နှလုံးဆီသို့ အဆုတ်သွေးပြန်ကြော အားလုံး ပုံမှန်မဟုတ်ဘဲ စီးဝင်ခြင်း

နှလုံးဆီသို့ အဆုတ်သွေးပြန်ကြော အားလုံး ပုံမှန်မဟုတ်ဘဲ စီးဝင်ခြင်း အကြောင်း သိကောင်းစရာ

နှလုံးဆီသို့ အဆုတ်သွေးပြန်ကြော အားလုံး ပုံမှန်မဟုတ်ဘဲ စီးဝင်ခြင်း (Total anomalous pulmonary venous return – TAPVR) ဆိုသည်မှာ အဖြစ်နည်းသော မွေးရာပါ နှလုံးချို့ယွင်းချက် (Congenital heart defect) တစ်မျိုး ဖြစ်သည်။ ၎င်းကို တိုတိုဖြင့် TAPVC (Total abnormal pulmonary venous connection) ဟုလည်း ခေါ်ဆိုလေ့ရှိပြီး၊ အဆုတ်မှ သွေးပြန်ကြောများသည် နှလုံး၏ ပုံမှန်မဟုတ်သော နေရာလွဲမှားသည့် နေရာသို့ လာရောက်ချိတ်ဆက်မိနေခြင်း ဖြစ်သည်။

ပုံမှန်အားဖြင့် အောက်ဆီဂျင်ပြည့်ဝသော သွေးများသည် အဆုတ်မှတစ်ဆင့် နှလုံး၏ ဘယ်ဘက်အပေါ်ခန်း (Left atrium) သို့ စီးဝင်ပြီးနောက် ခန္ဓာကိုယ်တစ်ခုလုံးသို့ ဆက်လက်စီးဆင်းရမည် ဖြစ်သည်။ သို့သော် TAPVR ဝေဒနာတွင်မူ ပုံမှန်မဟုတ်သော သွေးပြန်ကြောချိတ်ဆက်မှုကြောင့် အဆိုပါသွေးများသည် နှလုံး၏ ညာဘက်အပေါ်ခန်း (Right atrium) သို့ လမ်းကြောင်းလွဲ၍ စီးဝင်သွားပြီး အောက်ဆီဂျင်နည်းသော သွေးများနှင့် သွားရောက်ရောနှောသွားသည်။ ရလဒ်အနေဖြင့် ခန္ဓာကိုယ်သို့ ဆက်လက်စီးဆင်းမည့် သွေးများတွင် လုံလောက်သော အောက်ဆီဂျင်ပမာဏ မပါရှိတော့ပေ။

TAPVR အမျိုးအစား ကွဲပြားမှုများသည် သွေးပြန်ကြောများ မည်သည့်နေရာတွင် လာရောက်ဆုံဆည်းကြသလဲ ဆိုသည့်အချက်ပေါ်တွင် မူတည်သည်။ TAPVR ဝေဒနာ ခံစားရသော မွေးကင်းစကလေးငယ် အများစုတွင် မိသားစုမျိုးရိုး၌ မွေးရာပါ နှလုံးရောဂါရာဇဝင် မရှိကြသည်ကို တွေ့ရသည်။

ရောဂါလက္ခဏာများ

ကလေးမွေးဖွားပြီးပြီးချင်းတွင် ဆရာဝန်သည် TAPVR ၏ ရောဂါလက္ခဏာများကို ခွဲခြားသိရှိနိုင်ပါသည်။ သို့သော်လည်း အချို့သော ကလေးငယ်များတွင်မူ အတော်အတန် ကြာမြင့်မှသာ လက္ခဏာများ စတင်ပြသလေ့ ရှိသည်။

TAPVR ရှိသော ကလေးငယ်တစ်ဦးသည် ခန္ဓာကိုယ်သို့ စီးဆင်းမည့် သွေးများထဲတွင် အောက်ဆီဂျင်ပမာဏ နည်းပါးခြင်းကြောင့် သော်လည်းကောင်း၊ အဆုတ်သွေးပြန်ကြောများတစ်လျှောက် သွေးစီးဆင်းမှု လျော့နည်းခြင်း သို့မဟုတ် ပိတ်ဆို့ခြင်းကြောင့် သော်လည်းကောင်း အသက်ရှူရ ခက်ခဲခြင်းနှင့် အသားအရေ ပြာနှမ်းခြင်း (Cyanotic) တို့ကို ကြုံတွေ့ရနိုင်ပါသည်။