ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာဆီးပေါများသောရောဂါ (Diabetes insipidus) ဆိုသည်မှာ ခန္ဓာကိုယ်တွင်း အရည်ဓာတ် မျှခြေကို ထိခိုက်စေသည့် အခြေအနေတစ်ခု ဖြစ်ပြီး ဆီးအလွန်အကျွံ သွားခြင်းနှင့် ရေဓာတ်များစွာ သောက်သုံးပြီးသည့်တိုင် ရေငတ်ခြင်းကို ပိုမိုခံစားရစေတတ်သည်။
အများစုက “ဆီးချိုရောဂါ” ဟုသာ သိထားကြသည့် သွေးတွင်းသကြားဓာတ် မြင့်မားသော ဆီးချိုရောဂါ (Diabetes mellitus – အမျိုးအစား ၁ နှင့် ၂ ပါဝင်ပြီး ပိုမိုအဖြစ်များပါသည်) နှင့် ယခုပြဆိုထားသော ဆီးပေါများသောရောဂါ (Diabetes insipidus) တို့သည် လုံးဝမတူညီဘဲ ကွဲပြားခြားနားသော ရောဂါနှစ်ခု ဖြစ်ကြောင်း သတိပြုရန် အရေးကြီးပါသည်။
ဆီးပေါများသောရောဂါ ဖြစ်ပွားရခြင်းမှာ ဗေဆိုပရက်ဆင် (Vasopressin) ဟုလည်း ခေါ်ဆိုသည့် ဆီးထိန်းဟော်မုန်း (Antidiuretic Hormone – ADH) ကြောင့် ဖြစ်သည်။ သင့်ခန္ဓာကိုယ်က ထိုဟော်မုန်းကို လုံလောက်စွာ မထုတ်လုပ်နိုင်ခြင်း (သို့မဟုတ်) သင့်ကျောက်ကပ်က ၎င်းဟော်မုန်းကို ကောင်းမွန်စွာ အသုံးမချနိုင်ခြင်းတို့ကြောင့် ဖြစ်ပွားရခြင်း ဖြစ်သည်။
ဆီးပေါများသောရောဂါကို အမြစ်ပြတ်အောင် မကုသနိုင်သော်လည်း ၎င်း၏ လက္ခဏာများကို ထိရောက်စွာ ထိန်းချုပ်နိုင်မည့် ကုသမှုများ ရှိပါသည်။ ဤကုသမှုများသည် အလွန်အကျွံ ရေငတ်ခြင်းကို သက်သာစေရန်၊ ဆီးသွားသည့် ပမာဏကို လျှော့ချရန်နှင့် ရေဓာတ်ခမ်းခြောက်ခြင်းကို ကာကွယ်ရန် ရည်ရွယ်လုပ်ဆောင်ခြင်း ဖြစ်သည်။
ရောဂါလက္ခဏာများ
ဆီးပေါများသောရောဂါ၏ လက္ခဏာများနှင့် အချက်ပြလက္ခဏာများတွင် အောက်ပါတို့ ပါဝင်သည် –
- ရေခဏခဏသောက်ခြင်းနှင့် ညဘက်တွင် ဆီးခဏခဏသွားခြင်း
- အရောင်ဖျော့သော ဆီးများကို အများအပြား သွားခြင်း
- အလွန်အကျွံ ရေငတ်ခြင်း
- အအေးစာ သို့မဟုတ် အအေးဘူးများကို ပြင်းထန်စွာ တောင့်တခြင်း
အကယ်၍ သင့်ရောဂါအခြေအနေ ပြင်းထန်ပြီး အရည်ဓာတ်များစွာ သောက်သုံးပါက တစ်နေ့လျှင် ဆီးပမာဏ ၂၀ ကွာတ် (၁၉ လီတာခန့်) အထိ ထွက်ရှိနိုင်ပါသည်။ (ကျန်းမာရေးကောင်းမွန်သော လူကြီးတစ်ဦးသည် ပုံမှန်အားဖြင့် တစ်နေ့လျှင် ဆီး ၁ ကွာတ်မှ ၃ ကွာတ် (၁ လီတာမှ ၃ လီတာခန့်) သာ သွားလေ့ရှိပါသည်။)
ဆီးပေါများသောရောဂါရှိသော ကလေးငယ်များတွင် အောက်ပါ အချက်ပြလက္ခဏာများနှင့် ဝေဒနာအချို့ ပြသတတ်ပါသည် –
- အရောင်ဖျော့သော ဆီးများကို အများအပြား သွားခြင်း
- ဒိုင်ပါ (ကလေးသေးခံ) များ ရွှဲရွှဲစိုနေခြင်း သို့မဟုတ် အိပ်ရာထဲ ဆီးထွက်ခြင်း
- အလွန်အကျွံ ရေငတ်ခြင်း
- အအေးစာ သို့မဟုတ် အအေးဘူးများကို ပြင်းထန်စွာ တောင့်တခြင်း
- ဖွံ့ဖြိုးမှု နှောင့်နှေးခြင်း
- ကိုယ်အလေးချိန် ကျဆင်းခြင်း
- ဖျားခြင်း
- အန်ခြင်း
- ဝမ်းချုပ်ခြင်း
- အိပ်စက်ရခက်ခဲခြင်း
- အမြင်အာရုံဆိုင်ရာ ပြဿနာများ ရှိလာခြင်း
- ခေါင်းကိုက်ခြင်း
အကယ်၍ သင်သည် ဆီးအလွန်အကျွံသွားခြင်းနှင့် ပြင်းထန်စွာ ရေငတ်ခြင်းတို့ကို ခစားနေရပါက ဆရာဝန်နှင့် ချက်ချင်း ပြသတိုင်ပင်ပါ။
အကြောင်းရင်းများခန္ဓာကိုယ်တွင်း အရည်ဓာတ်ပမာဏ မျှခြေ မညီမမျှ ဖြစ်လာသောအခါ ဆီးပေါများသောရောဂါ စတင်ဖြစ်ပွားလာသည်။
ပုံမှန်အားဖြင့် သင့်ကျောက်ကပ်သည် ခန္ဓာကိုယ်တွင်းမှ စွန့်ပစ်ပစ္စည်းများကို ဖယ်ရှားရန် သွေးထဲတွင် ပါဝင်သော အရည်များကို စစ်ထုတ်ပေးသည်။ ထိုသို့ စစ်ထုတ်လိုက်သော အရည်အများစုသည် သွေးကြောထဲသို့ ပြန်လည်စီးဝင်သွားပြီး၊ ကျန်ရှိသော စွန့်ပစ်ပစ္စည်းများနှင့် အရည်ပမာဏ အနည်းငယ်တို့ စုပေါင်းကာ ဆီးအဖြစ် ဖြစ်ပေါ်လာသည်။ ဆီးသည် ဆီးအိမ်အတွင်း ခေတ္တသိုလှောင်ပြီးနောက်မှ ခန္ဓာကိုယ်ပြင်ပသို့ စွန့်ထုတ်ခြင်း ဖြစ်သည်။
ခန္ဓာကိုယ်အတွင်း သင့်လျော်သော ရေဓာတ်မျှခြေကို ထိန်းသိမ်းရန် ဗေဆိုပရက်ဆင် ဟုလည်းခေါ်သော ဆီးထိန်းဟော်မုန်း (ADH) မဖြစ်မနေ လိုအပ်ပါသည်။ ဤဟော်မုန်းသည် ကျောက်ကပ်မှ စစ်ထုတ်လိုက်သော အရည်များကို သွေးကြောထဲသို့ ပြန်လည်စုပ်ယူနိုင်ရန် ကူညီပေးသည်။ ADH ဟော်မုန်းကို ဦးနှောက်၏ အစိတ်အပိုင်းတစ်ခုဖြစ်သော ဟိုက်ပိုသလမတ်စ် (Hypothalamus) တွင် ထုတ်လုပ်ပြီး၊ ဦးနှောက်ခြေရင်းတွင်ရှိသော ပီကျူးထရီဂလင်း (Pituitary gland) ခေါ် တက်စေ့ဂလင်းအသေးလေးတွင် သိုလှောင်ထားသည်။ ခန္ဓာကိုယ်တွင် ADH ဟော်မုန်း ချို့တဲ့လာသောအခါ သို့မဟုတ် ၎င်းဟော်မုန်း၏ အလုပ်လုပ်ဆောင်မှုကို ပိတ်ဆို့ခံရသောအခါ ဆီးများ အလွန်အကျွံ ထွက်ရှိလာရခြင်း ဖြစ်သည်။
သင့်တွင် ဆီးပေါများသောရောဂါ ရှိနေပါက သင့်ခန္ဓာကိုယ်သည် အရည်ဓာတ်မျှခြေကို ထိန်းသိမ်းရန် ရုန်းကန်ရပါလိမ့်မည်။ သင်ခံစားနေရသော ဆီးပေါများသောရောဂါ အမျိုးအစားပေါ် မူတည်၍ ဖြစ်ပွားရသည့် အကြောင်းရင်းများ ကွဲပြားနိုင်သည် –
- ဦးနှောက်အခြေခံ ဆီးပေါများသောရောဂါ (Central diabetes insipidus) – ခွဲစိတ်မှု ပြုလုပ်ခြင်း၊ အကျိတ်ဖြစ်ခြင်း၊ ဦးခေါင်းထိခိုက်ဒဏ်ရာရခြင်း သို့မဟုတ် ဖျားနာခြင်းတို့ကြောင့် ပီကျူးထရီဂလင်း သို့မဟုတ် ဟိုက်ပိုသလမတ်စ် ထိခိုက်ပျက်စီးသွားသောအခါ ADH ဟော်မုန်း ပုံမှန်ထုတ်လုပ်ခြင်း၊ သိုလှောင်ခြင်းနှင့် ထွက်ရှိခြင်းတို့ကို အဟန့်အတားဖြစ်စေပြီး ဤရောဂါအမျိုးအစားကို ဖြစ်ပွားစေသည်။ မျိုးရိုးလိုက်သော မျိုးရိုးဗီဇဆိုင်ရာ ချို့ယွင်းချက်ကြောင့်လည်း ဖြစ်နိုင်သည်။ အချို့သောအခြေအနေများတွင် ခန္ဓာကိုယ်၏ ကိုယ်ခံအားစနစ်က ADH ထုတ်လုပ်ပေးသော ဆဲလ်များကို မှားယွင်းတိုက်ခိုက်သည့် ကိုယ်ခံအားစနစ် ဖောက်ပြန်မှု (Autoimmune response) ကြောင့်လည်း ဖြစ်ပွားတတ်သည်။
- ကျောက်ကပ်အခြေခံ ဆီးပေါများသောရောဂါ (Nephrogenic diabetes insipidus) – သင့်ကျောက်ကပ် ထိခိုက်ပျက်စီးနေပြီး ADH ဟော်မုန်းအပေါ် ပုံမှန်အတိုင်း တုံ့ပြန်နိုင်စွမ်း မရှိတော့သောအခါ ဤရောဂါအမျိုးအစား ဖြစ်ပွားသည်။ နာတာရှည် ကျောက်ကပ်ရောဂါ သို့မဟုတ် မျိုးရိုးလိုက်သော (မျိုးရိုးဗီဇ) ပြဿနာကြောင့် ကျောက်ကပ် ထိခိုက်ရခြင်း ဖြစ်နိုင်သည်။ ထို့အပြင် လီသီယမ် (Lithium) နှင့် ဖော့စကာနက် (Foscarnet) ကဲ့သို့သော ဗိုင်းရပ်စ်သတ်ဆေးများ အပါအဝင် အချို့သော ဆေးဝါးများကြောင့်လည်း ကျောက်ကပ်အခြေခံ ဆီးပေါများသောရောဂါ ဖြစ်ပွားနိုင်သည်။ ဆီးလမ်းကြောင်း ပိတ်ဆို့ခြင်း သို့မဟုတ် ဆီးလမ်းကြောင်း ပိုးဝင်ခြင်းတို့ကြောင့်လည်း ဤရောဂါ ဖြစ်ပွားတတ်သည်။
- ကိုယ်ဝန်ဆောင် ဆီးပေါများသောရောဂါ (Gestational diabetes insipidus) – ကိုယ်ဝန်ဆောင်ချိန်တွင် ဖြစ်ပွားတတ်သော ဆီးပေါများသောရောဂါသည် အလွန်ရှားပါးသည်။ ကိုယ်ဝန်ဆောင်စဉ် ကာလအတွင်း၌သာ အချင်း (Placenta) မှ ထွက်ရှိလာသော အင်ဇိုင်း (Enzyme) တစ်မျိုးက မိခင်၏ ခန္ဓာကိုယ်တွင်းရှိ ADH ဟော်မုန်းများကို ဖျက်ဆီးပစ်ခြင်းကြောင့် ဖြစ်သည်။
- ရေအလွန်အကျွံသောက်ခြင်းကြောင့် ဖြစ်သော ဆီးပေါများသောရောဂါ (Primary polydipsia) – ဒီပဆိုဂျန်းနစ် ဆီးပေါများသောရောဂါ (Dipsogenic diabetes insipidus) ဟုလည်း ခေါ်ဆိုပြီး အရည်များကို အလွန်အကျွံ သောက်သုံးခြင်းကြောင့် အရောင်အလွန်ဖျော့သော ဆီးများ အများအပြား ထွက်ရှိလာသည့် အခြေအနေ ဖြစ်သည်။ ရေငတ်ခြင်းကို ထိန်းချုပ်ပေးသော ဟိုက်ပိုသလမတ်စ် စနစ် ထိခိုက်ပျက်စီးသွားခြင်းကြောင့် ဤဝေဒနာ ဖြစ်ပွားနိုင်သည်။ ထို့အပြင် စိတ်ကမူးယောင်ခြောက်ခြားဖြစ်ခြင်း ရောဂါ (Schizophrenia) နှင့် အခြားသော စိတ်ကျန်းမာရေး ဝေဒနာများနှင့်လည်း ဆက်စပ်မှု ရှိနေတတ်သည်။
ဆီးပေါများသောရောဂါ ဖြစ်ပွားရသည့် အကြောင်းရင်းကို တိကျစွာ ရှာဖွေဖော်ထုတ်ရန် စိန်ခေါ်မှုများ ရှိနိုင်သော်လည်း ရေရှည်တွင် စနစ်တကျ စစ်ဆေးမှုများ ပြုလုပ်ခြင်းဖြင့် အရင်းခံ အကြောင်းရင်းကို သိရှိနိုင်မည် ဖြစ်သည်။
ဖြစ်နိုင်ခြေရှိသော အကြောင်းရင်းများ
ဆီးပေါများသောရောဂါသည် မည်သူ့တွင်မဆို ဖြစ်ပွားနိုင်သော်လည်း အောက်ပါအခြေအနေ ရှိသူများတွင် ဖြစ်ပွားနိုင်ခြေ ပိုမိုမြင့်မားနိုင်သည် –
- မိသားစုဝင်ထဲတွင် ဤရောဂါဖြစ်ဖူးသည့် ရာဇဝင်ရှိခြင်း။
- ကျောက်ကပ်ပြဿနာများကို ဖြစ်စေနိုင်သော ဆီးဆေးများ (Diuretics) ကဲ့သို့သော သီးသန့်ဆေးဝါးအချို့ကို မှီဝဲနေရခြင်း။
- သွေးတွင်း ကယ်လ်စီယမ် ပမာဏ အလွန်မြင့်မားနေခြင်း သို့မဟုတ် ပိုတက်စီယမ် ပမာဏ အလွန်နိမ့်ကျနေခြင်း။
- ပြင်းထန်သော ဦးခေါင်းထိခိုက်ဒဏ်ရာ ရဖူးခြင်း သို့မဟုတ် ဦးနှောက်ခွဲစိတ်မှု ခံယူဖူးခြင်း။
ရောဂါရှာဖွေခြင်းဆီးပေါများသောရောဂါကို ရှာဖွေဖော်ထုတ်ရန် အောက်ပါစစ်ဆေးမှုများကို ပြုလုပ်လေ့ရှိသည် –
- ရေအငတ်ခံ စစ်ဆေးခြင်း (Water deprivation test) – ဆရာဝန်နှင့် ကျန်းမာရေးဝန်ထမ်းများ၏ စောင့်ကြည့်မှုအောက်တွင် နာရီပေါင်းများစွာကြာ အရည်ဓာတ် သောက်သုံးခြင်းကို ရှောင်ကြဉ်ရန် သင့်ကို လမ်းညွှန်ပါလိမ့်မည်။ သင့်အား ရေအငတ်ခံထားစဉ်အတွင်း ဆရာဝန်သည် သင့်ကိုယ်အလေးချိန် ပြောင်းလဲမှု၊ ဆီးထွက်ရှိမှုပမာဏနှင့် ဆီးနှင့်သွေး၏ ပျစ်ခဲမှု (ဒြပ်စုစည်းမှု) အပြောင်းအလဲများကို စောင့်ကြည့်စစ်ဆေးပါမည်။ ထို့ပြင် သွေးထဲရှိ ADH ဟော်မုန်းပမာဏကိုလည်း စစ်ဆေးပါလိမ့်မည်။ ဤစစ်ဆေးမှုပြုလုပ်နေစဉ်အတွင်း ဆရာဝန်သည် ဓာတ်ခွဲခန်းထုတ် ADH ဟော်မုန်းအတုကို ထည့်သွင်းပေးနိုင်ပါသည်။ ၎င်းသည် သင့်ခန္ဓာကိုယ်မှ ADH ဟော်မုန်း လုံလောက်စွာ ထုတ်လုပ်နိုင်ခြင်း ရှိ၊ မရှိနှင့် သင့်ကျောက်ကပ်က ADH ဟော်မုန်းအပေါ် မျှော်လင့်ထားသကဲ့သို့ တုံ့ပြန်နိုင်စွမ်း ရှိ၊ မရှိတို့ကို သိရှိစေမည် ဖြစ်သည်။
- ဆီးစစ်ခြင်း (Urine test) – ဆီးထဲတွင် ရေဓာတ်ပါဝင်မှု အလွန်များပြားနေခြင်း ရှိ၊ မရှိကို ဆီးစစ်ခြင်းဖြင့် သိရှိနိုင်ပြီး ၎င်းသည် ဆီးပေါများသောရောဂါကို ရောဂါရှာဖွေရာတွင် များစွာအထောက်အကူပြုပါသည်။
- သွေးစစ်ခြင်း (Blood test) – သွေးထဲရှိ ဆိုဒီယမ် (Sodium)၊ ပိုတက်စီယမ် (Potassium) နှင့် ကယ်လ်စီယမ် (Calcium) ကဲ့သို့သော သီးသန့်ဒြပ်စင်များ၏ အဆင့်ကို စစ်ဆေးခြင်းဖြင့် ဆီးပေါများသောရောဂါ ရှိ၊ မရှိ ရှာဖွေနိုင်သည့်အပြင် ၎င်းရောဂါ၏ အမျိုးအစားကိုပါ ခွဲခြားသတ်မှတ်ရာတွင် ကူညီပေးနိုင်ပါသည်။
- သံလိုက်ဓာတ်မှန်ရိုက်ခြင်း (Magnetic Resonance Imaging – MRI) – ပီကျူးထရီဂလင်း သို့မဟုတ် ဟိုက်ပိုသလမတ်စ်တို့တွင် ပုံမှန်မဟုတ်သော ချို့ယွင်းချက်များ ရှိ၊ မရှိ စစ်ဆေးရန် MRI ရိုက်နိုင်ပါသည်။ ဤစစ်ဆေးမှုသည် ခန္ဓာကိုယ်ကို ထိုးဖောက်ခွဲစိတ်ရန် မလိုဘဲ ရေဒီယိုလှိုင်းများနှင့် အားပြင်းသော သံလိုက်စက်ကွင်းတို့ကို အသုံးပြုကာ ဦးနှောက်တစ်သျှူးများ၏ တိကျပြတ်သားသော ပုံရိပ်များကို ဖန်တီးပေးခြင်း ဖြစ်သည်။
- မျိုးရိုးဗီဇဆိုင်ရာ စစ်ဆေးခြင်း (Genetic screening) – အကယ်၍ သင့်မိသားစုဝင်ထဲတွင် ဆီးအလွန်အကျွံသွားသည့် ပြဿနာမျိုး ကြုံတွေ့ဖူးသူရှိပါက ဆရာဝန်က မျိုးရိုးဗီဇ စစ်ဆေးမှုကို လမ်းညွှန်နိုင်ပါသည်။
ကုသမှု
သင်ခံစားနေရသော ဆီးပေါများသောရောဂါ အမျိုးအစားပေါ် မူတည်၍ ကုသမှုပုံစံများ ကွဲပြားပါလိမ့်မည်။
အကယ်၍ သင်သည် အပျော့စား ဆီးပေါများသောရောဂါကို ခံစားနေရပါက ရေကို ပိုမိုသောက်သုံးပေးရုံမျှဖြင့် လုံလောက်နိုင်ပါသည်။
- ဦးနှောက်အခြေခံ ဆီးပေါများသောရောဂါ (Central diabetes insipidus) – အကယ်၍ ဤရောဂါသည် ပီကျူးထရီဂလင်း သို့မဟုတ် ဟိုက်ပိုသလမတ်စ်တွင် အကျိတ်ဖြစ်ခြင်းကဲ့သို့သော ပုံမှန်မဟုတ်သည့် အခြေအနေတစ်ခုကြောင့် ဖြစ်ပွားရခြင်း ဖြစ်ပါက ဆရာဝန်သည် ထိုအခြေခံအကြောင်းရင်းကို အရင်ဦးစွာ ကုသပါလိမ့်မည်။ ဤရောဂါအမျိုးအစားကို ကုသရန်အတွက် များသောအားဖြင့် ဒက်စမိုပရက်ဆင် (Desmopressin – DDAVP, Nocdurna) ခေါ် သုတေသနပြု ထုတ်လုပ်ထားသော ဟော်မုန်းအတုကို အသုံးပြုကြသည်။ ဤဆေးသည် ဆီးထိန်းဟော်မုန်း (ADH) နေရာတွင် အစားထိုးဝင်ရောက် လုပ်ဆောင်ပေးပြီး ဆီးသွားခြင်းကို လျော့နည်းစေသည်။ ဒက်စမိုပရက်ဆင်ဆေးကို သောက်ဆေးပြား၊ နှာခေါင်းဖျန်းဆေးနှင့် ဆေးထိုးစနစ် ပုံစံအမျိုးမျိုးဖြင့် ရရှိနိုင်ပါသည်။ ဦးနှောက်အခြေခံ ဆီးပေါများသောရောဂါရှိသူ အများစုသည် (နေ့စဉ် ပမာဏ အတက်အကျ ရှိနိုင်သော်လည်း) ADH ဟော်မုန်းအချို့ကို ခန္ဓာကိုယ်မှ ထုတ်လုပ်နိုင်ပါသေးသည်။ ထို့ကြောင့် သင်လိုအပ်သော ဒက်စမိုပရက်ဆင် ဆေးပမာဏသည်လည်း ပြောင်းလဲနိုင်ပါသည်။ ဒက်စမိုပရက်ဆင် ဆေးပမာဏ အလွန်အကျွံ သုံးစွဲမိပါက ခန္ဓာကိုယ်တွင်း ရေဓာတ်များစုပုံလာပြီး သွေးတွင်းဆားဓာတ် အလွန်အကျွံ လျော့နည်းသွားကာ အန္တရာယ်ရှိသော အခြေအနေများ ဖြစ်ပေါ်စေနိုင်ပါသည်။
- ကျောက်ကပ်အခြေခံ ဆီးပေါများသောရောဂါ (Nephrogenic diabetes insipidus) – ဤရောဂါအမျိုးအစားတွင် ကျောက်ကပ်က ADH ဟော်မုန်းအပေါ် ထိရောက်စွာ တုံ့ပြန်နိုင်စွမ်း မရှိသောကြောင့် ဒက်စမိုပရက်ဆင်ဆေးဖြင့် ကုသ၍ မရနိုင်ပါ။ ထို့အစား ကျောက်ကပ်မှ ထုတ်လုပ်သော ဆီးပမာဏကို လျှော့ချနိုင်ရန် ဆားဓာတ်လျှော့ချထားသော အစားအစာ (Low-salt diet) ကို စားသုံးရန် ဆရာဝန်က လမ်းညွှန်နိုင်ပါသည်။ ထို့အပြင် ရေဓာတ်ခမ်းခြောက်မှု မရှိစေရန်အတွက်လည်း ရေကို လုံလောက်စွာ သောက်သုံးပေးရပါမည်။
ဟိုက်ဒရိုကလိုရိုသိုင်ယာဇိုက် (Hydrochlorothiazide) ဆေးဖြင့် ကုသခြင်းက သင့်ရောဂါလက္ခဏာများကို သက်သာကောင်းမွန်စေနိုင်ပါသည်။ ပုံမှန်အားဖြင့် ဟိုက်ဒရိုကလိုရိုသိုင်ယာဇိုက် ဆီးဆေးသည် ဆီးထုတ်လုပ်မှုကို ပိုမိုများပြားစေသော်လည်း၊ ကျောက်ကပ်အခြေခံ ဆီးပေါများသောရောဂါရှိသူ အချို့တွင်မူ ဆီးထွက်ရှိမှုကို ပြန်လည်လျော့နည်းသွားစေနိုင်သည့် အာနိသင် ရှိပါသည်။
အကယ်၍ သင့်ရောဂါလက္ခဏာများသည် သင်လက်ရှိမှီဝဲနေသော ဆေးဝါးများကြောင့် ဖြစ်ပွားရခြင်း ဖြစ်ပါက ထိုဆေးများကို ရပ်တန့်လိုက်ခြင်းက အထောက်အကူ ဖြစ်စေနိုင်ပါသည်။ သို့သော်လည်း မည်သည့်ဆေးဝါးကိုမဆို မရပ်တန့်မီ ဆရာဝန်နှင့် အရင်ဦးစွာ တိုင်ပင်ဆွေးနွေးရပါမည်။
- ကိုယ်ဝန်ဆောင် ဆီးပေါများသောရောဂါ (Gestational diabetes insipidus) – ကိုယ်ဝန်ဆောင်စဉ် ဖြစ်ပွားတတ်သော ဆီးပေါများသောရောဂါအတွက် အသုံးအများဆုံး ကုသမှုပုံစံမှာ ဒက်စမိုပရက်ဆင် (Desmopressin) ဟော်မုန်းအတုကို အသုံးပြု၍ ကုသခြင်း ဖြစ်သည်။
- ရေအလွန်အကျွံသောက်ခြင်းကြောင့် ဖြစ်သော ဆီးပေါများသောရောဂါ (Primary polydipsia) – ဤရောဂါအမျိုးအစားအတွက် အရည်ဓာတ် သောက်သုံးမှုကို လျှော့ချခြင်းမှလွဲ၍ သီးသန့်ကုသမှု မရှိပါ။ အကယ်၍ ဤအခြေအနေသည် စိတ်ကျန်းမာရေး ဝေဒနာတစ်ခုခုနှင့် ဆက်စပ်နေပါက ထိုစိတ်ကျန်းမာရေး ဝေဒနာကို စနစ်တကျ ကုသပေးခြင်းဖြင့် ဆီးပေါများသောရောဂါ၏ လက္ခဏာများကို သက်သာစေနိုင်ပါသည်။
