အသံအိုးရောင်ရမ်းခြင်း
ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာ
အသံအိုးရောင်ရမ်းခြင်းသည် အသံကို အလွန်အကျွံသုံးခြင်း၊ တစုံတရာပွတ်တိုက်ခြင်း သို့မဟုတ် ပိုးဝင်ခြင်းတို့ကြောင့် ဖြစ်ပွားလေ့ရှိသည်။ အသံအိုးထဲတွင် အသံကြိုးများရှိပြီး ၎င်းတို့ကို ကြွက်သားနှင့် အရိုးနုများကို ဖုံးအုပ်ထားသည့် အချွဲမြှေးများဖြင့် ဖွဲ့စည်းထားသည်။ ပုံမှန်အခြေအနေတွင် ဤအသံကြိုးများသည် ချောမွေ့စွာ ပွင့်လိုက်ပိတ်လိုက်လုပ်ပြီး လှုပ်ရှားခြင်းနှင့် တုန်ခါခြင်းမှတဆင့် အသံထွက်ပေါ်စေသည်။
သို့သော် အသံအိုးရောင်ရမ်းသည့်အခါ အသံကြိုးများ ရောင်ရမ်းလာပြီး လေဖြတ်သန်းသည့်အခါ ထွက်ပေါ်လာမည့် အသံကို ပုံပျက်စေသည်။ ထို့ကြောင့် အသံအိုးရောင်ရမ်းသူများသည် အသံဝင်ခြင်းကို ခံစားရပြီး ပြင်းထန်သော အခြေအနေများတွင် အသံလုံးဝမထွက်နိုင်သည်အထိ ဖြစ်နိုင်သည်။
အသံအိုးရောင်ရမ်းခြင်းသည် ကာလတို သို့မဟုတ် ကာလရှည် (နာတာရှည်) ဖြစ်နိုင်သည်။ အများအားဖြင့် ယာယီ ဗိုင်းရပ်စ်ပိုးကူးစက်မှုကြောင့် ဖြစ်ပွားတတ်ပြီး စိုးရိမ်စရာမရှိပါ။ သို့သော် အသံဝင်ခြင်း ကြာရှည်နေပါက ပိုမိုပြင်းထန်သော ကျန်းမာရေးပြဿနာတစ်ခုခု ရှိနေနိုင်သည်ကို ပြသနေခြင်း ဖြစ်နိုင်သည်။ ထိုလက္ခဏာများကို သတိထားပြီး လိုအပ်ပါက ဆေးကုသမှု ခံယူသင့်သည်။
ရောဂါလက္ခဏာများ
အသံအိုးရောင်ရမ်းခြင်းသည် အများအားဖြင့် ဗိုင်းရပ်စ်ကဲ့သို့သော ပုံမှန်ဖျားနာခြင်းကြောင့် ဖြစ်ပွားလေ့ရှိပြီး ရက်သတ္တပတ်အနည်းငယ်အကြာတွင် ပျောက်ကင်းသွားတတ်သည်။ ပိုမိုပြင်းထန်သော သို့မဟုတ် ကြာရှည်သော ပြဿနာများသည် အသံအိုးရောင်ရမ်းခြင်း၏ အကြောင်းရင်းဖြစ်ခဲသည်။ အသံအိုးရောင်ရမ်းခြင်း၏ လက္ခဏာများမှာ အောက်ပါအတိုင်း ဖြစ်နိုင်သည်
- လည်ချောင်း ယားယံခြင်းနှင့် စပ်ဖျင်းဖျင်းဖြစ်ခြင်း
- အသံပျောက်ခြင်း သို့မဟုတ် အသံအားနည်းခြင်း
- လည်ချောင်းနာခြင်း
- လည်ချောင်းခြောက်ခြင်း
- ခြောက်သွေ့သော ချောင်းဆိုးခြင်း
- အသံဝင်ခြင်း
ကာလတို အသံအိုးရောင်ရမ်းခြင်း အများစုကို အသံအနားပေးခြင်းနှင့် ရေများများသောက်ခြင်း အပါအဝင် မိမိကိုယ်ကို ဂရုစိုက်သည့် နည်းလမ်းများဖြင့် ကုသနိုင်သည်။ ကာလတို အသံအိုးရောင်ရမ်းနေစဉ် အသံကို အလွန်အကျွံအသုံးပြုပါက အသံကြိုး ထိခိုက်ဒဏ်ရာရခြင်း ဖြစ်ပေါ်နိုင်သည်။
အကယ်၍ သင့်တွင် အသံအိုးရောင်ရမ်းသည့် လက္ခဏာများ နှစ်ပတ်ထက် ပိုကြာနေပါက ဆရာဝန်နှင့် ပြသရန် ချိန်းဆိုပါ။
အောက်ပါအခြေအနေများတွင် ဆရာဝန်နှင့် ချက်ချင်း ဆက်သွယ်ပါ
- အသက်ရှူရ ခက်ခဲခြင်း
- အဖျားကြီးခြင်း ကြာရှည်နေခြင်း
- ရက်သတ္တပတ် အတော်ကြာပြီး မသက်မသာဖြစ်မှု တိုးလာခြင်း
- သွေးပါအောင် ချောင်းဆိုးခြင်း
သင့်ကလေးတွင် အောက်ပါတို့ဖြစ်ပွားပါက ကလေးဆရာဝန်နှင့် ချက်ချင်း ဆက်သွယ်ပါ
- သွားရည်များ ပိုမိုကျခြင်း
- အဖျားရှိနေခြင်း
- အစားအစာ မျိုချရ ခက်ခဲခြင်း
- အသက်ရှူရ ခက်ခဲခြင်း
- အသက်ရှူသွင်းချိန်တွင် ကျယ်လောင်ပြီး စူးရှသော အသံထွက်ခြင်း
ဤလက္ခဏာများသည် အသံအိုးအောက်ရှိ လေပြွန်ရောင်ရမ်းခြင်းဖြစ်သော ကလေးလေပြွန်ရောင်ရောဂါ ခရူးပ်ရောဂါကို ညွှန်ပြနိုင်သည်။ ခရူးပ်ရောဂါ အများစုကို အိမ်တွင် ကုသနိုင်သော်လည်း ပြင်းထန်သော အခြေအနေများကို ဆရာဝန်ပြသရန် လိုအပ်သည်။ ဤလက္ခဏာများသည် လေပြွန်အဖုံး ရောင်ရမ်းခြင်းတွင်လည်း တွေ့ရှိနိုင်ပြီး ၎င်းသည် လူကြီးများနှင့် ကလေးများအတွက် အသက်အန္တရာယ် ရှိနိုင်သည်။
ဖြစ်ပွားစေသော အကြောင်းရင်းများ
အသံထွက်ပေါ်လာပုံ
စကားပြောဆိုခြင်းသည် အဆုတ်မှနေ၍ လေပြွန်နှင့် အသံအိုးတို့မှတဆင့် လေစီးဆင်းမှုဖြင့် ဖြစ်ပေါ်သော ဖြစ်စဉ်တစ်ခုဖြစ်သည်။ အသံအိုးအတွင်းရှိ အသံကြိုးများ တုန်ခါသောအခါ အသံထွက်ပေါ်လာသည်။ ဤအသံကို စကားလုံးများအဖြစ် ပုံဖော်ခြင်းကို အာခေါင်ပျော့၊ လျှာနှင့် နှုတ်ခမ်းများကို ထိန်းချုပ်သည့် ကြွက်သားများ၏ ညှိနှိုင်းလုပ်ဆောင်မှုဖြင့် ပြီးမြောက်စေသည်။ ထူးခြားသည်မှာ အသံကြိုးများသည် အသက်ရှူသွင်းစဉ် ပွင့်နေပြီး အသက်ရှူထုတ်စဉ် ပိတ်သွားပြီး တုန်ခါမှုမှတဆင့် အသံထွက်ပေါ်စေရန် ကူညီပေးသည်။
ရုတ်တရက် ဖြစ်ပွားသော အသံအိုးရောင်ရမ်းခြင်း
အသံအိုးရောင်ရမ်းမှု အများစုသည် ယာယီဖြစ်ပြီး အရင်းခံအကြောင်းတရား ပျောက်ကင်းသွားသောအခါ သက်သာသွားသည်။ ရုတ်တရက် အသံအိုးရောင်ရမ်းခြင်းကို ဖြစ်စေနိုင်သည်များမှာ
- သာမန်အအေးမိခြင်းနှင့် တူသော ဗိုင်းရပ်စ်ကူးစက်မှုများ
- အော်ဟစ်ခြင်း သို့မဟုတ် အသံကို အလွန်အကျွံသုံးခြင်းကြောင့် အသံကြိုးဒဏ်ဖြစ်ခြင်း
- ဘက်တီးရီးယား ကူးစက်မှုများ (ဖြစ်ပွားမှုနည်းသည်)
- မှိုစွဲခြင်း
နာတာရှည် အသံအိုးရောင်ရမ်းခြင်း
သုံးပတ်ထက် ပိုကြာသော အသံအိုးရောင်ရမ်းခြင်းကို နာတာရှည် အသံအိုးရောင်ရမ်းခြင်းဟု သတ်မှတ်သည်။ အရင်းအမြစ်တစုံတရာနှင့် ပွတ်တိုက်ထိတွေ့မှုများ အချိန်ကြာလာသည်နှင့်အမျှ ဤအမျိုးအစားကို ဖြစ်စေလေ့ရှိသည်။ နာတာရှည် အသံအိုးရောင်ရမ်းခြင်းကြောင့် အသံကြိုးတင်းခြင်း၊ ဒဏ်ရာရခြင်း သို့မဟုတ် အသံကြိုးပေါ်တွင် အလုံးအဖုများ ဖြစ်ပေါ်ခြင်းတို့ ဖြစ်နိုင်သည်။ ဖြစ်နိုင်ချေရှိသော အကြောင်းရင်းများမှာ
- မီးခိုး၊ ဓာတ်မတည့်စေသော အရာများ သို့မဟုတ် ဓာတုအငွေ့များကို ရှူရှိုက်မိခြင်း
- အစာအိမ်အချဉ်ရည် ပြန်ဆန်တက်ခြင်း ရောဂါ
- နာတာရှည် ထိပ်ကပ်နာရောင်ရမ်းခြင်း
- အရက် အလွန်အကျွံသောက်ခြင်း
- အသံကို ပုံမှန်ထပ် အလွန်အကျွံသုံးခြင်း (ဥပမာ ပရိသတ်များ၊ အဆိုတော်များ)
- ဆေးလိပ်သောက်ခြင်း
- နာတာရှည် အသံအိုးရောင်ရမ်းခြင်း၏ ဖြစ်လေ့နည်းသော အကြောင်းရင်းများမှာ
- မှို သို့မဟုတ် ဘက်တီးရီးယား ပိုးဝင်ခြင်း
- ကပ်ပါးကောင် ပိုးဝင်ခြင်း
အသံဝင်ခြင်းကို ကြာရှည်ဖြစ်စေသော အခြားအကြောင်းရင်းများမှာ
- ကင်ဆာ၊ အာရုံကြောပြဿနာများ၊ ခွဲစိတ်မှုကြောင့် အာရုံကြောထိခိုက်ခြင်း၊ ရင်ဘတ် သို့မဟုတ် လည်ပင်း ဒဏ်ရာရခြင်း သို့မဟုတ် အခြားဆေးဘက်ဆိုင်ရာ ပြဿနာများကြောင့် ဖြစ်နိုင်သော အသံကြိုးအကြောသေခြင်း
- အသံကြိုးများ ကွေးကောက်ခြင်း
- ကင်ဆာရောဂါ
ဖြစ်နိုင်ချေများစေသော အချက်များ
အသံအိုးရောင်ရမ်းခြင်းကို ဖြစ်စေနိုင်သော အချက်များမှာ
- ထိပ်ကပ်နာ၊ လေပြွန်ရောင်ရမ်းခြင်း သို့မဟုတ် အအေးမိခြင်းကဲ့သို့သော အသက်ရှူလမ်းကြောင်းဆိုင်ရာ ရောဂါဖြစ်ပွားနေခြင်း
- လုပ်ငန်းခွင်ရှိ ဓာတုပစ္စည်းများ၊ ဆေးလိပ်ငွေ့၊ အရက်အလွန်အကျွံသောက်ခြင်း သို့မဟုတ် အစာအိမ်အက်ဆစ်ကဲ့သို့သော ယားယံစေသော အရာများနှင့် ထိတွေ့နေရခြင်း
- အော်ဟစ်ခြင်း၊ သီချင်းဆိုခြင်း သို့မဟုတ် ကျယ်လောင်စွာ စကားပြောခြင်းကဲ့သို့ အသံကို အလွန်အကျွံ အသုံးပြုခြင်း
- ကိုယ်ခံအားစနစ် အားနည်းသူများ သို့မဟုတ် ရှူဆေး စတီးရွိုက်များကို သုံးစွဲနေသူများတွင် မှိုကြောင့်ဖြစ်သော အသံအိုးရောင်ရမ်းခြင်း ဖြစ်ပွားနိုင်သည်။
ရောဂါရှာဖွေခြင်း
အသံဝင်ခြင်းသည် အသံအိုးရောင်ရမ်းခြင်း၏ အများဆုံးတွေ့ရလေ့ရှိသော လက္ခဏာဖြစ်သည်။ ပိုးဝင်ခြင်း သို့မဟုတ် ယားယံခြင်း၏ ပြင်းထန်မှုပေါ်မူတည်၍ သင့်အသံသည် အနည်းငယ် အသံဝင်ခြင်းမှ လုံးဝအသံပျောက်သည်အထိ ပုံစံမျိုးစုံ ပြောင်းလဲနိုင်သည်။ သင့်တွင် အသံဝင်ခြင်း ကြာရှည်နေပါက ဆရာဝန်သည် သင့်ရောဂါရာဇဝင်နှင့် လက္ခဏာများကို မေးမြန်းပါလိမ့်မည်။ သင်၏ အသံကြိုးများကို စစ်ဆေးခြင်းနှင့် သင်စကားပြောသည်ကို နားထောင်ခြင်းအပြင် ဆရာဝန်သည် သင့်အား နား၊ နှာခေါင်း၊ လည်ချောင်း အထူးကုနှင့် ပြသရန် အကြံပြုနိုင်သည်။
အချို့အခြေအနေများတွင် ဆရာဝန်များသည် အသံအိုးရောင်ရမ်းခြင်းကို ရှာဖွေဖော်ထုတ်ရန် အောက်ပါနည်းလမ်းများကို အသုံးပြုနိုင်သည်
- လည်ချောင်းတို့ဖတ် ရယူခြင်း။ သင့်ဆရာဝန်သည် သင့်ကို စစ်ဆေးပြီး လည်ချောင်းတို့ဖတ် ရယူပါမည်။ ထို့နောက် ထိုနမူနာကို ပိုးမွှားများပေါက်ပွားစေသော ဓာတုပစ္စည်းနှင့် ထိတွေ့စေသည်။ အကယ်၍ ပိုးမွေးရာတွင် ရောဂါဖြစ်စေသော ဘက်တီးရီးယားကို တွေ့ရှိပါက ရောဂါရှိသည်ဟု သတ်မှတ်သည်။
- အသံအိုးကြည့်မှန်ပြောင်းကြည့်ခြင်း။ ဤလုပ်ငန်းစဉ်တွင် ဆရာဝန်သည် အသံကြိုးများကို မျက်မြင်စစ်ဆေးရန် အလင်းရောင်နှင့် မှန်အသေးစားလေးကို အသုံးပြု၍ သင့်လည်ချောင်းအတွင်းသို့ ကြည့်ရှုမည်ဖြစ်သည်။ ဆရာဝန်သည် ဖိုင်ဘာအော့ပတစ် မှန်ပြောင်းကိုလည်း အသုံးပြုနိုင်သည်။ ၎င်းသည် ပါးစပ် သို့မဟုတ် နှာခေါင်းမှတဆင့် လည်ချောင်းနောက်ဘက်သို့ ကင်မရာအသေးစားနှင့် မီးပါရှိသော ပိုက်ပျော့ကို ထည့်သွင်းခြင်းဖြစ်သည်။ ထို့နောက် သင်စကားပြောသောအခါ အသံကြိုးများ မည်သို့လှုပ်ရှားသည်ကို ဆရာဝန်က ကြည့်ရှုနိုင်သည်။
- အသားစယူ စစ်ဆေးခြင်း။ အကယ်၍ ဆရာဝန်သည် ပုံမှန်မဟုတ်သော အရာတစ်ခုခုကို တွေ့ရှိပါက အဏုကြည့်မှန်ပြောင်းဖြင့် စစ်ဆေးရန် တစ်ရှူးနမူနာယူခြင်းကို ပြုလုပ်နိုင်သည်။
ကုသခြင်း
အများအားဖြင့် ကာလတိုအသံအိုးရောင်ရမ်းခြင်းသည် တစ်ပတ်ခန့်အကြာတွင် သူ့အလိုလို သက်သာသွားတတ်သည်။ အသက်ပြင်းပြင်းရှူခြင်း၊ ရေဓာတ်ပြည့်ဝအောင်နေခြင်းနှင့် လေထုထဲတွင် အစိုဓာတ်ပေါင်းထည့်ခြင်း ကဲ့သို့သော တကိုယ်ရည် စောင့်ရှောက်သည့် နည်းလမ်းများသည်လည်း လက္ခဏာများကို သက်သာစေနိုင်သည်။
နာတာရှည် အသံအိုးရောင်ရမ်းခြင်းအတွက် ကုသမှုများသည် ရင်ပူခြင်း၊ ဆေးလိပ်သောက်ခြင်း သို့မဟုတ် အရက်အလွန်အကျွံသောက်ခြင်း ကဲ့သို့သော ရောဂါ အရင်းခံအကြောင်းတရားများ ဖြေရှင်းခြင်းအပေါ် အဓိကမူတည်သည်။
တစ်ခါတစ်ရံ အသုံးပြုသော ဆေးဝါးများမှာ
- ပိုးသတ်ဆေးများ။ အသံအိုးရောင်ရမ်းခြင်း၏ အကြောင်းရင်းသည် အမြဲတမ်းလိုလို ဗိုင်းရပ်စ်ကြောင့်ဖြစ်၍ ပိုးသတ်ဆေးသောက်ခြင်းသည် အထောက်အကူမဖြစ်နိုင်ပါ။ သို့သော် သင့်တွင် ဘက်တီးရီးယားကြောင့်ဖြစ်သော ရောဂါရှိပါက ဆရာဝန်သည် ပိုးသတ်ဆေးသောက်ရန် အကြံပြုနိုင်သည်။
- ကော်တီကိုစတီးရွိုက်များ။ ဤဆေးများသည် တစ်ခါတစ်ရံ အသံကြိုးရောင်ရမ်းခြင်းကို လျှော့ချရာတွင် ကူညီပေးနိုင်သည်။ သို့သော် ကလေးငယ်များတွင် အသံအိုးရောင်ရမ်းခြင်းသည် ခရုပ်ရောဂါနှင့် ဆက်စပ်နေသည့်အခါမျိုးကဲ့သို့ အသံအိုးရောင်ရမ်းခြင်းကို အရေးပေါ်ကုသရန် လိုအပ်သည့် အခြေအနေများတွင်သာ ဤနည်းလမ်းကို သုံးလေ့ရှိသည်။
အသံဆိုင်ရာ ကုထုံးသည် အသံပြဿနာများကို ပိုဆိုးစေသည့် အပြုအမူများကို နားလည်ရန်နှင့် လျှော့ချရန် ထိရောက်သော နည်းလမ်းဖြစ်သည်။ အသံဆိုင်ရာ ကုထုံးတွင် စကားပြောကုထုံးပညာရှင် သို့မဟုတ် အသံနည်းပြနှင့် တွဲဖက်လုပ်ဆောင်ရပြီး ၎င်းတို့က မှန်ကန်သော အသံအသုံးပြုနည်းများ၊ အသက်ရှူလေ့ကျင့်ခန်းများနှင့် အသံပေါ်တွင် ဝန်ပိမှုလျှော့ချရန် မဟာဗျူဟာများကို လမ်းညွှန်ပေးနိုင်သည်။
ရှေးရိုးစွဲကုသမှုများနှင့် မလုံလောက်သော အခြေအနေအချို့တွင် ခွဲစိတ်ကုသရန် လိုအပ်နိုင်သည်။ ခွဲစိတ်မှု ရွေးချယ်စရာများတွင် အသံကြိုးများရှိ ဖွဲ့စည်းပုံဆိုင်ရာ မူမမှန်မှုများကို ဖြေရှင်းခြင်း၊ အလုံးအဖုများ သို့မဟုတ် အနာများကို ဖယ်ရှားခြင်း သို့မဟုတ် အသံပြဿနာများကို ဖြစ်စေသော အခြားအရင်းခံ ပြဿနာများကို ပြုပြင်ခြင်းတို့ ပါဝင်နိုင်သည်။ သင့်အခြေအနေနှင့် လိုအပ်ချက်များအပေါ် မူတည်၍ အသင့်တော်ဆုံး ကုသမှုလုပ်ငန်းစဉ်ကို ဆုံးဖြတ်ရန် ကျန်းမာရေးပညာရှင် သို့မဟုတ် နား၊ နှာခေါင်း၊ လည်ချောင်း အထူးကုနှင့် တိုင်ပင်ဆွေးနွေးရန် အရေးကြီးသည်။
