အားကစားလုပ်ပြီး ခေါင်းကိုက်ခြင်း
ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာ
အားကစားလုပ်ပြီး ခေါင်းကိုက်ခြင်း သည် ကြာရှည်ပြီး ပင်ပန်းပြင်းထန်သော လေ့ကျင့်ခန်းလုပ်နေစဉ် သို့မဟုတ် လုပ်ပြီးပြီးချင်းတွင် ဖြစ်ပေါ်နိုင်ပါသည်။ အပြေး။ လှေလှော်။ တင်းနစ်။ ရေကူးနှင့် အလေးမခြင်းတို့သည် လေ့ကျင့်ခန်းလုပ်ပြီးနောက် ခေါင်းကိုက်ခြင်းကို ဖြစ်စေနိုင်သော အားကစားအချို့ ဖြစ်ပါသည်။
လေ့ကျင့်ခန်းနှင့် ဆက်စပ်သော ခေါင်းကိုက်ခြင်းကို ဆေးဘက်ဆိုင်ရာ ကျွမ်းကျင်သူများက အုပ်စုနှစ်စု ခွဲခြားထားပါသည်။ မူလအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်းသည် ပုံမှန်အားဖြင့် အန္တရာယ်မရှိဘဲ အခြားအခြေခံရောဂါများနှင့် ဆက်စပ်မှုမရှိသည့်အပြင် ဆေးဝါးဖြင့် မကြာခဏ ကုသနိုင်ပါသည်။
ဒုတိယအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်းသည် ဦးနှောက်အတွင်း သွေးထွက်ခြင်း သို့မဟုတ် အကျိတ်ဖြစ်ခြင်းကဲ့သို့သော ပြင်းထန်သည့် အခြေခံပြဿနာတစ်ခုခုကြောင့်သော်လည်းကောင်း။ နှလုံးသွေးကြောဆိုင်ရာရောဂါကဲ့သို့သော ပြင်ပပြဿနာတစ်ခုခုကြောင့်သော်လည်းကောင်း ဖြစ်ပေါ်လာခြင်း ဖြစ်ပါသည်။ ဒုတိယအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်းသည် ချက်ချင်း ဆေးကုသမှု ခံယူရန် လိုအပ်နိုင်ပါသည်။
ရောဂါလက္ခဏာများ
မူလအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်း
ဤခေါင်းကိုက်ခြင်း အမျိုးအစားများသည်
- အများအားဖြင့် တဒိတ်ဒိတ်နှင့် ကိုက်ခဲတတ်ပါသည်။
- ပြင်းထန်သော ကိုယ်လက်လှုပ်ရှားမှု လုပ်ဆောင်နေစဉ် သို့မဟုတ် လုပ်ဆောင်ပြီးနောက်တွင် ဖြစ်ပေါ်တတ်ပါသည်။
- ဖြစ်ရပ်အများစုတွင် ဦးခေါင်း၏ ဘေးတစ်ဖက်တစ်ချက်လုံးကို ထိခိုက်စေပါသည်။
ဒုတိယအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်း
ဤခေါင်းကိုက်ခြင်း အမျိုးအစားများသည်။
- မူလအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်းကဲ့သို့ပင် တူညီသော လက္ခဏာများ ရှိတတ်ပါသည်။
- သတိလစ်ခြင်း။
- အန်ခြင်း။
- အမြင်နှစ်ထပ် ဖြစ်ခြင်း။
- ဇက်ခိုင်ခြင်း။
မူလအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်းသည် ငါးမိနစ်မှ ၄၈ နာရီအထိ ကြာမြင့်နိုင်သော်လည်း။ ဒုတိယအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်းမှာ အနည်းဆုံး တစ်ရက် သို့မဟုတ် တစ်ခါတစ်ရံ ထို့ထက်ပို၍ ကြာမြင့်တတ်ပါသည်။
အကယ်၍ သင်သည် လေ့ကျင့်ခန်းလုပ်နေစဉ် သို့မဟုတ် လုပ်ပြီးပြီးချင်း ခေါင်းကိုက်ပါက ဆရာဝန်နှင့် တိုင်ပင်ပါ။ အကယ်၍ ခေါင်းကိုက်ခြင်းသည် ရုတ်တရက် စတင်ဖြစ်ပေါ်လာပါက သို့မဟုတ် ဤကဲ့သို့သော ခေါင်းကိုက်ခြင်းမျိုး ပထမဆုံးအကြိမ် ဖြစ်ဖူးခြင်း ဖြစ်ပါက ကျန်းမာရေးစောင့်ရှောက်မှု ကျွမ်းကျင်သူထံ ချက်ချင်း ဆက်သွယ်ပါ။
အကြောင်းရင်းများ
မူလအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်း
မူလအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်း၏ အတိအကျ အကြောင်းရင်းကို မသိရသေးပါ။ သီအိုရီတစ်ခုအရ ပြင်းထန်သော ကိုယ်လက်လှုပ်ရှားမှုကြောင့် ဦးခေါင်းခွံအတွင်းရှိ သွေးကြောများ ကျယ်လာခြင်းကြောင့် ဖြစ်နိုင်သည်ဟု ဆိုပါသည်။
ဒုတိယအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်း
ဒုတိယအဆင့် လေ့ကျင့်ခန်းကြောင့်ဖြစ်သော ခေါင်းကိုက်ခြင်းသည် အောက်ပါကဲ့သို့သော အခြေခံအခြေအနေများကြောင့် ဖြစ်ပေါ်လာခြင်း ဖြစ်ပါသည်။
- ဦးနှောက်နှင့် ဦးနှောက်ကို ဖုံးအုပ်ထားသော ပါးလွှာသည့် အမြှေးပါးများကြား သွေးထွက်ခြင်း။
- ဦးနှောက်အတွင်းရှိ သို့မဟုတ် ဦးနှောက်သို့ သွားသော သွေးကြောများ ပုံမှန်မဟုတ်ခြင်း။
- ဦးနှောက်အကျိတ်များ။
- ဦးနှောက်နှင့် အာရုံကြောမကြီးအတွင်းရှိ အရည်စီးဆင်းမှုကို အဟန့်အတားဖြစ်စေခြင်း။
- ထိပ်ကပ်နာ ဖြစ်ခြင်း။
- ဦးခေါင်း၊ လည်ပင်း သို့မဟုတ် ကျောရိုး၏ တည်ဆောက်ပုံဆိုင်ရာ မူမမှန်မှုများ။
ဖြစ်နိုင်ခြေရှိသော အကြောင်းအချက်များ
အကယ်၍ သင်သည် မြင့်မားသော တောင်ပေါ်ဒေသများတွင် လေ့ကျင့်ခန်းလုပ်ခြင်း။ အလွန်ပူပြင်းသော ရာသီဥတုတွင် လေ့ကျင့်ခန်းလုပ်ခြင်း သို့မဟုတ် သင့်မိသားစုဝင်ထဲတွင်ဖြစ်စေ။ သင့်တွင်ဖြစ်စေ မိုင်ဂရိန်းခေါင်းကိုက်ရောဂါ ရာဇဝင်ရှိပါက လေ့ကျင့်ခန်းကြောင့်ဖြစ်သော ခေါင်းကိုက်ခြင်း ပိုမို ဖြစ်ပေါ်နိုင်ပါသည်။
ရောဂါရှာဖွေခြင်း
အောက်ပါအချက်များနှင့် ကိုက်ညီပါက သင့်ဆရာဝန်သည် ပုံရိပ်ဖော်စစ်ဆေးမှုတစ်ခု ပြုလုပ်ရန် အကြံပြုပါလိမ့်မည်။
- သင့်အသက်အရွယ်သည် ၄၀ ကျော်ဖြစ်ခြင်း။
- သင်၏ ခေါင်းကိုက်ခြင်းသည် နာရီပေါင်းများစွာ သို့မဟုတ် ထို့ထက်ပို၍ ကြာမြင့်ခြင်း။
- ပျို့အန်ခြင်း သို့မဟုတ် အမြင်အာရုံ ပြဿနာများကဲ့သို့သော နောက်ဆက်တွဲ လက္ခဏာများ ပြသခြင်း။
- ခေါင်းကိုက်ခြင်းသည် မိုးကြိုးပစ်သကဲ့သို့ ရုတ်တရက်နှင့် ပြင်းထန်စွာ ဖြစ်ပေါ်ခြင်း။
ဤအခြေအနေများတွင် ပုံရိပ်ဖော်စစ်ဆေးမှု အမျိုးမျိုးသည် တည်ဆောက်ပုံဆိုင်ရာ သို့မဟုတ် သွေးကြောဆိုင်ရာ မူမမှန်မှုများကြောင့် ဖြစ်သော ခေါင်းကိုက်ခြင်းမျိုး မဟုတ်ဘဲ အန္တရာယ်မရှိသော လေ့ကျင့်ခန်းကြောင့်ဖြစ်သော ခေါင်းကိုက်ခြင်း အမျိုးအစား ဖြစ်ကြောင်း ကျန်းမာရေးစောင့်ရှောက်မှု ကျွမ်းကျင်သူကို အတည်ပြုရန် ကူညီပေးနိုင်ပါသည်။
- သံလိုက်ဓာတ်မှန်ရိုက်ခြင်း (အမ်အာရ်အိုင်)။ ဤစစ်ဆေးမှုသည် သံလိုက်စက်ကွင်းနှင့် ရေဒီယိုလှိုင်းများကို အသုံးပြု၍ ဦးနှောက်၏ တည်ဆောက်ပုံဆိုင်ရာ အစိတ်အပိုင်းများကို ကန့်လန့်ဖြတ် ပုံရိပ်များ ထုတ်ပေးပါသည်။
- သံလိုက်ဓာတ်မှန်ဖြင့် သွေးကြောပုံဖော်ခြင်း (အမ်အာရ်အေ) နှင့် ကွန်ပျူတာဓာတ်မှန်ဖြင့် သွေးကြောပုံဖော်ခြင်း (စီတီ အန်ဂျီယိုဂရပ်ဖီ)။ ဤစစ်ဆေးမှုများသည် ဦးနှောက်အတွင်းရှိ သို့မဟုတ် ဦးနှောက်သို့ သွားသော သွေးကြောများကို ပုံရိပ်ဖော်ပေးပါသည်။
- ကွန်ပျူတာဓာတ်မှန်ရိုက်ခြင်း (စီတီ စကန်)။ စီတီ စကန်သည် အိတ်စရေးလှိုင်းများကို အသုံးပြု၍ ဦးနှောက်၏ ကန့်လန့်ဖြတ် ပုံရိပ်ကို ထုတ်ပေးပါသည်။ အကယ်၍ သင်၏ ခေါင်းကိုက်ခြင်းသည် လွန်ခဲ့သော ၄၈ နာရီအတွင်းမှ စတင်ခဲ့ခြင်း ဖြစ်ပါက ဤစစ်ဆေးမှုသည် ဦးနှောက်အတွင်း သို့မဟုတ် ပတ်ဝန်းကျင်တွင် လတ်တလော ဖြစ်ပေါ်ထားသော သွေးထွက်မှုများကို ရှာဖွေနိုင်ပါသည်။
အကယ်၍ ခေါင်းကိုက်ခြင်းသည် ရုတ်တရက် ဖြစ်ပေါ်လာပြီး ဦးနှောက်ပုံရိပ်ဖော် စစ်ဆေးမှုများတွင် ထူးခြားမှု မရှိပါက ခါးရိုးဆစ်အတွင်းမှ အရည်ဖောက်ထုတ်၍ စစ်ဆေးခြင်း ကိုလည်း တစ်ခါတစ်ရံ လိုအပ်တတ်ပါသည်။
ကုသခြင်း
သင်၏ လေ့ကျင့်ခန်းကြောင့်ဖြစ်သော ခေါင်းကိုက်ခြင်းသည် တည်ဆောက်ပုံဆိုင်ရာ သို့မဟုတ် သွေးကြောဆိုင်ရာ ပြဿနာများကြောင့် မဟုတ်ပါက ခေါင်းကိုက်ခြင်းကို ကာကွယ်ရန် သင့်ဆရာဝန်သည် အချို့သော ဆေးဝါးများကို ပုံမှန်သောက်သုံးရန် အကြံပြုနိုင်ပါသည်။
- အင်ဒိုမီသာဆင် – အရောင်ကျဆေးတစ်မျိုး။
- ပရိုပရန်နိုလို – သွေးပေါင်ချိန် ထိန်းဆေးတစ်မျိုး။
အချို့သော လူနာများတွင် နက်ပရောက်ဆင်။ ဖီနယ်လ်ဇင်း နှင့် ဒိုင်ဟိုက်ဒရိုအာဂေါတမင်း မက်ဆီလိတ် ကဲ့သို့သော အခြား ကုသမှုများသည်လည်း အောင်မြင်မှုရှိကြောင်း အစီရင်ခံစာများ ရှိပါသည်။
အကယ်၍ သင်၏ လေ့ကျင့်ခန်းကြောင့်ဖြစ်သော ခေါင်းကိုက်ခြင်းသည် ကြိုတင်ခန့်မှန်းနိုင်သော အခြေအနေမျိုး (ဥပမာ တင်းနစ်ပြိုင်ပွဲ သို့မဟုတ် တောင်တက်ခြင်းကဲ့သို့သော လှုပ်ရှားမှုများ) ဖြစ်ပါက ထိုလှုပ်ရှားမှု မတိုင်မီ တစ်နာရီ သို့မဟုတ် နှစ်နာရီအလိုတွင် ဆေးကြိုသောက်ထားနိုင်ပါသည်။ အကယ်၍ လေ့ကျင့်ခန်းလုပ်ပြီးနောက် ခေါင်းကိုက်ခြင်းသည် မကြာခဏဖြစ်ခြင်း သို့မဟုတ် ခန့်မှန်း၍မရခြင်းမျိုး ဖြစ်ပါက ကာကွယ်ဆေးကို နေ့စဉ် သောက်သုံးရန် လိုအပ်နိုင်ပါသည်။
