ဒီးကွာဗင်း အရွတ်အမြှေးရောင်ရောဂါ

ရောဂါရှာဖွေခြင်း

ဒီကွာဗင်းအရွတ်အမြှေးရောင်ရောဂါကို ရောဂါ ရှာဖွေရန်အတွက် ပုံမှန်အားဖြင့် ဓာတ်မှန် ကဲ့သို့သော ပုံရိပ်ဖော် စစ်ဆေးမှုများ မလိုအပ်ပါ။ ယင်းအစား ဆရာဝန်သည် လက်ကို စစ်ဆေးမည်ဖြစ်ပြီး လူနာအနေဖြင့် မအီမသာ ဖြစ်ခြင်း ရှိ ၊ မရှိ သိနိုင်ရန် လက်ကောက်ဝတ်၏ လက်မဘက်ခြမ်းကို ဖိ၍ စစ်ဆေးပါလိမ့်မည်။ ရောဂါ အတည်ပြုနိုင်ရန်အတွက် အပိုဆောင်း စစ်ဆေးမှုများ လိုအပ်နိုင်ပါသည်။

• ဖင်ကယ်စတင်း စစ်ဆေးမှု ။ ။ ၎င်းကို ဒီကွာဗင်းအရွတ် ရောင်ရမ်းမှုကို စစ်ဆေးရန် အများအားဖြင့် အသုံးပြုပါသည်။ ရည်ရွယ်ချက်မှာ လှုပ်ရှားမှုကြောင့် နာကျင်မှု ရှိ ၊ မရှိ သိနိုင်ရန် ဖြစ်ပါသည်။ အကယ်၍ နာကျင်ပါက ကြီးထွားနေသော အရွတ်များသည် ကျဉ်းမြောင်းနေသော အရွတ်အိမ်အတွင်း ပွတ်တိုက် ဖြတ်သန်းနေရခြင်း ဖြစ်သောကြောင့် ဒီကွာဗင်းအရွတ် ရောင်ရမ်းမှု ဖြစ်နေခြင်းကို အတည်ပြုနိုင်ပါသည်။
• စစ်ဆေးနေစဉ်အတွင်း ။ ။ ဆရာဝန်သည် လူနာအား လက်မကို အခြား လက်ချောင်းများဖြင့် ဆုပ်ငုံ၍ လက်သီးဆုပ်ရန် ညွှန်ကြားပါလိမ့်မည်။ ထိုသို့ လက်သီးဆုပ်ထားစဉ်မှာပင် လက်ကောက်ဝတ်ကို တစ်စုံတစ်ဦးနှင့် လက်ဆွဲနှုတ်ဆက်သည့် ပုံစံအတိုင်း အပေါ်အောက် လှုပ်ရှားခိုင်းပါမည်။ အကယ်၍ ဤသို့ လှုပ်ရှားသည့်အခါ လက်ကောက်ဝတ်၏ လက်မဘက်ခြမ်းတွင် နာကျင်မှု ဖြစ်ပေါ်ပါက ထိုလူနာတွင် ဒီကွာဗင်းအရွတ်အမြှေးရောင်ရောဂါ ရှိနေသည်မှာ သေချာသလောက် ရှိပါသည်။

ကုသခြင်း

ဒီကွာဗင်းအရွတ်အမြှေးရောင်ရောဂါကို ချက်ချင်း ကုသခြင်းဖြင့် ၄ ပတ်မှ ၆ ပတ်အတွင်း ရောဂါလက္ခဏာများ သက်သာလာပါလိမ့်မည်။ ကိုယ်ဝန်ဆောင်ခြင်းနှင့် ဆက်စပ်သော ဒီကွာဗင်းအရွတ်အမြှေးရောင်ရောဂါမှာမူ ကလေးမွေးဖွားပြီးနောက်တွင် ပျောက်ကင်းသွားလေ့ ရှိပါသည်။

ယေဘုယျအားဖြင့် ကုသမှု၏ ရည်ရွယ်ချက်မှာ ရောင်ရမ်းမှုကို လျှော့ချရန် ၊ လက်မ၏ လှုပ်ရှားမှုကို ပြန်လည် ရရှိစေရန်နှင့် ကုသမှု ခံယူပြီးနောက် ရောဂါ ပြန်လည် ဖြစ်ပွားနိုင်ခြေကို လျှော့ချရန် ဖြစ်ပါသည်။ ဒီကွာဗင်းအရွတ် ရောင်ရမ်းမှုကို ခွဲစိတ်သည့် နည်းလမ်း သို့မဟုတ် ခွဲစိတ်စရာ မလိုသည့် နည်းလမ်းများဖြင့် ကုသနိုင်ပါသည်။

• ဆေးဝါးများ ။ ။ ဆရာဝန်သည် မအီမသာ ဖြစ်ခြင်းနှင့် ရောင်ရမ်းမှုကို လျှော့ချရန်အတွက် နက်ပရိုဆင် သို့မဟုတ် အိုင်ဗျူပရိုဖန် ကဲ့သို့သော အရောင်ကျဆေးများကို ညွှန်ကြားနိုင်ပါသည်။ အရွတ်အမြှေးအိမ်အတွင်းသို့ စတီးရွိုက် (သို့မဟုတ် ကော်တီကိုစတီးရွိုက်) ထိုးဆေးများ ထိုးရန်လည်း စဉ်းစားနိုင်ပါသည်။ လူနာ အများစုသည် ကော်တီကိုစတီးရွိုက် ထိုးဆေး ထိုးပြီးနောက်တွင် လုံးဝ ပြန်လည် သက်သာသွားလေ့ ရှိကြပြီး ရောဂါလက္ခဏာ စတင်သည့် ပထမ ခြောက်လအတွင်း ကုသမှု ခံယူပါက တစ်ကြိမ် ထိုးရုံဖြင့် သက်သာသွားလေ့ ရှိပါသည်။
• ကုထုံးများ ။ ။ ဒီကွာဗင်းအရွတ်အမြှေးရောင်ရောဂါ ရှိသူများသည် လက်ကောက်ဝတ်ကို မည်သို့ အသုံးပြုရမည်နှင့် လက်ကောက်ဝတ် တင်းအားကို မည်သို့ လျှော့ချရမည်ကို ဆွေးနွေးရန်အတွက် ကာယကုထုံး ပညာရှင် သို့မဟုတ် အသက်မွေးဝမ်းကျောင်းဆိုင်ရာ ကုထုံးပညာရှင်နှင့် တွေ့ဆုံနိုင်ပါသည်။ လေ့ကျင့်ခန်း အချို့သည် နာကျင်မှုနှင့် အရွတ် ရောင်ရမ်းမှုကို လျှော့ချပေးရင်း ကြွက်သားများကို သန်မာစေရန် ကူညီပေးနိုင်ပါသည်။
  ဒီကွာဗင်းအရွတ်အမြှေးရောင်ရောဂါအတွက် အဓိက ကုသမှုကို အောက်ပါအတိုင်း စတင်နိုင်ပါသည်။

• လက်မနှင့် လက်ကောက်ဝတ် လှုပ်ရှားမှုကို ထိန်းချုပ်ရန်နှင့် အရွတ် လုံးဝ ပြန်လည် ပျောက်ကင်းသွားသည်အထိ နေရာမှန်တွင် ရှိနေစေရန် ကျပ်ကိရိယာများကို အသုံးပြုခြင်း။
• ကျပ်ကိရိယာများကို ပုံမှန်အားဖြင့် ၄ ပတ်မှ ၆ ပတ်အထိ တစ်နေ့လျှင် ၂၄ နာရီ ၊ တစ်ပတ်လျှင် ၇ ရက်လုံး ဝတ်ဆင်ထားရလေ့ ရှိပါသည်။
• နာကျင်မှုနှင့် ရောင်ရမ်းမှုကို ဖြစ်စေသည့် လုပ်ဆောင်ချက်များ သို့မဟုတ် လက်မကို ထပ်ခါတလဲလဲ လှုပ်ရှားခြင်းများမှ ရှောင်ကြဉ်ခြင်း။
• လက်မကို အသုံးပြု၍ လက်ကောက်ဝတ်ကို ဘေးတစ်ဖက်တစ်ချက်စီသို့ ညှစ်ခြင်းမှ ရှောင်ကြဉ်ခြင်း။
• ရောင်ရမ်းမှုကို လျှော့ချရန်အတွက် လက်မနှင့် လက်ကောက်ဝတ်ပေါ်တွင် ရေခဲကပ်ပေးခြင်း။

• ခွဲစိတ် ကုသခြင်း သို့မဟုတ် အခြားသော လုပ်ဆောင်ချက်များ ။ ။ ခွဲစိတ်စရာ မလိုသော ကုသမှုများဖြင့် ဒီကွာဗင်းအရွတ်အမြှေးရောင် လက္ခဏာများ မသက်သာပါက ခွဲစိတ်ရန် အကြံပြုလေ့ ရှိပါသည်။ ခွဲစိတ်မှုကို ထုံဆေး အသုံးပြု၍ ပြင်ပ လူနာ အနေဖြင့် ပြုလုပ်နိုင်ပါသည်။

ခွဲစိတ်နေစဉ်အတွင်း ခွဲစိတ်ဆရာဝန်သည် ထိခိုက်နေသော အရွတ် သို့မဟုတ် အရွတ်များကို ဖုံးအုပ်ထားသော အရွတ်အိမ်ကို စစ်ဆေးပြီး ဖိအားကို လျှော့ချရန်အတွက် ၎င်းကို ဖွင့်ပေးပါလိမ့်မည်။ အရွတ်အိမ်ကို လှီးဖြတ်လိုက်ခြင်းဖြင့် အရွတ်များအား အရွတ်အိမ်အတွင်း ပိုမို လွတ်လပ်စွာ လှုပ်ရှားနိုင်စေပါသည်။ ဤလုပ်ဆောင်ချက်၏ ရည်ရွယ်ချက်မှာ လက်မနှင့် လက်ကောက်ဝတ် လှုပ်ရှားနိုင်စွမ်းကို ပြန်လည် ရရှိစေရန်နှင့် မအီမသာ ဖြစ်ခြင်းနှင့် ရောင်ရမ်းမှုကို လျှော့ချရန် ဖြစ်ပါသည်။

ခွဲစိတ်မှု အပြီးတွင် ကာယကုထုံး ပညာရှင် သို့မဟုတ် အသက်မွေးဝမ်းကျောင်းဆိုင်ရာ ကုထုံးပညာရှင်သည် သင့်လျော်သော သန်မာရေး လေ့ကျင့်ခန်းများ ပေးရန်နှင့် နောင်တွင် ပြဿနာများ ထပ်မံ မဖြစ်စေရန် နေ့စဉ် လုပ်ငန်းဆောင်တာများကို လိုက်လျောညီထွေ ဖြစ်အောင် ပြုပြင်ရန်အတွက် လူနာထံသို့ လာရောက်နိုင်ပါသည်။ အထူးသဖြင့် ဆရာဝန်သည် လက်မနှင့် လက်ကောက်ဝတ် ပြန်လည် ကောင်းမွန်လာစေရန် လေ့ကျင့်ခန်း အစီအစဉ်တစ်ခုကို အကြံပြုပါလိမ့်မည်။ ပြန်လည် သက်သာလာမည့် အချိန်မှာ လူနာ၏ အသက်အရွယ် ၊ ယေဘုယျ ကျန်းမာရေး အခြေအနေနှင့် ရောဂါလက္ခဏာ ဖြစ်ပွားခဲ့သည့် ကြာမြင့်ချိန်တို့အပေါ် မူတည်၍ ကွဲပြားနိုင်ပါသည်။

ရောဂါကို ပိုမို ဆိုးရွားစေသည့် လုပ်ဆောင်ချက်များနှင့် ရှောင်ကြဉ်ရမည့် အချက်များအပေါ် ဆရာဝန်၏ အကြံပြုချက်များကို လိုက်နာရန်မှာလည်း အလွန် အရေးကြီးပါသည်။ ဤလှုပ်ရှားမှုများကို ကန့်သတ်ခြင်းဖြင့် နောင်တွင် ဒီကွာဗင်းအရွတ် ရောင်ရမ်းမှုကြောင့် ဖြစ်ပွားနိုင်သော နောက်ဆက်တွဲ ပြဿနာများကို ကာကွယ်ပေးနိုင်ပါသည်။

Doctors who treat this condition