ស្វែងរកគ្រូពេទ្យ មគ្គុទេស ធ្វើការណាត់ជួប និយាយជាមួយគ្រូពេទ្យ

អត្ថបទសុខភាព

Holiday Heart Syndrome: ហានិភ័យសុខភាពដែលលាក់ខ្លួនក្នុងការប្រារព្ធជប់លៀងបែបធ្ងន់ធ្ងរ

ក្នុងឱកាសបុណ្យចូលឆ្នាំចិន តែងតែពោរពេញទៅដោយបរិយាកាសនៃការប្រារព្ធពិធីដ៏រីករាយដូចជាការទទួលអាំងប៉ាវ រៀបចំពិធីជប់លៀងអាហារ នំចំណីនឹងគ្រឿងស្រវឹងរួមជាមួយគ្នា ដែលមនុស្សមួយចំនួនអាចជប់លៀងតជាប់គ្នាជាច្រើនយប់ធ្វើ ឱ្យរាងកាយសម្រាកបានតិច រហូតដល់អាចនាំឱ្យកើតជំងឺបេះដូង Holiday Heart Syndrome ឬបេះដូងលោតខុសប្រក្រតីដោយមិនដឹងខ្លួន ។

វេជ្ជបណ្ឌិត Zaida Buranasin វេជ្ជបណ្ឌិតឯកទេសជំងឺបេះដូងនឹងសរសៃឈាម នៃមន្ទីរពេទ្យវេជ្ជថានី បានពោលថា ជំងឺបេះដូងភាគច្រើនតែងតែមិនបង្ហាញរោគសញ្ញាជាក់ស្តែងក្នុងដំណាក់កាលដំបូងឡើយ រហូតដល់ពេលដែលយើងដឹងខ្លួនប្រហែលអាចនឹងយឺតពេលទៅហើយ ដោយជំងឺ Holiday Heart Syndrome ឬជំងឺបេះដូងលោតខុសប្រក្រតីបែបស្រួចស្រាល គឺជាជំងឺបេះដូងមួយដែលកើតឡើងភ្លាមៗ ជាជំងឺដែលគ្មានសញ្ញាព្រមានឪ្យយើងដឹងមុននោះទេ ភាគច្រើនតែងកើតឡើងក្នុងរដូវវិស្សមកាលវែង។ ជំងឺនេះអាចកើតមានចំពោះមនុស្សគ្រប់រូប ជាពិសេសមនុស្សកំពុងពេញវ័យ ដែលសម្រាកមិនបានគ្រប់គ្រាន់ មិនគេង ជប់លៀងជាប់គ្នាជាច្រើនយប់ អ្នកដែលពិសារគ្រឿងស្រវឹងក្នុងបរិមាណច្រើន ឬជាប់ៗគ្នាជាច្រើនថ្ងៃ រោគសញ្ញាដែលជួបញឹកញាប់បំផុតរួមមាន មិនសូវស្រស់ស្រាយ មិនសូវមានថាមពល មានអារម្មណ៍តឹង ឬឈឺទ្រូង វិលមុខ ងងឹតមុខ បេះដូងលោតញាប់ជាងធម្មតា ពិបាកដកដង្ហើម និងអស់កម្លាំង។ ប្រសិនបើអ្នក ឬអ្នកដែលនៅជុំវិញខ្លួនអ្នកមានរោគសញ្ញាទាំងនេះ សូមប្រញាប់ទៅជួបគ្រូពេទ្យឱ្យបានឆាប់តាមដែលអាចធ្វើទៅបាន។

មូលហេតុនៃជម្ងឺបេះដូង Holiday Heart Syndrome កើតឡើងពីកត្តាជាច្រើនរួមគ្នា ដូចជា៖

ការពិសារគ្រឿងស្រវឹងជាច្រើន ដែលជាកត្តាទៅជំរុញបេះដូងឱ្យលោតលឿន និងលោតខុសចង្វាក់
ការដែលមិនបានគេងក្នុងរដូវវិស្សមកាល
រាងកាយខ្សោះជាតិទឹកពីការពិសារគ្រឿងស្រវឹង
ភាពតានតឹងពីការជួបជុំនៃថ្ងៃឈប់សម្រាក

វិធីថែរក្សាខ្លួនក្នុងឱកាសបុណ្យចូលឆ្នាំចិនដើម្បីការពារខ្លួនអ្នកពីជំងឺមិនមែនជារឿងពិបាកនោះទេ ដោយអ្នកគួរពិសារគ្រឿងស្រវឹងយ៉ាងមានកម្រិត រកពេលសម្រាក ឬធ្វើសកម្មភាពផ្សេងជាជាងពិសារគ្រឿងស្រវឹង ជៀសវាងការញ៉ាំអាហារដែលមានជាតិសូដ្យូម និងខ្លាញ់ ព្រោះប្រសិនបើអ្នកមិនគ្រប់គ្រងការទទួលទានអាហាររបស់អ្នកទេ វានឹងប៉ះពាល់ដល់មុខងារបេះដូងរបស់អ្នក រួមទាំងការសម្រាកឱ្យបានគ្រប់គ្រាន់ផងដែរ ព្រោះក្នុងឱកាសពិធីបុណ្យចូលឆ្នាំចិននេះ អ្នកគួរតែរកពេលសម្រាក ព្រោះបើអ្នកសម្រាកមិនគ្រប់គ្រាន់ ឬគេងយប់ជ្រៅជាប់គ្នាជាច្រើនថ្ងៃអាចបណ្តាលឱ្យភាពងងុយគេង និងអស់កម្លាំងសន្សំទុកក្នុងរាងកាយ រហូតដល់ប៉ះពាល់ដល់ប្រសិទ្ធភាពការងារបន្ទាប់ពីថ្ងៃឈប់សម្រាក ហើយអាចប្រឈមនឹងហានិភ័យនៃជំងឺ Holiday Heart Syndrome។

ការព្យាបាលជម្ងឺបេះដូង Holiday Heart Syndrome អាស្រ័យលើភាពធ្ងន់ធ្ងរនៃរោគសញ្ញា ដោយវេជ្ជបណ្ឌិតអាចនឹងចេញវេជ្ជបញ្ជាថ្នាំដើម្បីព្យាបាលជំងឺបេះដូងលោតខុសប្រក្រតី និងណែនាំអ្នកជំងឺឱ្យកាត់បន្ថយការប្រើប្រាស់គ្រឿងស្រវឹង គេងឱ្យបានគ្រប់គ្រាន់

ជៀសវាងការទទួលទានជាតិអាល់កុលលើសកម្រិត ពិសារទឹកឪ្យបានច្រើនដើម្បីកុំឱ្យរាងកាយរបស់អ្នកខ្វះជាតិទឹក នឹងជៀសវាងអាហារដែលមានជាតិខ្លាញ់ខ្ពស់ ឬមានរសជាតិប្រៃខ្លាំង។