော့ချပေးပါသည်။
ဆီးကျိတ်ကြီးထွားမှုကြောင့် ပြင်းထန်သော ပိတ်ဆို့မှုများ ဖြစ်ပေါ်လာသည့်အခါ သို့မဟုတ် တစ်ရှူးများကို ဖယ်ရှားရန် လိုအပ်သည့်အခါ ဆရာဝန်များက ခွဲစိတ်ကုသမှုကို အကြံပြုနိုင်ပါသည်။ မှန်ကန် သင့်တော်သော ကုသမှု ချဉ်းကပ်ပုံသည် ခံစားရသည့် ရောဂါလက္ခဏာများ၊ ဆီးကျိတ် အခြေအနေနှင့် လူနာတစ်ဦးချင်းစီ၏ ကုသမှုဆိုင်ရာ ရည်မှန်းချက်များပေါ် မူတည်ပါသည်။
ဆီးကျိတ်ကြီးခြင်း ( BPH) ရောဂါလက္ခဏာများကို မကုသဘောထားပါက မည်သို့ ဖြစ်ပွားနိုင်သနည်း။ ဆီးကျိတ်ကြီးခြင်း ရောဂါလက္ခဏာများကို မကုဘဲထားပါက အချိန်ကြာလာသည်နှင့်အမျှ ဆီးအိမ် လုပ်ဆောင်ချက်နှင့် ဆီးလမ်းကြောင်း ကျန်းမာရေးကို တဖြည်းဖြည်း ထိခိုက်လာစေနိုင်ပါသည်။ ဆီးကျိတ် ဆက်လက်ကြီးထွားလာခြင်းသည် ဆီးလမ်းကြောင်းပေါ်ရှိ ဖိအားကို တိုးမြင့်စေပြီး ဆီးအိမ်အတွင်း ဆီးကုန်အောင် စွန့်ထုတ်နိုင်ရန် ပိုမို ခက်ခဲလာစေပါသည်။
ဖြစ်ပွားနိုင်သော နောက်ဆက်တွဲ ပြဿနာများမှာ အောက်ပါအတိုင်း ဖြစ်ပါသည်-
ဆီးလမ်းကြောင်း ပိုးဝင်ခြင်း ( Urinary Tract Infections – UTIs)- ဆီးအိမ်အတွင်း ဆီးကုန်အောင် မစွန့်ထုတ်နိုင်ခြင်းကြောင့် ဘက်တီးရီးယားများ ပေါက်ပွားနိုင်ပြီး ပိုးဝင်နိုင်ခြေ မြင့်မားလာခြင်း။ဆီးတွင် သွေးပါခြင်း ( Hematuria)- ဆီးကျိတ်ကြီးထွားလာခြင်းကြောင့် ဆီးလမ်းကြောင်းအတွင်းရှိ သွေးကြောများကို ယားယံမှုဖြစ်စေပြီး ဆီးအတွင်း သွေးပါလာရခြင်း။ဆီး လုံးဝ မသွားနိုင်ခြင်း ( Urinary Retention)- ပြင်းထန်စွာ ပိတ်ဆို့မှုကြောင့် ဆီးအိမ်အတွင်းမှ ဆီးများကို လျှော်ကန်စွာ မစွန့်ထုတ်နိုင်တော့ဘဲ ဆေးကုသမှု ခံယူရန် လိုအပ်လာခြင်း။ဆီးအိမ်ကျောက်တည်ခြင်း ( Bladder Stones)- ဆီးအိမ်အတွင်း ဆီးများ ကျန်ရစ်နေခြင်းကြောင့် ကျောက်တည်ခြင်းကို ဖြစ်ပေါ်စေနိုင်ခြင်း။ကျောက်ကပ် ထိခိုက်ခြင်း ( Kidney Problems)- ရေရှည် ဆီးလမ်းကြောင်း ပိတ်ဆို့မှုကြောင့် ကျောက်ကပ် လုပ်ဆောင်ချက် ပျက်စီးနိုင်ပြီး နာတာရှည် ကျောက်ကပ်ရောဂါ ဖြစ်ပွားနိုင်ခြေ တိုးမြင့်လာခြင်း။
သင့်တော်မှန်ကန်သော ဆီးကျိတ်ကြီးခြင်း ကုသမှုကို ရွေးချယ်ရာတွင် ရောဂါဖြစ်ပွားရသည့် အကြောင်းအရင်း၊ ရောဂါလက္ခဏာများနှင့် ရရှိနိုင်သော ကုသမှု နည်းလမ်းများကို နားလည်သဘောပေါက်ခြင်းမှ စတင်ပါသည်။ ထိခိုက်ဒဏ်ရာ သက်သာစေသော နည်းလမ်းများ သို့မဟုတ် ခွဲစိတ်ကုသမှု ရွေးချယ်စရာများ ပါဝင်သည်ဖြစ်စေ စောစီးစွာ စမ်းသပ်စစ်ဆေးခြင်းသည် လူနာတစ်ဦးချင်းစီ၏ အခြေအနေနှင့် အကိုက်ညီဆုံးဖြစ်မည့် ကုသမှုပုံစံကို ရှာဖွေနိုင်ရန် ဆရာဝန်များကို ကူညီပေးပါသည်။
ဝေ့ဌာနီနိုင်ငံတကာအထူးကုဆေးရုံကြီး၏ ဆီးလမ်းကြောင်းနှင့် အမျိုးသားကျန်းမာရေးဌာန (Urology and Men’s Health Center) တွင် အထူးကု ဆရာဝန်ကြီးများက BPH ဝေဒနာရှင် အမျိုးသားများအတွက် ဘက်စုံ စမ်းသပ်စစ်ဆေးမှုများနှင့် လူနာတစ်ဦးချင်းစီနှင့် ကိုက်ညီမည့် ကုသမှု ချဉ်းကပ်ပုံများကို အဆင့်မြင့် နည်းပညာများ၊ နည်းလမ်းမျိုးစုံ အသုံးပြု၍ ဆီးစနစ် လုပ်ဆောင်ချက်နှင့် လူနေမှုဘဝ အရည်အသွေး တိုးတက်ကောင်းမွန်လာစေရန် ကုသပေးလျက် ရှိပါသည်။
မကြာခဏ မေးလေ့ရှိသော မေးခွန်းများ ( FAQ) ဆီးကျိတ်ကြီးခြင်းအတွက် ခွဲစိတ်ကုသမှုကို မည်သည့်အချိန်တွင် စဉ်းစားသင့်ပါသနည်း။ သောက်ဆေးများဖြင့် ရောဂါလက္ခဏာများကို ထိန်းချုပ်နိုင်ခြင်း မရှိတော့သည့်အခါ သို့မဟုတ် ဆီး လုံးဝ မသွားနိုင်ခြင်း၊ မကြာခဏ ဆီးလမ်းကြောင်း ပိုးဝင်ခြင်း၊ ဆီးအိမ်ကျောက်တည်ခြင်း၊ ခဏခဏ ဆီးတွင် သွေးပါခြင်း သို့မဟုတ် ကျောက်ကပ် ထိခိုက်ခြင်းစသည့် နောက်ဆက်တွဲ ပြဿနာများ ဖြစ်ပေါ်လာသည့်အခါ ခွဲစိတ်ကုသမှုကို အကြံပြုနိုင်ပါသည်။
ဆီးကျိတ်ကြီးခြင်း (BPH) အတွက် ပထမအဆင့် အခြေခံ ကုသမှုမှာ မည်သည်နည်း။ BPH အတွက် ပထမအဆင့် အခြေခံ ကုသမှုသည် ရောဂါလက္ခဏာ ပြင်းထန်မှုနှင့် နေ့စဉ်လူနေမှုဘဝကို မည်မျှအထိ ထိခိုက်မှုရှိသည်ဆိုသည့် အချက်ပေါ်တွင် မူတည်ပါသည်။ ဆရာဝန်များသည် လူနာတစ်ဦးချင်းစီ၏ အခြေအနေပေါ် မူတည်၍ စောင့်ကြည့်လေ့လာခြင်း၊ နေထိုင်မှုပုံစံ ပြောင်းလဲခြင်း သို့မဟုတ် သင့်တော်သော ကုသမှု နည်းလမ်းများကို အကြံပြုပေးနိုင်ပါသည်။
ဆီးကျိတ်ကြီးခြင်း (BPH) ကို အမြစ်ပြတ် သက်သာပျောက်ကင်းအောင် ကုသနိုင်ပါသလား။ BPH ကို ဆီးလမ်းကြောင်းဆိုင်ရာ ရောဂါလက္ခဏာများကို သက်သာစေသည့် ကုသမှုများဖြင့်လည်းကောင်း၊ ဆီးကျိတ်ကြီးခြင်းကြောင့် ဖြစ်ပေါ်လာသော ပိတ်ဆို့မှုများကို လျှော့ချပေးသည့် ကုသမှုများဖြင့်လည်းကောင်း ထိန်းချုပ်ကုသနိုင်ပါသည်။ ရေရှည် ရလဒ်သည် ရွေးချယ်သည့် ကုသမှု ချဉ်းကပ်ပုံနှင့် လူနာတစ်ဦးချင်းစီ၏ အခြေအနေပေါ် မူတည်ပါသည်။
ဆီးကျိတ်ကြီးခြင်းအတွက် အကောင်းဆုံး ကုသမှု နည်းလမ်းမှာ မည်သည်နည်း။ ဆီးကျိတ်ကြီးခြင်းအတွက် အကောင်းဆုံး ကုသမှုသည် ဆီးကျိတ် အရွယ်အစား၊ ရောဂါလက္ခဏာများ၊ ဆီးအိမ် လုပ်ဆောင်ချက်နှင့် အောက်ခံ ကျန်းမာရေး အခြေအနေပေါ်တွင် မူတည်ပါသည်။ ဆရာဝန်များသည် လူနာတစ်ဦးချင်းစီ၏ လိုအပ်ချက်များပေါ် မူတည်၍ ထိခိုက်ဒဏ်ရာ သက်သာစေသော နည်းလမ်းများ သို့မဟုတ် ခွဲစိတ်ကုသမှုများကို ရွေးချယ်ပေးကြပါသည်။
ခွဲစိတ်စရာ မလိုဘဲ ဆီးကျိတ်ကြီးခြင်းအတွက် အကောင်းဆုံး ကုသမှု နည်းလမ်းမှာ မည်သည်နည်း။ ခွဲစိတ်ရန် မလိုသော ဆီးကျိတ်ကြီးခြင်း ကုသမှု နည်းလမ်းများတွင် UroLift၊ ဆီးကျိတ် သွေးကြောပိတ် ကုသမှု (PAE) နှင့် Rezūm ရေခိုးရေငွေ့အပူသုံး ကုသမှုကဲ့သို့သော ထိခိုက်ဒဏ်ရာ သက်သာစေသော နည်းလမ်းများ ပါဝင်ပါသည်။ ဆရာဝန်များသည် ရောဂါလက္ခဏာများနှင့် ဆီးကျိတ် အခြေအနေပေါ် မူတည်၍ အသင့်တော်ဆုံး နည်းလမ်းကို ရွေးချယ်ပေးပါသည်။
ဆီးကျိတ်ကြီးခြင်းအတွက် နောက်ဆုံးပေါ် ကုသမှု နည်းလမ်းမှာ မည်သည်နည်း။ ဆီးကျိတ်ကြီးခြင်းအတွက် နောက်ဆုံးပေါ် ကုသမှုများတွင် UroLift၊ PAE၊ Rezūm ရေခိုးရေငွေ့အပူသုံး ကုသမှုနှင့် HoLEP ကဲ့သို့သော အဆင့်မြင့် ကုသမှု နည်းလမ်းများ ပါဝင်ပြီး ယင်းတို့သည် မတူညီသော ချဉ်းကပ်ပုံများဖြင့် ရောဂါလက္ခဏာများကို ထိန်းချုပ်ပေးရန် ကူညီပေးပါသည်။
အသေးစိတ် အချက်အလက်များ ထပ်မံသိရှိလိုပါက ဆက်သွယ်ရန်- ဆီးလမ်းကြောင်းနှင့် အမျိုးသားကျန်းမာရေးဌာန ၊ ဝေ့ဌာနီနိုင်ငံတကာအထူးကုဆေးရုံကြီး
Medically Reviewed by
DR. ATTAWAT ANGSUPANKOSOL
Surgery
Urosurgery
Readers’ Rating
4.9 out of 5 stars (based on 8 reviews)
