အကြောင်းရင်းမရှိဘဲ ဦးခေါင်းခွံအတွင်း ဖိအားမြင့်တက်ခြင်း

ရောဂါရှာဖွေခြင်း

အကြောင်းရင်းမရှိဘဲ ဦးခေါင်းခွံအတွင်း ဖိအားမြင့်တက်ခြင်းကို ရောဂါရှာဖွေအတည်ပြုရန် ခဲယဉ်းနိုင်ပါသည်၊၊ အဘယ်ကြောင့်ဆိုသော် ၎င်း၏လက္ခဏာများသည် ဦးနှောက်အကျိတ်ရှိသူများ၏ လက္ခဏာများနှင့် ဆင်တူသောကြောင့် ဖြစ်ပါသည်၊၊

ဦးနှောက်အကျိတ် ဖြစ်နိုင်ခြေကို ဖယ်ထုတ်ရန်နှင့် ရောဂါလက္ခဏာများ၏ အကြောင်းရင်းကို သိရှိနိုင်ရန် ကျန်းမာရေးစောင့်ရှောက်သူသည် လူနာ၏ ကျန်းမာရေးရာဇဝင်နှင့် လက္ခဏာများကို လေ့လာခြင်း၊ ခန္ဓာကိုယ်ကို စစ်ဆေးခြင်းနှင့် အချို့သော စမ်းသပ်မှုများ ပြုလုပ်ရန် လိုအပ်ပါလိမ့်မည်၊၊

ပြုလုပ်ရမည့် စမ်းသပ်မှုများတွင် အောက်ပါတို့ ပါဝင်နိုင်ပါသည်-

• မျက်စိစစ်ဆေးခြင်း။ အမြင်အာရုံတွင် အကွယ်အလပ်များ ရှိ၊ မရှိ သိနိုင်ရန် အမြင်အာရုံနယ်ပယ်ကို စစ်ဆေးပါလိမ့်မည်၊၊ ယေဘုယျအားဖြင့် မျက်စိနောက်ဘက်ရှိ အမြင်အာရုံကြောများ ရောင်ရမ်းမှု ရှိ၊ မရှိကို စစ်ဆေးပြီး မျက်စိဓာတ်မှန်များ ရိုက်ကူးခြင်းဖြင့်လည်း အမြင်လွှာအလွှာများ၏ အထူကို တိုင်းတာစစ်ဆေးပါလိမ့်မည်၊၊
• ဦးနှောက်ပုံရိပ်ဖော် စစ်ဆေးခြင်း။ ဦးနှောက်အကျိတ် သို့မဟုတ် သွေးခဲခြင်းကဲ့သို့သော ဆင်တူသည့် လက္ခဏာပေးတတ်သည့် အခြေအနေများကို ဖယ်ထုတ်နိုင်ရန် ဦးနှောက်ကွန်ပျူတာဓာတ်မှန် သို့မဟုတ် သံလိုက်ဓာတ်မှန်များ ရိုက်ကူးရန် အကြံပြုနိုင်ပါသည်၊၊
• ခါးရိုးဆစ်အတွင်းမှ အရည်ထုတ်၍ စစ်ဆေးခြင်း။ ဤလုပ်ငန်းစဉ်တွင် ခါးအောက်ပိုင်းရှိ အရိုးဆစ်နှစ်ခုကြားမှ အပ်ဖြင့်ထိုး၍ ဦးနှောက်နှင့် အာရုံကြောအရည် အနည်းငယ်ကို ထုတ်ယူကာ ဓာတ်ခွဲခန်းတွင် စစ်ဆေးခြင်း ဖြစ်ပါသည်၊၊ ၎င်းသည် ဦးခေါင်းခွံအတွင်းရှိ ဖိအားပမာဏကို တိုင်းတာရန်အတွက်လည်း အထောက်အကူပြုပါသည်၊၊

ကုသခြင်း

ဝေဒနာရှင်အများစုတွင် ကုသမှုခံယူပြီးနောက် ရောဂါလက္ခဏာများ ကောင်းမွန်လာလေ့ရှိပါသည်၊၊ ကုသမှု၏ အဓိကရည်ရွယ်ချက်မှာ ဝေဒနာကို သက်သာစေရန်နှင့် အမြင်အာရုံ ပိုမိုဆိုးရွားမသွားစေရန် ကာကွယ်ပေးဖို့ ဖြစ်ပါသည်၊၊

ကုသမှုခံယူပြီးနောက်တွင်လည်း မိမိ၏ အမြင်အာရုံကို စောင့်ကြည့်ရန် ဆရာဝန်နှင့် ပုံမှန်ပြသရန် အလွန်အရေးကြီးပါသည်၊၊ စနစ်တကျ ကုသမှုမခံယူပါက အမြင်အာရုံ လုံးဝကွယ်သွားသည်အထိ ဖြစ်နိုင်ပါသည်၊၊

ကုသမှုနည်းလမ်းများမှာ အောက်ပါအတိုင်း ဖြစ်ပါသည်-

• ကိုယ်အလေးချိန် လျှော့ချခြင်း။ ကိုယ်အလေးချိန် လွန်ကဲသူများအတွက် ကိုယ်အလေးချိန် လျှော့ချခြင်းသည် ဝေဒနာကို သက်သာစေပါသည်၊၊ ဆရာဝန်အနေဖြင့် ခန္ဓာကိုယ်အလေးချိန်၏ ၅ ရာခိုင်နှုန်းမှ ၁၀ ရာခိုင်နှုန်းအထိ လျှော့ချရန် အကြံပြုနိုင်ပါသည်၊၊ ဆားပါဝင်မှုနည်းသော အစားအစာများကို စားသုံးခြင်းဖြင့်လည်း ရောဂါလက္ခဏာများကို လျော့ပါးစေနိုင်ပါသည်၊၊
• ဆေးဝါးများ။
  • မျက်စိရေတိမ်ရောဂါကုဆေးများ။ ဦးနှောက်နှင့် အာရုံကြောအရည် ထုတ်လုပ်မှုကို လျှော့ချရန်အတွက် ဤဆေးကို ညွှန်ကြားနိုင်ပါသည်၊၊ ဘေးထွက်ဆိုးကျိုးအနေဖြင့် ဗိုက်အောင့်ခြင်း၊ ကျောက်ကပ်ကျောက်တည်ခြင်း၊ နုံးချိခြင်းနှင့် ခြေဖျားလက်ဖျားများ ကျဉ်ခြင်းတို့ ဖြစ်နိုင်ပါသည်၊၊
  • ဆီးဆေးများ။ အရည်များ စုပုံနေမှုကို လျှော့ချရန်နှင့် ဆီးသွားနှုန်းကောင်းစေရန် အခြားဆီးဆေးများကိုလည်း တွဲဖက်သုံးနိုင်ပါသည်၊၊
  • ခေါင်းကိုက်ဝေဒနာကုဆေးများ။ ဤရောဂါနှင့်အတူ ပါလာတတ်သော ပြင်းထန်သည့် ခေါင်းကိုက်ဝေဒနာကို သက်သာစေရန် ဆေးဝါးများ အသုံးပြုနိုင်ပါသည်၊၊
• ခွဲစိတ်ကုသခြင်း။ အမြင်အာရုံ ပိုမိုဆိုးရွားလာသည့် ပြင်းထန်သော အခြေအနေများတွင် ခွဲစိတ်ရန် လိုအပ်နိုင်ပါသည်၊၊
  • အမြင်အာရုံကြောဖိအားလျှော့ချခြင်း။ ဤနည်းလမ်းတွင် အမြင်အာရုံကြောကို ဖုံးအုပ်ထားသော အလွှာပါးကို လှီးဖြတ်၍ ပိုလျှံနေသော အရည်များကို ထွက်စေခြင်း ဖြစ်ပါသည်၊၊ မျက်စိတစ်ဖက်ကို ကုသရုံဖြင့် နှစ်ဖက်စလုံးအတွက် အကျိုးရှိတတ်သော်လည်း အမြင်အာရုံဆိုင်ရာ ပြဿနာများ ထပ်မံဖြစ်ပေါ်နိုင်သည့် စွန့်စားမှုလည်း ရှိပါသည်၊၊
  • အရည်ထုတ်ပြွန်ထည့်ခြင်း။ အခြားကုသမှုများဖြင့် မသက်သာပါက ဦးနှောက် သို့မဟုတ် ခါးရိုးအတွင်းမှ ပိုလျှံသော အရည်များကို ဝမ်းဗိုက်အတွင်းသို့ စီးဆင်းစေရန် ပိုက်ထည့်၍ ကုသခြင်း ဖြစ်ပါသည်၊၊ သို့သော် ဤပိုက်များ ပိတ်ဆို့တတ်သဖြင့် နောက်ထပ် ခွဲစိတ်မှုများ လိုအပ်နိုင်ပါသည်၊၊
  • သွေးပြန်ကြောအတွင်း အထောက်အကူပြုပစ္စည်းထည့်ခြင်း။ ဦးခေါင်းအတွင်းရှိ သွေးပြန်ကြောကြီးများတွင် သွေးလည်ပတ်မှု ကောင်းမွန်စေရန် အထောက်အကူပြုပစ္စည်း ထည့်သွင်းခြင်း ဖြစ်ပါသည်၊၊ ဤနည်းလမ်းနှင့် ပတ်သက်၍ အကျိုးကျေးဇူးနှင့် ဆိုးကျိုးများကို သုတေသနများ ပိုမိုပြုလုပ်ရန် လိုအပ်နေပါသေးသည်၊၊

Doctors who treat this condition