နှာခေါင်းအတွင်း ကင်ဆာ
ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာ
အက်စ်သီစီယိုနူရိုဘလက်စတိုးမား သို့မဟုတ် အော်လ်ဖက်ထရီ နူရိုဘလက်စတိုးမား ဟုခေါ်သည့် နှာခေါင်းအတွင်း ကင်ဆာသည် နှာခေါင်းပေါက်၏ အပေါ်ပိုင်းတွင် ဖြစ်ပွားတတ်သော ကင်ဆာကျိတ်တစ်မျိုး ဖြစ်ပါသည်၊၊ ၎င်းသည် ပုံမှန်အားဖြင့် နှာခေါင်းပေါက်အတွင်းမှ စတင်ဖြစ်ပွားလေ့ရှိပြီး လေအိတ်များ၊၊ မျက်လုံးများနှင့် ဦးနှောက်သို့ ပျံ့နှံ့သွားနိုင်ပါသည်၊၊ အက်စ်သီစီယိုနူရိုဘလက်စတိုးမားသည် ရှားပါးသော ကင်ဆာအမျိုးအစားဖြစ်ပြီး လူတစ်ဦး၏ အနံ့ခံအာရုံနှင့် အသက်ရှူခြင်းကို ပြင်းထန်စွာ ထိခိုက်စေနိုင်ပါသည်၊၊
ဤကင်ဆာသည် နှာခေါင်းပေါက်နှင့် ဦးနှောက်ကို ပိုင်းခြားထားသော အရိုးအနီးတစ်ဝိုက်တွင် စတင်ဖြစ်ပွားပါသည်၊၊ ထိုအရိုးတွင် အနံ့ခံအာရုံကြောများ ဖြတ်သန်းသွားသော အလွန်သေးငယ်သည့် အပေါက်လေးများ ရှိပါသည်၊၊ အက်စ်သီစီယိုနူရိုဘလက်စတိုးမားသည် လည်ပင်းရှိ ပြန်ရည်ကျိတ်များနှင့် ပါးစပ်အနီးရှိ တံတွေးဂလင်းများသို့ ပျံ့နှံ့နိုင်ပါသည်၊၊ ပြင်းထန်သော အခြေအနေများတွင် ဦးနှောက်၏ အခြားနေရာများနှင့် အဆုတ်၊၊ အသည်းနှင့် အရိုးများအပါအဝင် ခန္ဓာကိုယ်၏ အခြားအစိတ်အပိုင်းများသို့လည်း ပျံ့နှံ့သွားနိုင်ပါသည်၊၊
ဤရောဂါရှိသူများသည် အနံ့ခံအာရုံ ဆုံးရှုံးခြင်း၊၊ ခဏခဏ နှာခေါင်းသွေးယိုခြင်းနှင့် နှာခေါင်းဖြင့် အသက်ရှူရန် ခက်ခဲခြင်းတို့ ခံစားရနိုင်ပါသည်၊၊ ဤအခြေအနေအတွက် ပုံမှန်ကုသမှုများတွင် ခွဲစိတ်ခြင်း၊၊ ဓာတ်ရောင်ခြည် ကုသခြင်းနှင့် ကီမိုဆေးသွင်းခြင်းတို့ ပါဝင်ပါသည်၊၊
ရောဂါလက္ခဏာများ
အက်စ်သီစီယိုနူရိုဘလက်စတိုးမား၏ ရောဂါလက္ခဏာများသည် ရောဂါအခြေအနေ တိုးလာသည်နှင့်အမျှ ပြောင်းလဲနိုင်ပါသည်၊၊ အတွေ့ရများသော လက္ခဏာများမှာ၊၊
- အနံ့ခံအာရုံ လျော့နည်းခြင်း သို့မဟုတ် ဆုံးရှုံးခြင်း၊၊
- နှာခေါင်းသွေး ခဏခဏ ယိုခြင်း၊၊
- နှာခေါင်းဖြင့် အသက်ရှူရန် ခက်ခဲခြင်း၊၊
- မျက်လုံးပတ်ပတ်လည်တွင် နာကျင်ခြင်း၊၊
- အမြင်အာရုံ ဆုံးရှုံးခြင်း သို့မဟုတ် ပြောင်းလဲခြင်း၊၊
- နားအတွင်း နာကျင်ခြင်း သို့မဟုတ် ဖိအားခံစားရခြင်း၊၊
- ခေါင်းခဏခဏ ကိုက်ခြင်း၊၊
- နှာခေါင်းပိတ်ခြင်း၊၊
- နှာစေးခြင်း သို့မဟုတ် နှာပိတ်ခြင်း ပိုမိုဆိုးရွားလာခြင်း သို့မဟုတ် သက်သာမလာခြင်း၊၊
- နှာခေါင်းအတွင်း ပြည်ရှိနေခြင်း၊၊
- လည်ပင်းရှိ ပြန်ရည်ကျိတ်များ ကြီးလာခြင်း၊၊
- ပါးစပ်ဖွင့်ရန် ခက်ခဲခြင်း၊၊
အကယ်၍ ဤလက္ခဏာများ ဆက်တိုက်ဖြစ်ပေါ်နေပါက စနစ်တကျ ရောဂါရှာဖွေကုသမှု ခံယူနိုင်ရန် ဆရာဝန်နှင့် ချက်ချင်း တိုင်ပင်ပါ၊၊
အကြောင်းရင်းများ
အက်စ်သီစီယိုနူရိုဘလက်စတိုးမား ဖြစ်ပွားရသည့် အကြောင်းရင်းကို လက်ရှိတွင် မသိရသေးပါ၊၊ ယေဘုယျအားဖြင့် ကင်ဆာသည် မျိုးဗီဇပြောင်းလဲမှုမှ စတင်လေ့ရှိပြီး ၎င်းသည် ကျန်းမာသော ဆဲလ်များကို ရပ်တန့်ရန် ညွှန်ကြားချက်များပေးသော်လည်း ရပ်တန့်မသွားဘဲ ဆက်လက်ကြီးထွားစေပါသည်၊၊ ကင်ဆာဆဲလ်များသည် ထိန်းချုပ်မရဘဲ ပွားလာကြပါသည်၊၊ ထိုသို့ ပုံမှန်မဟုတ်သော ဆဲလ်များ စုပုံလာရာမှ အကျိတ် ဖြစ်ပေါ်လာခြင်း ဖြစ်ပါသည်၊၊
ဖြစ်နိုင်ခြေရှိသော အကြောင်းအချက်များ
အလုပ်အကိုင်ကြောင့်ဖြစ်စေ၊၊ အခြားနည်းလမ်းဖြင့်ဖြစ်စေ အန္တရာယ်ရှိသော ဓာတုပစ္စည်းများနှင့် အမှုန်အမွှားများနှင့် ထိတွေ့ရသူများသည် နှာခေါင်းပေါက်ကင်ဆာ ဖြစ်ပွားနိုင်ခြေ ပိုများနိုင်ကြောင်း သုတေသနများက ဖော်ပြနေပါသည်၊၊ သစ်သားဖုန်မှုန့်၊ ဂျုံ၊ နီကယ်နှင့် ကက်ဒမီယမ် ဖုန်မှုန့်များ၊ ကော်များ၊ ဖော်မလ်ဒီဟိုက်နှင့် ပျော်ရည်များကဲ့သို့သော ပစ္စည်းများသည် ဖြစ်နိုင်ခြေရှိသော အကြောင်းရင်းများ ဖြစ်ပါသည်၊၊ အနံ့ခံအာရုံကြော ကင်ဆာဖြစ်ပွားမှုတွင် ဆေးလိပ်ငွေ့၏ အခန်းကဏ္ဍမှာ အတိအကျ မသေချာသော်လည်း ၎င်းသည် အထောက်အကူပြုသော အချက်တစ်ခု ဖြစ်နိုင်ပါသည်၊၊
ရောဂါရှာဖွေခြင်း
အက်စ်သီစီယိုနူရိုဘလက်စတိုးမားကို ရောဂါရှာဖွေရန် ကျန်းမာရေးကျွမ်းကျင်သူသည် ပုံမှန်အားဖြင့် လူနာခံစားနေရသော လက္ခဏာများကို မေးမြန်းခြင်း၊၊ မိသားစု၏ ဆေးရာဇဝင်ကို ပြန်လည်သုံးသပ်ခြင်းနှင့် ကိုယ်ခန္ဓာကို စစ်ဆေးခြင်းတို့ဖြင့် စတင်ပါသည်၊၊ ဆရာဝန်သည် အကျိတ်၏ အရွယ်အစားနှင့် ပျံ့နှံ့မှုကို သိရှိနိုင်ရန် မျက်လုံး၊၊ နှာခေါင်း၊၊ ဦးခေါင်းနှင့် လည်ပင်းတို့ကို စစ်ဆေးပါလိမ့်မည်၊၊
ရောဂါအတည်ပြုရန် အောက်ပါစစ်ဆေးမှုများ လိုအပ်နိုင်ပါသည်၊၊
- မှန်ပြောင်းကြည့်ခြင်း (Endoscopy)။ ဤလုပ်ငန်းစဉ်သည် ဆရာဝန်အား နှာခေါင်းအတွင်း၊ နှာခေါင်းနောက်ပိုင်း သို့မဟုတ် နှာခေါင်းနှင့် အာခေါင်ဆုံရာနေရာနှင့် နှာခေါင်းပေါက်အတွင်းရှိ လေအိတ်နေရာများတွင် အကျိတ်ပျံ့နှံ့မှု အခြေအနေကို စစ်ဆေးနိုင်ခွင့် ပေးပါသည်၊ ဤလုပ်ငန်းစဉ်တွင် နှာခေါင်းအတွင်းပိုင်းကို ကြည့်ရှုရန် ကင်မရာတပ်ဆင်ထားသော သေးငယ်ပြီး ပျော့ပြောင်းသည့် ပြွန်ချောင်းလေးဖြစ်သည့် အန်ဒိုစကုပ် ကို အသုံးပြုပါသည်၊၊
- ပုံရိပ်ဖော်စစ်ဆေးမှုများ။ ပုံရိပ်ဖော်စစ်ဆေးမှုများသည် အက်စ်သီစီယိုနူရိုဘလက်စတိုးမား၏ တည်နေရာ၊၊ အတိုင်းအတာနှင့် ပျံ့နှံ့ခြင်း ရှိ၊ မရှိတို့ကို အကဲဖြတ်ရန် ကူညီပေးပါသည်၊၊ နှာခေါင်းပေါက်ကို စစ်ဆေးရန် အိတ်စရေး၊၊ စီတီစကန်၊၊ အမ်အာရ်အိုင် နှင့် ပီအီးတီ စကန် ကဲ့သို့သော ပုံရိပ်ဖော်နည်းလမ်း အမျိုးမျိုးကို အသုံးပြုနိုင်ပါသည်၊၊
- အသားစယူစစ်ဆေးခြင်း။ အက်စ်သီစီယိုနူရိုဘလက်စတိုးမားသည် အလွန်ရှားပါးပြီး ဦးခေါင်း၊၊ လည်ပင်း သို့မဟုတ် နှာခေါင်းတစ်ဝိုက်တွင် ဖြစ်ပွားတတ်သော အခြားကင်ဆာများနှင့် ဆင်တူနိုင်သောကြောင့် ရောဂါရှာဖွေရန် ခက်ခဲပါသည်၊၊ အချက်အလက်များ ပိုမိုရရှိရန် အသားစယူခြင်း လိုအပ်နိုင်ပါသည်၊၊ ၎င်းသည် ရောဂါဗေဒဆိုင်ရာ စစ်ဆေးရန်အတွက် အကျိတ်တစ်ရှူးနမူနာကို ဖယ်ထုတ်ယူခြင်းဖြစ်သည့် ခွဲစိတ်နည်းလမ်းတစ်ခု ဖြစ်ပါသည်၊၊
ရောဂါရှာဖွေမှု အစိတ်အပိုင်းတစ်ခုအနေဖြင့် ဆရာဝန်သည် အကျိတ်မှ တစ်ရှူးနမူနာများ ရယူရန် အထူးပြုလုပ်ထားသော ကိရိယာကို လူနာ၏နှာခေါင်းမှတစ်ဆင့် ထည့်သွင်းနိုင်ပါသည်၊၊ အက်စ်သီစီယိုနူရိုဘလက်စတိုးမားကို အခြားဆင်တူသော အကျိတ်များနှင့် ခွဲခြားနိုင်ရန် အသားစနမူနာကို တိကျစွာ စစ်ဆေးခွဲခြမ်းစိတ်ဖြာရန် လိုအပ်ပါသည်၊၊ အသားစယူစစ်ဆေးမှု ရလဒ်များသည် ရောဂါဗေဒဆိုင်ရာ စုံစမ်းစစ်ဆေးမှုမှတစ်ဆင့် အကျိတ်၏ အဆင့်အတန်း သို့မဟုတ် ပြင်းထန်မှု အဆင့်ကို ဆုံးဖြတ်ရန်လည်း ကူညီပေးပါလိမ့်မည်၊၊ ပုံမှန်အားဖြင့် အသားစယူခြင်းကို ဆရာဝန်၏ အခန်း သို့မဟုတ် ဆေးခန်းတွင် ပြုလုပ်လေ့ရှိပါသည်၊၊
ကုသခြင်း
အက်စ်သီစီယိုနူရိုဘလက်စတိုးမား ကုသမှုတွင် အဓိကအားဖြင့် ခွဲစိတ်မှုမှတစ်ဆင့် ကင်ဆာကို ဖယ်ရှားခြင်း ပါဝင်ပါသည်၊၊ ခွဲစိတ်ပြီးနောက် ဓာတ်ရောင်ခြည်နှင့် ကီမိုဆေးသွင်းခြင်းတို့ကို တွဲဖက်ကုသခြင်းဖြင့် အသက်ရှင်သန်နိုင်ခြေ အကောင်းဆုံးကို ရရှိနိုင်ပါသည်၊၊ အာရုံကြောခွဲစိတ်ဆရာဝန်များ၊၊ ဦးခေါင်းနှင့် လည်ပင်းခွဲစိတ်ဆရာဝန်များ၊၊ ဓာတ်ရောင်ခြည်ဆိုင်ရာ ကင်ဆာအထူးကုများနှင့် ဆေးဘက်ဆိုင်ရာ ကင်ဆာအထူးကုများကဲ့သို့သော နယ်ပယ်အသီးသီးမှ ပညာရှင်များသည် အက်စ်သီစီယိုနူရိုဘလက်စတိုးမား ကုသမှုတွင် မကြာခဏ ပါဝင်ဆောင်ရွက်ကြပါသည်၊၊
- ခွဲစိတ်ကုသခြင်း။ အကျိတ်၏ တည်နေရာပေါ်မူတည်၍ အက်စ်သီစီယိုနူရိုဘလက်စတိုးမားကို ကုသရန် အသုံးများသော ခွဲစိတ်နည်းလမ်းများမှာ၊၊
- မှန်ပြောင်းဖြင့် ခွဲစိတ်ခြင်း။ ကင်ဆာနှင့် ပတ်ဝန်းကျင်ရှိ တစ်ရှူးများကို ဖယ်ရှားရာတွင် ကူညီရန် အထူးခွဲစိတ်ကိရိယာများကို မှန်ပြောင်းမှတစ်ဆင့် ထည့်သွင်းပါသည်၊၊ အန်ဒိုစကုပ် ဆိုသည်မှာ နှာခေါင်းအတွင်းသို့ ထည့်သွင်းရသော ကင်မရာပါသည့် ရှည်လျားပြီး ပါးလွှာသော ပြွန်ချောင်းဖြစ်ပါသည်၊၊
- ဦးခေါင်းခွံဖောက်၍ ခွဲစိတ်ခြင်း။ ဤဦးခေါင်းခွံအောက်ခြေ ခွဲစိတ်မှုတွင် အကျိတ်ကို ဖယ်ရှားပြီး ဦးနှောက်မှ သီးခြားခွဲထုတ်ပါသည်၊၊ အကျိတ်ကို ချဉ်းကပ်နိုင်ရန် ဦးခေါင်းခွံ၏ သေးငယ်သော အစိတ်အပိုင်းတစ်ခုကို ယာယီအားဖြင့် လှန်ထားခြင်း ဖြစ်ပါသည်၊၊
- ဓာတ်ရောင်ခြည်ကုသခြင်း။ ဓာတ်ရောင်ခြည်ကုသခြင်းကို အက်စ်သီစီယိုနူရိုဘလက်စတိုးမား ကုသရန် အသုံးများပါသည်၊၊ ၎င်းသည် ခွဲစိတ်ရန် မသင့်တော်သူများအတွက် အဓိကကုသမှု ဖြစ်နိုင်သကဲ့သို့ ကင်ဆာပြန်ဖြစ်နိုင်ခြေကို လျှော့ချရန် ခွဲစိတ်ပြီးနောက်တွင်လည်း ပေးနိုင်ပါသည်၊၊ ကင်ဆာဆဲလ်များကို သတ်ရန် ဓာတ်ရောင်ခြည်ကုသမှုတွင် အိတ်စရေး သို့မဟုတ် ပရိုတွန်ကဲ့သို့သော စွမ်းအင်မြင့် ရောင်ခြည်များကို အသုံးပြုပါသည်၊၊ ခွဲစိတ်ပြီးနောက်တွင် ဦးခေါင်းနှင့် လည်ပင်း၌ ကျန်ရှိနေနိုင်သော သေးငယ်သည့် ကင်ဆာဆဲလ်များကို ဖယ်ရှားရန် ဓာတ်ရောင်ခြည်ကုသမှုကို မကြာခဏ ပေးလေ့ရှိပါသည်၊၊
- ကီမိုဆေးသွင်းကုသခြင်း။ အက်စ်သီစီယိုနူရိုဘလက်စတိုးမားကို ကုသရန် ကီမိုဆေးသွင်းခြင်းကိုလည်း အသုံးပြုနိုင်ပါသည်၊၊ ကီမိုဆေးသွင်းခြင်းကို ခွဲစိတ်ပြီးနောက် ကျန်ရှိနေသော ကင်ဆာဆဲလ်များကို ဖယ်ရှားရန် ဓာတ်ရောင်ခြည်ကုသမှုနှင့်အတူ တွဲဖက်အသုံးပြုလေ့ရှိပြီး အထူးသဖြင့် အလွန်ပြင်းထန်သော သို့မဟုတ် ပျံ့နှံ့နေသော အကျိတ်များတွင် အသုံးပြုပါသည်၊၊ ကီမိုဆေးသွင်းခြင်းသည် ကင်ဆာဆဲလ်များကို သတ်ရန် ပြင်းထန်သော ဆေးဝါးများကို အသုံးပြုခြင်း ဖြစ်ပါသည်၊၊
