ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာ
အမျိုးသားတစ်ဦးသည် ကာမစိတ်နှိုးဆွမှု ကြာရှည်စွာ ရရှိနေသော်လည်း ကာမဆန္ဒအထွတ်အထိပ်သို့ ရောက်ရန်နှင့် သုတ်လွှတ်ရန် အချိန်အလွန် ကြာမြင့်နေခြင်းကို သုတ်လွှတ်နှေးခြင်းဟု ခေါ်ဆိုပါသည်။ အချို့သော အမျိုးသားများတွင် သုတ်လွှတ်နိုင်စွမ်း လုံးဝမရှိခြင်းမျိုးလည်း ဖြစ်နိုင်ပါသည်။
သုတ်လွှတ်ရန် အချိန်အလွန် ကြာမြင့်ခြင်းသည် ပျော်ရွှင်ကြည်နူးမှုထက် စိတ်ပျက်အားမလိုအားမရှိဖြစ်မှုကို ခံစားရစေနိုင်ပါသည်။ ဤအခြေအနေသည် ရေတိုပြဿနာ သို့မဟုတ် ရေရှည်ပြဿနာလည်း ဖြစ်နိုင်ပါသည်။ နာတာရှည်ရောဂါအချို့၊ ခွဲစိတ်မှုများနှင့် ဆေးဝါးများသည် သုတ်လွှတ်နှေးခြင်းကို ဖြစ်စေနိုင်သည့် အကြောင်းရင်းများ ဖြစ်ပါသည်။ ကုသမှုနည်းလမ်းမှာ ဖြစ်ပွားရသည့် အရင်းခံအကြောင်းရင်းပေါ်တွင် မူတည်ပါလိမ့်မည်။
ကာမဆန္ဒအထွတ်အထိပ်သို့ ရောက်ရှိရန်အတွက် သတ်မှတ်ထားသော အချိန်ကာလဟူ၍ မရှိကြောင်း အများက လက်ခံထားကြပါသည်။ အမျိုးသားများတွင် တစ်ခါတစ်ရံ သုတ်လွှတ်နှေးခြင်း ဖြစ်ပေါ်တတ်ပြီး ၎င်းသည် ပုံမှန်အားဖြင့် ပြဿနာမဟုတ်ပါ။ သို့သော် ဤသို့နှေးကွေးခြင်းက ဆက်တိုက်ဖြစ်နေလျှင် သို့မဟုတ် မိမိနှင့် မိမိ၏ အဖော်အတွက် စိတ်သောကဖြစ်စေလျှင်မူ စိုးရိမ်စရာ အခြေအနေ ဖြစ်လာပါသည်။
ရောဂါလက္ခဏာများ
သုတ်လွှတ်နှေးခြင်း ခံစားနေရသူအချို့သည် ကာမဆန္ဒအထွတ်အထိပ်သို့ ရောက်ရန် မိနစ် ၃၀ သို့မဟုတ် ထိုထက်မက ကြာရှည်စွာ နှိုးဆွမှု ခံယူရန် လိုအပ်တတ်ပါသည်။ အခြားတစ်ဖက်တွင်မူ အချို့သော အမျိုးသားများသည် သုတ် လုံးဝမလွှတ်နိုင်ခြင်းမျိုး ဖြစ်နိုင်ပါသည်။
ဤသို့သော အခြေအနေမျိုးတွင် ကာမဆက်ဆံမှု ကြာရှည်လာခြင်းကြောင့် ရုပ်ပိုင်းဆိုင်ရာ နုံးခွေခြင်းနှင့် မအီမသာဖြစ်ခြင်းတို့ကို ခံစားရနိုင်ပါသည်။ ထို့အပြင် မိမိ၏ အဖော်ဖြစ်သူမှာလည်း ၎င်း၏ ဆွဲဆောင်မှုရှိခြင်းနှင့် စွမ်းဆောင်နိုင်စွမ်းတို့အပေါ် သံသယဝင်လာနိုင်သဖြင့် ထိခိုက်မှုများ ရှိနိုင်ပါသည်။
အမျိုးသားအတော်များများတွင် အဖော်နှင့်အတူ ကာမဆက်ဆံစဉ် ကာမဆန္ဒအထွတ်အထိပ်သို့ ရောက်ရန် ခက်ခဲတတ်သော်လည်း တစ်ကိုယ်ရည်အာသာဖြေစဉ်တွင်မူ ပုံမှန်သုတ်လွှတ်နိုင်ခြင်းမျိုးလည်း ရှိတတ်ပါသည်။
ရောဂါလက္ခဏာများအပေါ် မူတည်၍ သုတ်လွှတ်နှေးခြင်းကို အောက်ပါအတိုင်း ခွဲခြားနိုင်ပါသည်
- ယခင်က ပုံမှန်ဖြစ်ခဲ့သော်လည်း နောက်ပိုင်းမှ စတင်ဖြစ်ပေါ်လာခြင်း
- လိင်ပိုင်းဆိုင်ရာ ရင့်ကျက်လာချိန်မှစ၍ တစ်သက်လုံး ဖြစ်ပေါ်နေခြင်း
- မည်သည့်အဖော် သို့မဟုတ် မည်သည့်နှိုးဆွမှုမျိုးနှင့်မဆို ဖြစ်ပေါ်ခြင်း
- သီးခြားအခြေအနေအချို့တွင်သာ ဖြစ်ပေါ်ခြင်း တို့ဖြစ်ပါသည်။
သုတ်လွှတ်နှေးခြင်းနှင့် ပတ်သက်၍ ကျန်းမာရေးစောင့်ရှောက်သူနှင့် ဆွေးနွေးတိုင်ပင်ရန် အကြံပြုလိုပါသည်။ မိမိတစ်ဦးတည်းကြောင့်ဖြစ်စေ၊ အဖော်နှင့် ပြဿနာရှိ၍ဖြစ်စေ ဆေးဘက်ဆိုင်ရာ အကြံဉာဏ် ရယူသင့်ပါသည်။ အထူးသဖြင့် သုတ်လွှတ်နှေးခြင်းနှင့် ဆက်စပ်နိုင်သော ရောဂါအခံများ ရှိနေခြင်း သို့မဟုတ် ဆေးဝါးများ သောက်သုံးနေရခြင်းမျိုး ရှိပါက ဆရာဝန်နှင့် ပြသရန် အရေးကြီးပါသည်။
ဖြစ်ပွားရသည့် အကြောင်းရင်းများ
သုတ်လွှတ်နှေးခြင်းသည် ဆေးဝါးများ၊ နာတာရှည်ရောဂါများနှင့် ခွဲစိတ်မှုများကဲ့သို့သော ရုပ်ပိုင်းဆိုင်ရာ အကြောင်းရင်းများအပြင် စိတ်ပိုင်းဆိုင်ရာ အကြောင်းရင်းများ ပေါင်းစပ်မှုကြောင့် ဖြစ်လေ့ရှိပါသည်။ မူးယစ်ဆေးဝါး သုံးစွဲခြင်း သို့မဟုတ် စိတ်ဓာတ်ကျခြင်း၊ စိုးရိမ်ပူပန်ခြင်းနှင့် စိတ်ဖိစီးမှုကဲ့သို့သော စိတ်ကျန်းမာရေး ပြဿနာများကြောင့်လည်း ဖြစ်နိုင်ပါသည်။
- ရုပ်ပိုင်းဆိုင်ရာ အကြောင်းရင်းများမှာ အောက်ပါအတိုင်း ဖြစ်ပါသည်
- ဆီးချိုကြောင့် အာရုံကြော ထိခိုက်ခြင်း၊ လေဖြတ်ခြင်း သို့မဟုတ် ခါးရိုးဆစ် အာရုံကြော ဒဏ်ရာရခြင်း။
- အမျိုးသား မျိုးပွားစနစ်တွင် မွေးရာပါ ချို့ယွင်းချက်ရှိခြင်း။
- ကာမဆန္ဒ အထွတ်အထိပ်ကို ထိန်းချုပ်သော တင်ပါးဆုံရှိ အာရုံကြောများ ပျက်စီးခြင်း။
- ဆီးလမ်းကြောင်း ပိုးဝင်ခြင်း။
- ဆီးကျိတ် ခွဲစိတ်ကုသမှု ခံယူထားခြင်း။
- သိုင်းရွိုက်ဟော်မုန်း သို့မဟုတ် တက်စတိုစတီရုန်း ဟော်မုန်းပမာဏ နည်းပါးခြင်း။
- သုတ်ရည်သည် လိင်တံမှတစ်ဆင့် အပြင်သို့ မထွက်ဘဲ ဆီးအိမ်ထဲသို့ နောက်ပြန်စီးဝင်ခြင်း။
- အရက်ကို အလွန်အကျွံ သောက်သုံးခြင်း။
- စိတ်ပိုင်းဆိုင်ရာ အကြောင်းရင်းများမှာ အောက်ပါအတိုင်း ဖြစ်ပါသည်
- စိတ်ဓာတ်ကျခြင်း၊ စိုးရိမ်ပူပန်ခြင်း သို့မဟုတ် အခြားစိတ်ကျန်းမာရေး ပြဿနာများ။
- အဖော်နှင့် ဆက်ဆံရေးတွင် စိတ်ဖိစီးခြင်း သို့မဟုတ် ဆက်သွယ်ပြောဆိုမှု အားနည်းခြင်း။
- စွမ်းဆောင်ရည်အပေါ် စိုးရိမ်ပူပန်ခြင်း။
- အဖော်နှင့် အတူနေစဉ် စိတ်မလုံခြုံခြင်း။
- ရောဂါရမည်ကို စိုးရိမ်ခြင်း၊ ကိုယ်ဝန်ရသွားမည်ကို စိုးရိမ်ခြင်း သို့မဟုတ် အဖော်ကို နာကျင်အောင် လုပ်မိမည်ကို ကြောက်ရွံ့ခြင်း။
- စိတ်ကူးယဉ်မှုနှင့် လက်တွေ့ ကာမဆက်ဆံမှုအကြား ကွာဟချက် ရှိနေခြင်း။
- မိမိ၏ ကိုယ်ခန္ဓာအပေါ် ယုံကြည်မှု မရှိခြင်း။
- ယဉ်ကျေးမှု သို့မဟုတ် ဘာသာရေးဆိုင်ရာ ကန့်သတ်ချက်များ။
- စိတ်ကျရောဂါကုဆေးများ၊ သွေးတိုးကျဆေးများ၊ ဆီးဆေးများ၊ စိတ်ဝေဒနာကုဆေးများနှင့် အတက်ကျဆေးများကြောင့်လည်း သုတ်လွှတ်နှေးခြင်း ဖြစ်နိုင်ပါသည်။
အကယ်၍ တစ်ကိုယ်ရည် အာသာဖြေစဉ်တွင် အခက်အခဲမရှိ သုတ်လွှတ်နိုင်သော်လည်း အဖော်နှင့် အတူနေစဉ်တွင်မူ ခက်ခဲနေပါက ၎င်းသည် ရုပ်ပိုင်းဆိုင်ရာ အကြောင်းရင်းတစ်ခုတည်းကြောင့် မဟုတ်နိုင်ပါ။ မိမိ၏ သီးခြားနည်းလမ်း သို့မဟုတ် အလေ့အထကို အဖော်ဖြစ်သူက လိုက်ပါလုပ်ဆောင်ရန် ခက်ခဲခြင်း သို့မဟုတ် မိမိကလည်း တောင်းဆိုရန် ဝန်လေးခြင်းတို့ကြောင့် စိုးရိမ်စိတ်များ ဖြစ်ပေါ်လာပြီး သုတ်လွှတ်နှေးခြင်းကို ပိုမိုဆိုးရွားစေနိုင်ပါသည်။
ဖြစ်နိုင်ခြေများစေသော အချက်များ
သုတ်လွှတ်နှေးခြင်းသည် မည်သူ့တွင်မဆို ဖြစ်ပွားနိုင်ပါသည်။ ဖြစ်နိုင်ခြေကို မြင့်မားစေသော အချက်များမှာ အောက်ပါအတိုင်း ဖြစ်ပါသည်
- အသက်ကြီးလာသည်နှင့်အမျှ သုတ်လွှတ်ရန် အချိန်ပိုယူရတတ်ပါသည်။
- စိတ်ဓာတ်ကျခြင်း သို့မဟုတ် စိုးရိမ်ပူပန်ခြင်း။
- ဆီးချိုရောဂါ၊ လေဖြတ်ခြင်း သို့မဟုတ် ခါးရိုးဆစ် ဒဏ်ရာရခြင်း။
- ဆီးအိမ် သို့မဟုတ် ဆီးကျိတ် ခွဲစိတ်မှု ရာဇဝင်ရှိခြင်း။
- စိတ်ကျဆေး သို့မဟုတ် သွေးတိုးကျဆေးများ သောက်သုံးနေရခြင်း။
- အဖော်နှင့် ဆက်သွယ်ပြောဆိုမှု အားနည်းခြင်း။
- အရက်ကို ရေရှည် အလွန်အကျွံ သောက်သုံးခြင်း။
ရောဂါရှာဖွေခြင်း
ရောဂါရှာဖွေရန်အတွက် အောက်ပါလုပ်ဆောင်ချက်များဖြင့် ကူညီပေးပါလိမ့်မည်
- စမ်းသပ်စစ်ဆေးခြင်း – ဆရာဝန်သည် လူနာ၏ ကျန်းမာရေးရာဇဝင်၊ လိင်မှုဆိုင်ရာ အလေ့အထနှင့် သုတ်လွှတ်မှု အခြေအနေများကို မေးမြန်းပါလိမ့်မည်။ လိင်တံနှင့် ဝှေးစေ့များကို အသေးစိတ် စစ်ဆေးခြင်းအပြင် လိင်အင်္ဂါ၏ အာရုံခံစားမှု ပုံမှန်ရှိ၊ မရှိကိုလည်း စမ်းသပ်ပါလိမ့်မည်။
- သွေးစစ်ခြင်း – နှလုံးရောဂါ၊ ဆီးချိုရောဂါနှင့် ဟော်မုန်းပမာဏ နည်းပါးခြင်းတို့ကို သိရှိရန် သွေးစစ်ခြင်း ပြုလုပ်ပါလိမ့်မည်။
- ဆီးစစ်ခြင်း – ပိုးဝင်ခြင်း၊ ဆီးချိုရောဂါနှင့် အခြားကျန်းမာရေး ပြဿနာများကို စစ်ဆေးရန် ဆီးစစ်ခြင်း ပြုလုပ်ပါလိမ့်မည်။
ကုသခြင်း
ကျန်းမာရေးစောင့်ရှောက်သူများသည် အရင်းခံအကြောင်းရင်းပေါ် မူတည်၍ ကုသမှုနည်းလမ်း အမျိုးမျိုးကို အကြံပြုနိုင်ပါသည်။ ထိုကုသမှုများတွင် ဆေးဝါးအသစ် ညွှန်ကြားခြင်း သို့မဟုတ် ရောဂါကို ဖြစ်စေနိုင်သည့် လက်ရှိသောက်နေသော ဆေးဝါးများကို ညှိနှိုင်းပေးခြင်း၊ နှစ်သိမ့်ဆွေးနွေးသူ သို့မဟုတ် လိင်မှုဆိုင်ရာ ကျွမ်းကျင်သူနှင့် စိတ်ပညာပိုင်းဆိုင်ရာ တိုင်ပင်ဆွေးနွေးခြင်း၊ သို့မဟုတ် အရက်လျှော့သောက်ခြင်းနှင့် တရားမဝင် မူးယစ်ဆေးဝါး သုံးစွဲမှုကို ရှောင်ကြဉ်ခြင်းကဲ့သို့သော လူနေမှုပုံစံ ပြောင်းလဲခြင်းများ ပါဝင်နိုင်ပါသည်။
- ဆေးဝါးများ – အကယ်၍ လူနာသည် သုတ်လွှတ်နှေးခြင်းကို ဖြစ်စေနိုင်သည့် ဆေးဝါးတစ်ခုခုကို သောက်သုံးနေရပါက ဆေးပမာဏ လျှော့ချခြင်း သို့မဟုတ် ဆေးအမျိုးအစား ပြောင်းလဲခြင်းတို့က ကူညီနိုင်ပါသည်။ တစ်ခါတစ်ရံတွင် အခြားဆေးဝါးတစ်ခုကို ထည့်သွင်းခြင်း သို့မဟုတ် ပေါင်းစပ်အသုံးပြုခြင်းကလည်း အကျိုးရှိနိုင်ပါသည်။
သုတ်လွှတ်နှေးခြင်းကို ကုသရန်အတွက်သာ သီးသန့်အတည်ပြုထားသော ဆေးဝါးဟူ၍ မရှိသေးပါ။ သုတ်လွှတ်နှေးခြင်းကို ကုသရန် အသုံးပြုသော ဆေးဝါးများသည် များသောအားဖြင့် အခြားသော ဝေဒနာများကို ကုသရန်အတွက် ညွှန်ကြားထားသော ဆေးဝါးများသာ ဖြစ်ပါသည်။
သုတ်လွှတ်နှေးခြင်းကို ကုသရန်အတွက် အောက်ပါဆေးဝါးများကို အသုံးပြုနိုင်ပါသည်
- တက်စတိုစတီရုန်း – ဟော်မုန်းဆိုင်ရာ ဆေးဝါး
- ဆိုက်ပရိုဟက်ပတာဒင်း – ဓာတ်မတည့်ခြင်းနှင့် အာလာဂျီအတွက် ဆေးဝါး
- အမန်တာဒင်း – ပါကင်ဆန်ရောဂါအတွက် ကုသဆေး
- ဘတ်စပီရုန်း – စိုးရိမ်ပူပန်မှုအတွက် ကုသဆေး
- အောက်ဆီတိုစင် – ကာမဆန္ဒအထွတ်အထိပ် ရောက်ချိန်တွင် ခန္ဓာကိုယ်မှ သဘာဝအတိုင်း ထွက်ရှိပြီး သားအိမ်ကြွက်သားများ ကျုံ့နိုင်စေရန် မီးဖွတ်စဉ်တွင် အသုံးပြုသော ဟော်မုန်း
သို့သော် ဤဆေးဝါးများသည် သုတ်လွှတ်နှေးခြင်းကို ကုသရန်အတွက် သီးသန့်ထုတ်လုပ်ထားခြင်း မဟုတ်ကြောင်း သတိပြုရန် လိုအပ်ပါသည်။ ၎င်းတို့သည် အကျိုးရှိနိုင်သလို အကျိုးမရှိသည်လည်း ဖြစ်နိုင်ပါသည်။
- စိတ်ပညာဆိုင်ရာ တိုင်ပင်ဆွေးနွေးခြင်း – သုတ်လွှတ်နှေးခြင်းကို ဖြစ်စေသော စိတ်ဓာတ်ကျခြင်း သို့မဟုတ် စိုးရိမ်ပူပန်ခြင်းကဲ့သို့သော အရင်းခံ စိတ်ကျန်းမာရေး ပြဿနာများကို ကုသရာတွင် စိတ်ပညာဆိုင်ရာ တိုင်ပင်ဆွေးနွေးခြင်းသည် အကျိုးရှိနိုင်ပါသည်။ ထို့အပြင် သုတ်လွှတ်နိုင်စွမ်းအပေါ် တိုက်ရိုက်သက်ရောက်နေသော စိတ်ပိုင်းဆိုင်ရာ ပြဿနာများကို ကုသရန်အတွက်လည်း ၎င်းကို အသုံးပြုပါသည်။
တိုင်ပင်ဆွေးနွေးရာတွင် စိတ်ပညာရှင် သို့မဟုတ် စိတ်ကျန်းမာရေး နှစ်သိမ့်ဆွေးနွေးသူထံ မိမိတစ်ဦးတည်း သော်လည်းကောင်း၊ အဖော်နှင့်အတူ သော်လည်းကောင်း သွားရောက်နိုင်ပါသည်။ အရင်းခံအကြောင်းရင်းပေါ် မူတည်၍ လိင်ပိုင်းဆိုင်ရာ ချို့ယွင်းမှုများကို အထူးပြုဆွေးနွေးပေးသည့် ကျွမ်းကျင်သူနှင့် ပြသခြင်းက အကောင်းဆုံး ဖြစ်နိုင်ပါသည်။ လူနာ၏ သီးခြားစိုးရိမ်ပူပန်မှုများအပေါ် မူတည်၍ အကောင်းဆုံးသော တိုင်ပင်ဆွေးနွေးမှု ပုံစံမှာ ကွဲပြားနိုင်ပါသည်။
- အိမ်တွင်းကုသမှု – လူနာအနေဖြင့် တင်ပါးဆုံကြွက်သား လေ့ကျင့်ခန်း (ကီဂဲလ် လေ့ကျင့်ခန်း) နှင့် ရင်းနှီးပြီးသား ဖြစ်နိုင်ပါသည်။ ဆီးသွားနေစဉ် ရုတ်တရက် ရပ်လိုက်၊ ပြန်သွားလိုက် လုပ်ကြည့်ခြင်းဖြင့် လေ့ကျင့်ခန်းလုပ်ရမည့် ကြွက်သားများကို ရှာဖွေနိုင်ပါသည်။ ထိုကြွက်သားများကို ရှာတွေ့ပြီးနောက် မည်သည့်နေရာနှင့် မည်သည့်ပုံစံတွင်မဆို ဤလေ့ကျင့်ခန်းများကို ပြုလုပ်နိုင်ပါသည်။ သန်မာသော တင်ပါးဆုံကြွက်သားများ ရှိခြင်းနှင့် ထိုကြွက်သားများကို ပိုမိုထိန်းချုပ်နိုင်ခြင်းက လူနာအတွက် အကျိုးရှိစေနိုင်ပါသည်။
သုတ်လွှတ်နှေးခြင်း သို့မဟုတ် သုတ်မလွှတ်နိုင်ခြင်း အခြေအနေများနှင့် ပတ်သက်၍ သုတေသနများ ဆက်လက်လုပ်ဆောင်နေဆဲ ဖြစ်ပါသည်။ သုတ်လွှတ်ရန် အချိန်မည်မျှ ကြာမြင့်မှသာ လွန်ကဲသည်ဟု သတ်မှတ်မည်ဆိုသည့်အပေါ် တိကျသော လမ်းညွှန်ချက်များ၊ ကုသမှုများ သို့မဟုတ် အကြောင်းရင်းများကို ခိုင်မာစွာ အတည်မပြုနိုင်သေးပါ။ ဤပြဿနာများသည် မိမိနှင့် မိမိ၏ အဖော်အပေါ် ဆိုးကျိုးသက်ရောက်လာသည့်အခါ အခက်အခဲများ ဖြစ်ပေါ်လာတတ်ပါသည်။ အချို့က သုတ်မလွှတ်ဘဲ ကြာရှည်စွာ ဆက်ဆံနိုင်ခြင်းကို အကောင်းမြင်နိုင်သော်လည်း ၎င်းသည် များသောအားဖြင့် လူတိုင်းအတွက် စိတ်ဖိစီးမှုနှင့် ရုပ်ပိုင်းဆိုင်ရာ ပြဿနာများကို ဖြစ်ပေါ်စေနိုင်ပါသည်။ ဤစိုးရိမ်ပူပန်မှုများကို အပြည့်အဝ ဖြေရှင်းနိုင်ရန်အတွက် မိမိ၏ အဖော်နှင့်ရော ကျန်းမာရေးစောင့်ရှောက်သူနှင့်ပါ ပွင့်ပွင့်လင်းလင်း ဆွေးနွေးတိုင်ပင်ရပါမည်။
