အစာရေမျိုပြွန်ရောင်ရမ်းခြင်း
ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာ
အစာရေမျိုပြွန်ရောင်ရမ်းခြင်းဆိုသည်မှာ ပါးစပ်မှ အစာအိမ်သို့ အစာများကို သယ်ဆောင်ပေးသည့် ကြွက်သားပြွန်ချောင်းလေး ရောင်ရမ်းခြင်း ဖြစ်ပါသည်၊၊
နာကျင်ခြင်း၊ ပူလောင်ခြင်း၊ ရင်ဘတ်အောင့်ခြင်းနှင့် အစာမျိုရခဲခြင်းတို့သည် အစာရေမျိုပြွန်ရောင်ရမ်းခြင်း၏ လက္ခဏာများ ဖြစ်နိုင်ပါသည်၊၊ ဤရောဂါသည် အကြောင်းရင်း အမျိုးမျိုးကြောင့် ဖြစ်ပွားနိုင်ပါသည်၊၊ အစာအိမ်အတွင်းရှိ အက်ဆစ်များ အစာရေမျိုပြွန်ထဲသို့ ပြန်တက်လာခြင်း၊ ပိုးဝင်ခြင်း၊ သောက်ဆေးအချို့နှင့် ဓာတ်မတည့်ခြင်းတို့သည် အဓိက အကြောင်းရင်းအချို့ ဖြစ်ပါသည်၊၊
အစာရေမျိုပြွန်ရောင်ရမ်းခြင်း အမျိုးအစားများမှာ အောက်ပါအတိုင်း ဖြစ်ပါသည်၊၊
- အစာအိမ်အက်ဆစ် ပြန်တက်ခြင်းကြောင့် ရောင်ရမ်းခြင်း။ အစာအိမ်အတွင်းရှိ အက်ဆစ်များနှင့် အစာခြေရည်များ အစာရေမျိုပြွန်အတွင်းသို့ နောက်ပြန်စီးဝင်လာသောအခါ အစာရေမျိုပြွန်အတွင်းပိုင်းရှိ အမြှေးပါးများ ယောင်ယမ်းပြီး ပျက်စီးလာတတ်ပါသည်၊၊ ၎င်းသည် အဖြစ်အများဆုံး အမျိုးအစား ဖြစ်ပါသည်၊၊ အကယ်၍ လူနာသည် အစာအိမ်အက်ဆစ် ပြန်တက်ခြင်း သို့မဟုတ် ခဏခဏ အန်ခြင်းတို့ကို ခံစားရပါက ဤအခြေအနေ ဖြစ်ပေါ်နိုင်ပါသည်၊၊၎င်းကို ဖြစ်စေသောအချက်များတွင် အစာအိမ်အက်ဆစ် ပြန်တက်သည့်ရောဂါ၊၊ သည်းခြေရည် ပြန်တက်ခြင်းနှင့် အစားအလွန်အကျွံစားပြီး ပြန်အန်ထုတ်သည့် ရောဂါတို့ ပါဝင်ပါသည်၊၊
- ဓာတ်မတည့်မှုကြောင့် ရောင်ရမ်းခြင်း။ ၎င်းသည် ကိုယ်ခံအားစနစ်၏ အလွန်အမင်း တုံ့ပြန်မှုကြောင့် ဖြစ်ပေါ်သော ရောဂါအမျိုးအစား ဖြစ်ပါသည်၊၊ ဤအခြေအနေတွင် ကိုယ်ခံအားစနစ်သည် ပိုးဝင်ခြင်း သို့မဟုတ် ဓာတ်မတည့်မှုကို တိုက်ဖျက်ရန်အတွက် သွေးဖြူဥတစ်မျိုးကို အလွန်အမင်း ထုတ်လုပ်ပေးပါသည်၊၊ သို့သော် ထိုအန္တရာယ်များ ကင်းစင်သွားပြီးနောက်တွင်ပင် ဤသွေးဖြူဥများသည် အစာရေမျိုပြွန်အတွင်း ဆက်လက်စုပုံနေပြီး နာတာရှည် ရောင်ရမ်းမှုကို ဖြစ်စေပါသည်၊၊ ဤရောဂါကို ဓာတ်မတည့်မှု အမျိုးမျိုးရှိသူများတွင် ပိုမိုတွေ့ရလေ့ရှိပါသည်၊၊
- ဆေးဝါးကြောင့် ရောင်ရမ်းခြင်း။ သောက်ဆေးများသည် အစာရေမျိုပြွန် နံရံများနှင့် ကြာရှည်စွာ ထိတွေ့နေသောအခါ တစ်ရှူးများ ပျက်စီးပြီး ဤရောဂါ ဖြစ်ပွားနိုင်ပါသည်၊၊ လူနာသည် ဆေးလုံးကို ရေအလုံအလောက်နှင့် မမျိုခြင်း သို့မဟုတ် လုံးဝမကျသွားဘဲ အစာရေမျိုပြွန်ထဲတွင် ဆေးအကြွင်းအကျန်များ ကျန်ရှိနေသောအခါ ဖြစ်ပေါ်တတ်ပါသည်၊၊ ဤသို့ ဆေးဝါးများ ကြာရှည်ရှိနေခြင်းက အစာရေမျိုပြွန် တစ်ရှူးများကို ထိခိုက်စေပါသည်၊၊ဥပမာအားဖြင့် အကိုက်အခဲပျောက်ဆေးများ၊ ပါရာစီတမော၊ ပိုးသတ်ဆေးများ၊ ပိုတက်စီယမ် ကလိုရိုက်၊ အရိုးသန်ဆေးများနှင့် ကင်ဆာဆေးများ ပါဝင်ပါသည်၊၊
- ပိုးဝင်ခြင်းကြောင့် ရောင်ရမ်းခြင်း။ အစာရေမျိုပြွန်တွင် ပိုးဝင်ခြင်းသည် ကိုယ်ခံအားစနစ် အားနည်းသူများမှလွဲ၍ ဖြစ်လေ့ဖြစ်ထ မရှိပါ၊၊ ပုံမှန်အားဖြင့် ခန္ဓာကိုယ်၏ အခြားနေရာများမှ ပိုးဝင်ခြင်းသည် အစာရေမျိုပြွန်သို့ ပျံ့နှံ့လာခြင်း ဖြစ်ပါသည်၊၊ ဗိုင်းရပ်စ်နှင့် မှိုကြောင့်ဖြစ်သော ပိုးဝင်ခြင်းများသည် အဖြစ်အများဆုံး ဖြစ်ပါသည်၊၊
- သွေးဖြူဥများပြားခြင်းကြောင့် ရောင်ရမ်းခြင်း။ အစာရေမျိုပြွန်အတွင်းပိုင်း နံရံတွင် သွေးဖြူဥတစ်မျိုး တိုးပွားလာခြင်း ဖြစ်ပါသည်၊၊ ၎င်းသည် အစာအိမ်အက်ဆစ် ပြန်တက်သည့်ရောဂါ သို့မဟုတ် ဓာတ်မတည့်မှုကြောင့် ရောင်ရမ်းခြင်းတို့နှင့် ဆက်စပ်နေနိုင်ပါသည်၊၊
- ကိုယ်ခံအားစနစ်က ပြန်လည်တိုက်ခိုက်ခြင်းကြောင့် ရောင်ရမ်းခြင်း။ အချို့သော ကိုယ်ခံအားစနစ်ဆိုင်ရာ ရောဂါများကြောင့် နောက်ဆက်တွဲ ပြဿနာအနေဖြင့် အစာရေမျိုပြွန် ရောင်ရမ်းနိုင်ပါသည်၊၊ ၎င်းတို့တွင် ဘီချက်ရောဂါ၊ အူလမ်းကြောင်းရောင်ရမ်းသည့်ရောဂါနှင့် ကိုယ်အင်္ဂါအစားထိုးပြီးနောက် ကိုယ်ခံအားက ပြန်တိုက်သည့် အခြေအနေများ ပါဝင်ပါသည်၊၊
- ဓာတ်ရောင်ခြည်ကြောင့် ရောင်ရမ်းခြင်း။ အစာရေမျိုပြွန်၊ ရင်ဘတ် သို့မဟုတ် လည်ချောင်းတို့ကို ဓာတ်ရောင်ခြည်ဖြင့် ကုသရာတွင် ဘေးထွက်ဆိုးကျိုးအနေဖြင့် အစာရေမျိုပြွန် နံရံများ ရောင်ရမ်းနိုင်ပါသည်၊၊ အလွန်ရှားပါးသော်လည်း အချို့သူများတွင် နာတာရှည် ရောင်ရမ်းခြင်းအဖြစ် ကျန်ရှိသွားနိုင်ပါသည်၊၊
ကုသမှုပုံစံမှာ ဖြစ်ပွားရသည့် အကြောင်းရင်းနှင့် တစ်ရှူးပျက်စီးမှု အတိုင်းအတာပေါ်တွင် မူတည်ပါသည်၊၊ အကယ်၍ မကုသဘဲ ထားပါက အစာရေမျိုပြွန်၏ အစာသယ်ဆောင်နိုင်စွမ်းကို ထိခိုက်စေနိုင်ပါသည်၊၊ ထို့ပြင် အစာရေမျိုပြွန် ကျဉ်းသွားခြင်း၊ အမာရွတ်ဖြစ်ခြင်း၊ ကိုယ်အလေးချိန် ကျဆင်းခြင်းနှင့် ရေဓာတ်ခန်းခြောက်ခြင်းတို့ ဖြစ်ပေါ်နိုင်ပါသည်၊၊ ထို့ကြောင့် နောက်ဆက်တွဲ ပြဿနာများကို ကာကွယ်ရန် အချိန်မီ ကုသရန် အရေးကြီးပါသည်၊၊
ရောဂါလက္ခဏာများ
အစာရေမျိုပြွန်ရောင်ရမ်းခြင်း၏ ပုံမှန်လက္ခဏာများမှာ အောက်ပါအတိုင်း ဖြစ်ပါသည်၊၊
- အစာမျိုရခက်ခြင်း သို့မဟုတ် မျိုချလျှင် နာကျင်ခြင်း၊၊
- ရင်ပူခြင်း၊၊
- အစာနင်ခြင်း (မျိုချလိုက်သော အစာများ အစာရေမျိုပြွန်တွင် တစ်နေခြင်း)၊၊
- ရင်ဘတ်အောင့်ခြင်း၊၊
- အက်ဆစ်များ ပြန်တက်ခြင်း၊၊
- ပျို့ခြင်းနှင့် အန်ခြင်း၊၊
- အန်ဖတ်တွင် သွေးပါခြင်း၊၊
- ခံတွင်း အနာဖြစ်ခြင်း၊၊
- ကလေးငယ်များတွင် အစာစားရန် ခက်ခဲခြင်း၊၊
- ကလေးငယ်များတွင် ရင်ဘတ် သို့မဟုတ် ဗိုက်အောင့်ခြင်း၊၊
လက္ခဏာအများစုမှာ အခြားသော အစာခြေစနစ်ဆိုင်ရာ ရောဂါများကြောင့်လည်း ဖြစ်နိုင်ပါသည်၊၊ အကယ်၍ လက္ခဏာများသည် ရက်အနည်းငယ်ထက် ပိုကြာနေလျှင်၊ ရင်ပူပျောက်ဆေးများဖြင့် မသက်သာလျှင်၊ အစာစားရန် ခက်ခဲလာလျှင် သို့မဟုတ် ဖျားခြင်း၊ ခေါင်းကိုက်ခြင်းနှင့် ကြွက်သားနာကျင်ခြင်းတို့ပါ တွဲဖြစ်လာလျှင် ဆရာဝန်နှင့် ချက်ချင်းပြသရန် အရေးကြီးပါသည်၊၊ ထို့ပြင် အကြောင်းရင်းမရှိဘဲ ကိုယ်အလေးချိန် ကျဆင်းလာပါကလည်း ဆရာဝန်နှင့် တိုင်ပင်ပါ၊၊
အကယ်၍ ရင်ဘတ်အောင့်ခြင်းမှာ မိနစ်အနည်းငယ်ထက် ပိုကြာခြင်း သို့မဟုတ် အစာစားပြီးနောက် အသက်ရှူရခက်ခဲခြင်းတို့ ဖြစ်ပေါ်ပါက အရေးပေါ် ဆေးကုသမှု ခံယူရန် လိုအပ်ပါသည်၊၊
အကြောင်းရင်းများ
ကိုယ်ခံအားစနစ်သည် ပိုးဝင်ခြင်းကို တိုက်ဖျက်ရာတွင်ဖြစ်စေ၊ ဓာတ်မတည့်မှု ဖြစ်ပေါ်ချိန်တွင်ဖြစ်စေ သို့မဟုတ် စားသုံးလိုက်သော အရာများကြောင့် တစ်ရှူးများ ပျက်စီးသွားချိန်တွင်ဖြစ်စေ အစာရေမျိုပြွန် တစ်ရှူးများ ရောင်ရမ်းခြင်း ဖြစ်ပေါ်နိုင်ပါသည်၊၊
- အစာအိမ်အက်ဆစ် ပြန်တက်ခြင်း၊၊
- အစားအစာ သို့မဟုတ် လေထုအတွင်းရှိ အမှုန်အမွှားများနှင့် ဓာတ်မတည့်ခြင်း၊၊
- ဗိုင်းရပ်စ်၊ ဘက်တီးရီးယား သို့မဟုတ် မှိုပိုးဝင်ခြင်း၊၊
- အကိုက်အခဲပျောက်ဆေးများ၊ ပိုးသတ်ဆေးများနှင့် နှလုံးဆေးအချို့၊၊
- ဓာတ်ရောင်ခြည်ဖြင့် ကုသခြင်း၊၊
- ကိုယ်ခံအားစနစ်ဆိုင်ရာ ရောဂါများ၊၊
ဖြစ်နိုင်ခြေရှိသော အကြောင်းအချက်များ
ရောဂါအမျိုးအစားအလိုက် ဖြစ်နိုင်ခြေရှိသော အချက်များမှာ ကွဲပြားနိုင်ပါသည်၊၊
- အစာအိမ်အက်ဆစ် ပြန်တက်ခြင်းကြောင့် ရောင်ရမ်းခြင်း။ အောက်ပါအချက်များသည် ဤရောဂါဖြစ်ပွားနိုင်ခြေကို မြင့်မားစေပါသည်၊၊
- အိပ်ခါနီးတွင် အစာစားခြင်း၊၊
- အဆီများသော အစားအစာများကို အလွန်အကျွံ စားခြင်း၊၊
- ဆေးလိပ်သောက်ခြင်း၊၊
- ကိုယ်အလေးချိန် များခြင်းနှင့် ကိုယ်ဝန်ဆောင်ထားခြင်း၊၊ချောကလက်၊ ကဖင်း၊ အရက်နှင့် ပူစီနံတို့သည် ရောဂါလက္ခဏာများကို ပိုမိုဆိုးရွားစေနိုင်ပါသည်၊၊
- ဓာတ်မတည့်မှုကြောင့် ရောင်ရမ်းခြင်း။ အောက်ပါအချက်များ ပါဝင်နိုင်ပါသည်၊၊
- မိသားစုအတွင်း ဤရောဂါရှိသူ ရှိခြင်း၊၊
- ပန်းနာရင်ကျပ်၊ အရေပြားဓာတ်မတည့်ခြင်းနှင့် နှာစေးချောင်းဆိုး ဓာတ်မတည့်မှု ရာဇဝင်ရှိခြင်း၊၊
- ဆေးဝါးကြောင့် ရောင်ရမ်းခြင်း။ ဆေးလုံးများ အစာအိမ်ထဲသို့ မြန်မြန်ဆန်ဆန် မရောက်ရှိနိုင်သော အခြေအနေများနှင့် ဆက်စပ်နေပါသည်၊၊
- ဆေးကို ရေမပါဘဲ သို့မဟုတ် ရေအနည်းငယ်ဖြင့်သာ သောက်ခြင်း၊၊
- အသက်ကြီးလာခြင်း (အစာရေမျိုပြွန် ကြွက်သားများ အားနည်းလာခြင်း သို့မဟုတ် တံတွေးထွက်နည်းလာခြင်းကြောင့် ဖြစ်နိုင်ပါသည်)၊၊
- ထူးခြားသော ပုံသဏ္ဌာန် သို့မဟုတ် အရွယ်အစားရှိသော ဆေးလုံးများ၊၊
- လဲလျောင်းနေစဉ် ဆေးသောက်ခြင်း၊၊
- အိပ်ခါနီးတွင် ဆေးသောက်ခြင်း၊၊
- ပိုးဝင်ခြင်းကြောင့် ရောင်ရမ်းခြင်း။ စတီးရွိုက်ဆေးများ သို့မဟုတ် ပိုးသတ်ဆေးများ သောက်သုံးခြင်းနှင့် ဆက်စပ်လေ့ရှိပါသည်၊၊ ဆီးချိုရောဂါသည်လည်း မှိုပိုးဝင်ခြင်းကို ဖြစ်စေနိုင်ခြေ မြင့်မားစေပါသည်၊၊
ကိုယ်ခံအားစနစ် ချို့ယွင်းခြင်းသည်လည်း အခြားသော ပိုးဝင်ခြင်းများကို ဖြစ်စေနိုင်ပါသည်၊၊ အေအိုင်ဒီအက်စ် (AIDS) ရောဂါ သို့မဟုတ် အချို့သော ကင်ဆာရောဂါများကြောင့် ဖြစ်နိုင်ပါသည်၊၊ ထို့ပြင် ကင်ဆာကုသမှုများနှင့် ကိုယ်အင်္ဂါအစားထိုးသူများ သောက်သုံးရသော ကိုယ်ခံအားချဆေးများသည်လည်း ပိုးဝင်နိုင်ခြေကို မြင့်မားစေနိုင်ပါသည်၊၊
ရောဂါရှာဖွေခြင်း
အောက်ပါ စစ်ဆေးမှုများမှတစ်ဆင့် အစာရေမျိုပြွန်ရောင်ရမ်းခြင်း ရှိ၊ မရှိကို ဆုံးဖြတ်နိုင်ပါသည်၊၊
- ကိုယ်ခန္ဓာကို စစ်ဆေးခြင်း။ ကျန်းမာရေးစောင့်ရှောက်သူများသည် ပုံမှန်တွေ့ရလေ့ရှိသော ရောဂါလက္ခဏာများအပေါ် မူတည်၍ ရောဂါကို ရှာဖွေလေ့ရှိပါသည်၊၊ ကုသမှု ထိရောက်မှု ရှိ၊ မရှိ သိနိုင်ရန် အက်ဆစ်ဓာတ်ကို ဟန့်တားပေးသည့် ဆေးတစ်မျိုးကို ညွှန်ကြားပြီး တုံ့ပြန်မှုကို စောင့်ကြည့်နိုင်ပါသည်၊၊ အကယ်၍ လက္ခဏာများ သက်သာလာပါက အစာအိမ်အက်ဆစ် ပြန်တက်ခြင်းကြောင့် ဖြစ်သော ရောင်ရမ်းမှုဟု ယူဆနိုင်ပါသည်၊၊
- ဘေရီယမ်ဓာတ်မှန်ရိုက်ခြင်း။ လူနာအား ဘေရီယမ်ဓာတ်ပါဝင်သော ဆေးရည် သို့မဟုတ် ဆေးလုံးကို သောက်ခိုင်းပါသည်၊၊ ဘေရီယမ်သည် အစာအိမ်နှင့် အစာရေမျိုပြွန် နံရံများတွင် ကပ်သွားပြီး အင်္ဂါအစိတ်အပိုင်းများကို ပုံရိပ်တွင် ထင်ရှားစွာ မြင်ရစေပါသည်၊၊ ဤပုံရိပ်များမှတစ်ဆင့် အစာရေမျိုပြွန် ကျဉ်းနေခြင်း၊၊ တည်ဆောက်ပုံ ပြောင်းလဲခြင်း၊၊ အစာအိမ်ကျွံခြင်း၊၊ အကျိတ်များ သို့မဟုတ် ရောဂါလက္ခဏာကို ဖြစ်စေသည့် အခြားသော ပုံမှန်မဟုတ်သည့် အချက်များကို ရှာဖွေနိုင်ပါသည်၊၊
- မှန်ပြောင်းကြည့်ရှုစစ်ဆေးခြင်း။ အစွန်းတွင် ကင်မရာအသေးစားလေး တပ်ဆင်ထားသော ရှည်လျားပြီး သေးသွယ်သည့် ပြွန်ချောင်းလေးကို လည်ချောင်းမှတစ်ဆင့် အစာရေမျိုပြွန်ထဲသို့ ထည့်သွင်းခြင်း ဖြစ်ပါသည်၊၊ ဆရာဝန်သည် မှန်ပြောင်းမှတစ်ဆင့် အစာရေမျိုပြွန်ကို ကြည့်ရှုပြီး ပုံမှန်မဟုတ်သော အခြေအနေများကို စစ်ဆေးနိုင်ပါသည်၊၊ ရောင်ရမ်းရသည့် အကြောင်းရင်းပေါ်မူတည်၍ အစာရေမျိုပြွန်၏ အသွင်အပြင်မှာ ကွဲပြားနိုင်ပါသည်၊၊ ဤစစ်ဆေးမှုကို ပြုလုပ်စဉ် လူနာအား အိပ်ဆေးပေးထားပါလိမ့်မည်၊၊
- အစာရေမျိုပြွန် စုပ်ယူစစ်ဆေးသည့် ကိရိယာ။ မှန်ပြောင်းကြည့်ရန် မလိုဘဲ ရောင်ရမ်းမှု အဆင့်ကို တိုင်းတာသည့် နည်းလမ်းဖြစ်ပြီး ကြိုးငယ်လေးဖြင့် ချိတ်ဆက်ထားသော ဆေးတောင့်လေးကို အသုံးပြုပါသည်၊၊ လူနာသည် ထိုဆေးတောင့်ကို မျိုချရပြီး ၎င်းသည် အစာအိမ်အတွင်း အရည်ပျော်သွားပါသည်၊၊ ဆရာဝန်က ကြိုးကို ပြန်ဆွဲလိုက်သောအခါ ဆေးတောင့်အတွင်းရှိ ရေမြှုပ်လေးသည် အစာရေမျိုပြွန် တစ်ရှူးနမူနာများကို သယ်ဆောင်လာပြီး ရောင်ရမ်းမှု အဆင့်ကို အကဲဖြတ်နိုင်စေပါသည်၊၊
- ဓာတ်ခွဲခန်း စစ်ဆေးမှုများ။ မှန်ပြောင်းကြည့်နေစဉ်အတွင်း တစ်ရှူးနမူနာ အနည်းငယ်ကို ထုတ်ယူ၍ ဓာတ်ခွဲခန်းသို့ ပေးပို့စစ်ဆေးခြင်း ဖြစ်ပါသည်၊၊ ၎င်းကို အသားစယူ စစ်ဆေးခြင်းဟု ခေါ်ပါသည်၊၊
ဖြစ်နိုင်ခြေရှိသော အကြောင်းရင်းပေါ် မူတည်၍ ဘက်တီးရီးယား၊ ဗိုင်းရပ်စ် သို့မဟုတ် မှိုပိုးဝင်ခြင်း ရှိ၊ မရှိနှင့် ဓာတ်မတည့်မှုဆိုင်ရာ သွေးဖြူဥ ပမာဏတို့ကို ဓာတ်ခွဲစစ်ဆေးနိုင်ပါသည်၊၊
ကုသခြင်း
အဓိက ရည်ရွယ်ချက်မှာ နောက်ဆက်တွဲ ပြဿနာများကို ထိန်းချုပ်ရန်၊ ရောဂါလက္ခဏာများကို သက်သာစေရန်နှင့် ရောဂါဖြစ်စေသော အရင်းအမြစ်များကို ကုသရန် ဖြစ်ပါသည်၊၊ ကုသမှု အစီအစဉ်သည် ဖြစ်ပွားရသည့် အကြောင်းရင်းပေါ်မူတည်၍ ကွဲပြားပါသည်၊၊
- နေထိုင်မှုပုံစံ ပြောင်းလဲခြင်း။ အက်ဆစ်ပြန်တက်ခြင်းနှင့် အစာမကျေခြင်းကို ဖြစ်စေသော သို့မဟုတ် ဓာတ်မတည့်မှု ဖြစ်စေသော အစားအစာနှင့် သောက်စရာများကို ရှောင်ကြဉ်ရန် အစားအသောက်ပုံစံ ပြောင်းလဲခြင်း ဖြစ်ပါသည်၊၊
- ညနေခင်း အလေ့အထ။ အက်ဆစ်ပြန်တက်ခြင်းကို လျှော့ချရန်အတွက် ညစာကို အနည်းငယ်သာ စားပါ၊၊ အစာခြေရန် အချိန်ရစေရန် အိပ်ရာမဝင်မီ အနည်းဆုံး ၃ နာရီခန့် ကြိုတင်၍ ညစာစားပါ၊၊
- ကိုယ်တိုင် စောင့်ရှောက်ခြင်း။ အစာရေမျိုပြွန်ကို ကာကွယ်ရန် ဆေးလိပ်သောက်ခြင်းနှင့် အရက်သောက်ခြင်းတို့ကို ရပ်တန့်ရန် အကြံပြုပါသည်၊၊
- အစာအိမ်အက်ဆစ် ပြန်တက်ခြင်းကြောင့် ရောင်ရမ်းခြင်း။ ကုသမှုများတွင် အောက်ပါတို့ ပါဝင်ပါသည်၊၊
- အပြင်တွင် ဝယ်ယူရရှိနိုင်သော ဆေးဝါးများ။
- လေဆေးနှင့် ရင်ပူပျောက်ဆေးများ၊၊
- အက်ဆစ်ထုတ်လုပ်မှုကို တားဆီးပေးပြီး အစာရေမျိုပြွန်ကို ကုသပေးသော ဆေးဝါးများ (ဥပမာ- အိုမီပရာဇိုး၊၊ လန်ဆိုပရာဇိုး) တို့ ဖြစ်ပါသည်၊၊
- ဆရာဝန် ညွှန်ကြားသည့် ဆေးဝါးများ။ ဆရာဝန်မှ အညွှန်းဖြင့် ပေးသော အက်ဆစ်လျှော့ချသည့် ဆေးဝါးများ ဖြစ်ပါသည်၊၊
- ခွဲစိတ်ကုသခြင်း (Fundoplication)။ အခြားသော ကုသမှုများဖြင့် မသက်သာပါက ခွဲစိတ်မှု ပြုလုပ်နိုင်ပါသည်၊၊ ဤခွဲစိတ်မှုတွင် အစာအိမ်၏ အစိတ်အပိုင်းတစ်ခုကို အစာရေမျိုပြွန် အောက်ခြေရှိ အဖွင့်အပိတ် အဆို့ရှင်တွင် ပတ်ပေးခြင်းဖြင့် အဆို့ရှင်ကို ကြံ့ခိုင်စေပြီး အက်ဆစ်များ ပြန်မတက်အောင် ကာကွယ်ပေးပါသည်၊၊
- သံလိုက်ပုတီးလုံးလေးများဖြင့် ကုသခြင်း (LINX)။ ၎င်းသည် အစာရေမျိုပြွန် အောက်ခြေတွင် သံလိုက်ဓာတ်ပါသော တိုက်တေနီယမ် ပုတီးလုံးလေးများကို ပတ်ပေးသည့် ခွဲစိတ်မှု ဖြစ်ပါသည်၊၊ ၎င်းသည် အဆို့ရှင်ကို အားကောင်းစေပြီး အက်ဆစ်ပြန်တက်ခြင်းကို တားဆီးပေးပါသည်၊၊
- ဓာတ်မတည့်မှုကြောင့် ရောင်ရမ်းခြင်း။ ဓာတ်မတည့်သည့် အရာများကို ရှောင်ကြဉ်ခြင်းနှင့် ကိုယ်ခံအား တုံ့ပြန်မှုကို လျှော့ချပေးသော ဆေးဝါးများဖြင့် ကုသပါသည်၊၊ ညွှန်ကြားလေ့ရှိသော ဆေးဝါးများမှာ၊၊
- အက်ဆစ်လျှော့ချဆေးများ။ အစပိုင်းတွင် အက်ဆစ်ထုတ်လုပ်မှုကို လျှော့ချပေးသော ဆေးဝါးများကို ဆရာဝန်က ညွှန်ကြားပါလိမ့်မည်၊၊
- စတီးရွိုက်ဆေးများ။ အချို့သော သုတေသနများအရ ရှူဆေးအဖြစ် အသုံးပြုသော စတီးရွိုက်များကို အရည်အဖြစ် မျိုချခြင်းဖြင့် အစာရေမျိုပြွန် နံရံမှ ရောင်ရမ်းမှုကို ကုသနိုင်ကြောင်း တွေ့ရှိရပါသည်၊၊
- ဓာတ်မတည့်သော အစားအစာများကို ရှောင်ခြင်း။ ဤရောဂါသည် အစားအစာနှင့် ဓာတ်မတည့်ခြင်းကြောင့် အဖြစ်များပါသည်၊၊ ထို့ကြောင့် ဓာတ်မတည့်မှု ဖြစ်စေနိုင်သော အစားအစာများကို ရှောင်ကြဉ်ခြင်းသည် ထိရောက်သော ကုသမှု ဖြစ်ပါသည်၊၊ လူနာသည် ဓာတ်မတည့်တတ်သော အစားအစာများကို တစ်မျိုးချင်းစီ ပြန်စားကြည့်ပြီး လက္ခဏာ ပြန်ပေါ်၊ မပေါ် စောင့်ကြည့်ရပါသည်၊၊
- ပရိုတင်းတားဆေးများ။ လူကြီးများနှင့် အသက် ၁၂ နှစ်အထက် ကလေးများတွင် ဓာတ်မတည့်မှုကြောင့် ဖြစ်သော ရောင်ရမ်းမှုကို ကုသရန်အတွက် အသုံးပြုပါသည်၊၊ ၎င်းသည် ရောင်ရမ်းမှုကို ဖြစ်စေသော ခန္ဓာကိုယ်အတွင်းရှိ ပရိုတင်းအချို့ကို တားဆီးပေးပါသည်၊၊ ဤဆေးကို တစ်ပတ်လျှင် တစ်ကြိမ် ထိုးနှံရပါသည်၊၊
- ဆေးဝါးကြောင့် ရောင်ရမ်းခြင်း။ ရောဂါဖြစ်စေသော ဆေးဝါးကို ရှောင်ကြဉ်ခြင်းနှင့် ဆေးသောက်သည့် အလေ့အထကို ပြုပြင်ခြင်းဖြင့် ကုသပါသည်၊၊ ဆရာဝန်သည် ရောင်ရမ်းမှု ဖြစ်နိုင်ခြေနည်းသော အခြားဆေးတစ်မျိုးကို ပြောင်းလဲပေးနိုင်ပါသည်၊၊ ဖြစ်နိုင်ခြေ လျှော့ချရန် အောက်ပါတို့ကို လိုက်နာသင့်ပါသည်၊၊
- ဖြစ်နိုင်ပါက ဆေးကို အရည်ပုံစံဖြင့် ရွေးချယ်သောက်ပါ၊၊
- ဆေးသောက်လျှင် ရေတစ်ဖန်ခွက် အပြည့်ဖြင့် သောက်ပါ၊၊
- ဆေးသောက်ပြီးနောက် ချက်ချင်း လဲမအိပ်ပါနှင့်၊၊ အနည်းဆုံး မိနစ် ၃၀ ခန့် မတ်မတ် ထိုင်နေခြင်း သို့မဟုတ် မတ်တပ်ရပ်နေခြင်း ပြုလုပ်ပါ၊၊
- ပိုးဝင်ခြင်းကြောင့် ရောင်ရမ်းခြင်း။ ဘက်တီးရီးယား၊ ဗိုင်းရပ်စ်၊ မှို သို့မဟုတ် သန်ကောင်များကြောင့် ဖြစ်ပါက ဆရာဝန် ညွှန်ကြားသော ဆေးဝါးများဖြင့် ကုသနိုင်ပါသည်၊၊
- အခြားသော နောက်ဆက်တွဲ ပြဿနာများကို ကုသခြင်း။ အစာရေမျိုပြွန် အလွန်အမင်း ကျဉ်းသွားပါက သို့မဟုတ် အစာနင်နေပါက အစာရေမျိုပြွန်ကို ပြန်လည် ချဲ့ပေးသည့် လုပ်ငန်းစဉ်ကို ပြုလုပ်နိုင်ပါသည်၊၊
