ဖီယိုခရိုမိုဆိုက်တိုးမား

ရောဂါရှာဖွေခြင်း

ဤအကျိတ်ရောဂါကို ရှာဖွေဖော်ထုတ်ရန်အတွက် ဆရာဝန်သည် စစ်ဆေးမှုအမျိုးမျိုးကို ပြုလုပ်ရန် ညွှန်ကြားပါလိမ့်မည်၊၊

ဓာတ်ခွဲခန်းစစ်ဆေးမှုများ

ဤစစ်ဆေးမှုများသည် ခန္ဓာကိုယ်အတွင်းရှိ ဟော်မုန်းပမာဏများနှင့် ထိုဟော်မုန်းများကြောင့် ထွက်လာသော ဓာတ်ပစ္စည်းများကို စစ်ဆေးခြင်းဖြစ်ပါသည်-

• ၂၄ နာရီအတွင်း ဆီးစုဆောင်းစစ်ဆေးခြင်း။ ၂၄ နာရီအတွင်း ဆီးသွားသည့် အကြိမ်တိုင်းတွင် ဆီးနမူနာကို စုဆောင်းရပါမည်၊၊ နမူနာများကို မည်သို့အမှတ်အသားပြုလုပ်ရမည်၊ မည်သို့သိမ်းဆည်းရမည်နှင့် မည်သို့ပြန်လည်ပေးပို့ရမည်ကို အသေးစိတ်မေးမြန်းပါ၊၊
• သွေးစစ်ခြင်း။ ဓာတ်ခွဲခန်းတွင် စစ်ဆေးရန်အတွက် သွေးနမူနာ ရယူပါလိမ့်မည်၊၊

စစ်ဆေးမှုများမပြုလုပ်မီ ပြင်ဆင်ရန်လိုအပ်ချက်များကို ဆရာဝန်နှင့် တိုင်ပင်ရန် အရေးကြီးပါသည်၊၊ ဥပမာအားဖြင့် အစာဖြတ်ထားရန် သို့မဟုတ် ဆေးဝါးအချို့ကို ခဏရပ်ထားရန် ညွှန်ကြားနိုင်ပါသည်၊၊ သို့သော် ဆရာဝန်၏ခွင့်ပြုချက်မရှိဘဲ မိမိသဘောဖြင့် ဆေးဖြတ်ခြင်းမျိုး လုံးဝမပြုလုပ်ရပါ၊၊

ပုံရိပ်ဖော်စစ်ဆေးမှုများ

ဓာတ်ခွဲခန်းအဖြေများက အကျိတ်ရှိနိုင်ကြောင်း ညွှန်ပြပါက ဆရာဝန်သည် အကျိတ်တည်ရှိရာနေရာကို ရှာဖွေရန် အောက်ပါပုံရိပ်ဖော်စစ်ဆေးမှုများကို ပြုလုပ်ပါလိမ့်မည်-

• ကွန်ပျူတာဓာတ်မှန်ရိုက်ခြင်း။ အဆင့်မြင့် ဓာတ်မှန်နည်းပညာဖြင့် စစ်ဆေးခြင်းဖြစ်ပါသည်၊၊
• သံလိုက်ဓာတ်မှန်ရိုက်ခြင်း။ သံလိုက်စက်ကွင်းနှင့် ရေဒီယိုလှိုင်းများကို အသုံးပြု၍ အသေးစိတ်ပုံရိပ်များ ဖော်ထုတ်ခြင်းဖြစ်ပါသည်၊၊
• ရေဒီယိုသတ္တိကြွပစ္စည်းအသုံးပြု၍ ပုံရိပ်ဖော်ခြင်း။ ခန္ဓာကိုယ်အတွင်း ထိုးထည့်လိုက်သော ရေဒီယိုသတ္တိကြွပစ္စည်းများကို အကျိတ်က စုပ်ယူမှုအပေါ် မူတည်၍ အကျိတ်ငယ်လေးများကို ရှာဖွေသော နည်းလမ်းဖြစ်ပါသည်၊၊
• ဆဲလ်များ၏ လုပ်ဆောင်ချက်ကို ပုံရိပ်ဖော်ခြင်း။ အကျိတ်က စုပ်ယူထားသော ရေဒီယိုသတ္တိကြွပစ္စည်းများကို ဖော်ထုတ်ပေးနိုင်သော အခြားနည်းလမ်းတစ်ခု ဖြစ်ပါသည်၊၊

အခြားအကြောင်းရင်းများကြောင့် ရိုက်ကူးသော ဓာတ်မှန်များတွင်လည်း အဒရီနယ်ဂလင်းရှိ အကျိတ်ကို တွေ့ရှိနိုင်ပါသည်၊၊ ထိုသို့တွေ့ရှိပါက ဆရာဝန်သည် အကျိတ်အကြောင်း ပိုမိုသိရှိနိုင်ရန် ထပ်မံစစ်ဆေးမှုများ ပြုလုပ်ပါလိမ့်မည်၊၊

မျိုးရိုးဗီဇစစ်ဆေးခြင်း

ဤအကျိတ်သည် မျိုးရိုးလိုက်သောရောဂါနှင့် ဆက်စပ်မှု ရှိ၊ မရှိ သိရှိနိုင်ရန် မျိုးရိုးဗီဇစစ်ဆေးရန် ဆရာဝန်က အကြံပြုနိုင်ပါသည်၊၊ ထိုသို့စစ်ဆေးခြင်းမှာ အောက်ပါအချက်များကြောင့် အရေးကြီးပါသည်-

• မျိုးရိုးဗီဇဆိုင်ရာ ချို့ယွင်းချက်အချို့သည် အခြားသော ရောဂါများကိုလည်း ဖြစ်စေနိုင်သဖြင့် ထပ်မံစစ်ဆေးမှုများ ပြုလုပ်ရန် လိုအပ်သည်ကို သိရှိနိုင်ပါသည်၊၊
• အချို့သော ရောဂါများသည် ပြန်လည်ဖြစ်ပွားနိုင်ခြေ သို့မဟုတ် ကင်ဆာဖြစ်နိုင်ခြေ ပိုများသဖြင့် သင်၏ကုသမှုပုံစံနှင့် ရေရှည်ကျန်းမာရေးစောင့်ကြည့်မှုအပေါ် သက်ရောက်မှုရှိနိုင်ပါသည်၊၊
• သင်၏စစ်ဆေးမှုအဖြေသည် အခြားသော မိသားစုဝင်များတွင်လည်း ဤရောဂါရှိ၊ မရှိ စစ်ဆေးရန် လိုအပ်ကြောင်း ညွှန်ပြနိုင်ပါသည်၊၊

ကုသခြင်း

ဤအကျိတ်အတွက် အဓိကကုသမှုမှာ အကျိတ်ကို ခွဲစိတ်ဖယ်ရှားခြင်းပင် ဖြစ်ပါသည်၊၊ ခွဲစိတ်မှုမပြုမီ သွေးပေါင်ချိန်ထိန်းညှိပေးသော ဆေးဝါးများကို ဆရာဝန်က ညွှန်ကြားပါလိမ့်မည်၊၊ ထိုဆေးဝါးများသည် ခွဲစိတ်နေစဉ်အတွင်း သွေးပေါင်ချိန် ရုတ်တရက် အလွန်အမင်း တက်လာနိုင်သည့် အန္တရာယ်ကို လျှော့ချပေးပါသည်၊၊

ခွဲစိတ်မှုမပြုမီ ပြင်ဆင်ခြင်း

ခွဲစိတ်မှုမပြုမီ ၇ ရက်မှ ၁၀ ရက်ခန့်အလိုတွင် သွေးပေါင်ချိန်ကျစေရန် ဆေးဝါးများ သောက်ရန်လိုအပ်ပါသည်၊၊ သင်လက်ရှိသောက်နေသော ဆေးဝါးများကို လဲလှယ်ခြင်း သို့မဟုတ် ဆေးအသစ်များ ထပ်ပေါင်းခြင်းများ ပြုလုပ်ပါလိမ့်မည်၊၊ ဆားဓာတ်များသော အစားအစာများကို စားရန်လည်း အကြံပြုနိုင်ပါသည်၊၊

သွေးကြောများကို ပွင့်စေပြီး သွေးလည်ပတ်မှု ကောင်းမွန်စေရန် ဆေးဝါးအမျိုးမျိုးကို အသုံးပြုပါသည်၊၊ ထိုဆေးဝါးများသည် နှလုံးခုန်နှုန်းကိုလည်း ထိန်းညှိပေးပါသည်၊၊ ဤဆေးများသောက်ချိန်တွင် သွေးကြောများ ကျယ်လာသဖြင့် မတ်တပ်ရပ်သည့်အခါ သွေးပေါင်ချိန် ရုတ်တရက်ကျသွားခြင်းကို ကာကွယ်ရန်အတွက် ဆားဓာတ်များသော အစားအစာများကို စားခိုင်းခြင်းဖြင့် သွေးကြောအတွင်း အရည်ဓာတ် ပိုမိုရရှိအောင် ဆောင်ရွက်ခြင်းဖြစ်ပါသည်၊၊

ခွဲစိတ်ကုသခြင်း

အဒရီနယ်အကျိတ်ကို ဖယ်ရှားရန်အတွက် များသောအားဖြင့် မှန်ပြောင်းကြည့်ခွဲစိတ်မှုကို အသုံးပြုပါသည်၊၊ ဆရာဝန်သည် ဝမ်းဗိုက်တွင် သေးငယ်သော အပေါက်လေးများဖောက်၍ ကင်မရာနှင့် ခွဲစိတ်ကိရိယာများကို ထည့်သွင်းကာ ခွဲစိတ်ပါလိမ့်မည်၊၊

ပုံမှန်အားဖြင့် အကျိတ်ရှိသော အဒရီနယ်ဂလင်းတစ်ခုလုံးကို ဖယ်ရှားလေ့ရှိသော်လည်း အခြေအနေပေါ်မူတည်၍ အကျိတ်ကိုသာ ဖယ်ရှားပြီး ကျန်းမာသော တစ်ရှူးများကို ချန်ထားခဲ့နိုင်ပါသည်၊၊

အကယ်၍ အကျိတ်မှာ ကင်ဆာဖြစ်နေပါက အကျိတ်နှင့်အတူ ပတ်ဝန်းကျင်ရှိ တစ်ရှူးများကိုပါ ဖယ်ရှားပါလိမ့်မည်၊၊ ကင်ဆာတစ်ရှူးအားလုံးကို မဖယ်ရှားနိုင်လျှင်ပင် ခွဲစိတ်ခြင်းနှင့် ဆေးကုသခြင်းတို့က ဟော်မုန်းထုတ်လုပ်မှုကို လျှော့ချပေးနိုင်ပြီး သွေးပေါင်ချိန်ကို ထိန်းညှိပေးနိုင်ပါသည်၊၊

ခွဲစိတ်မှုအပြီး

ကျန်ရှိနေသော ကျန်းမာသည့် အဒရီနယ်ဂလင်းတစ်ခုတည်းကပင် ဂလင်းနှစ်ခုစာ လုပ်ဆောင်ချက်များကို လုပ်ဆောင်နိုင်ပါသည်၊၊ သွေးပေါင်ချိန်မှာလည်း ပုံမှန်အတိုင်း ပြန်ဖြစ်သွားလေ့ရှိပါသည်၊၊ သို့သော် အကျိတ်ပြန်ဖြစ်ခြင်း ရှိ၊ မရှိနှင့် ကျန်းမာရေးအခြေအနေကို စောင့်ကြည့်ရန် တစ်သက်တာလုံး ပုံမှန်စစ်ဆေးမှုများ ခံယူရန် လိုအပ်ပါသည်၊၊

ကင်ဆာကုသမှုများ

ကင်ဆာဖြစ်သော ဤအကျိတ်အမျိုးအစားမှာ အလွန်ရှားပါးပါသည်၊၊ ခန္ဓာကိုယ်အနှံ့ ပြန့်နှံ့သွားသော ကင်ဆာအကျိတ်များအတွက် ကုသမှုများမှာ အောက်ပါအတိုင်း ဖြစ်နိုင်ပါသည်-

• ပစ်မှတ်ထားကုထုံး။ ကင်ဆာဆဲလ်များကိုသာ သီးသန့်ဖျက်ဆီးနိုင်သော ရေဒီယိုသတ္တိကြွပစ္စည်း သို့မဟုတ် ဆေးဝါးများကို အသုံးပြု၍ ကုသခြင်းဖြစ်ပါသည်၊၊
• ဓာတုကုထုံး။ လျင်မြန်စွာ ပွားများနေသော ကင်ဆာဆဲလ်များကို သတ်ရန် ပြင်းထန်သော ဆေးဝါးများကို အသုံးပြုခြင်းဖြစ်ပါသည်၊၊
• ဓာတ်ရောင်ခြည်ဖြင့် ကုသခြင်း။ အရိုးအထိ ပြန့်နှံ့သွားသော ကင်ဆာကြောင့်ဖြစ်သည့် နာကျင်မှုဝေဒနာများကို သက်သာစေရန် အသုံးပြုပါသည်၊၊

Doctors who treat this condition