ယားယံခြင်း

အကျဉ်းချုပ်အကြောင်းအရာ

ယားယံခြင်းသည် အရေပြားတွင် ယားယံမှုကို ခံစားရသော ဆေးပညာဆိုင်ရာ အခြေအနေတစ်ခု ဖြစ်ပါသည်၊၊ ၎င်းသည် ထိုယားယံမှုကို သက်သာစေရန် မိမိကိုယ်ကို ကုတ်ခြစ်မိစေသည့် မသက်မသာဖြစ်သော ခံစားချက်မျိုး ဖြစ်ပါသည်၊၊ ယားယံခြင်းသည် စိတ်အနှောင့်အယှက်ဖြစ်စေပြီး ခန္ဓာကိုယ်၏ နေရာတစ်ခုတည်းတွင်သော်လည်းကောင်း၊ နေရာအနှံ့အပြားတွင်သော်လည်းကောင်း ဖြစ်ပွားနိုင်ပါသည်၊၊ အသက်ကြီးလာသည်နှင့်အမျှ အရေပြားသည် ပိုမိုခြောက်သွေ့လာတတ်သဖြင့် ဤဝေဒနာမှာ သက်ကြီးရွယ်အိုများတွင် အဖြစ်များလေ့ရှိပါသည်၊၊

သင်၏အရေပြားမှာ ပုံမှန်အတိုင်းရှိနေခြင်း သို့မဟုတ် နီမြန်းခြင်း၊ ကြမ်းတမ်းခြင်းနှင့် အဖုအပိမ့်များ ထွက်ခြင်းတို့မှာ ယားယံရသည့် အကြောင်းရင်းအပေါ် မူတည်ပါသည်၊၊ မကြာခဏ ကုတ်ခြစ်ခြင်းကြောင့် အရေပြားမှာ ထူထဲလာခြင်း၊ အကွက်များ ဖြစ်ပေါ်လာခြင်း၊ သွေးထွက်ခြင်း သို့မဟုတ် ပိုးဝင်ခြင်းတို့ ဖြစ်နိုင်ပါသည်၊၊

ယားယံရသည့် အကြောင်းရင်းနှင့် ဖြစ်ပွားသော နေရာအပေါ် မူတည်၍ အမျိုးအစားများစွာ ရှိပါသည်၊၊ အဖြစ်အများဆုံး အမျိုးအစားများမှာ-

• အာရုံကြောကြောင့် လက်မောင်းယားခြင်း။ အာရုံကြော ထိခိုက်မှုကြောင့် လက်မောင်းအပေါ်ပိုင်းတွင် ယားယံခြင်း ဖြစ်ပါသည်၊၊
• ညဘက်တွင် ယားယံခြင်း။ ဆေးဝါးများ၏ ဘေးထွက်ဆိုးကျိုး၊ အရေပြားယားယံစေသော အရာများနှင့် ထိတွေ့မိခြင်း သို့မဟုတ် ခန္ဓာကိုယ်၏ သဘာဝဖြစ်စဉ်များကြောင့် ညဘက်တွင် ယားယံခြင်း ဖြစ်နိုင်ပါသည်၊၊
• စအိုတစ်ဝိုက် ယားယံခြင်း။ စအိုတစ်ဝိုက်တွင် ပိုးဝင်ခြင်း၊ လိပ်ခေါင်းရောဂါ သို့မဟုတ် ယားယံစေသော အရာများနှင့် ထိတွေ့ခြင်းကြောင့် ဖြစ်ပွားပါသည်၊၊
• ကျောက်ကပ်ရောဂါကြောင့် ယားယံခြင်း။ ကျောက်ကပ်လုပ်ဆောင်ချက် ချို့ယွင်း၍ သွေးသန့်စင်မှု ခံယူနေရသော လူနာများတွင် ဤလက္ခဏာ ခံစားရတတ်ပါသည်၊၊

ရောဂါလက္ခဏာများ

ယားယံခြင်းသည် ဤဝေဒနာ၏ အဓိက လက္ခဏာ ဖြစ်ပါသည်၊၊ ၎င်းသည် မသက်မသာ ဖြစ်မှုကို သက်သာစေရန် အရေပြားကို ကုတ်ခြစ်လိုစိတ် ဖြစ်ပေါ်စေပါသည်၊၊ ယားယံခြင်းကို ဦးရေပြား၊ လက်မောင်း သို့မဟုတ် ခြေထောက်ကဲ့သို့သော နေရာကွက်၍သော်လည်းကောင်း၊ တစ်ကိုယ်လုံးတွင်သော်လည်းကောင်း ခံစားရနိုင်ပါသည်၊၊ အရေပြားတွင် သိသာသော ပြောင်းလဲမှုမရှိဘဲ ယားယံနိုင်သလို အောက်ပါအတိုင်းလည်း ဖြစ်နိုင်ပါသည်-

• အရေပြား နီမြန်းရောင်ရမ်းခြင်း၊၊
• ကုတ်ခြစ်ရာများ ရှိခြင်း၊၊
• အရေပြား ခြောက်သွေ့ခြင်း သို့မဟုတ် အက်ကွဲခြင်း၊၊
• သားရေကဲ့သို့ ထူထဲခြင်း သို့မဟုတ် အကြေးခွံများ ဖြစ်ပေါ်ခြင်း၊၊
• အဖုများ၊ အကွက်များ သို့မဟုတ် အရည်ကြည်ဖုများ ထွက်ခြင်း၊၊
• ယားယံသော နေရာတွင် နာကျင်ခြင်း၊၊
• အရေပြား ပေါက်ပြဲရာမှ အဝါရောင် သို့မဟုတ် အဖြူရောင်အရည်များ ထွက်ခြင်း၊ အနာမကျက်ခြင်းနှင့် အဖတ်များ တက်ခြင်း (ပိုးဝင်သည့် လက္ခဏာ)၊၊

တစ်ခါတစ်ရံတွင် ယားယံခြင်းမှာ ပြင်းထန်ပြီး အချိန်ကြာမြင့်နိုင်ပါသည်၊၊ ပွတ်တိုက်ခြင်း သို့မဟုတ် ကုတ်ခြစ်ခြင်းကြောင့် ပို၍ ယားယံလာတတ်ပါသည်၊၊ ကုတ်လေယားလေ ဖြစ်နေသော သံသရာကို ဖြတ်တောက်ရန် ခက်ခဲနိုင်ပါသည်၊၊

အကယ်၍ မိမိဘာသာ ဂရုစိုက်သော်လည်း နှစ်ပတ်ထက်ကျော်၍ ယားယံနေခြင်း၊ နေ့စဉ်ဘဝ သို့မဟုတ် အိပ်စက်မှုကို အနှောင့်အယှက်ဖြစ်စေလောက်အောင် ပြင်းထန်ခြင်း၊ အကြောင်းရင်းမရှိဘဲ ရုတ်တရက် ယားခြင်း၊ တစ်ကိုယ်လုံး ယားခြင်း သို့မဟုတ် ယားယံခြင်းနှင့်အတူ ကိုယ်အလေးချိန်ကျခြင်း၊ ဖျားခြင်း၊ ညဘက် ချွေးထွက်ခြင်းတို့ တွဲဖက်ဖြစ်ပေါ်ပါက ဆရာဝန် သို့မဟုတ် အရေပြားအထူးကုနှင့် ပြသရန် အရေးကြီးပါသည်၊၊

ကုသမှုခံယူသော်လည်း သုံးလကျော်သည်အထိ မသက်သာပါက အရေပြားရောဂါ ရှိ၊ မရှိ စစ်ဆေးရန် အထူးကုနှင့် ပြသသင့်ပါသည်၊၊

ဖြစ်ပွားရသောအကြောင်းရင်းများ

အချို့အခြေအနေများတွင် ယားယံရသည့် အကြောင်းရင်းကို မသိရှိနိုင်ပါ၊၊ ဖြစ်နိုင်ခြေရှိသော အကြောင်းရင်းများမှာ-

• အရေပြားရောဂါများ။ အရေပြားရောင်ရမ်းခြင်း၊ နှင်းခူ၊ ဝဲနာ၊ အပူလောင်ခြင်း၊ အမာရွတ်များ၊ ပိုးမွှားကိုက်ခြင်းနှင့် အင်ပျဉ်ထခြင်းတို့ကြောင့် ယားယံနိုင်ပါသည်၊၊
• အတွင်းပိုင်းရောဂါများ။ အသည်းရောဂါ၊ ကျောက်ကပ်ရောဂါ၊ သွေးအားနည်းရောဂါ၊ ဆီးချိုရောဂါ၊ လည်ပင်းကြီးဟော်မုန်းပြဿနာနှင့် အချို့သော အကျိတ်များကြောင့် တစ်ကိုယ်လုံး ယားယံနိုင်ပါသည်၊၊ ၎င်းတွင် ဟော်မုန်းအပြောင်းအလဲနှင့် အသက်အရွယ်အရ ခန္ဓာကိုယ် ပြောင်းလဲမှုများလည်း ပါဝင်နိုင်ပါသည်၊၊
• အာရုံကြောစနစ် ချို့ယွင်းခြင်း။ အာရုံကြော ထိခိုက်မှု သို့မဟုတ် အာရုံကြောစနစ် ရောဂါများကြောင့် ယားယံခြင်း ဖြစ်နိုင်ပါသည်၊၊ ရေယုန်၊ အာရုံကြော ညှပ်ခြင်းနှင့် အာရုံကြောလမ်းကြောင်း ပျက်စီးခြင်းတို့မှာ ဥပမာများ ဖြစ်ပါသည်၊၊
• စိတ်ကျန်းမာရေး အခြေအနေများ။ စိတ်ပိုင်းဆိုင်ရာ ပြဿနာများကြောင့် ယားယံခြင်း ဖြစ်နိုင်ပါသည်၊၊ စိတ်ဓာတ်ကျခြင်း၊ စိုးရိမ်ပူပန်ခြင်းနှင့် စွဲလမ်းစိတ်လွန်ကဲခြင်းတို့မှာ ဥပမာများ ဖြစ်ပါသည်၊၊
• ဓာတ်မတည့်ခြင်းနှင့် ယားယံစေသော အရာများ။ သိုးမွှေး၊ ဓာတုပစ္စည်းများနှင့် ဆပ်ပြာများက အရေပြားကို ယားယံစေပြီး အဖုအပိမ့်များ ထွက်စေနိုင်ပါသည်၊၊ အလှကုန်များ သို့မဟုတ် အပင်အချို့နှင့် ဓာတ်မတည့်ခြင်းကြောင့်လည်း ဖြစ်နိုင်ပါသည်၊၊ ထို့ပြင် နာကျင်မှုဝေဒနာ သက်သာစေသော ဆေးအချို့ကြောင့်လည်း အရေပြား ယားယံနိုင်ပါသည်၊၊
• ပတ်ဝန်းကျင်ဆိုင်ရာ အချက်များ။ အဝတ်အထည်များ၊ ပိုးမွှားကိုက်ခြင်း၊ ဆေးဝါးတုံ့ပြန်မှု၊ အပူချိန်အပြောင်းအလဲ သို့မဟုတ် ထိခိုက်နာကျင်စေသော အရာများကြောင့်လည်း ယားယံခြင်း ဖြစ်နိုင်ပါသည်၊၊

ဖြစ်နိုင်ခြေရှိသောအချက်များ

လူတိုင်းသည် ဘဝ၏ တစ်ချိန်ချိန်တွင် ယားယံခြင်းကို ခံစားရနိုင်ပါသည်၊၊ ပြင်းထန်မှုနှင့် အကြိမ်ရေမှာ လူတစ်ဦးနှင့်တစ်ဦး မတူညီနိုင်ပါ၊၊ အောက်ပါအချက်များရှိသူများတွင် ပိုမိုဖြစ်နိုင်ခြေ ရှိပါသည်-

• အသက် ၆၅ နှစ်နှင့် အထက်ရှိသူများ၊၊
• အရေပြားရောင်ရမ်းခြင်း၊ လည်ပင်းကြီးရောဂါနှင့် သွေးအားနည်းရောဂါကဲ့သို့သော ကျန်းမာရေး ပြဿနာရှိသူများ၊၊
• ကျောက်ကပ်ဆေးနေရသူများ၊၊
• ကိုယ်ဝန်ဆောင် အမျိုးသမီးများ၊၊