ငါးမျက်စိနှင့် အသားမာများ

အကျဉ်းချုပ် သုံးသပ်ချက်

မိမိအရေပြားက ဖိအား၊ ပွတ်တိုက်မှု၊ ယားယံမှု သို့မဟုတ် ပွန်းပဲ့ခြင်းများမှ မိမိကိုယ်ကို ကာကွယ်ရန် ကြိုးစားသည့်အခါ အသားမာနှင့် ငါးမျက်စိ တို့ ဖြစ်ပေါ်လာစေပြီး ၎င်းတို့သည် ထူထဲပြီး မာကျောသည့် အရေပြား အလွှာများ ဖြစ်သည်။ လက်ချောင်း၊ ခြေချောင်း သို့မဟုတ် ခြေဖဝါး တို့တွင် မကြာခဏ ဖြစ်ပေါ်လေ့ရှိသည်။ အဖြစ်အများဆုံး အကြောင်းရင်းမှာ မတော်သော၊ သင့်လျော်မှုမရှိသော ဖိနပ်များ ဖြစ်သည်။

ငါးမျက်စိ များသည် များသောအားဖြင့် သေးငယ်ပြီး လုံးဝန်းသည်။ ၎င်းတို့သည် ရိုးရိုးအသားမာများထက် သေးငယ်ပြီး ပိုမိုနက်ရှိုင်းသည်။ ခြေချောင်းများ၏ အပေါ်ပိုင်း သို့မဟုတ် ဘေးနှစ်ဖက်သည် ငါးမျက်စိများ အများဆုံး တွေ့ရှိရသည့် နေရာများဖြစ်သည်။ ငါးမျက်စိ အမျိုးအစား အများအပြား ရှိသည်

• မာကျောသော ငါးမျက်စိ – ၎င်းတို့သည် သေးငယ်ပြီး သိပ်သည်းစွာ မာကျောသော အရေပြား အကွက်များ ဖြစ်ကြပြီး ပုံမှန်အားဖြင့် ပိုမိုထူထဲသော အရေပြား အကွက်ကြီးများအတွင်းတွင် ပါဝင်သည်။ အရေပြားပေါ်ရှိ အရိုး ဖိအားကြောင့် ဖြစ်ပေါ်သည့် နေရာများ ဥပမာ ခြေချောင်းထိပ်များတွင် မာကျောသော ငါးမျက်စိများ ပုံမှန်အားဖြင့် ဖြစ်ပေါ်သည်။
• ပျော့သော ငါးမျက်စိ – ဤငါးမျက်စိများသည် ဖြူဖျော့သော သို့မဟုတ် မီးခိုးရောင် ရှိပြီး ပိုမိုပျော့ပျောင်းကာ ရော်ဘာကဲ့သို့ အထိအတွေ့ ရှိသည်။ ခြေချောင်းများကြားတွင် ပျော့သော ငါးမျက်စိများကို တွေ့နိုင်သည်။
• အစေ့ပုံ ငါးမျက်စိ – ဤသေးငယ်သော ငါးမျက်စိများသည် ပုံမှန်အားဖြင့် ခြေဖဝါး တွင် ဖြစ်ပေါ်သည်။

အခြား အသားမာ များသည် များသောအားဖြင့် ဖိအားရှိသော နေရာများ ဥပမာ ဖနောင့်၊ ခြေဖဝါး၊ လက်ဖဝါးနှင့် ဒူး တို့တွင် ဖြစ်ပေါ်လေ့ရှိပြီး နာကျင်မှု နည်းပါးသည်။ ၎င်းတို့သည် ငါးမျက်စိများထက် ပိုမိုကြီးမားလေ့ရှိပြီး အရွယ်အစားနှင့် ပုံသဏ္ဌာန် အမျိုးမျိုး ကွဲပြားနိုင်သည်။

လက်များ တွင်လည်း အသားမာများ မကြာခဏ တွေ့ရတတ်သည်။ ဥပမာ – ဂစ်တာသမားများ၏ လက်ချောင်းထိပ်များ သို့မဟုတ် အားကစားသမားများ၊ အလေးမ လေ့ကျင့်သူများ သို့မဟုတ် လက်မှုပညာရှင်များ၏ လက်ဖဝါးများ စသဖြင့် အမြဲတစေ ပွတ်တိုက်မှု ရှိသည့်နေရာများတွင် အသားမာများ ဖြစ်ပေါ်သည်။

ငါးမျက်စိ သို့မဟုတ် အသားမာတို့က နာကျင်မှု ဖြစ်ခြင်း သို့မဟုတ် လူနာက ၎င်းတို့၏ ပုံပန်းသဏ္ဌာန်ကို မနှစ်မြို့ခြင်းများမှအပ လူနာသည် ကျန်းမာရေး ကောင်းမွန်ပါက ကုသမှု မလိုအပ်ပေ။ လူအများစုအတွက် ထိုပွတ်တိုက်မှု သို့မဟုတ် ဖိအား၏ အရင်းအမြစ် ရှာဖွေဖယ်ရှားခြင်းဖြင့် ငါးမျက်စိနှင့် အသားမာများကို ဖယ်ရှားနိုင်သည်။

လက္ခဏာများ

ငါးမျက်စိနှင့် အသားမာတို့သည် အောက်ပါ လက္ခဏာများကို ပြသနိုင်သည်

• ဖြစ်ပွားသည့် နေရာတွင် ထူထဲပြီး ကြမ်းတမ်းသော အရေပြား
• ထိမိပါက မာကျောသည်ဟု ခံစားရသော ကြွတက်နေသော အဖု
• ဖြစ်ပွားသည့် အရေပြားအောက်တွင် နာကျင်ခြင်း
• ဖြစ်ပွားသည့် နေရာတွင် ခြောက်သွေ့ ခြင်း၊ အဖတ်လန်ခြင်း သို့မဟုတ် ဖယောင်းသားကဲ့သို့ ပြောင်လက်နေခြင်း

ငါးမျက်စိ သို့မဟုတ် အသားမာကြောင့် သိသာထင်ရှားသော မသက်မသာဖြစ်ခြင်း သို့မဟုတ် ရောင်ရမ်းခြင်း ခံစားရပါက ကျန်းမာရေးစောင့်ရှောက်မှု ပညာရှင်ထံမှ ဆေးဘက်ဆိုင်ရာ အကူအညီ ရယူရန် အကြံပြုအပ်သည်။ ဆီးချိုရောဂါ ရှိခြင်း သို့မဟုတ် သွေးစီးဆင်းမှု မကောင်းပါက ငါးမျက်စိ သို့မဟုတ် အသားမာတို့ကို မိမိကိုယ်တိုင် ကုသရန် မကြိုးစားဘဲ ဆေးကုသမှု ခံယူရန် အထူးအရေးကြီးသည်။ အကြောင်းမှာ သေးငယ်သော ခြေထောက် ဒဏ်ရာလေးမှနေ၍ ပိုးဝင်သည့်အနာ ဖြစ်ပေါ်စေနိုင်သောကြောင့် ဖြစ်သည်။

ဖြစ်ပွားစေသော အကြောင်းရင်းများ

အသားမာနှင့် ငါးမျက်စိတို့သည် ထပ်တလဲလဲ ပွတ်တိုက်မှုနှင့် ဖိအားတို့ကြောင့်ဖြစ်ပေါ်လာသည်။ ဤဖိအားနှင့် ပွတ်တိုက်မှု၏ အရင်းအမြစ်များမှာ အောက်ပါတို့ ဖြစ်သည်

• တော်သော ကွက်တိကျသော ဖိနပ် မစီးခြင်း – ကျပ်သော ဖိနပ်များ သည် ခြေထောက်၏ အချို့သော အစိတ်အပိုင်းများကို ဖိညှစ်နိုင်သည်။ ဖိနပ်များ ချောင်နေပါက ခြေထောက်သည် ဖိနပ်နှင့် ထပ်တလဲလဲ ပွတ်တိုက်ပြီး ပွန်းတိုက်နိုင်သည်။ ဒေါက်ဖိနပ် အမြင့်စီးသော အမျိုးသမီးများ သည် လမ်းလျှောက်သည့်အခါ အောက်သို့ ဖိအားကြောင့် ၎င်းတို့၏ ခြေဖဝါးအောက်ပိုင်းတွင် မကြာခဏ အသားမာများ ဖြစ်ပေါ်လေ့ရှိသည်။ ထို့အပြင် ဖိနပ်၏ ချုပ်ရိုး သို့မဟုတ် အနားသတ်များသည် ခြေထောက်ကို ပြဿနာ ဖြစ်စေနိုင်သည်။ အဆင်မပြေသော ခြေအိတ်များကြောင့်လည်း ပြဿနာဖြစ်စေနိုင်သည်။
• ခြေအိတ် မဝတ်ခြင်း – ခြေအိတ်မပါဘဲ ဖိနပ်နှင့် ခြေညှပ်ဖိနပ်များ စီးခြင်း သည် ခြေထောက်ပေါ်တွင် ပွတ်တိုက်မှု ဖြစ်စေနိုင်သည်။
• စက်ကိရိယာများ အသုံးပြုခြင်း သို့မဟုတ် တူရိယာများ တီးခတ်ခြင်း – လက်များ သို့မဟုတ် လက်ချောင်းများပေါ်ရှိ အရေပြားကို ထပ်တလဲလဲ ပွတ်တိုက်မိသော အလုပ်ကြမ်းများ၊ ကိုယ်လက်လှုပ်ရှားမှု ဝါသနာများ၊ အားကစား လှုပ်ရှားမှုများ သို့မဟုတ် တူရိယာ တီးခတ်ခြင်း၊ စက်ကိရိယာ အသုံးပြုခြင်းများ၊ ဘောပင်ပင်လျှင် ထပ်တလဲလဲ ဖိအား ကြောင့် လက်များပေါ်တွင် အသားမာများ ဖြစ်ပေါ်စေနိုင်သည်။
• မျိုးရိုးဗီဇ – မျိုးရိုးဗီဇ သည် ခြေဖဝါးနှင့် လက်ဖဝါးရှိ ကိုယ်အလေးချိန် မခံသော နေရာများ တွင် ဖြစ်ပေါ်သော ငါးမျက်စိ အမျိုးအစားတွင် အခန်းကဏ္ဍမှ ပါဝင်နိုင်သည်။
• အခြားများ – ဖွဲ့စည်းပုံဆိုင်ရာ ခြေထောက် ချို့ယွင်းချက်များ သို့မဟုတ် (မွေးရာပါ ချို့ယွင်းချက်များ ဥပမာ ခြေချောင်းကောက်ခြင်းတို့ကြောင့်) ပြောင်းလဲသွားသော ကိုယ်ခန္ဓာ လှုပ်ရှားမှုပုံစံ။ မှားယွင်းသော လမ်းလျှောက်ခြင်း ဆိုသည်မှာ ခြေထောက်၏ အတွင်းဘက် သို့မဟုတ် အပြင်ဘက် အနားသတ်ပေါ်တွင် အလွန်အကျွံ အလေးချိန်ဖို့ထားခြင်းကို ဆိုလိုသည်။