အေဗွီ နုတ် ပြန်လည်ဝင်ရောက်သော နှလုံးခုန်မြန်ခြင်း
ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာ
အပေါ်ခန်းမှ စတင်သော နှလုံးခုန်နှုန်း အလွန်မြန်ခြင်း အမျိုးအစားများထဲတွင် အဖြစ်အများဆုံး ဖြစ်သည့် အေဗွီ နုတ် ပြန်လည်ဝင်ရောက်သော နှလုံးခုန်မြန်ခြင်း ရောဂါသည် လူနာ၏ နှလုံးကို အချိန်မတိုင်မီ ခုန်စေသည့် အေဗွီ နုတ် အတွင်းရှိ အပိုလမ်းကြောင်း တစ်ခုကြောင့် ဖြစ်ပွားခြင်း ဖြစ်ပါသည်။ ဤရောဂါသည် တစ်မိနစ်လျှင် နှလုံးခုန်နှုန်း ၁၀၀ ထက် ပိုမိုမြန်ဆန်သော ပုံမှန်မဟုတ်သည့် နှလုံးခုန်ခြင်းများကို ဖြစ်ပေါ်စေပါသည်။ မည်သူမဆို ဤရောဂါ ဖြစ်ပွားနိုင်သော်လည်း အမျိုးသမီးငယ်များတွင် အများဆုံး တွေ့ရလေ့ ရှိပါသည်။
အေဗွီ နုတ် ပြန်လည်ဝင်ရောက်သော နှလုံးခုန်မြန်ခြင်း ရောဂါ၏ လက္ခဏာများ
ဤရောဂါသည် ရုတ်တရက် နှလုံးခုန် မြန်ခြင်းများကို ဖြစ်စေနိုင်ပြီး အချိန်တိုအတွင်း ပြန်လည် သက်သာသွားနိုင်ပါသည်။ အေဗွီ နုတ် ပြန်လည်ဝင်ရောက်သော နှလုံးခုန်မြန်ခြင်း ရောဂါသည် အောက်ပါ အဖြစ်များသော လက္ခဏာအချို့ကို ဖြစ်စေနိုင်ပါသည်။
- ခေါင်းထဲ ပေါ့ပါးနေခြင်း
- မူးဝေခြင်း
- နှလုံးခုန် မြန်ခြင်း (တစ်မိနစ်လျှင် ၁၄၀ မှ ၂၈၀ အထိ)
- နှလုံးတုန်ခြင်း
- ဆီးခဏခဏ သွားခြင်း
- အသက်ရှူရ ခက်ခဲခြင်း
ရှားပါးသော အခြေအနေများတွင် ဤရောဂါသည် ပြင်းထန်နိုင်ပြီး အောက်ပါကဲ့သို့သော ဆိုးရွားသည့် လက္ခဏာများနှင့် နောက်ဆက်တွဲ ပြဿနာများကို ဖြစ်စေနိုင်ပါသည်။
- ရင်ဘတ် တင်းကျပ်ခြင်း
- စိတ်ရှုပ်ထွေးခြင်း
- သတိလစ်ခြင်း သို့မဟုတ် မေ့မြောခြင်း
- သွေးဖိအား ကျခြင်း
- ရှော့ခ် ဖြစ်ခြင်း
ဖြစ်ပွားရသည့် အကြောင်းရင်းများ
နှလုံးတွင် အပေါ်ခန်း နှစ်ခုနှင့် အောက်ခန်း နှစ်ခု ဟုခေါ်သော အခန်း လေးခန်း ရှိပါသည်။ ညာဘက် အပေါ်ခန်း သို့မဟုတ် အေထရီယမ် တွင် ရှိသော ဆိုင်းနပ်စ် နုတ် သည် နှလုံးခုန်နှုန်းကို ထိန်းချုပ်သည့် သဘာဝ စည်းချက် ထိန်းစက် အဖြစ် လုပ်ဆောင်ပြီး လျှပ်စစ် အချက်ပြ လိုင်းများကို ပေးပို့ခြင်းဖြင့် နှလုံးကြွက်သားများကို ကျုံ့စေကာ သွေးများကို အောက်ခန်းများအတွင်းသို့ ပို့ဆောင်ပေးပါသည်။ ထို့နောက် နှလုံး အချက်ပြ လိုင်းများသည် အေဗွီ နုတ် သို့ ဆက်လက် ရောက်ရှိသွားပြီး ထိုနေရာတွင် အချက်ပြ လိုင်းများ နှေးကွေးသွားခြင်းဖြင့် သွေးများကို အောက်ခန်းများအတွင်းသို့ ဖြည့်တင်းပေးကာ အဆုတ်နှင့် ခန္ဓာကိုယ်ရှိ အခြားသော အင်္ဂါများသို့ သွေးများ ပို့ဆောင်ပေးနိုင်ရန် လုပ်ဆောင်ပေးပါသည်။ ပုံမှန် လူတစ်ယောက်အတွက် ဤလုပ်ငန်းစဉ်သည် တစ်မိနစ်လျှင် နှလုံးခုန်နှုန်း ၆၀ မှ ၁၀၀ အတွင်း ချောမွေ့စွာ လည်ပတ်နေသော်လည်း အေဗွီ နုတ် ပြန်လည်ဝင်ရောက်သော နှလုံးခုန်မြန်ခြင်း ရောဂါ ရှိသူများသည် ပုံမှန်ထက် ပိုမို မြန်ဆန်သော နှုန်းကို ခံစားရမည် ဖြစ်ပြီး နှလုံးခန်းများအတွင်း သွေးများကို လျင်မြန်စွာ မဖြည့်တင်းနိုင်တော့သည့်အတွက် နှလုံးခုန်နှုန်း အလွန် မြန်လာကာ ဦးနှောက်က သွေးနှင့် အောက်ဆီဂျင် လုံလောက်စွာ မရရှိတော့ဘဲ လူနာအား မူးဝေခြင်း သို့မဟုတ် ချာချာလည် မူးခြင်းတို့ကို ဖြစ်စေပါသည်။
ဤရောဂါသည် အပေါ်ခန်းမှ စတင်သော နှလုံးခုန်နှုန်း အလွန်မြန်ခြင်း၏ အဖြစ်အများဆုံး အမျိုးအစား ဖြစ်ပါသည်
ဤရောဂါသည် နှလုံးကို အချိန်မတိုင်မီ ညှစ်စေခြင်းကို ဖြစ်ပေါ်စေပြီး ၎င်းမှာ အချိန်မတိုင်မီ ညှစ်ခြင်း ဟုခေါ်သော ချို့ယွင်းချက် တစ်မျိုး ဖြစ်ပါသည်။ ဤချို့ယွင်းချက်ကြောင့် နှလုံး၏ လျှပ်စစ် လှုံ့ဆော်မှုသည် အေဗွီ နုတ် အနီးရှိ လမ်းကြောင်းငယ် တစ်ခုအတွင်းသို့ ဝင်ရောက်ကာ လှည့်ပတ်နေခြင်းကို ဖြစ်စေနိုင်ပါသည်။ ဤအခြေအနေကို ပြန်လည်ဝင်ရောက်သော လမ်းကြောင်းပတ်လမ်း ဟု ခေါ်ဆိုပြီး ၎င်းသည် ဆက်တိုက် ဖြစ်ပေါ်နေသော နှလုံးခုန် မြန်ခြင်းများကို လျင်မြန်စွာ ဖြစ်ပေါ်စေနိုင်ပါသည်။ သုတေသနများ အားနည်းသော်လည်း ဤရောဂါ ခံစားနေရသော အချို့သော လူနာများတွင် မိသားစု ရာဇဝင် ရှိနေသည့်အတွက် ဆရာဝန် အချို့က ဤရောဂါ ဖြစ်ပွားမှုတွင် မျိုးရိုးဗီဇသည်လည်း အခန်းကဏ္ဍ တစ်ခုမှ ပါဝင်သည်ဟု ယုံကြည်ကြပါသည်။
ဖြစ်နိုင်ခြေရှိသော အချက်များ
အပေါ်ခန်းမှ စတင်သော နှလုံးခုန်နှုန်း အလွန်မြန်ခြင်း ရောဂါကို မည်သူမဆို ခံစားရနိုင်သော်လည်း ကိုယ်ဝန်ဆောင် အမျိုးသမီးများတွင် အများဆုံး တွေ့ရလေ့ ရှိသကဲ့သို့ မွေးကင်းစ ကလေးငယ်များနှင့် ကလေးများတွင်လည်း အဖြစ်အများဆုံးသော ပုံမှန်မဟုတ်သည့် နှလုံးခုန်ခြင်း အမျိုးအစား ဖြစ်ပါသည်။ အေဗွီ နုတ် ပြန်လည်ဝင်ရောက်သော နှလုံးခုန်မြန်ခြင်းနှင့် အပေါ်ခန်းမှ စတင်သော နှလုံးခုန်နှုန်း အလွန်မြန်ခြင်းတို့ကို အောက်ပါ အချက်များက လှုံ့ဆော်နိုင်ပါသည်။
- အသက်အရွယ် ။ ။ အသက်လတ်ပိုင်း အရွယ်ရှိသူများသည် ဤရောဂါ ဖြစ်ပွားနိုင်ခြေ ပိုမို မြင့်မားပါသည်။
- နှလုံးဆိုင်ရာ အခြေအနေများ ။ ။ နှလုံး သွေးကြောကျဉ်း ရောဂါ ရှိသူများ ၊ နှလုံး ခွဲစိတ်မှု ရာဇဝင် ရှိသူများ ၊ နှလုံး သွေးလွှတ်ကြော ကျဉ်းသူများ ၊ နှလုံးသွေးရပ်ခြင်း ဖြစ်ဖူးသူများ ၊ နှလုံး အဆို့ရှင် ထိခိုက်ထားသူများ ၊ နှလုံး အမာရွတ် ရှိသူများနှင့် နှလုံးကြွက်သား ရောဂါ ရှိသူများ။
- မွေးရာပါ နှလုံးရောဂါ ။ ။ ၎င်းသည် နှလုံးခုန်ပုံကို အနှောင့်အယှက် ဖြစ်စေနိုင်ပါသည်။
- လည်ပင်းကြီး ရောဂါ ။ ။ လည်ပင်းကြီး ဟော်မုန်း များခြင်းနှင့် နည်းခြင်း နှစ်မျိုးလုံး ပါဝင်ပါသည်။
- ဆီးချို ရောဂါ ။ ။ ဆီးချိုကို မကုသဘဲ ထားပါက သွေးတိုးခြင်း အပါအဝင် နှလုံး နောက်ဆက်တွဲ ပြဿနာများ ဖြစ်ပွားနိုင်ခြေ ရှိပါသည်။
- အိပ်နေစဉ် အသက်ရှူ ရပ်တန့်ခြင်း ။ ။ အိပ်နေစဉ် အသက်ရှူခြင်းကို ပုံမှန်မဟုတ် ဖြစ်စေပြီး ဤရောဂါ ဖြစ်နိုင်ခြေကို မြင့်တက်စေပါသည်။
- မူးယစ်ဆေးဝါးများ သုံးစွဲခြင်း ။ ။ နီကိုတင်း ၊ အမ်ဖက်တမင်းနှင့် ကိုကိန်း ကဲ့သို့သော ဆေးဝါးများ။
ရောဂါရှာဖွေခြင်း
ဤရောဂါကို အောက်ပါ နည်းလမ်းများဖြင့် ရောဂါ ရှာဖွေနိုင်ပါသည်။
- သွေးစစ်ခြင်း ။ ။ လည်ပင်းကြီး ရောဂါ ၊ နှလုံး ချို့ယွင်းမှုများနှင့် ပုံမှန်မဟုတ်သော နှလုံးခုန်ခြင်းကို ဖြစ်စေနိုင်သည့် အခြား ကျန်းမာရေး ပြဿနာများအတွက် စစ်ဆေးခြင်း ဖြစ်ပါသည်။
- လျှပ်စစ် နှလုံးစစ်ဆေးချက် ။ ။ နှလုံးခုန်သည့် အချိန်နှင့် ကြာမြင့်ချိန် အပါအဝင် နှလုံး၏ လျှပ်စစ် အချက်ပြ လှုံ့ဆော်မှုများ လုပ်ဆောင်ပုံကို ကြည့်ရှုရန် အသုံးပြုပါသည်။
- ဟော်လ်တာ စောင့်ကြည့်စက် ။ ။ သင်၏ နေ့စဉ် လုပ်ငန်းဆောင်တာများ လုပ်ဆောင်နေစဉ်အတွင်း နှလုံး၏ လုပ်ဆောင်ချက်များကို ဤသယ်ဆောင်ရ လွယ်ကူသော လျှပ်စစ် နှလုံးစစ်ဆေးသည့် ကိရိယာဖြင့် ဆရာဝန်က မှတ်တမ်းတင်နိုင်ရန် ကူညီပေးပါသည်။
- နှလုံးပုံရိပ်ဖော် အက်ကိုး စစ်ဆေးခြင်း ။ ။ အသံလှိုင်းများကို အသုံးပြု၍ သင်၏ နှလုံးပုံရိပ်ကို ဖော်ထုတ်ပြီး ၎င်း၏ အရွယ်အစား ၊ တည်ဆောက်ပုံနှင့် လှုပ်ရှားမှုများကို ပြသပေးပါသည်။
ဤရောဂါ၏ လက္ခဏာများကို တမင်တကာ လှုံ့ဆော်ခြင်းဖြင့်လည်း ရောဂါ ရှာဖွေနိုင်ပါသည်။ လက္ခဏာများကို လှုံ့ဆော်ရန် အောက်ပါ စစ်ဆေးမှုများကို အသုံးပြုပါသည်။
- နှလုံးဒဏ်ခံနိုင်ရည် စစ်ဆေးခြင်း ။ ။ လူနာအား လေ့ကျင့်ခန်း လုပ်သည့် စက်ပေါ်တွင် ပြေးစေခြင်း သို့မဟုတ် စက်ဘီး စီးစေခြင်းတို့ ပြုလုပ်နေစဉ် နှလုံး၏ လုပ်ဆောင်ချက်များကို မှတ်တမ်းတင်ပြီး ခွဲခြမ်းစိတ်ဖြာရန် လိုအပ်ပါသည်။
- လျှပ်စစ် ဇီဝကမ္မဗေဒ ဆိုင်ရာ လေ့လာမှုနှင့် နှလုံးမြေပုံ ဖော်ထုတ်ခြင်း ။ ။ ပုံမှန်မဟုတ်သော နှလုံးခုန်ခြင်း ဖြစ်ပွားသည့် နေရာကို သိရှိနိုင်ရန် ဆရာဝန်ကို ကူညီပေးပါသည်။
ကုသခြင်း
ဤရောဂါ ရှိသူ အများစုမှာ ကုသမှု ခံယူရန် မလိုအပ်ပါ။ ဤရောဂါ ခံစားရသည့် အကြိမ်အရေအတွက် များသူ သို့မဟုတ် ကြာရှည် ခံစားရသူများ သို့မဟုတ် လက္ခဏာများ ထပ်တလဲလဲ ဖြစ်ပေါ်နေသူများအတွက် အောက်ပါ ကုသမှု နည်းလမ်းများထဲမှ တစ်ခုခုကို အကြံပြုနိုင်ပါသည်။
- ဗေးဂတ်စ် အာရုံကြော လှုံ့ဆော်မှု နည်းလမ်းများ ။ ။ နှလုံးခုန် မြန်ခြင်းကို ရပ်တန့်ရန်အတွက် အသက်အောင့်၍ အားစိုက် ညှစ်ခြင်း ၊ မျက်နှာကို ရေခဲရေအတွင်း နှစ်ခြင်း သို့မဟုတ် ချောင်းဆိုးခြင်း စသည့် လုပ်ငန်းစဉ်များ ဖြစ်ပါသည်။
- လျှပ်စစ်ဖြင့် နှလုံးခုန်နှုန်း ညှိခြင်း ။ ။ ဗေးဂတ်စ် နည်းလမ်းများကို တုံ့ပြန်မှု မရှိသော လူနာများအတွက် ဤနည်းလမ်းကို အကြံပြုပါသည်။ ဤလုပ်ငန်းစဉ်တွင် ဆေးဝါးများ ညွှန်ကြားခြင်း သို့မဟုတ် ရင်ဘတ်ပေါ်ရှိ လျှပ်စစ်ပြားများမှတစ်ဆင့် နှလုံးကို လျှပ်စစ်ဖြင့် လှုံ့ဆော်ခြင်းတို့ ပြုလုပ်ပါမည်။ ပုံမှန် နှလုံး စည်းချက် ပြန်လည် ရရှိစေရန် ဆရာဝန်သည် လျှပ်စစ်ဖြင့် လှုံ့ဆော်ခြင်းကို အသုံးပြုပါသည်။
- ဆေးဝါးများ ။ ။ နှလုံးခုန်နှုန်းကို ထိန်းချုပ်ရန် သို့မဟုတ် နှလုံး စည်းချက်ကို ပုံမှန် ဖြစ်စေရန် ဤရောဂါ ခံစားရသည့် အကြိမ်အရေအတွက် များသူများကို အများဆုံး ညွှန်ကြားလေ့ ရှိပါသည်။
- ပိုက်ပျော့ အသုံးပြု၍ လျှပ်စစ်လှိုင်း လမ်းကြောင်းကို ဖျက်ဆီးခြင်း ။ ။ ပိုက်ပျော့ တစ်ခု သို့မဟုတ် တစ်ခုထက်ပို၍ သွေးကြောများအတွင်းသို့ ထည့်သွင်းပြီး နှလုံးဆီသို့ လမ်းညွှန် ပို့ဆောင်ပါသည်။ ထို့နောက် ခွဲစိတ် ဆရာဝန်များသည် ပိုက်ပျော့၏ ထိပ်ဖျားရှိ အာရုံခံ ကိရိယာများကို အသုံးပြု၍ နှလုံးကို ပိုမို မြန်ဆန်စွာ ခုန်စေသည့် ပုံမှန်မဟုတ်သော အချက်ပြ လိုင်းများကို ပိတ်ဆို့ရန်အတွက် နှလုံး အနားသားတွင် အမာရွတ်များ ပြုလုပ်ပါလိမ့်မည်။ ထိုအမာရွတ်များ ပိတ်ရန်အတွက် အပူ စွမ်းအင် ဖြစ်သည့် ရေဒီယိုကြိမ်နှုန်း သို့မဟုတ် အအေးလွန် စွမ်းအင်ကို အသုံးပြုပါသည်။
