အရေပြားအကြေးခွံထွက်ခြင်းရောဂါ

ရောဂါရှာဖွေခြင်း

အရေပြားအထူးကုဆရာဝန်သည် ဤရောဂါကို ရှာဖွေဖော်ထုတ်ရန် အောက်ပါလုပ်ငန်းစဉ်များကို အသုံးပြုပါသည်-

• ခန္ဓာကိုယ်ကို စစ်ဆေးခြင်း။ ကျန်းမာရေးစောင့်ရှောက်သူသည် လူနာ၏ ကျန်းမာရေးအခြေအနေ၊ မိသားစုဝင်များတွင် ဤရောဂါရှိ၊ မရှိ မေးမြန်းခြင်းနှင့် အရေပြား၊ ဦးရေပြား၊ လက်သည်းခြေသည်းများကို စစ်ဆေးခြင်းတို့ ပြုလုပ်ပါလိမ့်မည်၊၊
• အရေပြားအသားစယူ၍ စစ်ဆေးခြင်း။ အရေပြားအကွက်များ ဖြစ်ပေါ်ခြင်းသည် ဤရောဂါကို ညွှန်ပြနေသော်လည်း အခြားသော အရေပြားရောဂါများနှင့်လည်း ဆင်တူနိုင်သဖြင့် အတည်ပြုနိုင်ရန် အသားစယူစစ်ဆေးမှုကို ဆရာဝန်က အကြံပြုနိုင်ပါသည်၊၊ စစ်ဆေးစဉ်အတွင်း အရေပြားအကွက်မှ အသားစအနည်းငယ်ကို ယူ၍ အဏုကြည့်မှန်ပြောင်းဖြင့် သေချာစွာ ဓာတ်ခွဲစစ်ဆေးပါလိမ့်မည်၊၊

ကုသခြင်း

ဤရောဂါကုသမှုများသည် အရေပြားဆဲလ်များ အလွန်အကျွံကြီးထွားမှုကို နှေးကွေးစေရန်နှင့် အကြေးခွံများကို ဖယ်ရှားရန် ရည်ရွယ်ပါသည်၊၊ လိမ်းဆေးများ၊ အလင်းဖြင့်ကုသခြင်းနှင့် သောက်ဆေး သို့မဟုတ် ထိုးဆေးများ စသည့် နည်းလမ်းမျိုးစုံ ရှိပါသည်၊၊ ကုသမှုကို ရွေးချယ်ရာတွင် ရောဂါ၏ ပြင်းထန်မှု၊ ယခင်ကုသမှုများအပေါ် တုံ့ပြန်မှုနှင့် မိမိဘာသာ ဂရုစိုက်မှုများအပေါ် မူတည်ပါသည်၊၊ ထိရောက်သော နည်းလမ်းကို မတွေ့ရှိမီ ဆေးဝါးများစွာကို စမ်းသပ်ရန် သို့မဟုတ် ကုသမှုများကို ပေါင်းစပ်ရန် လိုအပ်နိုင်ပါသည်၊၊ သို့သော်လည်း ကုသမှု အောင်မြင်သည့်တိုင်အောင် ရောဂါမှာ အချိန်ကြာလာသည်နှင့်အမျှ ပြန်လည်ဖြစ်ပွားတတ်ပါသည်၊၊

အရေပြားလိမ်းဆေးဖြင့် ကုသခြင်း

• ဟော်မုန်းဓာတ်ပါသော လိမ်းဆေးများ။ ရောဂါအခြေအနေ အနည်းငယ်မှ အသင့်အတင့်ရှိသူများအတွက် အသုံးအများဆုံး ဆေးဝါးများဖြစ်ပြီး ဆီ၊ ခရင်မ်၊ လိုးရှင်း၊ ဂျယ်လ်နှင့် ခေါင်းလျှော်ရည် စသည့် ပုံစံမျိုးစုံဖြင့် ရရှိနိုင်ပါသည်၊၊ မျက်နှာ သို့မဟုတ် အရေပြားတွန့်ရာများကဲ့သို့ နုနယ်သော နေရာများအတွက် အာနိသင်ပျော့သော လိမ်းဆေးများကို အကြံပြုပါသည်၊၊ ရောဂါကြွနေချိန်တွင် တစ်နေ့တစ်ကြိမ် လိမ်းနိုင်ပြီး သက်သာနေချိန်တွင် တစ်ရက်ခြား သို့မဟုတ် ရုံးပိတ်ရက်များတွင်သာ လိမ်းနိုင်ပါသည်၊၊ ပိုမိုခေါင်းမာသော နေရာများအတွက် အာနိသင်ပြင်းသော လိမ်းဆေးများကို သုံးနိုင်သော်လည်း အရေပြားပါးလွှာခြင်းနှင့် ဆေးယဉ်ပါးခြင်းတို့ကို ဖြစ်စေနိုင်သဖြင့် ရေရှည် သို့မဟုတ် အလွန်အကျွံ သုံးစွဲခြင်းကို ရှောင်ကြဉ်ရပါမည်၊၊
• ဗီတာမင်ဒီ ဒြပ်ပေါင်းများ။ ၎င်းတို့သည် အရေပြားဆဲလ်ကြီးထွားမှုကို နှေးကွေးစေရာတွင် ထိရောက်မှုရှိပါသည်၊၊ ၎င်းတို့ကို တစ်မျိုးတည်း သို့မဟုတ် အခြားလိမ်းဆေးများနှင့် တွဲဖက်သုံးနိုင်ပါသည်၊၊ အချို့သော ဒြပ်ပေါင်းများသည် အရေပြားယားယံမှု နည်းပါးသဖြင့် နုနယ်သော နေရာများအတွက် သင့်လျော်သော်လည်း ဈေးနှုန်းမှာ အခြားလိမ်းဆေးများထက် ပိုမိုမြင့်မားတတ်ပါသည်၊၊
• ဗီတာမင်အေ ဒြပ်ပေါင်းများ။ ၎င်းတို့ကို ဂျယ်လ် သို့မဟုတ် ခရင်မ်ပုံစံဖြင့် ရရှိနိုင်ပြီး တစ်နေ့လျှင် တစ်ကြိမ် သို့မဟုတ် နှစ်ကြိမ် လိမ်းရပါသည်၊၊ သို့သော်လည်း အရေပြားယားယံခြင်းနှင့် အလင်းရောင်ဒဏ် မခံနိုင်ခြင်းတို့ ဖြစ်စေနိုင်ပါသည်၊၊ ကိုယ်ဝန်ဆောင်များ၊ နို့တိုက်မိခင်များနှင့် ကလေးယူရန် ပြင်ဆင်နေသူများအတွက် ဘေးထွက်ဆိုးကျိုးများ ရှိနိုင်သဖြင့် အသုံးမပြုရန် အကြံပြုပါသည်၊၊
• ခုခံအားစနစ် ထိန်းညှိဆေးများ။ ၎င်းတို့သည် အရေပြားနီမြန်းခြင်းနှင့် အကြေးခွံများ ဖြစ်ပေါ်ခြင်းကို လျှော့ချပေးရာတွင် ထိရောက်ပါသည်၊၊ အခြားလိမ်းဆေးများက ဘေးထွက်ဆိုးကျိုးပေးနိုင်သော မျက်လုံးတစ်ဝိုက်ကဲ့သို့ အရေပြားပါးသည့် နေရာများအတွက် အထူးကောင်းမွန်ပါသည်၊၊ သို့သော် ကိုယ်ဝန်ဆောင်များနှင့် နို့တိုက်မိခင်များ မသုံးစွဲသင့်သလို ရေရှည်သုံးစွဲပါက အရေပြားကင်ဆာနှင့် အခြားရောဂါများ ဖြစ်နိုင်ခြေရှိသဖြင့် သတိပြုရပါမည်၊၊
• အကြေးခွံပျော်ဆေး။ ဤဓာတ်ပါဝင်သော ခေါင်းလျှော်ရည်နှင့် ဦးရေပြားကုသဆေးများသည် ဦးရေပြားတွင် ဖြစ်ပေါ်သော အကြေးခွံများကို လျှော့ချပေးပါသည်၊၊ ၎င်းသည် ဆေးများ အရေပြားအတွင်းသို့ ပိုမိုစိမ့်ဝင်နိုင်စေသဖြင့် အခြားကုသမှုများနှင့် တွဲဖက်သုံးနိုင်ပါသည်၊၊
• ကျောက်မီးသွေးကတ္တရာ။ ၎င်းသည် အကြေးခွံထွက်ခြင်း၊ ယားယံခြင်းနှင့် ရောင်ရမ်းခြင်းတို့ကို လျှော့ချပေးပါသည်၊၊ ပုံစံမျိုးစုံဖြင့် ရရှိနိုင်သော်လည်း အရေပြားကို ယားယံစေနိုင်သည့်အပြင် အနံ့ပြင်းခြင်း၊ အဝတ်အထည်နှင့် အိပ်ရာခင်းများကို စွန်းထင်းစေခြင်းတို့ ဖြစ်စေနိုင်ပါသည်၊၊ ကိုယ်ဝန်ဆောင်နှင့် နို့တိုက်မိခင်များ မသုံးစွဲသင့်ပါ၊၊
• အင်သရာလင် ခရင်မ်။ ၎င်းသည် အရေပြားဆဲလ်များ ဖွံ့ဖြိုးမှုကို နှေးကွေးစေပြီး အကြေးခွံများနှင့် ကြမ်းတမ်းသော အရေပြားများကို ဖယ်ရှားပေးနိုင်ပါသည်၊၊ မျက်နှာနှင့် မျိုးပွားအင်္ဂါများတွင် သုံးရန် မသင့်တော်ပါ၊၊ ၎င်းသည် အရေပြားကို ယားယံစေနိုင်ပြီး ထိတွေ့သမျှ အရာအားလုံးကို စွန်းထင်းစေတတ်ပါသည်၊၊ များသောအားဖြင့် လိမ်းပြီး ခေတ္တအကြာတွင် ရေဖြင့် ပြန်လည်ဆေးကြောရပါသည်၊၊

အလင်းဖြင့်ကုသခြင်း

အလင်းဖြင့်ကုသခြင်းကို အလယ်အလတ်မှ ပြင်းထန်သော အကြေးခွံနာဝေဒနာရှင်များအတွက် အဓိကကုသမှုအဖြစ် တစ်မျိုးတည်းသော်လည်းကောင်း၊ ဆေးဝါးများနှင့် တွဲဖက်၍သော်လည်းကောင်း အသုံးပြုလေ့ရှိပါသည်၊၊ ဤလုပ်ငန်းစဉ်တွင် အရေပြားကို သဘာဝအလင်း သို့မဟုတ် လူလုပ်အလင်းရောင်နှင့် စနစ်တကျ ထိတွေ့စေခြင်း ဖြစ်ပါသည်၊၊ လိုလားသော ရလဒ်ရရှိရန် အကြိမ်ကြိမ် ကုသမှုခံယူရန် အရေးကြီးပါသည်၊၊ အကယ်၍ မိမိအိမ်တွင် ဤနည်းဖြင့် ကုသလိုပါက သင့်တော်မှု ရှိ၊ မရှိကို ကျန်းမာရေးစောင့်ရှောက်သူနှင့် တိုင်ပင်ဆွေးနွေးရပါမည်၊၊

အလင်းဖြင့်ကုသမှု အမျိုးအစားများမှာ အောက်ပါအတိုင်း ဖြစ်ပါသည်-

• နေရောင်ခြည်ဖြင့် ကုသခြင်း။ နေ့စဉ် နေရောင်ခြည်နှင့် ခေတ္တထိတွေ့ခြင်းသည် ရောဂါကို သက်သာစေနိုင်ပါသည်၊၊ သို့သော် နေရောင်ခြည်ကို အသုံးမပြုမီ အထိရောက်ဆုံးနှင့် ဘေးအကင်းဆုံးဖြစ်စေရန် ဆရာဝန်နှင့် ဦးစွာတိုင်ပင်ရပါမည်၊၊
• ပေါင်းစပ်ကုသမှု။ ဤနည်းလမ်းသည် ကျောက်မီးသွေးကတ္တရာလိမ်းဆေးနှင့် ခရမ်းလွန်ရောင်ခြည်ကို တွဲဖက်အသုံးပြုခြင်း ဖြစ်ပါသည်၊၊ ၎င်းသည် အရေပြား၏ တုံ့ပြန်မှုကို ကောင်းမွန်စေသဖြင့် ပိုမိုထိရောက်ပါသည်၊၊
• လှိုင်းအလျားကျယ်သော ခရမ်းလွန်ရောင်ခြည်။ လိမ်းဆေးများဖြင့် မသက်သာသော အကွက်များ သို့မဟုတ် တစ်ကိုယ်လုံးတွင် ဖြစ်ပွားသောအကွက်များအတွက် လူလုပ်အလင်းရင်းမြစ်ကို အသုံးပြု၍ ကုသခြင်း ဖြစ်ပါသည်၊၊ သို့သော် အရေပြားနီမြန်းခြင်း၊ ယားယံခြင်းနှင့် ခြောက်သွေ့ခြင်းကဲ့သို့သော ယာယီဘေးထွက်ဆိုးကျိုးများ ရှိနိုင်ပါသည်၊၊
• လှိုင်းအလျားကျဉ်းသော ခရမ်းလွန်ရောင်ခြည်။ ဤနည်းလမ်းသည် လှိုင်းအလျားကျယ်သော နည်းလမ်းထက် ပိုမိုထိရောက်သဖြင့် နေရာအတော်များများတွင် အစားထိုးအသုံးပြုလာကြပါသည်၊၊ အရေပြားသက်သာလာသည်အထိ တစ်ပတ်လျှင် နှစ်ကြိမ် သို့မဟုတ် သုံးကြိမ် ကုသရပြီး နောက်ပိုင်းတွင် အကြိမ်ရေ လျှော့ချနိုင်ပါသည်၊၊ သို့သော် ၎င်းသည် ဘေးထွက်ဆိုးကျိုး ပိုမိုပြင်းထန်နိုင်ပါသည်၊၊
• ဆေးနှင့် အလင်းတွဲဖက်ကုသခြင်း။ ဤနည်းလမ်းတွင် အလင်းဒဏ်ခံနိုင်ရည် မြင့်တက်စေသော ဆေးကို အရင်သောက်သုံးစေပြီးမှ ခရမ်းလွန်ရောင်ခြည်နှင့် ထိတွေ့စေခြင်း ဖြစ်ပါသည်၊၊ ဤရောင်ခြည်သည် အရေပြားအတွင်းပိုင်းသို့ ပိုမိုစိမ့်ဝင်နိုင်သဖြင့် ပြင်းထန်သော အခြေအနေများအတွက် အသုံးပြုပြီး ရလဒ်ကောင်းများ ရရှိစေပါသည်၊၊ သို့သော် ပျို့အန်ခြင်း၊ ခေါင်းကိုက်ခြင်း၊ ပူစပ်ပူလောင်ဖြစ်ခြင်းတို့ ခံစားရနိုင်ပြီး ရေရှည်တွင် အရေပြားတွန့်ခြင်း၊ မှည့်ခြောက်များထွက်ခြင်းနှင့် အရေပြားကင်ဆာ ဖြစ်နိုင်ခြေ မြင့်တက်ခြင်းတို့ ရှိနိုင်ပါသည်၊၊
• လေဆာဖြင့် ကုသခြင်း။ ဤနည်းလမ်းသည် ရောဂါဖြစ်နေသော နေရာကိုသာ ပြင်းအားကောင်းသော ခရမ်းလွန်ရောင်ခြည်ဖြင့် ပစ်မှတ်ထားကုသခြင်း ဖြစ်ပါသည်၊၊ သာမန်အလင်းကုထုံးများထက် ကုသမှုအကြိမ်ရေ နည်းပါးသော်လည်း အရေပြားရောင်ရမ်းခြင်းနှင့် အရည်ကြည်ဖုထွက်ခြင်းတို့ ဖြစ်နိုင်ပါသည်၊၊

ဆေးဝါးများ

ရောဂါအခြေအနေ ပြင်းထန်ပါက သို့မဟုတ် အခြားကုသမှုများဖြင့် မသက်သာပါက ဆရာဝန်သည် သောက်ဆေး သို့မဟုတ် ထိုးဆေးများကို ညွှန်ကြားပါလိမ့်မည်၊၊ အချို့ဆေးဝါးများသည် ဘေးထွက်ဆိုးကျိုး ပြင်းထန်နိုင်သဖြင့် ကာလတိုသာ အသုံးပြုရလေ့ရှိပါသည်၊၊

• ဟော်မုန်းဓာတ်ပါသော ထိုးဆေးများ။ မပျောက်ဘဲ ကျန်နေသည့် အကွက်ငယ်များအတွက် တိုက်ရိုက်ထိုးနှံ ကုသနိုင်ပါသည်၊၊
• ဗီတာမင်အေ သောက်ဆေးများ။ အရေပြားဆဲလ်များ ထွက်ရှိမှုကို လျှော့ချရန် အသုံးပြုပါသည်၊၊ အရေပြားခြောက်ခြင်းနှင့် ကြွက်သားနာကျင်ခြင်းတို့ ဖြစ်နိုင်ပြီး ကိုယ်ဝန်ဆောင်နှင့် နို့တိုက်မိခင်များ မသုံးစွဲသင့်ပါ၊၊
• ဇီဝဆေးဝါးများ။ ဤဆေးများသည် ခန္ဓာကိုယ်၏ ခုခံအားစနစ်ကို ထိန်းညှိပေးခြင်းဖြင့် ရောဂါသံသရာကို ဖြတ်တောက်ကာ ရက်သတ္တပတ်အနည်းငယ်အတွင်း လက္ခဏာများကို သက်သာစေပါသည်၊၊ အခြားကုသမှုများဖြင့် မသက်သာသူများအတွက် အသုံးပြုပြီး အချို့အမျိုးအစားများကို ကလေးများတွင်လည်း သုံးစွဲနိုင်ပါသည်၊၊ သို့သော် ဤဆေးများသည် ဈေးနှုန်းကြီးမြင့်နိုင်သည့်အပြင် ခုခံအားကို လျှော့ချပေးသဖြင့် ပြင်းထန်သော ပိုးဝင်မှုများ ဖြစ်နိုင်ခြေရှိသောကြောင့် အသုံးမပြုမီ တီဘီရောဂါ ရှိ၊ မရှိ စစ်ဆေးရန် လိုအပ်ပါသည်၊၊
• ခုခံအားထိန်းဆေး။ တစ်ပတ်လျှင် တစ်ကြိမ်သောက်သုံးရလေ့ရှိပြီး အရေပြားဆဲလ်ထွက်နှုန်းနှင့် ရောင်ရမ်းမှုကို လျှော့ချပေးပါသည်၊၊ ပျို့အန်ခြင်း၊ အစားအသောက်ပျက်ခြင်းနှင့် နုံးချိခြင်းတို့ ဖြစ်စေနိုင်သဖြင့် ရေရှည်သုံးစွဲသူများသည် သွေးစစ်ခြင်းနှင့် အသည်းလုပ်ဆောင်ချက် စစ်ဆေးခြင်းတို့ ပုံမှန်ပြုလုပ်ရပါမည်၊၊ ကလေးယူရန် ပြင်ဆင်နေသူများအနေဖြင့် အနည်းဆုံး သုံးလကြိုတင်၍ ဤဆေးကို ရပ်နားထားရပါမည်၊၊
• ခုခံအားနှိမ်နင်းဆေး။ ပြင်းထန်သော အခြေအနေများအတွက် သောက်ဆေးအဖြစ် သုံးစွဲပြီး ခုခံအားစနစ်ကို နှိမ်နင်းပေးပါသည်၊၊ ဤဆေးကို တစ်နှစ်ထက်ကျော်၍ ဆက်တိုက်မသုံးသင့်ပါ၊၊ ၎င်းသည် ပိုးဝင်ခြင်းနှင့် ကင်ဆာအပါအဝင် အခြားကျန်းမာရေးပြဿနာများကို ဖြစ်စေနိုင်သဖြင့် ရေရှည်သုံးစွဲပါက သွေးတိုးနှင့် ကျောက်ကပ်လုပ်ဆောင်ချက်ကို စောင့်ကြည့်ရပါမည်၊၊
• အခြားဆေးဝါးများ။ အထက်ပါဆေးများ သုံးစွဲ၍မရသော အခြေအနေများတွင် အခြားသော ဆေးဝါးများကို စဉ်းစားနိုင်ပါသည်၊၊ ဘေးထွက်ဆိုးကျိုးများကို ဆရာဝန်နှင့် သေချာစွာ တိုင်ပင်ရပါမည်၊၊

Doctors who treat this condition