အဆုတ်သွေးလွှတ်ကြောအဆို့ရှင် ပိတ်ဆို့ခြင်း

အကျဉ်းချုပ်အကြောင်းအရာ

အဆုတ်သွေးလွှတ်ကြောအဆို့ရှင် ပိတ်ဆို့ခြင်းရောဂါသည် နှလုံးမှအဆုတ်သို့ သွေးစီးဆင်းမှုကို ခွင့်ပြုပေးသော အဆို့ရှင် ပုံမှန်မဟုတ်ဘဲ ဖြစ်တည်လာခြင်းကြောင့် ဖြစ်ပွားပါသည်၊၊ ထိုနေရာတွင် တစ်ရှူးများ အလွန်အကျွံ ဖုံးအုပ်ပိတ်ဆို့နေသဖြင့် အဆို့ရှင်သည် လုံးဝပွင့်နိုင်ခြင်း သို့မဟုတ် ပိတ်နိုင်ခြင်း မရှိတော့ပါ၊၊ အဆုတ်သို့ သွေးရောက်ရှိမှု နည်းပါးခြင်းသည် ခန္ဓာကိုယ်အတွင်း အောက်ဆီဂျင် ရရှိမှု နည်းပါးခြင်းကို ဖြစ်စေပါသည်၊၊

ယေဘုယျအားဖြင့် ဤမွေးရာပါ နှလုံးရောဂါသည် အသက်အန္တရာယ်ရှိပြီး ကလေးမွေးဖွားချိန်မှစ၍ ရောဂါရှာဖွေတွေ့ရှိနိုင်ပါသည်၊၊ မွေးကင်းစကလေးငယ်များတွင် အဆုတ်သို့ သွေးစီးဆင်းနိုင်ရန် အခြားသော သဘာဝနှလုံးလမ်းကြောင်းများ ရှိနေတတ်ပါသည်၊၊ ဤလမ်းကြောင်းများသည် မိခင်ဝမ်းဗိုက်အတွင်းရှိစဉ် ကလေးအတွက် အရေးကြီးသော်လည်း များသောအားဖြင့် မွေးဖွားပြီးသည်နှင့် ချက်ချင်းပိတ်သွားတတ်ပါသည်၊၊

ဤရောဂါသည် ခန္ဓာကိုယ်အတွင်း လုံလောက်သော အောက်ဆီဂျင် ပို့ဆောင်မှုကို ကန့်သတ်လိုက်သဖြင့် ကလေးငယ်၏ အရေပြားအရောင်မှာ ပြာနှမ်းနေတတ်ပြီး နှလုံးလုပ်ဆောင်ချက် ကောင်းမွန်လာစေရန် ဆေးဝါးများ သို့မဟုတ် ခွဲစိတ်မှုဖြင့် ကုသရန် လိုအပ်ပါသည်၊၊

ရောဂါလက္ခဏာများ

ဤရောဂါရှိသော ကလေးငယ်များသည် မွေးဖွားပြီးပြီးချင်းတွင် လက္ခဏာများ ပြတတ်ပါသည်၊၊ ရောဂါလက္ခဏာများမှာ အောက်ပါအတိုင်း ဖြစ်ပါသည်-

• အရေပြားအရောင် ပြာနှမ်းခြင်း သို့မဟုတ် မီးခိုးရောင်ဖြစ်ခြင်း
• အသက်ရှူရခက်ခဲခြင်း
• နုံးချိခြင်း သို့မဟုတ် အားအင်ကုန်ခမ်းခြင်း
• နို့တိုက်ရာတွင် အခက်အခဲရှိခြင်း

အခြေအနေအများစုတွင် ကလေးမွေးဖွားပြီးနောက် ဆရာဝန်က ဤရောဂါကို ချက်ချင်းသိရှိနိုင်ပါသည်၊၊ အကယ်၍ ကလေးငယ်သည် အိမ်သို့ရောက်ရှိပြီးမှ လက္ခဏာများ စတင်ပြသလာပါက ဆေးကုသမှုကို ချက်ချင်းခံယူရန် လိုအပ်ပါသည်၊၊

ဖြစ်ပွားရသောအကြောင်းရင်းများ

ဖြစ်ပွားရသည့် အကြောင်းရင်းကို တိကျစွာ မသိရသေးသော်လည်း နှလုံး၏ လုပ်ဆောင်ချက်ကို သိရှိခြင်းဖြင့် ဤရောဂါ မည်သို့ဖြစ်ပေါ်သည်ကို နားလည်နိုင်ပါသည်၊၊

နှလုံးအလုပ်လုပ်ပုံ-

နှလုံးတွင် အခန်း (၄) ခန်းရှိပြီး ခန္ဓာကိုယ်အနှံ့သို့ သွေးညှစ်ထုတ်ပေးရန် လုပ်ဆောင်ပါသည်၊၊ အဆုတ်သွေးလွှတ်ကြောများသည် နှလုံးညာဘက်အခန်းများမှ သွေးကို အဆုတ်သို့ ပို့ဆောင်ပေးပါသည်၊၊ အဆုတ်သွေးပြန်ကြောများသည် အဆုတ်မှ အောက်ဆီဂျင်ရရှိလာသော သွေးများကို နှလုံးဘယ်ဘက်အခန်းများသို့ ပြန်လည်ပို့ဆောင်ပေးပါသည်၊၊ ထို့နောက် အောက်ဆီဂျင်ကြွယ်ဝသော ထိုသွေးများကို ပင်မသွေးလွှတ်တော်ကြီးမှတစ်ဆင့် ခန္ဓာကိုယ်အနှံ့သို့ ညှစ်ထုတ်ပေးပါသည်၊၊ သွေးသည် နှလုံးအဆို့ရှင်များ၏ အဖွင့်အပိတ်ဖြင့် နှလုံးခုန်နှုန်းနှင့်အညီ လမ်းကြောင်းတစ်ခုတည်းသို့ စီးဆင်းပါသည်၊၊

ဤရောဂါရှိသူများတွင် အဆုတ်သွေးလွှတ်ကြောအဆို့ရှင်မှာ ကောင်းမွန်စွာ ဖြစ်တည်မလာသဖြင့် နှလုံးညာဘက်အောက်ခန်းမှ အောက်ဆီဂျင်ယူရန် အဆုတ်သို့ သွေးညှစ်ထုတ်ပေးနိုင်ခြင်း မရှိပါ၊၊

မိခင်ဝမ်းဗိုက်အတွင်းရှိစဉ်တွင် ကလေးငယ်သည် အဆုတ်မှတစ်ဆင့်မဟုတ်ဘဲ အချင်းမှတစ်ဆင့် အောက်ဆီဂျင်ရရှိသဖြင့် ပုံမှန်မဟုတ်သော အဆို့ရှင်ကြောင့် အသက်အန္တရာယ် မရှိနိုင်သေးပါ၊၊

နှလုံးညာဘက်ခြမ်းသည် လက်ခံရရှိသော သွေးများကို နှလုံးအပေါ်ခန်းနှစ်ခုကြားရှိ အပေါက်ငယ်မှတစ်ဆင့် စီးဆင်းစေပါသည်၊၊ ထို့နောက် အောက်ဆီဂျင်ပါသောသွေးများကို ခန္ဓာကိုယ်အနှံ့သို့ ညှစ်ထုတ်ပေးပါသည်၊၊

မွေးဖွားပြီးနောက်တွင် အဆုတ်သည် ခန္ဓာကိုယ်သို့ အောက်ဆီဂျင်ပေးရန် တာဝန်ယူရသဖြင့် ဤရောဂါရှိသော နှလုံးသည် အဆုတ်သို့ သွေးပို့ရန် အခြားလမ်းကြောင်းကို အသုံးပြုရပါသည်၊၊ အပေါ်ခန်းကြားရှိ အပေါက်ငယ်မှာ မွေးဖွားပြီးနောက် သဘာဝအတိုင်း ပိတ်သွားတတ်သော်လည်း ဤရောဂါကြောင့် ထိုအပေါက်မှာ မပိတ်ဘဲ ပွင့်နေနိုင်ပါသည်၊၊

မွေးကင်းစကလေးငယ်များတွင် ပင်မသွေးလွှတ်တော်ကြီးနှင့် အဆုတ်သွေးလွှတ်ကြောကို ဆက်သွယ်ပေးထားသော သွေးကြောလမ်းကြောင်းတစ်ခု ရှိပါသည်၊၊ ၎င်းသည် အောက်ဆီဂျင်နည်းသော သွေးများကို အဆုတ်သို့ ပို့ဆောင်ပေးရန် လုပ်ဆောင်ပါသည်၊၊ ထိုလမ်းကြောင်းသည် မွေးဖွားပြီးနောက် သဘာဝအတိုင်း ပိတ်သွားတတ်သော်လည်း ၎င်းကို ဆက်လက်ပွင့်နေစေရန် ဆေးဝါးများဖြင့် ထိန်းထားနိုင်ပါသည်၊၊

အချို့ကလေးငယ်များတွင် အဆို့ရှင်ပိတ်ခြင်းအပြင် နှလုံးအောက်ခန်းနှစ်ခုကြား နံရံတွင် အပေါက်ပါခြင်းလည်း တွဲဖြစ်တတ်ပါသည်၊၊ ထိုအပေါက်သည် ညာဘက်အောက်ခန်းမှ သွေးများကို ဘယ်ဘက်အောက်ခန်းသို့ စီးဆင်းစေပါသည်၊၊ ဤသို့ ရောဂါနှစ်မျိုးတွဲဖြစ်သူများတွင် အဆုတ်နှင့် သွေးလွှတ်တော်ဆိုင်ရာ ပြဿနာများစွာ ရှိနေတတ်ပါသည်၊၊

နှလုံးအောက်ခန်းကြားနံရံ အပေါက်မပါဘဲ အဆို့ရှင်ပိတ်နေသော ရောဂါသည် မွေးဖွားခြင်းမပြုမီ နှလုံးညာဘက်အောက်ခန်းသို့ သွေးလုံလောက်စွာ မရောက်ရှိသဖြင့် ထိုအခန်းမှာ ကောင်းမွန်စွာ ဖွံ့ဖြိုးမလာခြင်းကို ဖြစ်စေပါသည်၊၊

ဖြစ်နိုင်ခြေရှိသောအချက်များ

အတိအကျ အကြောင်းရင်းကို မသိရသော်လည်း မွေးရာပါ နှလုံးရောဂါဖြစ်နိုင်ခြေကို မြင့်မားစေသော အချက်များမှာ-

• မိဘများတွင် မွေးရာပါ နှလုံးရောဂါ ရှိခြင်း
• မိခင်သည် ကိုယ်ဝန်မဆောင်မီ ကိုယ်အလေးချိန် အလွန်အကျွံ များနေခြင်း
• ကိုယ်ဝန်ဆောင်စဉ် အပါအဝင် ဆေးလိပ်သောက်သည့် ရာဇဝင်ရှိခြင်း
• မိခင်တွင် ဆီးချိုရောဂါရှိသော်လည်း မကုသဘဲ သို့မဟုတ် မထိန်းသိမ်းဘဲ ထားခြင်း
• မိခင်သည် ကိုယ်ဝန်ဆောင်စဉ် ဝက်ခြံပျောက်ဆေးကဲ့သို့သော အချို့ဆေးဝါးများကို သောက်သုံးခြင်း