လိင်ဆက်ဆံစဉ် နာကျင်ခြင်း

အကျဉ်းချုပ်အကြောင်းအရာ

လိင်ဆက်ဆံစဉ် နာကျင်ခြင်း ဆိုသည်မှာ လိင်မဆက်ဆံမီ၊ ဆက်ဆံစဉ် သို့မဟုတ် ဆက်ဆံပြီးနောက်တွင် မိန်းမကိုယ်တစ်ဝိုက်၌ အစဉ်တစိုက် သို့မဟုတ် ထပ်ခါတလဲလဲ မသက်မသာဖြစ်ပြီး နာကျင်ခြင်းကို ခံစားရခြင်းဖြစ်ပါသည်။ ၎င်းသည် စိတ်ပိုင်းဆိုင်ရာနှင့် ခံစားချက်ပိုင်းဆိုင်ရာအပေါ် ဆိုးကျိုးများသက်ရောက်စေနိုင်ပြီး အိမ်ထောင်ရေးအဆင်မပြေခြင်းနှင့် ရင်းနှီးမှုလျော့နည်းခြင်းတို့ကို ဖြစ်ပေါ်စေနိုင်သည့် အဖြစ်များသော အခြေအနေတစ်ခုဖြစ်ပါသည်။

နာကျင်သည့်နေရာကိုကြည့်၍ လိင်ဆက်ဆံစဉ်နာကျင်ခြင်း အမျိုးအစားကို ခွဲခြားနိုင်ပါသည်။

• အစပြုချိန်တွင် နာကျင်ခြင်း။ ။ လိင်ဆက်ဆံမှု စတင်ချိန်တွင် မိန်းမကိုယ်ဝ၌ ခံစားရသော နာကျင်မှုဖြစ်ပြီး ချောဆီထွက်ရှိမှု နည်းပါးခြင်း၊ ထိခိုက်ဒဏ်ရာရရှိခြင်း သို့မဟုတ် ပိုးဝင်ခြင်းတို့ကြောင့် ဖြစ်နိုင်ပါသည်။
• အထဲအထိ နာကျင်ခြင်း။ ။ လိင်တံ အထဲအထိ နက်ရှိုင်းစွာဝင်ရောက်ချိန်တွင် မသက်မသာဖြစ်ခြင်းကို ခံစားရခြင်းဖြစ်ပြီး အချို့သော ဆက်ဆံမှုပုံစံများတွင် ပို၍နာကျင်နိုင်ပါသည်။ ဤနာကျင်မှုသည် သားအိမ်ခေါင်း သို့မဟုတ် ဝမ်းဗိုက်အောက်ပိုင်းတွင် ဖြစ်လေ့ရှိပြီး များသောအားဖြင့် ရောဂါအခံတစ်ခုခု သို့မဟုတ် ခွဲစိတ်မှုတစ်ခုခုနှင့် ဆက်စပ်နေလေ့ရှိပါသည်။

သင်၏ကျန်းမာရေးစောင့်ရှောက်မှုပေးသူသည် လက္ခဏာများကို စစ်ဆေးပြီး နာကျင်ရခြင်း၏ အရင်းအမြစ်ကို ရှာဖွေဖော်ထုတ်ခြင်းဖြင့် သင့်လျော်သော ကုသမှုကို အကြံပြုပေးနိုင်ပါသည်။

ရောဂါလက္ခဏာများ

လိင်ဆက်ဆံစဉ် နာကျင်မှုရှိပါက အောက်ပါတို့ကို သတိပြုမိနိုင်ပါသည်။

• လိင်ဆက်ဆံမှု စတင်ဝင်ရောက်ချိန်တွင်သာ နာကျင်ခြင်း။
• တမ်ပွန် (Tampon) သုံးခြင်းကဲ့သို့သော မည်သည့်ပစ္စည်းမျိုးမဆို မိန်းမကိုယ်အတွင်း ထည့်သွင်းချိန်တွင် မသက်မသာဖြစ်ခြင်း။
• အထဲသို့ နက်ရှိုင်းစွာ ထိုးသွင်းစဉ် နာကျင်ခြင်း။
• ပူစပ်ပူလောင်ဖြစ်ခြင်း သို့မဟုတ် ကိုက်ခဲခြင်း။
• ကြွက်သားများ တောင့်တင်းခြင်း သို့မဟုတ် ကြွက်တက်ခြင်း။
• လိင်ဆက်ဆံပြီးနောက် နာကျင်ကိုက်ခဲမှုသည် နာရီပေါင်းများစွာကြာသည်အထိ ကျန်ရှိနေခြင်း။

အကယ်၍ လိင်ဆက်ဆံစဉ် နာကျင်မှုကို မကြာခဏ ခံစားနေရပါက ဆရာဝန်နှင့် ဆွေးနွေးတိုင်ပင်ရန် အကြံပြုပါသည်။ ဤပြဿနာကို ဖြေရှင်းခြင်းဖြင့် သင်၏ လိင်မှုဆိုင်ရာကျန်းမာရေး၊ စိတ်ပိုင်းဆိုင်ရာ ရင်းနှီးမှုနှင့် မိမိကိုယ်ကိုယ် ယုံကြည်မှုတို့အပေါ် ကောင်းမွန်သော အကျိုးသက်ရောက်မှုများ ရှိလာနိုင်ပါသည်။

ဖြစ်ပွားရသောအကြောင်းရင်းများ

လိင်ဆက်ဆံစဉ် နာကျင်ရခြင်း၏ အကြောင်းရင်းများသည် အစပြုချိန်တွင် နာကျင်ခြင်း သို့မဟုတ် အထဲအထိ နက်ရှိုင်းစွာဝင်ရောက်ချိန်တွင် နာကျင်ခြင်းအပေါ် မူတည်၍ ကွဲပြားနိုင်ပါသည်။ စိတ်ပိုင်းဆိုင်ရာ အချက်အလက်များသည်လည်း နာကျင်မှုအမျိုးမျိုးနှင့် ဆက်စပ်နေနိုင်ပါသည်။

အစပြုချိန်တွင် နာကျင်ခြင်း

အစပြုချိန်တွင် နာကျင်ရခြင်းအတွက် ဖြစ်နိုင်ခြေရှိသော အကြောင်းရင်းများစွာ ရှိပါသည်။

• ထိခိုက်ဒဏ်ရာ သို့မဟုတ် စပ်ဖျဉ်းဖျဉ်းဖြစ်ခြင်း။ ။ မတော်တဆမှုများ၊ တင်ပါးဆုံတွင်းခွဲစိတ်မှု၊ အမျိုးသမီးအင်္ဂါ ဖြတ်တောက်မှု သို့မဟုတ် ကလေးမွေးဖွားစဉ် လမ်းကြောင်းချဲ့ရန် ညှပ်ဖြင့်ညှပ်ခြင်း (Episiotomy) တို့ကြောင့် ဖြစ်ပေါ်သော ဒဏ်ရာများ သို့မဟုတ် အနီစက်များ ပါဝင်ပါသည်။
• ချောဆီထွက်ရှိမှု မလုံလောက်ခြင်း။ ။ လိင်ဆက်ဆံခြင်းမပြုမီ ကြိုတင်နှိုးဆွမှု အားနည်းခြင်းကြောင့် ဖြစ်နိုင်သကဲ့သို့ သွေးဆုံးပြီးနောက်၊ ကလေးမွေးပြီးနောက် သို့မဟုတ် မိခင်နို့တိုက်ကျွေးနေစဉ်အတွင်း အီစထရိုဂျင် (Estrogen) ဟော်မုန်းပမာဏ ကျဆင်းခြင်းကြောင့်လည်း ဖြစ်နိုင်ပါသည်။ ထို့အပြင် စိတ်ကျရောဂါကုဆေးများ၊ သွေးတိုးကျဆေးများ၊ စိတ်ငြိမ်ဆေးများ၊ အလာဂျီဆေးများနှင့် အချို့သော သန္ဓေတားဆေးများသည် လိင်စိတ်ဆန္ဒနှင့် နှိုးဆွမှုကို သက်ရောက်မှုရှိစေကာ ချောဆီထွက်ရှိမှု နည်းပါးစေပြီး နာကျင်မှုကို ဖြစ်စေနိုင်ပါသည်။
• မွေးရာပါ ချို့ယွင်းချက်။ ။ မိန်းမကိုယ် လုံးဝမပါလာခြင်း သို့မဟုတ် မိန်းမကိုယ်ဝကို ပိတ်နေသော အမြှေးပါးရှိနေခြင်း (အပျိုမှေးပိတ်နေခြင်း) တို့ကြောင့်လည်း ဖြစ်နိုင်ပါသည်။
• ရောင်ရမ်းခြင်း၊ ပိုးဝင်ခြင်း သို့မဟုတ် အရေပြားရောဂါ။ ။ အင်္ဂါစပ်တွင် ပိုးဝင်ခြင်း သို့မဟုတ် ဆီးလမ်းကြောင်းပိုးဝင်ခြင်းတို့သည် လိင်ဆက်ဆံမှုအပေါ် သက်ရောက်နိုင်ပါသည်။ မိန်းမကိုယ်တစ်ဝိုက်တွင် နှင်းခူ (Eczema) သို့မဟုတ် အခြားအရေပြားရောဂါများ ရှိနေခြင်းသည်လည်း အကြောင်းရင်းတစ်ခု ဖြစ်နိုင်ပါသည်။
• မိန်းမကိုယ်ကြွက်သားများ အလိုအလျောက် ကျုံ့ခြင်း။ ။ မိန်းမကိုယ်နံရံရှိ ကြွက်သားများ အလိုအလျောက် ကျုံ့သွားခြင်းကြောင့် အထဲသို့ ထည့်သွင်းရန် ခက်ခဲပြီး နာကျင်စေနိုင်ပါသည်။

အထဲအထိ နက်ရှိုင်းစွာ နာကျင်ခြင်း

ဤနာကျင်မှုသည် လိင်ဆက်ဆံစဉ် နက်ရှိုင်းစွာ ထိုးသွင်းမှုနှင့်အတူ ဖြစ်ပေါ်လေ့ရှိပြီး အချို့သော ပုံစံများတွင် ပိုမိုပြင်းထန်နိုင်ပါသည်။ အကြောင်းရင်းများမှာ-

• ရောဂါအခံများ။ ။ သားအိမ်အတွင်းမြှေး အပြင်ရောက်ခြင်း (Endometriosis)၊ တင်ပါးဆုံတွင်း အင်္ဂါများ ရောင်ရမ်းခြင်း၊ သားအိမ်နောက်လှန်ခြင်း၊ သားအိမ်ကျခြင်း၊ သားအိမ်အကျိတ်များ၊ ဆီးအိမ်ရောင်ခြင်း၊ အူလမ်းကြောင်း မူမမှန်ခြင်း၊ တင်ပါးဆုံတွင်း ကြွက်သားများ အားနည်းခြင်း၊ သားအိမ်နံရံထူခြင်း၊ လိပ်ခေါင်းရောဂါနှင့် မျိုးဥအိမ်တွင် အရည်အိတ်တည်ခြင်း စသည်တို့ ပါဝင်ပါသည်။
• ခွဲစိတ်မှု သို့မဟုတ် ဆေးဝါးကုသမှုများ။ ။ သားအိမ်ထုတ်ခြင်း သို့မဟုတ် အခြားတင်ပါးဆုံတွင်း ခွဲစိတ်မှုများကြောင့် ဖြစ်ပေါ်လာသော အမာရွတ်များသည် လိင်ဆက်ဆံရာတွင် မသက်မသာဖြစ်စေနိုင်ပါသည်။ ကင်ဆာအတွက် ဓာတ်ရောင်ခြည်ပေးခြင်းနှင့် ကီမိုဆေးသွင်းခြင်းတို့သည်လည်း ခန္ဓာကိုယ်ကို ပြောင်းလဲစေကာ လိင်ဆက်ဆံရန် ခက်ခဲစေနိုင်ပါသည်။

စိတ်ပိုင်းဆိုင်ရာ အချက်အလက်များ

ခံစားချက်များသည် လိင်မှုဆိုင်ရာ အပြုအမူများနှင့် နီးကပ်စွာ ဆက်စပ်နေသောကြောင့် နာကျင်မှုတွင် ပါဝင်ပတ်သက်နေနိုင်ပါသည်။

• လိင်ပိုင်းဆိုင်ရာ နှောက်ယှက်ခံရဖူးသော ရာဇဝင်ရှိခြင်း။ လူတိုင်းတွင်မဖြစ်ခဲ့ဖူးသော်လည်း ဖြစ်ခဲ့ဖူးပါက ရောဂါနှင့်သက်ဆိုင်နိုင်သည်။
• စိတ်ပိုင်းဆိုင်ရာ ပြဿနာများ။ ။ စိုးရိမ်ပူပန်ခြင်း၊ စိတ်ဓာတ်ကျခြင်း၊ မိမိခန္ဓာကိုယ်အပေါ် မယုံကြည်ခြင်း၊ ရင်းနှီးမှုအပေါ် ကြောက်ရွံ့ခြင်း သို့မဟုတ် အိမ်ထောင်ရေးပြဿနာများသည် နှိုးဆွမှုအဆင့်ကို လျော့နည်းစေပြီး နာကျင်မှုကို ဖြစ်စေနိုင်ပါသည်။
• စိတ်ဖိစီးမှု။ ။ ဘဝတွင် စိတ်ဖိစီးမှုများရှိလာပါက တင်ပါးဆုံတွင်း ကြွက်သားများ တောင့်တင်းလာတတ်ပြီး လိင်ဆက်ဆံစဉ် နာကျင်မှုကို ဖြစ်စေနိုင်ပါသည်။

စိတ်ပိုင်းဆိုင်ရာ အချက်အလက်များကြောင့် နာကျင်ရခြင်း ဟုတ်မဟုတ် ဆုံးဖြတ်ရန် ခက်ခဲနိုင်ပါသည်။ အစောပိုင်းတွင် နာကျင်မှု ခံစားရခြင်းကြောင့် နောက်တစ်ကြိမ် နာကျင်မည်ကို ကြောက်ရွံ့လာခြင်းသည် စိတ်ကို လျှော့ချရန် ခက်ခဲစေပြီး နာကျင်မှုကို ပိုမိုဆိုးရွားစေနိုင်ပါသည်။ လိင်ဆက်ဆံခြင်းသည် နာကျင်မှုတစ်ခုဟု စတင်သတ်မှတ်မိပါက ဆက်ဆံမှုကို ရှောင်ကြဉ်လာနိုင်ပါသည်။