ကလေးအတက်ရောဂါ

အကျဉ်းချုပ်အကြောင်းအရာ

ကလေးအတက်ရောဂါ ဆိုသည်မှာ ကလေးငယ်များတွင် ဖြစ်ပွားတတ်သော အာရုံကြောဆိုင်ရာ ရောဂါအခြေအနေတစ်မျိုးဖြစ်ပြီး ဦးနှောက်အတွင်း ပုံမှန်မဟုတ်သော လျှပ်စစ်စီးဆင်းမှုများ ရုတ်တရက် ဖြစ်ပေါ်လာခြင်းကြောင့် အတက်ရောဂါလက္ခဏာများ ဖြစ်ပွားစေသည်၊၊ အတက်ရောဂါလက္ခဏာများသည် ကလေးငယ် သတိမေ့သွားခြင်းနှင့် ခန္ဓာကိုယ်ကို မထိန်းချုပ်နိုင်ဘဲ လှုပ်ရှားခြင်းများ အပါအဝင် ပုံစံအမျိုးမျိုးဖြင့် ပြသနိုင်သည်၊၊ သို့သော်လည်း အတက်ရောဂါလက္ခဏာအားလုံးမှာ ပုံစံတူညီကြသည်မဟုတ်ဘဲ အချို့ကလေးငယ်များတွင် အတက်ရောဂါဖြစ်ပွားနေစဉ်အတွင်း ငေးငိုင်နေခြင်း သို့မဟုတ် စိတ်ရှုပ်ထွေးနေခြင်း စသည့် အမူအရာများကို ပြသနိုင်သည်၊၊

အတက်ရောဂါသည် တက်ခြင်းကို ဖြစ်စေနိုင်သော်လည်း ကလေးငယ်များတွင် တက်ခြင်းတိုင်းမှာ အတက်ရောဂါကြောင့်ဟု မဆိုနိုင်ကြောင်း သတိပြုရန် အရေးကြီးသည်၊၊ အတက်ရောဂါရှိကြောင်း အတည်ပြုရန်အတွက် ကျန်းမာရေးစောင့်ရှောက်မှုပေးသူသည် ကလေးငယ်တွင် အခြားအခြေခံကျန်းမာရေးပြဿနာများနှင့် ဆက်စပ်မှုမရှိဘဲ အကြိမ်ကြိမ် တက်ခြင်းရှိ၊ မရှိကို စစ်ဆေးလိမ့်မည်၊၊

ကျန်းမာရေးကျွမ်းကျင်သူများသည် ဤရောဂါအခြေအနေကို ကလေးအတက်ရောဂါ သို့မဟုတ် အတက်ရောဂါစုဟု ခေါ်ဆိုနိုင်သည်၊၊ ကလေးငယ်များရှိ အတက်ရောဂါအတွက် ကုသမှုပုံစံများတွင် ဆေးဝါးဖြင့်ကုသခြင်း၊ ခွဲစိတ်ကုသခြင်း၊ ဆေးဘက်ဆိုင်ရာကိရိယာများ ထည့်သွင်းခြင်းနှင့် ကီတိုဂျန်းနစ် အစားအသောက်ပုံစံကို အသုံးပြုခြင်းတို့ ပါဝင်နိုင်သည်၊၊

ကလေးငယ်များတွင် ဖြစ်ပွားတတ်သော အတက်ရောဂါ အမျိုးအစားများစွာရှိပြီး ၎င်းတို့မှာ-

• ငေးတက်သော အတက်ရောဂါ၊၊ ၎င်းသည် ခေတ္တခဏ စိတ်ရှုပ်ထွေးခြင်းနှင့် ငေးငိုင်နေခြင်းတို့ကို ဖြစ်စေပြီး ထိုအချိန်အတွင်း ကလေးငယ်သည် ပတ်ဝန်းကျင်လှုံ့ဆော်မှုများကို တုံ့ပြန်နိုင်စွမ်းမရှိပေ၊၊
• ရိုလန်ဒစ် အတက်ရောဂါ၊၊ ဤအတက်ရောဂါအမျိုးအစားသည် အိပ်ပျော်ခါနီး သို့မဟုတ် နိုးခါနီးအချိန်များတွင် ဖြစ်ပွားတတ်ပြီး ခန္ဓာကိုယ်၏ တစ်ဖက်ခြမ်းတွင် မထိန်းချုပ်နိုင်သော လှုပ်ရှားမှုများကို ဖြစ်စေနိုင်ကာ စကားပြောဆိုခြင်းကိုလည်း ထိခိုက်စေနိုင်သည်၊၊
• ဆယ်ကျော်သက် ကြွက်သားတုန်ခါ အတက်ရောဂါ၊၊ ပျိုဖော်ဝင်စအရွယ်တွင် အဖြစ်များပြီး အဓိကအားဖြင့် နိုးလာချိန်တွင် ကြွက်သားများ တုန်ခါခြင်းနှင့် ဆတ်ခနဲလှုပ်ရှားခြင်းတို့ကို ဖြစ်စေသည်၊၊
• ကလေးသူငယ် အကြောဆွဲရောဂါ (ဝက်စ် ရောဂါစု)၊၊ ၎င်းတို့သည် မွေးကင်းစကလေးငယ်များတွင် ဖြစ်ပွားသော ပြင်းထန်သည့် အတက်ရောဂါများဖြစ်ပြီး အဓိကအားဖြင့် အိပ်စက်မှု အကူးအပြောင်းအချိန်များတွင် တုန်ခါခြင်း၊ ဆတ်ခနဲလှုပ်ရှားခြင်းနှင့် ခန္ဓာကိုယ်ကို မထိန်းချုပ်နိုင်ဘဲ လှုပ်ရှားခြင်းတို့ကို ဖြစ်စေသည်၊၊
• လင်းနော့စ်-ဂက်စ်တော့် ရောဂါစု၊၊ ဤရောဂါစုသည် ရုတ်တရက် ကြွက်သားများ တောင့်တင်းသွားခြင်းနှင့် ပြော့ခွေသွားခြင်းတို့ကို ဖြစ်စေသည့်အပြင် အတက်ရောဂါဖြစ်နေစဉ်အတွင်း သတိမရှိခြင်းနှင့် တုံ့ပြန်မှုမရှိခြင်းတို့ကို ဖြစ်စေသည်၊၊

ရောဂါလက္ခဏာများ

ကလေးငယ်များတွင် အတက်ရောဂါ၏ ပထမဆုံးလက္ခဏာမှာ တက်ခြင်းဖြစ်သည်၊၊ တက်နေစဉ်အတွင်း ကလေးငယ်များတွင် အောက်ပါအတိုင်း ပြသနိုင်သည်-

• မေ့လဲခြင်း သို့မဟုတ် သတိလစ်သွားခြင်း၊၊
• ခန္ဓာကိုယ် အစိတ်အပိုင်းတစ်ခုခုကို မထိန်းချုပ်နိုင်ဘဲ ဆတ်ခနဲလှုပ်ခြင်း၊ တုန်ခါခြင်း သို့မဟုတ် ထပ်တလဲလဲ လှုပ်ရှားခြင်း၊၊
• စကားမပြောနိုင်ခြင်း၊ နှုတ်ခမ်းကို တသသလုပ်ခြင်း သို့မဟုတ် ပါးစပ်ဖြင့် ဝါးနေသကဲ့သို့ လုပ်ခြင်း၊၊
• နှလုံးခုန်နှုန်း မြန်ခြင်း၊၊
• အသက်ရှူမြန်ခြင်း၊၊

မွေးကင်းစကလေးငယ်များတွင် အတက်ရောဂါလက္ခဏာကို ခွဲခြားသိမြင်ရန်မှာ လူကြီးကလေးများထက် ပိုမိုခက်ခဲနိုင်သည်၊၊ ပြုစုစောင့်ရှောက်သူတစ်ဦးအနေဖြင့် ပုံမှန်မဟုတ်သော အမူအရာမှန်သမျှကို လေ့လာမှတ်သားရန်၊ ထိုအမူအရာများ မည်မျှကြာသည်ကို မှတ်သားရန်နှင့် ထိုလေ့လာတွေ့ရှိချက်များကို ကလေး၏ ကျန်းမာရေးစောင့်ရှောက်မှုပေးသူနှင့် ဆွေးနွေးရန် အရေးကြီးသည်၊၊

တက်ပြီးနောက်တွင် ကလေးငယ်သည် နုံးချိခြင်း သို့မဟုတ် ဖြစ်ပျက်ခဲ့သည့်အရာများအပေါ် စိတ်ရှုပ်ထွေးခြင်းတို့ကို ခံစားရနိုင်သည်၊၊ အတက်ရပ်သွားသည်အထိ ၎င်းတို့သည် ဖြစ်ပျက်ခဲ့သမျှကို မည်သည်မျှ မှတ်မိလိမ့်မည်မဟုတ်ပေ၊၊ တက်ခြင်းကြောင့် ခေါင်းကိုက်ခြင်းများလည်း မကြာခဏ ဖြစ်ပေါ်တတ်သည်၊၊

ကလေးငယ်တွင် အောက်ပါတို့ ခံစားရပါက ဆေးဘက်ဆိုင်ရာ အကူအညီ ရယူပါ-

• တက်သည့်အကြိမ်အရေအတွက် ပိုမိုများပြားလာခြင်း၊၊
• အတက်ကျဆေးများကြောင့် ဘေးထွက်ဆိုးကျိုးများ ခံစားရခြင်း၊၊
• စိုးရိမ်ပူပန်ခြင်း သို့မဟုတ် စိတ်ဓာတ်ကျခြင်း၊၊
• မျှော်မှန်းထားသည့် အသက်အရွယ်အလိုက် ဖွံ့ဖြိုးမှုအဆင့်ဆင့်ကို မရောက်ရှိခြင်း၊၊

အကြောင်းရင်းများ

ကလေးငယ်များတွင် အတက်ရောဂါဖြစ်ပွားရခြင်းမှာ ဦးနှောက်အတွင်း မထိန်းချုပ်နိုင်သော လှပ်စစ်စီးဆင်းမှုများကြောင့် ဦးနှောက်ဆဲလ်များအကြား ဆက်သွယ်မှုကို အနှောင့်အယှက်ဖြစ်စေသောကြောင့်ဖြစ်သည်၊၊ ဖြစ်နိုင်ခြေရှိသော အကြောင်းရင်းများတွင် ဦးခေါင်းဒဏ်ရာရခြင်း၊ မွေးဖွားစဉ် နောက်ဆက်တွဲပြဿနာများ၊ ကူးစက်ရောဂါများ၊ မွေးရာပါ ဦးနှောက်ပုံစံမမှန်ခြင်း၊ မျိုးရိုးဗီဇဆိုင်ရာ ပါဝင်မှု သို့မဟုတ် တိကျသော အကြောင်းရင်းမရှိဘဲ ဖြစ်ပွားခြင်းတို့ ပါဝင်သည်၊၊ ကလေးအတက်ရောဂါ၏ မြစ်ဖျားခံရာများကို ပိုမိုနားလည်နိုင်ရန် လက်ရှိတွင် သုတေသနပြုမှုများ ဆက်လက်လုပ်ဆောင်နေသည်၊၊

ဖြစ်နိုင်ခြေရှိသောအချက်များ

ကလေးငယ်တစ်ဦးတွင် အောက်ပါအချက်များရှိပါက အတက်ရောဂါဖြစ်ပွားရန် အလားအလာ ပိုများနိုင်သည်-

• မျိုးရိုးဗီဇဆိုင်ရာ အလားအလာ သို့မဟုတ် ၎င်းတို့၏ ဇီဝမိသားစုအတွင်း အတက်ရောဂါရာဇဝင်ရှိခြင်း၊၊
• ဦးနှောက်ထိခိုက်ဒဏ်ရာရဖူးသည့် ရာဇဝင်ရှိခြင်း၊၊
• ဦးနှောက်အတွင်း ကူးစက်ရောဂါဖြစ်ဖူးသည့် ရာဇဝင်ရှိခြင်း၊၊
• အခြားသော အာရုံကြောဆိုင်ရာ ရောဂါစုများ သို့မဟုတ် ပြဿနာများရှိခြင်း၊၊