ជំងឺមហារីកសុដន់ ការយល់ដឹងអំពីប្រភេទ រោគសញ្ញា និងវិធីសាស្រ្តព្យាបាលកម្រិតខ្ពស់

ជំងឺមហារីកសុដន់ គឺជាជំងឺមួយក្នុងចំណោមជំងឺទូទៅបំផុតដែលប៉ះពាល់ដល់ជីវិតស្ត្រីនៅទូទាំងពិភពលោក។ នៅមជ្ឈមណ្ឌលសុដន់នៃមន្ទីរពេទ្យអន្តរជាតិវេជ្ជថានី យើងខ្ញុំផ្តល់ជូននូវការធ្វើរោគវិនិច្ឆ័យ និងការថែទាំដ៏ទូលំទូលាយសម្រាប់ស្ត្រីដែលប្រឈមមុខនឹងស្ថានភាពធ្ងន់ធ្ងរនេះ

ជំងឺមហារីកសុដន់ គឺជាអ្វី?

ជំងឺមហារីកសុដន់គឺជាជំងឺមួយដែលកោសិកាមិនប្រក្រតីនៅក្នុងសុដន់លូតលាស់ដោយមិនអាចគ្រប់គ្រងបាន ហើយក្លាយជាដុំសាច់។ កោសិកាមហារីកទាំងនេះអាចឈ្លានពានជាលិកាក្បែរៗ ហើយក្នុងករណីធ្ងន់ធ្ងរ វាអាចរាលដាលដល់តំបន់ផ្សេងទៀតនៃរាងកាយ ដូចជាឆ្អឹង ថ្លើម សួត ឬខួរក្បាល។ នៅពេលដែលរឿងនេះកើតឡើង ស្ថានភាពនេះត្រូវបានចាត់ថ្នាក់ជាជំងឺមហារីកសុដន់ដំណាក់កាលរាលដាល

ទោះបីជាជំងឺមហារីកសុដន់អាចកើតឡើងទាំងបុរស និងស្ត្រី ប៉ុន្ដែរកឃើញច្រើនចំពោះស្ត្រី។ ការធ្វើរោគវិនិច្ឆ័យដំណាក់កាលដំបូង និងការព្យាបាលត្រឹមត្រូវអាចជួយបង្កើនអត្រារស់រានមានជីវិត និងគុណភាពជីវិតប្រសើរឡើងយ៉ាងខ្លាំង

ប្រភេទនៃ ជំងឺមហារីកសុដន់

ជំងឺមហារីកសុដន់មិនមែនជាជំងឺតែមួយមុខនោះទេ។ វាអាចចាត់ថ្នាក់បានជាច្រើនវិធី អាស្រ័យលើរោគសាស្ត្រ ដំណាក់កាល និងស្ថានភាពអ្នកជំងឺ។ ដោយប្រភេទសំខាន់ៗរួមមាន៖

មហារីកបំពង់ទឹកដោះដំណាក់កាលដំបូង (Ductal Carcinoma In Situ ឬ DCIS)

ជាជំងឺមហារីកសុដន់ប្រភេទមិនរាលដាល ដោយកោសិកាមិនប្រក្រតីស្ថិតតែនៅក្នុងបំពង់ទឹកដោះ។ ទោះបីជាមិនទាន់រាតត្បាត ប៉ុន្តែ DCIS អាចវិវត្តទៅជាមហារីករាលដាលបានប្រសិនបើមិនបានព្យាបាល

មហារីកសុដន់រាតត្បាត

ប្រភេទនេះកើតឡើងនៅពេលដែលកោសិកាមហារីករីករាលដាលហួសពីបំពង់ទឹកដោះ ឬដុំសាច់ចូលទៅក្នុងជាលិកាសុដន់ជុំវិញ។ វាអាចបែងចែកបន្ថែមទៀតបាន ដូចជា៖

• បែងចែកតាម​ជាលិកាវិទ្យា (លក្ខណៈដែលរកឃើញដោយមីក្រូទស្សន៍)៖
  
  • មហារីក​បំពង់​ទឹកដោះ​ប្រភេទរាតត្បាត (Invasive Ductal Carcinoma – IDC)៖ ប្រភេទ​ដែល​កើតមាន​ញឹកញាប់​បំផុត ដែល​មាន​ប្រហែល 80% នៃ​ករណី​រាតត្បាតទាំងអស់
• បែងចែកតាម​ដំណាក់កាលនៃជំងឺ
  • មហារីក​សុដន់​ដំណាក់កាល​ដំបូង (Early Breast Cancer – EBC)៖ មហារីក​ដែលស្ថិតតែ​នៅក្នុង​សុដន់ ឬ​កូនកណ្តុរ​ក្បែរៗ និង​មិនទាន់​រាលដាល​ដល់​សរីរាង្គផ្សេងៗ
  • មហារីក​សុដន់​ដំណាក់កាល​រាលដាល (Metastatic Breast Cancer – MBC)៖ ឬត្រូវបានគេហៅ​ម្យ៉ាងទៀត​ថា​មហារីក​សុដន់​ដំណាក់កាល​ទី IV វា​បាន​រាលដាលពី​សុដន់​ទៅ​ផ្នែក​ផ្សេងទៀត​នៃ​រាងកាយ។ ទោះបីជា​មិនអាច​ព្យាបាលជាសះស្បើយ​ក៏ដោយ ប៉ុន្តែការព្យាបាល​អាចជួយ​គ្រប់គ្រង​រោគសញ្ញា និង​ពន្យារអាយុនៃការរស់រានមានជីវិត
• បែងចែកតាម​ស្ថានភាពអង្គធាតុទទួល receptor (Immunohistochemistry – IHC)៖
  • មហារីក​សុដន់​ប្រភេទ Hormone Receptor (HR)-Positive៖ កោសិកា​មហារីក​លូតលាស់​ឆ្លើយតប​ទៅនឹង​អេស្ត្រូសែន ឬ​ប្រូហ្សេស្តេរ៉ូន
  • មហារីក​សុដន់ប្រភេទ HER2 វិជ្ជមាន៖ បណ្ដាលមកពីការជំរុញ​ដោយ​ការបញ្ចេញ​ប្រូតេអ៊ីន HER2 ច្រើនពេក ដែល​អាច​កំណត់​គោលដៅ​ដោយ​ការព្យាបាល​ជាក់លាក់បាន
  • មហារីកសុដន់ប្រភេទបីស្រទាប់អវិជ្ជមាន (TNBC)៖ ខ្វះអរម៉ូនអ៊ឹស្ត្រូសែន ប្រូហ្សេស្តេរ៉ូន និងអង់ទីករ HER2។ ប្រភេទរងដ៏កាចសាហាវនេះពិបាកព្យាបាលជាង ហើយវាកើតមានច្រើនចំពោះស្ត្រីវ័យក្មេង

រោគសញ្ញាដែលត្រូវប្រុងប្រយ័ត្ន

ការកំណត់សញ្ញាបឋមនៃជំងឺមហារីកសុដន់អាចជួយបង្កើនឱកាសនៃការព្យាបាលដោយជោគជ័យបានយ៉ាងច្រើន។ ទោះបីជារោគសញ្ញាទាំងអស់មិនបង្ហាញពីជំងឺមហារីក ប៉ុន្តែការផ្លាស់ប្តូរណាមួយដែលកើតឡើងជាប់ ឬខុសធម្មតានៅក្នុងសុដន់គួរតែទទួលការវាយតម្លៃពីវេជ្ជបណ្ឌិតឯកទេស។ ខាងក្រោមនេះគឺជារោគសញ្ញាទូទៅបំផុតនៃជំងឺមហារីកសុដន់៖

ដុំពក ឬភាពក្រាស់នៅក្នុងសុដន់ ឬក្លៀក៖ ជំងឺមហារីកសុដន់ភាគច្រើនចាប់ផ្តើមជាដុំពកដែលអាចមានអារម្មណ៍ថារឹង មិនឈឺចាប់ និងនៅនឹងកន្លែង។ ទោះជាយ៉ាងណាក៏ដោយ ដុំពកខ្លះអាចទន់ ឬអាចផ្លាស់ទីបាន

ការផ្លាស់ប្តូររូបរាង ឬទំហំសុដន់៖ ការហើម ការរួមតូច ឬរូបរាងមិនស្មើគ្នាអាចបង្ហាញពីការលូតលាស់ជាលិកាមិនធម្មតា

ការផ្លាស់ប្តូរស្បែក៖ មិនគួរមើលរំលងនូវ ស្នាមផុង ស្នាមជ្រួញ ស្នាមក្រហម ឬស្នាមរបកបែកប្រុយនៅលើតំបន់សុដន់ ឬក្បាលសុដន់ឡើយ

ការហូរទឹករំអិលក្បាលសុដន់៖ ការហូរទឹករំអិលដោយធម្មជាតិ ជាពិសេសប្រសិនបើមានឈាម ឬកើតឡើងដោយមិនច្របាច់ អាចជាសញ្ញាព្រមានមួយ

ការផ្លាស់ប្តូរនៃក្បាលសុដន់ ឬលិបក្បាលសុដន់៖ ការរួញតូច រមាស់ ឬកន្ទួលជុំវិញតំបន់ក្បាលសុដន់អាចបង្ហាញពីការផ្លាស់ប្តូរជាលិកាជ្រៅ

ការឈឺសុដន់រ៉ាំរ៉ៃ៖ ទោះបីជាជំងឺមហារីកសុដន់ជាធម្មតាមិនមានការឈឺចាប់ ប៉ុន្តែបើមានការឈឺចាប់ជាប់រហូតនៅក្នុងតំបន់មួយដែលមិនបាត់ទៅវិញគួរតែទទួលការវាយតម្លៃ

ការហើមនៅក្លៀក ឬតំបន់ឆ្អឹងដងកាំបិត៖ នេះអាចបង្ហាញថាជំងឺមហារីកបានរីករាលដាលដល់កូនកណ្តុរនៅក្បែរនោះហើយ

សូមចងចាំថារោគសញ្ញាទាំងនេះក៏អាចកើតឡើងជាមួយនឹងស្ថានភាពដែលមិនមែនមហារីកដូចជាដុំគីស ឬការឆ្លងមេរោគ។ ទោះជាយ៉ាងណាក៏ដោយ ប្រសិនបើអ្នកសម្គាល់ឃើញសញ្ញាណាមួយក្នុងចំណោមទាំងនេះ វាជាការសំខាន់ក្នុងការពិគ្រោះជាមួយអ្នកឯកទេសសម្រាប់ការវាយតម្លៃយ៉ាងហ្មត់ចត់ និងការធ្វើតេស្តរោគវិនិច្ឆ័យ

ឧបករណ៍វិនិច្ឆ័យរោគកម្រិតខ្ពស់នៅមជ្ឈមណ្ឌលសុដន់មន្ទីរពេទ្យអន្តរជាតិវេជ្ជថានី

នៅមន្ទីរពេទ្យអន្តរជាតិវេជ្ជថានី យើងជឿជាក់លើសារៈសំខាន់នៃការរកឃើញចាប់តាំងពីដំបូង និងច្បាស់លាស់ ដែលជាមូលដ្ឋានគ្រឹះសម្រាប់ការរៀបចំផែនការព្យាបាលផ្ទាល់ខ្លួន។ មជ្ឈមណ្ឌលសុដន់របស់យើងផ្តល់នូវការធ្វើរោគវិនិច្ឆ័យត្រឹមត្រូវ និងទាន់ពេលវេលាដោយប្រើឧបករណ៍ថតរូបភាពទំនើប និងបច្ចេកវិទ្យាមន្ទីរពិសោធន៍ទាន់សម័យ ដូចជា៖

ម៉ាម៉ូក្រាមឌីជីថល (Digital Mammography)៖ សម្រាប់ការថតរូបភាពជាលិកាសុដន់ដែលមានគុណភាពបង្ហាញខ្ពស់

អ៊ុលត្រាសោនសុដន់ (Breast ultrasound)៖ មានប្រយោជន៍ជាពិសេសសម្រាប់អ្នកជំងឺវ័យក្មេងដែលមានជាលិកាសុដន់ក្រាស់

MRI សុដន់ (Breast MRI)៖ ការស្កេនលម្អិតដែលត្រូវបានប្រើជាញឹកញាប់សម្រាប់បុគ្គលដែលមានហានិភ័យខ្ពស់ ឬនៅពេលដែលលទ្ធផលនៃការថតម៉ាម៉ូក្រាមមិនច្បាស់លាស់

នីតិវិធីនៃការពិនិត្យដុំសាច់ (Biopsy procedures)៖ ដើម្បីបញ្ជាក់ពីវត្តមាន និងប្រភេទនៃជំងឺមហារីក រួមទាំងការចោះបឺតយកដោយម្ជុលខ្នាតតូច ការចោះបឺតយកដោយម្ជុលខ្នាតធំ ឬការកាត់យកដុំសាច់ទៅពិនិត្យវិនិច្ឆ័យដោយការវះកាត់

ជម្រើសនៃការព្យាបាលនៅមន្ទីរពេទ្យអន្តរជាតិវេជ្ជថានី

ការព្យាបាលជំងឺមហារីកសុដន់ជាទូទៅតែងប្រើវិធីសាស្រ្តការព្យាបាលបែបពហុវិធី។ មន្ទីរពេទ្យអន្តរជាតិវេជ្ជថានីផ្តល់ជូននូវការព្យាបាលសំខាន់ៗនៅក្រោមដំបូលតែមួយ រួមទាំងការវះកាត់ និងការព្យាបាលវេជ្ជសាស្ត្រ។ ក្រុមវេជ្ជសាស្ត្រពហុជំនាញរបស់យើង ប្រកបដោយគ្រូពេទ្យឯកទេសជំងឺមហារីក គ្រូពេទ្យវះកាត់សុដន់ និងអ្នកជំនាញខាងវិទ្យុសកម្ម និងកែសម្រួលផែនការព្យាបាលនីមួយៗឪ្យសមស្របជាមួយតម្រូវការផ្នែកគ្លីនិកជាក់លាក់របស់អ្នក

ការវះកាត់៖

• ការវះកាត់យកដុំសាច់ចេញ (Lumpectomy)៖ ការកាត់យកតែដុំសាច់ចេញ និងគែមជាលិកាជុំវិញចេញវបន្តិចបន្តួច
• ការវះកាត់យកសុដន់ចេញ (Mastectomy)៖ ការវះកាត់យកសុដន់ចេញទាំងមូល អាស្រ័យលើទំហំ និងដំណាក់កាលនៃដុំសាច់

ការព្យាបាលជាប្រព័ន្ធ ឬការព្យាបាលតាមវេជ្ជសាស្ត្រ៖

• ការព្យាបាលដោយគីមី (Chemotherapy)៖ ដើម្បីបំផ្លាញកោសិកាមហារីក ឬកាត់បន្ថយខ្នាតដុំសាច់មុន (neoadjuvant) និង/ឬក្រោយការវះកាត់ (adjuvant)
• ការព្យាបាលដោយអរម៉ូន (Hormone therapy)៖ ទប់ស្កាត់អរម៉ូនដែលជំរុញប្រភេទមហារីកសុដន់មួយចំនួន
• ការព្យាបាលដោយថ្នាំគោលដៅ (Targeted therapy)៖ ដូចជាថ្នាំទប់ស្កាត់ HER2 សម្រាប់ជំងឺមហារីកសុដន់ HER2-positive និងថ្នាំទប់ស្កាត់ CDK4/6 សម្រាប់ជំងឺមហារីកសុដន់ HR-positive
• ការព្យាបាលដោយប្រព័ន្ធភាពស៊ាំ (Immunotherapy)៖ ប្រើប្រាស់ក្នុងមហារីកប្រភេទ TNBC ទាំងក្នុងដំណាក់កាលដំបូង និងដំណាក់កាលរាលដាល

ការព្យាបាលដោយកាំរស្មី៖

ដើម្បីបំផ្លាញកោសិកាមហារីក ជារឿយៗបន្ទាប់ពីការវះកាត់ ដើម្បីកាត់បន្ថយហានិភ័យនៃការកើតឡើងវិញ ឬដើម្បីព្យាបាលជំងឺមហារីកសុដន់កម្រិតខ្ពស់ ឬជំងឺមហារីកសុដន់ដែលកើតឡើងវិញ

ទទួលបានការថែទាំពីអ្នកជំនាញនៅមជ្ឈមណ្ឌលសុដន់មន្ទីរពេទ្យអន្តរជាតិវេជ្ជថានី

ប្រសិនបើអ្នកបានកត់សម្គាល់ឃើញរោគសញ្ញាដូចជាដុំពក ឬការប្រែប្រួលនៅក្នុងសុដន់ ឬមានប្រវត្តិគ្រួសារកើតជំងឺមហារីកសុដន់ សូមកុំរង់ចាំ។ នៅមជ្ឈមណ្ឌលសុដន់នៃមន្ទីរពេទ្យអន្តរជាតិវេជ្ជថានី ផ្តល់ជូននូវការពិនិត្យសុខភាពយ៉ាងទូលំទូលាយ ការព្យាបាលទាន់សម័យ និងការថែទាំប្រកបដោយវិជ្ជាជីវៈ ជាមួយនឹងសម្ភារៈទំនើបៗ។ មជ្ឈមណ្ឌលសុដន់របស់យើងត្រូវបានបំពាក់ដោយបច្ចេកវិទ្យាវេជ្ជសាស្ត្រដែលទទួលស្គាល់ជាអន្តរជាតិ និងដឹកនាំដោយទស្សនវិជ្ជាផ្តោតលើអ្នកជំងឺ។ កំណត់ពេលពិគ្រោះយោបល់ថ្ងៃនេះ

សម្រាប់ព័ត៌មានបន្ថែម ឬធ្វើការណាត់, សូមទាក់ទងមកកាន់

មជ្ឈមណ្ឌលមហារីក, មន្ទីរពេទ្យអន្ដរជាតិវេជ្ជថានី
សេវាកម្មទូរស័ព្ទ ២៤ម៉ោង: 089-201-9000

Related Posts

See All

ការឈឺពោះពេលមករដូវមិនគួរត្រូវបានមើលរំលងទេ ព្រោះវាអាចជាសញ្ញានៃ ដុំសាច់ក្នុងស្បូន

ដុំសាច់ក្នុងស្បូន គឺជាដុំសាច់ដែលមិនមែនជាមហារីក ដែលរកឃើញ […]

អត្ថបទសុខភាព

សូមប្រុងប្រយ័ត្ន! ជំងឺលើសឈាម ដែលគ្មានរោគសញ្ញាអាចបង្កហានិភ័យជា ជំងឺសរសៃឈាមបេះដូង ដោយមិនដឹងខ្លួន

ជំងឺលើសឈាម គឺជាស្ថានភាពទូទៅមួយដែលជារឿយៗមិនបង្ហាញរោគសញ្ញ […]

អត្ថបទសុខភាព