ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာ
နားစည်ပေါက်ခြင်း ဆိုသည်မှာ နားပြွန်နှင့် နားအလယ်ပိုင်းကို ပိုင်းခြားထားသော နုနယ်သည့် အမြှေးပါးတွင် အပေါက်ဖြစ်သွားခြင်း သို့မဟုတ် စုတ်ပြဲသွားခြင်းကို ဆိုလိုပါသည်၊၊
ဤအခြေအနေသည် အကြားအာရုံကို လျော့နည်းစေနိုင်ပြီး နားအလယ်ပိုင်းတွင် ပိုးဝင်နိုင်ခြေကို ပိုမိုမြင့်မားစေပါသည်၊၊
နားစည်ပေါက်ခြင်းသည် များသောအားဖြင့် မည်သည့်ကုသမှုမျှ မလိုအပ်ဘဲ သီတင်းပတ်အနည်းငယ်အတွင်း သူ့အလိုလို ပြန်လည်ကျက်သွားတတ်ပါသည်၊၊
သို့သော် အချို့သော အခြေအနေများတွင် ပုံမှန်အတိုင်း ပြန်လည်ကောင်းမွန်လာစေရန်အတွက် အပေါက်ကို ဖာထေးခြင်း သို့မဟုတ် ခွဲစိတ်ကုသမှု ခံယူခြင်းတို့ ပြုလုပ်ရန် လိုအပ်နိုင်ပါသည်၊၊
ရောဂါလက္ခဏာများ
နားစည်ပေါက်ခြင်း၏ လက္ခဏာများမှာ-
- နားကိုက်ခြင်း။ အစပိုင်းတွင် ပြင်းထန်စွာ နာကျင်တတ်သော်လည်း ထိုနာကျင်မှုသည် လျင်မြန်စွာ ပြန်လည်သက်သာသွားနိုင်ပါသည်၊၊
- နားအတွင်းမှ အရည်များထွက်ခြင်း။ ချွဲကဲ့သို့ အရည်များ၊ ပြည်များ သို့မဟုတ် သွေးပါသော အရည်များ ထွက်လာသည်ကို တွေ့ရနိုင်ပါသည်၊၊
- အကြားအာရုံ ချို့ယွင်းခြင်း။ အသံကြားနိုင်စွမ်း လျော့နည်းသွားခြင်း ဖြစ်ပေါ်နိုင်ပါသည်၊၊
- နားထဲတွင် အသံမြည်ခြင်း (Tinnitus)။ နားထဲတွင် အသံတစီစီမြည်ခြင်း သို့မဟုတ် အုန်းအုန်းမြည်ခြင်းများ ဖြစ်ပေါ်နိုင်ပါသည်၊၊
- ခေါင်းမူးခြင်း (Vertigo)။ ပတ်ဝန်းကျင်တစ်ခုလုံး ချာချာလည်နေသကဲ့သို့ ခံစားရပြီး ကိုယ်ခန္ဓာဟန်ချက်ကို ထိခိုက်နိုင်ပါသည်၊၊
- ပျို့အန်ခြင်း။ ခေါင်းမူးခြင်း၏ နောက်ဆက်တွဲအနေဖြင့် ပျို့ခြင်း သို့မဟုတ် အန်ခြင်းများ ဖြစ်ပေါ်လာနိုင်ပါသည်၊၊
အကယ်၍ သင့်တွင် ဤလက္ခဏာများ ခံစားနေရပါက ကျန်းမာရေးစောင့်ရှောက်မှုပေးသူထံသို့ အမြန်ဆုံး ဆက်သွယ်ရန် အလွန်အရေးကြီးပါသည်၊၊
နားအလယ်ပိုင်းနှင့် နားအတွင်းပိုင်းရှိ ဖွဲ့စည်းပုံများသည် ထိခိုက်ဒဏ်ရာရခြင်း သို့မဟုတ် ရောဂါဖြစ်ပွားခြင်းတို့တွင် အလွန်တုံ့ပြန်လွယ်သောကြောင့် ဖြစ်ပါသည်၊၊
မှန်ကန်သော ကုသမှုရရှိရန်အတွက် ဤလက္ခဏာများ၏ အကြောင်းရင်းကို ရှာဖွေဖော်ထုတ်ရန်နှင့် နားစည်ပေါက်ခြင်း ရှိ၊ မရှိကို အတည်ပြုရန် လိုအပ်ပါသည်၊၊
ဖြစ်ပွားရသောအကြောင်းရင်းများ
နားစည်ပေါက်ခြင်း (သို့မဟုတ် စုတ်ပြဲခြင်း) ကို ဖြစ်စေနိုင်သော အကြောင်းရင်းများမှာ-
- လေဖိအားကြောင့်ဖြစ်သော ဒဏ်ရာ (Barotrauma)။ နားအလယ်ပိုင်းရှိ လေဖိအားနှင့် ပတ်ဝန်းကျင်လေဖိအားတို့ မညီမျှဘဲ နားစည်အပေါ်တွင် ဖိအားသက်ရောက်ရာမှ ဖြစ်ပေါ်ခြင်းဖြစ်ပါသည်၊၊ လေဖိအား ကွာခြားချက် အလွန်ပြင်းထန်ပါက နားစည်ပေါက်ထွက်သွားနိုင်ပါသည်၊၊ ဤအခြေအနေသည် များသောအားဖြင့် လေယာဉ်စီးစဉ် လေဖိအားပြောင်းလဲမှုကြောင့် ဖြစ်ပေါ်တတ်ပါသည်၊၊ ထို့အပြင် ရေငုပ်ခြင်း သို့မဟုတ် ကားလေအိတ် (Airbag) ပွင့်ထွက်စဉ် နားကို တိုက်ရိုက်ရိုက်ခတ်ခြင်း ကဲ့သို့သော လေဖိအား ရုတ်တရက်ပြောင်းလဲစေသည့် အခြေအနေများကြောင့်လည်း နားစည်ပေါက်နိုင်ပါသည်၊၊
- နားအလယ်ပိုင်း ပိုးဝင်ခြင်း (Otitis media)။ နားအလယ်ပိုင်း ပိုးဝင်ပါက အရည်များ စုလာတတ်ပါသည်၊၊ ထိုစုလာသော အရည်များမှ ပေးသော ဖိအားကြောင့် နားစည်ပေါက်ထွက်သွားနိုင်ပါသည်၊၊
- ကျယ်လောင်သောအသံ သို့မဟုတ် ပေါက်ကွဲသံများ (Acoustic trauma)။ ပေါက်ကွဲသံများ သို့မဟုတ် သေနတ်သံများကဲ့သို့ အလွန်ပြင်းထန်သော အသံလှိုင်းများသည် နားစည်ကို စုတ်ပြဲသွားစေနိုင်ပါသည်၊၊
- ဦးခေါင်းတွင် ပြင်းထန်သော ဒဏ်ရာရခြင်း။ ဦးခေါင်းခွံခြေရင်းပိုင်း ကျိုးခြင်းကဲ့သို့သော ပြင်းထန်သည့် ဒဏ်ရာများသည် နားစည်အပါအဝင် နားအလယ်ပိုင်းနှင့် အတွင်းပိုင်းရှိ အစိတ်အပိုင်းများကို ထိခိုက်ပျက်စီးစေနိုင်ပါသည်၊၊
- နားထဲသို့ ပြင်ပပစ္စည်းများ ထည့်ခြင်း။ ဂွမ်းတံ (Cotton swab) သို့မဟုတ် ဆံပင်ကလစ်ကဲ့သို့သော ပစ္စည်းငယ်လေးများဖြင့် နားကျပ်ခြင်းသည် နားစည်ကို ထိုးမိပြီး ပေါက်သွားစေနိုင်ပါသည်၊၊
ရောဂါရှာဖွေခြင်း
သင်၏ဆရာဝန် သို့မဟုတ် နား၊ နှာခေါင်း၊ လည်ချောင်း (ENT) အထူးကုဆရာဝန်သည် များသောအားဖြင့် အလင်းရောင်ပါသော နားကြည့်ကိရိယာ (Otoscope) သို့မဟုတ် အဏုကြည့်မှန်ပြောင်းကို အသုံးပြု၍ နားစည်ပေါက်ခြင်း (သို့မဟုတ် စုတ်ပြဲခြင်း) ရှိ၊ မရှိကို ကြည့်ရှုစစ်ဆေးကာ ရောဂါအမည်တပ်နိုင်ပါသည်၊၊
ထို့အပြင် နားနှင့်ပတ်သက်သော လက္ခဏာများ၏ အရင်းအမြစ်ကို ရှာဖွေရန် သို့မဟုတ် အကြားအာရုံချို့ယွင်းမှုကို အကဲဖြတ်ရန်အတွက် နောက်ထပ်စစ်ဆေးမှုများကိုလည်း ပြုလုပ်နိုင်ပါသည်၊၊ ထိုစစ်ဆေးမှုများတွင် အောက်ပါတို့ ပါဝင်နိုင်ပါသည်-
- ဓာတ်ခွဲခန်းတွင် စစ်ဆေးခြင်း။ အကယ်၍ နားအတွင်းမှ အရည်များထွက်နေပါက နားအလယ်ပိုင်းတွင် ဘက်တီးရီးယားပိုးဝင်ခြင်း ရှိ၊ မရှိ သိရှိနိုင်ရန် ထိုအရည်ကို ဓာတ်ခွဲခန်းပို့၍ ပိုးမွေးစစ်ဆေးခြင်း (Culture) ကို ဆရာဝန်က အကြံပြုနိုင်ပါသည်၊၊
- ခက်ရင်းပုံ သံလှိုင်းထုတ်ကိရိယာ (Tuning fork) ဖြင့် စစ်ဆေးခြင်း။ ခက်ရင်းပုံ သံလှိုင်းထုတ်ကိရိယာဆိုသည်မှာ ခေါက်လိုက်သည့်အခါ အသံထွက်ပေါ်လာသော သတ္တုကိရိယာလေးဖြစ်ပါသည်၊၊ ဆရာဝန်သည် အကြားအာရုံချို့ယွင်းမှုကို သိရှိနိုင်ရန် ရိုးရှင်းသော ခက်ရင်းပုံ သံလှိုင်းထုတ်ကိရိယာစစ်ဆေးမှုကို အသုံးပြုနိုင်ပါသည်၊၊ ထို့အပြင် ဤစစ်ဆေးမှုသည် အကြားအာရုံချို့ယွင်းခြင်းမှာ နားစည်ကဲ့သို့သော နားအလယ်ပိုင်းရှိ တုန်ခါမှုဆိုင်ရာ အစိတ်အပိုင်းများ ပျက်စီးခြင်းကြောင့်လား၊ နားအတွင်းပိုင်းရှိ အာရုံခံဆဲလ်များနှင့် အာရုံကြောများ ပျက်စီးခြင်းကြောင့်လား သို့မဟုတ် နှစ်မျိုးလုံးကြောင့်လား ဆိုသည်ကို ခွဲခြားသိရှိနိုင်ရန် ကူညီပေးပါသည်၊၊
- နားစည်လှုပ်ရှားမှု တိုင်းတာခြင်း (Tympanometry)။ နားပြွန်အတွင်းသို့ ကိရိယာလေးတစ်ခုထည့်သွင်းကာ လေဖိအားအပြောင်းအလဲအပေါ် နားစည်၏ တုံ့ပြန်မှုကို တိုင်းတာခြင်းဖြစ်ပါသည်၊၊ တုံ့ပြန်မှုပုံစံများကိုကြည့်၍ နားစည်ပေါက်ခြင်း ရှိ၊ မရှိကို သိရှိနိုင်ပါသည်၊၊
- အကြားအာရုံစစ်ဆေးခြင်း (Audiology exam)။ ဤစစ်ဆေးမှုသည် မတူညီသော အသံအနိမ့်အမြင့်နှင့် အကျယ်အဝန်းများအပေါ် သင်၏ ကြားနိုင်စွမ်းကို ဆန်းစစ်သည့် စစ်ဆေးမှုများဖြစ်ပါသည်၊၊ များသောအားဖြင့် အသံလုံခန်းအတွင်းတွင် ပြုလုပ်လေ့ရှိပြီး သင်၏ အကြားအာရုံအဆင့်အတန်းကို သတ်မှတ်ပေးပါသည်၊၊
ကုသခြင်း
နားစည်ပေါက်ခြင်း အများစုသည် မည်သည့်ကုသမှုမျှမလိုဘဲ သီတင်းပတ်အနည်းငယ်အတွင်း သူ့အလိုလို ပြန်လည်ကျက်သွားတတ်ပါသည်၊၊ သို့သော် ပိုးဝင်သည့်လက္ခဏာများရှိနေပါက ဆရာဝန်က ပိုးသတ်ဆေးနားအစက်ချဆေးများကို ညွှန်ကြားနိုင်ပါသည်၊၊ အကယ်၍ နားစည်ရှိ အပေါက် သို့မဟုတ် အနာသည် သူ့အလိုလို ပြန်မကျက်ပါက ထိုအပေါက်ကို ပိတ်ရန် ကုသမှုများ ပြုလုပ်ရပါသည်၊၊ ၎င်းတို့မှာ-
- နားစည်ဖာခြင်း (Eardrum patch)။ အကယ်၍ နားစည်အပေါက်သည် သဘာဝအတိုင်း ပြန်မပိတ်ပါက နား၊ နှာခေါင်း၊ လည်ချောင်း အထူးကုဆရာဝန်သည် စက္ကူဖာထေးကိရိယာ သို့မဟုတ် အခြားပစ္စည်းများဖြင့် ပြုလုပ်ထားသော အဖာလေးကို အသုံးပြု၍ ပိတ်ပေးနိုင်ပါသည်၊၊ ဤလုပ်ငန်းစဉ်တွင် ဆရာဝန်သည် နားစည်ပြန်လည်ကျက်လာစေရန် အပေါက်၏အနားသတ်များကို ဓာတုဆေးတစ်မျိုးဖြင့် အရင်တို့ပေးပြီးနောက် အပေါက်ပေါ်တွင် အဖာလေးဖြင့် ပိတ်ပေးခြင်းဖြစ်ပါသည်၊၊ အပေါက်လုံးဝပိတ်သွားရန် ဤနည်းလမ်းကို အကြိမ်ကြိမ် ပြုလုပ်ရန် လိုအပ်နိုင်ပါသည်၊၊
- ခွဲစိတ်ကုသခြင်း။ အကယ်၍ အဖာဖြင့်ပိတ်ခြင်းက ထိရောက်မှုမရှိပါက သို့မဟုတ် ဆရာဝန်က အဖာဖြင့်ပိတ်ရန် မဖြစ်နိုင်ဟု ယူဆပါက ခွဲစိတ်ရန် အကြံပြုနိုင်ပါသည်၊၊ အသုံးအများဆုံး ခွဲစိတ်မှုမှာ နားစည်ပြုပြင်ခြင်း ဖြစ်ပါသည်၊၊ ဤခွဲစိတ်မှုတွင် ခွဲစိတ်ဆရာဝန်သည် သင်၏ ကိုယ်ပိုင်တစ်ရှူးစလေးကို အသုံးပြု၍ နားစည်ရှိ အပေါက်ကို ပိတ်ပေးခြင်းဖြစ်ပါသည်၊၊ ဤခွဲစိတ်မှုသည် များသောအားဖြင့် ဆေးရုံတက်ရန်မလိုဘဲ ခွဲစိတ်ပြီး ထိုနေ့တွင်ပင် အိမ်ပြန်နိုင်သော ခွဲစိတ်မှုမျိုး ဖြစ်ပါသည်၊၊
