သိုင်းရွိုက်အကျိတ်

ရောဂါရှာဖွေခြင်း

အလုံးအကျိတ် သို့မဟုတ် အကျိတ်များကို မှန်ကန်စွာ ရောဂါရှာဖွေနိုင်ရန် အောက်ပါ စစ်ဆေးမှုနှင့် လုပ်ဆောင်ချက်များကို ပြုလုပ်ရပါသည်။

• ခန္ဓာကိုယ်ကို စမ်းသပ်စစ်ဆေးခြင်း။ ခန္ဓာကိုယ်ကို စမ်းသပ်စစ်ဆေးစဉ်အတွင်း လူနာအား တံတွေးမျိုချရန် ညွှန်ကြားပါလိမ့်မည်။ အကြောင်းမှာ အစာမျိုချခြင်းသည် သိုင်းရွိုက်အကျိတ်ကို အထက်အောက် ရွေ့လျားစေသောကြောင့် ဖြစ်ပါသည်။ ထို့အပြင် သိုင်းရွိုက်ဟော်မုန်း အထွက်လွန်ခြင်း သို့မဟုတ် အထွက်နည်းခြင်း ရှိ၊ မရှိကို ခွဲခြားနိုင်ရန် အခြားသော ရောဂါလက္ခဏာများကိုလည်း အထူးကုဆရာဝန်က ဆန်းစစ်ပါလိမ့်မည်။
• သိုင်းရွိုက်လုပ်ဆောင်ချက် စစ်ဆေးခြင်း။ သိုင်းရွိုက်ဂလင်းမှ ထုတ်လုပ်သော ဟော်မုန်းပမာဏကို သွေးထဲတွင် တိုင်းတာစစ်ဆေးသည့် ဓာတ်ခွဲခန်းစစ်ဆေးမှု ဖြစ်ပါသည်။ ၎င်းသည် လူနာတွင် သိုင်းရွိုက်ဟော်မုန်း အထွက်လွန်နေခြင်း သို့မဟုတ် အထွက်နည်းနေခြင်း ရှိ၊ မရှိကို ဆုံးဖြတ်ပေးပါသည်။
• သိုင်းရွိုက် အာထရာဆောင်း ရိုက်ခြင်း။ အသံလှိုင်းများကို အသုံးပြု၍ သိုင်းရွိုက်ဂလင်း၏ ပုံရိပ်များကို ဖော်ထုတ်သည့် စစ်ဆေးမှု ဖြစ်ပါသည်။ ၎င်းသည် အကျိတ်မှာ အခဲဖြစ်သလား သို့မဟုတ် အရည်အိတ်ဖြစ်သလား ဆိုသည်ကို ခွဲခြားပေးနိုင်ပါသည်။ သိုင်းရွိုက်အကျိတ်၏ တည်ဆောက်ပုံနှင့် ပုံသဏ္ဌာန်ကို သိရှိရန် အကောင်းဆုံးနည်းလမ်းမှာ အာထရာဆောင်း ရိုက်ခြင်း ဖြစ်ပါသည်။ ဤစစ်ဆေးမှုကို အသားစယူရာတွင်လည်း လမ်းညွှန်အဖြစ် အသုံးပြုပါသည်။
• အပ်ဖြင့် အသားစယူ စစ်ဆေးခြင်း။ အလွန်သေးငယ်သော အပ်တစ်ချောင်းကို အသုံးပြု၍ သိုင်းရွိုက်အကျိတ်တစ်ခု သို့မဟုတ် တစ်ခုထက်ပိုသော နေရာများမှ ဆဲလ်နမူနာများကို ဆရာဝန်က ထုတ်ယူပါသည်။ ထိုနမူနာများကို အသေးစိတ် ဓာတ်ခွဲစမ်းသပ်ရန်အတွက် ပေးပို့စစ်ဆေးပါသည်။
• သိုင်းရွိုက်စကင်ဖတ်ခြင်း။ ဤစစ်ဆေးမှုတွင် ရေဒီယိုသတ္တိကြွ အိုင်အိုဒင်းဓာတ်ကို လက်မောင်းသွေးကြောအတွင်းသို့ ထိုးထည့်ပါသည်။ ထို့နောက် လူနာက ကုတင်ပေါ်တွင် လဲလျောင်းနေစဉ်အတွင်း ကင်မရာတစ်လုံးက သင့်သိုင်းရွိုက်၏ ပုံရိပ်ကို ကွန်ပျူတာမျက်နှာပြင်ပေါ်တွင် ဖော်ပြပေးပါသည်။
• ဟော့နော့ဂျူးလ် (Hot nodules)။ ကင်ဆာမဟုတ်သော အကျိတ်များဖြစ်ပြီး ပုံမှန်သိုင်းရွိုက်တစ်ရှူးများထက် ရေဒီယိုသတ္တိကြွဓာတ်ကို ပိုမိုစုပ်ယူပါသည်။
• ကိုးလ်နော့ဂျူးလ် (Cold nodules)။ အချို့သောအခြေအနေများတွင် ကင်ဆာဖြစ်နိုင်ခြေ ရှိပါသည်။

ကုသခြင်း

ကင်ဆာမဟုတ်သော သိုင်းရွိုက်အကျိတ်များအတွက် ကုသမှုများတွင် အောက်ပါတို့ ပါဝင်ပါသည်။

• စောင့်ကြည့်စစ်ဆေးခြင်း။ ခန္ဓာကိုယ်ကို စမ်းသပ်ခြင်းနှင့် သိုင်းရွိုက်လုပ်ဆောင်ချက်ကို ပုံမှန်စစ်ဆေးရန် အကြံပြုပါသည်။ အကယ်၍ အကျိတ်မှာ ပိုမိုကြီးထွားလာပါက အသားစယူရန် လိုအပ်ပါသည်။ အကယ်၍ သိုင်းရွိုက်အကျိတ်မှာ ကင်ဆာမဟုတ်သေးပါက နောက်ထပ်ကုသမှု ခံယူရန် မလိုအပ်ပါ။
• သိုင်းရွိုက်ဟော်မုန်းဖြင့် ကုသခြင်း။ သိုင်းရွိုက်လုပ်ဆောင်ချက် စစ်ဆေးချက်အရ သိုင်းရွိုက်ဂလင်းသည် ခန္ဓာကိုယ်အတွက် လုံလောက်သော ဟော်မုန်းပမာဏ မထုတ်လုပ်နိုင်ပါက ဤကုသမှု ခံယူရန် လိုအပ်ပါသည်။
• ခွဲစိတ်ကုသခြင်း။ ကင်ဆာမဟုတ်သော အကျိတ်သည် အသက်ရှူခြင်း သို့မဟုတ် အစာမျိုခြင်းကို အနှောင့်အယှက်ဖြစ်စေသည်အထိ ကြီးမားလာပါက ခွဲစိတ်ရန် လိုအပ်နိုင်ပါသည်။ အထူးသဖြင့် သွေးစီးဆင်းမှု၊ အစာပြွန် သို့မဟုတ် လေပြွန်တို့ကို ပိတ်ဆို့နေသည့် အကျိတ်အများအပြားပါသော လည်ပင်းကြီးရောဂါများတွင်လည်း ခွဲစိတ်ကုသရန် လိုအပ်ပါသည်။ ထို့အပြင် အသားစစစ်ဆေးချက်အရ ရောဂါအဖြေ တိကျစွာမထွက်ခြင်း သို့မဟုတ် သံသယဖြစ်ဖွယ်ရှိခြင်းတို့ ရှိပါကလည်း ခွဲစိတ်ဖယ်ထုတ်ရန် လိုအပ်ပါသည်။

ကင်ဆာဖြစ်သော သိုင်းရွိုက်အကျိတ်များအတွက် ကုသမှုများတွင် အောက်ပါတို့ ပါဝင်ပါသည်။

• စောင့်ကြည့်စစ်ဆေးခြင်း။ သေးငယ်သော အကျိတ်များသည် ကင်ဆာဆဲလ်များအဖြစ် ပြောင်းလဲနိုင်ခြေ နည်းပါးသောကြောင့် မည်သည့်ကုသမှုမျှ မပြုလုပ်မီ အနီးကပ် စောင့်ကြည့်လေ့ရှိပါသည်။ ပုံမှန်စောင့်ကြည့်ရန်အတွက် အာထရာဆောင်းနှင့် သွေးစစ်ဆေးမှုများ ပြုလုပ်ရန် လိုအပ်ပါသည်။
• ခွဲစိတ်ကုသခြင်း။ ကင်ဆာဖြစ်သော သိုင်းရွိုက်အကျိတ်များအတွက် အကျိတ်ကို ခွဲစိတ်ဖယ်ထုတ်ခြင်းမှာ အဖြစ်များသော ကုသမှု ဖြစ်ပါသည်။ ရောဂါပြင်းထန်မှုအပေါ် မူတည်၍ သိုင်းရွိုက်တစ်ရှူး အများစုကို ဖယ်ထုတ်သည့် ခွဲစိတ်မှုကို ပြုလုပ်ပါသည်။

ခွဲစိတ်မှု ပြုလုပ်ရန် လိုအပ်သော်လည်း အသံကြိုးအာရုံကြော ထိခိုက်ခြင်းနှင့် သိုင်းရွိုက်ဘေး ဂလင်းများ ထိခိုက်ခြင်းကဲ့သို့သော အန္တရာယ်များလည်း ရှိနိုင်ပါသည်။

ခွဲစိတ်မှုအပြီးတွင် တစ်သက်တာ ကုသမှု ခံယူရန် လိုအပ်ပါသည်။ ခန္ဓာကိုယ်အတွက် လိုအပ်သော သိုင်းရွိုက်ဟော်မုန်းများ ရရှိစေရန် အထူးကုဆရာဝန်က လိုအပ်သော ဆေးဝါးများကို ညွှန်ကြားပါလိမ့်မည်။

• အယ်လ်ကိုဟောဖြင့် ကုသခြင်း။ ဤနည်းလမ်းသည် သေးငယ်သော ကင်ဆာအကျိတ်များကို အယ်လ်ကိုဟော ပမာဏအနည်းငယ် ထိုးထည့်ခြင်းဖြင့် ကင်ဆာဆဲလ်များကို ဖျက်ဆီးပေးနိုင်သည့် နည်းလမ်းဖြစ်ပါသည်။

သိုင်းရွိုက်ဟော်မုန်း အထွက်လွန်ခြင်းကြောင့် ဖြစ်ပေါ်သော သိုင်းရွိုက်အကျိတ်အတွက် ကုသမှုများတွင် အောက်ပါတို့ ပါဝင်ပါသည်။

• ရေဒီယိုသတ္တိကြွ အိုင်အိုဒင်း။ သိုင်းရွိုက်ဂလင်းသည် ရေဒီယိုသတ္တိကြွ အိုင်အိုဒင်းကို စုပ်ယူနိုင်သောကြောင့် ၎င်းကို သောက်ဆေးအဖြစ် သောက်သုံးနိုင်ပါသည်။ နှစ်လမှ သုံးလအတွင်း အကျိတ်၏ အရွယ်အစားကို သေးငယ်သွားစေပြီး သိုင်းရွိုက်ဟော်မုန်း အထွက်လွန်ခြင်း လက္ခဏာများကို လျော့ကျစေပါသည်။
• သိုင်းရွိုက်ဟော်မုန်း ထိန်းဆေးများ။ အချို့သောအခြေအနေများတွင် သိုင်းရွိုက်ဟော်မုန်း အထွက်လွန်ခြင်း လက္ခဏာများကို လျော့နည်းစေရန် ဆေးဝါးများ သောက်သုံးရန် အကြံပြုပါသည်။
• ခွဲစိတ်ကုသခြင်း။ အကယ်၍ လူနာသည် ရေဒီယိုသတ္တိကြွ အိုင်အိုဒင်းဖြင့် ကုသခြင်း သို့မဟုတ် ဆေးဝါးဖြင့် ကုသခြင်းတို့နှင့် မသင့်တော်ပါက အလွန်အမင်း အလုပ်လုပ်နေသော သိုင်းရွိုက်အကျိတ်ကို ခွဲစိတ်ဖယ်ထုတ်ရန် လိုအပ်နိုင်ပါသည်။ ခွဲစိတ်မှု မပြုလုပ်မီ အန္တရာယ်ရှိနိုင်ခြေများကို အထူးကုဆရာဝန်က ဆွေးနွေးပြောကြားပါလိမ့်မည်။

Doctors who treat this condition