ကျောက်ကပ်ရောင်ခြင်း

အကျဥ်းချုပ်

ကျောက်ကပ်ရောင်ခြင်း ဟုခေါ်သော ကျောက်ကပ်ရောဂါသည် သင့်ခန္ဓာကိုယ်မှ ဆီးထဲတွင် ပရိုတင်းဓာတ်များစွာကို စွန့်ထုတ်စေသည်။

ကျောက်ကပ်ရောင်ရောဂါသည် ကျောက်ကပ်ရှိ သေးငယ်သော သွေးကြောမျှင်များ အစုအဝေးများကို ပျက်စီးစေသည့် အခြေအနေဖြစ်ပြီး အမျိုးမျိုးသော နောက်ဆက်တွဲဆိုးကျိုးများဖြစ်စေနိုင်သည်။

သင့်ကျောက်ကပ်ရှိ သွေးကြောမျှင်များ အစုအဝေးများ သည် သင့်သွေးမှ အညစ်အကြေးများနှင့် ပိုလျှံနေသောအရည်များကို စစ်ထုတ်ရာတွင် အရေးပါသောအခန်းကဏ္ဍမှပါဝင်ပြီး ထိုအရာများကို ဆီးအဖြစ် စွန့်ထုတ်ပါသည်။ နိုက်ထရိုဂျင် စွန့်ပစ်ပစ္စည်း (ယူရီးယား)၊ ကြွက်သားစွန့်ပစ်ပစ္စည်း (creatinine) နှင့် အက်ဆစ်များ အပါအဝင် အမျိုးမျိုးသော စွန့်ပစ်ပစ္စည်းများကို ထိရောက်စွာ ဖယ်ရှားပေးသည်။

ကျန်းမာသောအခြေအနေတွင်၊ သွေးကြောမျှင်များ အစုအဝေးများသည် ဤစွန့်ပစ်ပစ္စည်းများကို ထိရောက်စွာ စစ်ထုတ်နိုင်ပြီး ပုံမှန်ကိုယ်ခန္ဓာလုပ်ဆောင်မှုများအတွက် လိုအပ်သော ဆဲလ်များနှင့် ပရိုတင်းဓာတ်များကဲ့သို့ မရှိမဖြစ်လိုအပ်သော အစိတ်အပိုင်းများကို သွေးကြောထဲ၌ သေချာထိန်းသိမ်းထားသည်။

သို့သော်၊ သွေးကြောမျှင်များ အစုအဝေးများ ပျက်စီးသွားသောအခါ၊ ၎င်းတို့သည် ၎င်းတို့၏ စစ်ထုတ်ခြင်းလုပ်ဆောင်မှုကို ထိထိရောက်ရောက် မလုပ်ဆောင်နိုင်တော့ပါ။ ထိုအခါတွင် ကျန်းမာသော ကျောက်ကပ်တွင် ပုံမှန်မတွေ့ရသောအခြေအနေများဖြစ်သည့် သွေးအတွင်းရှိပရိုတင်းများ ဆီးထဲသို့ ယိုစိမ့်မှုကို ဖြစ်စေနိုင်သည်။

ထိုသို့ဖြစ်သောကြောင့် ခြေချင်းဝတ်နဲ့ ခြေဖဝါးများတွင် ရောင်ရမ်းခြင်းတွေကို ဖြစ်ပေါ်စေပြီး နောက်ဆက်တွဲ ကျန်းမာရေးပြဿနာတွေ ဖြစ်လာနိုင်ခြေကို တိုးစေပါတယ်။ ကျောက်ကပ်ရောင်ခြင်းသည် အသက်အန္တရာယ်ရှိသော အခြေအနေတစ်ခုဖြစ်သည်။ ကုသမှုမရှိပါက ၎င်း၏ နောက်ဆက်တွဲပြဿနာများသည် သက်တမ်းကို တိုစေနိုင်သည်။

ကျောက်ကပ်ရောင်ခြင်းရောဂါရှိခြင်းမှာ သာမန်မဟုတ်ပါ။ နှစ်စဉ် ကလေး ၅၀၀၀၀ တွင် ၁ယောက်သည် ကျောက်ကပ်ရောင်ရောဂါ ဖြစ်ပေါ်လာနိုင်သည်။ ကျောက်ကပ်ရောင်‌ရောဂါသည် အသက် ၂ နှစ်မှ ၅ နှစ်ကြား ကလေးများတွင် အဖြစ်များသည်။ မိန်းကလေးများနှင့် နှိုင်းယှဉ်ပါက ယောက်ျားလေးများသည် ကျောက်ကပ်ရောင်ခြင်း ဖြစ်နိုင်ချေ နှစ်ဆနီးပါးရှိသည်။ နှစ်စဉ် အရွယ်ရောက်ပြီးသူ ၁၀၀၀၀၀ တွင် ၃ ယောက်သည် ဤရောဂါကို ခံစားရနိုင်သည်။

ကျောက်ကပ်ရောင်ခြင် ဖြစ်စေသည့် အရင်းခံအကြောင်းအရင်းကို မဖြစ်မနေကုသရန်လိုအပ်ပြီး ထိုသို့ကုသရာတွင် အများအားဖြင့် ဆေးဝါးများသောက်သုံးခြင်း ပါဝင်သည်။ ကျောက်ကပ်ရောင်ရောဂါရှိခြင်းသည် ရောဂါပိုးဝင်ခြင်းနှင့် သွေးခဲခြင်း ဖြစ်နိုင်ခြေကို တိုးစေသည်။ ဤအရာများကို ကာကွယ်ရန် သင့်ဆရာဝန်သည် ဆေးဝါးများနှင့် အစားအသောက်ပြုပြင်မှုများ ပေါင်းစပ်ပြီး ကုသရန် အကြံပြုနိုင်ပါသည်။

ရောဂါလက္ခဏာများ

ကျောက်ကပ်ရောင်ခြင်း ရောဂါလက္ခဏာများတွင် အောက်ပါတို့ပါဝင်သည်:

• ဖောယောင်ခြင်း၊ အထူးသဖြင့် ခြေကျင်းဝတ် ခြေဖမိုးနှင့် မျက်လုံးတစ်ဝိုက်တွင် ဖောယောင်ခြင်း
• ဆီးတွင် အနည်အမြုပ်များခြင်းသည် ဆီးတွင်း ပရိုတင်းဓာတ်များလွန်းခြင်း၏ လက္ခဏာတစ်ခုဖြစ်သည်။
• အရည်များစုပုံနေခြင်းကြောင့် ကိုယ်အလေးချိန်တိုးလာခြင်း။
• သွေးတွင်းအဆီဓာတ်နှင့် ကိုလက်စထရောများ မြင့်တက်လာခြင်း။
• ဝမ်းဗိုက်နာခြင်း။
• ပင်ပန်းနွမ်းနယ်ခြင်း။
• အစားအသောက်ပျက်ခြင်း။

သင့်ကို စိုးရိမ်ပူပန်မှုဖြစ်စေသော လက္ခဏာများကို သတိပြုမိပါက ဆရာဝန်နှင့် တိုင်ပင်ဆွေးနွေးရန် အရေးကြီးပါသည်။ ကျောက်ကပ်ရောင်ခြင်း သို့မဟုတ် အခြားကျန်းမာရေးအခြေအနေတစ်ခုခုနှင့် ပတ်သက်သော စိုးရိမ်ဖွယ်လက္ခဏာများ ကြုံတွေ့ရသောအခါတွင် ဆေးကုသမှုကို ဆောလျင်စွာရှာဖွေခြင်းသည် အရေးကြီးပါသည်။ တိုင်ပင်ဆွေးနွေးမှုဖြင့် သင်သည် သင်၏စိုးရိမ်ပူပန်မှုများကို ဆရာဝန်နှင့် ဆွေးနွေးနိုင်ပြီး သင့်လျော်သောရောဂါရှာဖွေခြင်းနှင့် လမ်းညွှန်ခြင်းတို့ကို သိရှိရယူနိုင်ပါသည်။

အကြောင်းအရင်းများ

သင့်ကျောက်ကပ်၏သေးငယ်သော သွေးကြောမျှင်များ အစုအဝေးများကို ပျက်စီးစေခြင်းသည် ပုံမှန်အားဖြင့်ကျောက်ကပ်ရောင်ခြင်းကို ဖြစ်စေသည်။
သင့်ကျောက်ကပ်များမှတဆင့် သွေးများ စီးဆင်းလာသည်နှင့်အမျှသေးငယ်သော သွေးကြောမျှင်များ အစုအဝေးများသည် ၎င်းသွေးများကို စစ်ထုတ်ပေးပြီး သင့်ခန္ဓာကိုယ်အတွက် လိုအပ်သော အရာများနှင့် မလိုအပ်သော အရာများကို ခွဲခြားပေးသည်။ သင့်ခန္ဓာကိုယ်တွင်းရှိ အရည်ပမာဏကို ထိန်းထားရန် အဓိကလိုအပ်သော အယ်လ်ဘမ်မင်အသားဓါတ်ပရိုတင်းကို ကျန်းမာသော သေးငယ်သော သွေးကြောမျှင်များ အစုအဝေးများက သင့်ဆီးထဲသို့ ယိုစိမ့်ခြင်းမှ တားဆီးသည်။ကျောက်ကပ်ရောင်ခြင်းသည် သေးငယ်သော သွေးကြောမျှင်များ အစုအဝေးများပျက်စီးသွားသောအခါတွင် ဖြစ်ပေါ်ပြီး ခန္ဓာကိုယ်မှ ပရိုတင်းများ အလွန်အကျွံ ဆုံးရှုံးသွားပါသည်။

ကျောက်ကပ်ရောင်ခြင်းဖြစ်စေနိုင်သောအကြောင်းအရင်းများ

ကျောက်ကပ်ရောင်ခြင်းသည် ရောဂါများနှင့် အခြေအနေများစွာကြောင့် ဖြစ်လာနိုင်သည်-

• ဆီးချိုကျောက်ကပ်ရောဂါ။ ဆီးချိုရောဂါသည် သွေးကြောမျှင်များ အစုအဝေးများကိုထိခိုက်စေပြီး ကျောက်ကပ်ကို ထိခိုက်စေသည့်ဆီးချိုရောဂါကို ဖြစ်စေနိုင်သည်။
• Minimal Change diseaseကျောက်ကပ်ရောင်ခြင်း။ ကလေးများတွင် အဖြစ်ဆုံးအကြောင်းရင်းဖြစ်သည်။ Minimal Change Diseaseသည် ကျောက်ကပ်၏လုပ်ဆောင်ချက်များကို မမှန်မကန်ဖြစ်စေသည်။ ဖြစ်စေသောအကြောင်းအရင်းမှာ တိတိကျကျမသိရှိရပါ။ သို့သော် ကျောက်ကပ်တစ်ရှူးကို အဏုကြည့်မှန်ပြောင်းဖြင့် ကြည့်သောအခါ၊ ပုံမှန် သို့မဟုတ် ပုံမှန်နီးပါးဖြစ်နေသည်။
• Focal segmental glomerulosclerosis။ ဤအခြေအနေသည် သွေးကြောမျှင်များ အစုအဝေးများ၏အစိတ်အပိုင်းများအမာရွတ်ဖြစ်ပြီး၊ အခြားရောဂါတစ်ခု၊ မျိုးရိုးဗီဇမူမမှန်မှု၊ဆေးဝါးများ သို့မဟုတ် တိတိကျကျမသိရှိရသောအကြောင်းပြချက်များဖြင့်ဖြစ်ပေါ်လာနိုင်သည်။
• Membranous nephropathy ။ ဤကျောက်ကပ်အခြေအနေ၏အကြောင်းရင်းမှာ သွေးကြောမျှင်များ အစုအဝေးများအတွင်းရှိအမြှေးပါးများထူလာခြင်း။ ဤကဲ့သို့ထူလာခြင်းမှာ ကိုယ်ခံအားစနစ်မှ အနည်ထိုင်ခြင်းကြောင့်ဖြစ်သည်။ ဤရောဂါသည် အကြောင်းရင်းမရှိဘဲ ဖြစ်ပွားနိုင်သည် သို့မဟုတ် ၎င်းသည် ကင်ဆာ၊ အသည်းရောင် အသားဝါBပိုး၊ ငှက်ဖျားနှင့် အရေပြားလေးဖက်နာတို့နှင့် ဆက်စပ်နေနိုင်သည်။
• Systemic lupus erythematosus အရေပြားလေးဖက်နာရောဂါ ။ ဤကိုယ်ခံအားဆိုင်ရာရောဂါသည် သင့်ခန္ဓာကိုယ်အနှံ့ ရောင်ရမ်းမှုကို ဖြစ်စေနိုင်သည်။ ကျောက်ကပ်ကို ဆိုးရွားစွာ ပျက်စီးစေနိုင်တဲ့ အလားအလာလည်း ရှိပါတယ်။
• Amyloidosis ပရိုတိန်းအသားဓါတ်စုပုံရောဂါ။ သင့်ကိုယ်တွင်းအင်္ဂါများတွင် Amyloid ပရိုတိန်းများစုပုံလာခြင်းကြောင့် ဤရောဂါကို ဖြစ်စေသည်။ Amyloid များစုပုံခြင်းသည် ကျောက်ကပ်၏ စစ်ထုတ်ခြင်းစွမ်းရည်ကို မကြာခဏထိခိုက်စေပါသည်။

ကျောက်ကပ်ရောင်ခြင်းပိုမိုဖြစ်ပွားစေလွယ်သောအချက်များ

ကျောက်ကပ်ရောင်ခြင်း ဖြစ်နိုင်ခြေပိုများစေသောအကြောင်းရင်းများမှာ အောက်ပါတို့ ပါဝင်သည်။

• သင့်ကျောက်ကပ်ကို ပျက်စီးစေနိုင်တဲ့ ရောဂါများ။ကျောက်ကပ်ရောင်ခြင်းသည် ဆီးချိုရောဂါ၊ lupusအရေပြားလေးဖက်နာရောဂါ၊ amyloidosis၊ reflux nephropathy နှင့်အခြားကျောက်ကပ်ဆိုင်ရာရောဂါများကဲ့သို့သောရောဂါများနှင့်အခြေအနေများရှိသူများတွင်ပိုမိုဖြစ်နိုင်သည်။
• ဆေးဝါးများ။ အကိုက်အခဲပျောက်ဆေး နှင့် ပိုးသတ်ဆေးများသည် ကျောက်ကပ်ရောင်ခြင်းကိုဖြစ်စေနိုင်သော အရာများထဲတွင် ပါဝင်ပါသည်။
• ပိုးဝင်ခြင်း။ HIV, အသည်းရောင်အသားဝါ B ပိုး၊ C ပိုး၊ ငှက်ဖျား‌ရောဂါများသည် ကျောက်ကပ်ရောင်ခြင်းကို ပိုမိုဖြစ်စေနိုင်သည်။