သွေးကြောဆိုင်ရာ သူငယ်ပြန်ရောဂါ

အကျဉ်းချုပ်အကြောင်းအရာ

သွေးကြောဆိုင်ရာ သူငယ်ပြန်ရောဂါဆိုသည်မှာ ဦးနှောက်သို့ သွေးထောက်ပံ့မှု လျော့နည်းခြင်းကြောင့် ဖြစ်ပေါ်လာသော ဦးနှောက်ပျက်စီးမှုများမှတစ်ဆင့် ဆင်ခြင်တုံတရား၊ စီစဉ်မှု၊ ဆုံးဖြတ်ချက်ချမှု၊ မှတ်ဉာဏ်နှင့် အခြားသော သိမြင်နိုင်စွမ်းဆိုင်ရာ လုပ်ဆောင်ချက်များတွင် အခက်အခဲဖြစ်ပေါ်သည့် အခြေအနေတစ်ခု ဖြစ်ပါသည်၊၊ လေဖြတ်ခြင်းမှာ အဓိကအချက်တစ်ခု ဖြစ်နိုင်သော်လည်း သွေးကြောများကို ပျက်စီးစေပြီး သွေးလှည့်ပတ်မှုကို အနှောင့်အယှက်ဖြစ်စေကာ ဦးနှောက်သို့ အောက်ဆီဂျင်နှင့် အာဟာရဓာတ်များ ရောက်ရှိမှုကို တားဆီးပေးသည့် အခြားသော ရောဂါများကြောင့်လည်း သွေးကြောဆိုင်ရာ သူငယ်ပြန်ရောဂါ ဖြစ်ပွားနိုင်ပါသည်၊၊

နှလုံးရောဂါနှင့် လေဖြတ်ခြင်းတို့တွင် တွေ့ရလေ့ရှိသော အချက်များမှာ သွေးကြောဆိုင်ရာ သူငယ်ပြန်ရောဂါ ဖြစ်နိုင်ခြေကိုလည်း မြင့်တက်စေပါသည်၊၊ ထိုအချက်များတွင် ဆေးလိပ်သောက်ခြင်း၊ သွေးတိုးခြင်း၊ ကိုလက်စထရော မြင့်မားခြင်းနှင့် ဆီးချိုရောဂါတို့ ပါဝင်ပါသည်၊၊ ဤအခြေအနေများကို ထိရောက်စွာ စီမံခန့်ခွဲခြင်းဖြင့် သွေးကြောဆိုင်ရာ သူငယ်ပြန်ရောဂါ ဖြစ်ပွားနိုင်ခြေကို လျှော့ချနိုင်ပါသည်၊၊

ရောဂါလက္ခဏာများ

သွေးကြောဆိုင်ရာ သူငယ်ပြန်ရောဂါ၏ လက္ခဏာများသည် ဦးနှောက်အတွင်း သွေးစီးဆင်းမှု ထိခိုက်သည့် နေရာပေါ်မူတည်၍ ကွဲပြားနိုင်ပါသည်၊၊ အယ်လ်ဇိုင်းမား အပါအဝင် အခြားသော သူငယ်ပြန်ရောဂါ ပုံစံများ၏ လက္ခဏာများနှင့်လည်း ထပ်တူကျလေ့ ရှိပါသည်၊၊ သို့သော် အယ်လ်ဇိုင်းမားရောဂါနှင့် မတူသည်မှာ သွေးကြောဆိုင်ရာ သူငယ်ပြန်ရောဂါ၏ အရေးကြီးဆုံး လက္ခဏာများတွင် မှတ်ဉာဏ်ချို့ယွင်းခြင်းထက် မြန်မြန်ဆန်ဆန် စဉ်းစားနိုင်စွမ်းနှင့် ပြဿနာများကို ဖြေရှင်းနိုင်စွမ်းတို့ ပါဝင်ခြင်း ဖြစ်ပါသည်၊၊

သွေးကြောဆိုင်ရာ သူငယ်ပြန်ရောဂါ၏ လက္ခဏာများမှာ အောက်ပါအတိုင်း ဖြစ်ပါသည်၊၊

• ဇဝေဇဝါဖြစ်ခြင်း
• အစီအစဉ်များ ချမှတ်ရန် သို့မဟုတ် လုပ်ဆောင်ရန် စွမ်းရည်လျော့နည်းလာခြင်း
• အာရုံစူးစိုက်ရန် ခက်ခဲခြင်း
• မှတ်ဉာဏ်၊ စနစ်တကျ ရှိမှုနှင့် ဆုံးဖြတ်ချက်ချမှုတို့တွင် ပြဿနာရှိခြင်း
• စဉ်းစားတွေးခေါ်မှု နှေးကွေးခြင်း
• အခြေအနေတစ်ခုကို အကဲဖြတ်ရန်၊ သင့်လျော်သော နည်းဗျူဟာ ထုတ်ဖော်ရန်နှင့် အခြားသူများကို ထိုနည်းဗျူဟာအား ရှင်းပြနိုင်စွမ်း ကျဆင်းလာခြင်း
• ဆီးသွားချင်စိတ် ရုတ်တရက် သို့မဟုတ် မကြာခဏ ဖြစ်ပေါ်ခြင်း သို့မဟုတ် ဆီးမထိန်းနိုင်ခြင်း
• ကိုယ်ခန္ဓာ သို့မဟုတ် မျက်နှာ၏ တစ်ဖက်ခြမ်းတွင် ထုံကျဉ်ခြင်း သို့မဟုတ် လေဖြတ်ခြင်း
• စိတ်မဝင်စားသလို ဖြစ်နေခြင်း သို့မဟုတ် စိတ်ဓာတ်ကျခြင်း
• လမ်းလျှောက်ရာတွင် မတည်မငြိမ် ဖြစ်ခြင်း

လေဖြတ်ပြီးနောက် လက္ခဏာများ ရုတ်တရက် ပေါ်ပေါက်လာပါက သွေးကြောဆိုင်ရာ သူငယ်ပြန်ရောဂါကို ပိုမိုသိသာစေပါသည်၊၊ ထိုသို့သောအခြေအနေများတွင် သိမြင်နိုင်စွမ်းနှင့် စဉ်းစားတွေးခေါ်မှု ပြောင်းလဲခြင်းမှာ လေဖြတ်ခြင်းနှင့် တိုက်ရိုက်ဆက်စပ်နေသဖြင့် လေဖြတ်ပြီးနောက်ပိုင်းဖြစ်သော သူငယ်ပြန်ရောဂါဟုလည်း ခေါ်ဆိုလေ့ ရှိပါသည်၊၊

လေဖြတ်ခြင်း သို့မဟုတ် လေဖြတ်ခြင်း အပျော့စားများ အကြိမ်ကြိမ် ဖြစ်ပွားပြီးနောက် သွေးကြောဆိုင်ရာ သူငယ်ပြန်ရောဂါ လက္ခဏာများမှာ သိသာသော ပုံစံတစ်ခုဖြင့် ပေါ်ပေါက်လာနိုင်ပါသည်၊၊ အယ်လ်ဇိုင်းမားရောဂါတွင် တဖြည်းဖြည်းနှင့် စဉ်ဆက်မပြတ် ကျဆင်းသွားလေ့ ရှိသော်လည်း သွေးကြောဆိုင်ရာ သူငယ်ပြန်ရောဂါတွင်မူ သိမြင်နိုင်စွမ်း ပြောင်းလဲမှုများသည် အဆင့်အလိုက် ကျဆင်းသွားသည်ကို မြင်တွေ့နိုင်ပါသည်၊၊

သို့သော် အယ်လ်ဇိုင်းမားရောဂါကြောင့်ဖြစ်သော သူငယ်ပြန်ရောဂါကဲ့သို့ပင် သွေးကြောဆိုင်ရာ သူငယ်ပြန်ရောဂါသည်လည်း အချိန်ကြာလာသည်နှင့်အမျှ တဖြည်းဖြည်း ပေါ်ပေါက်လာနိုင်ပါသည်၊၊ ထို့အပြင် အယ်လ်ဇိုင်းမားရောဂါနှင့် သွေးကြောဆိုင်ရာရောဂါတို့မှာ ဒွန်တွဲနေလေ့ ရှိသဖြင့် လူအများအပြားတွင် ရောဂါနှစ်မျိုးလုံး၏ လက္ခဏာများ ရှိနေနိုင်ပါသည်၊၊

သုတေသန လေ့လာချက်များအရ သူငယ်ပြန်ရောဂါ ခံစားနေရသူ အများအပြားတွင် ဦးနှောက်သွေးကြောဆိုင်ရာရောဂါနှင့် အယ်လ်ဇိုင်းမားရောဂါ နှစ်မျိုးလုံး ရှိနေတတ်သည်ဟု သိရပါသည်၊၊

အကြောင်းရင်းများ

သွေးကြောဆိုင်ရာ သူငယ်ပြန်ရောဂါသည် သင့်ဦးနှောက်အတွင်းရှိ သွေးကြောများကို ထိခိုက်စေသော ရောဂါဖြစ်ပြီး ဦးနှောက်မှ ပုံမှန်အလုပ်လုပ်ရန် လိုအပ်သော အာဟာရဓာတ်များနှင့် အောက်ဆီဂျင်တို့ကို ထောက်ပံ့ပေးနိုင်စွမ်း လျော့နည်းသွားစေပါသည်၊၊

အောက်ပါအခြေအနေများကြောင့် သွေးကြောဆိုင်ရာ သူငယ်ပြန်ရောဂါ ဖြစ်ပွားနိုင်ပါသည်၊၊

• ဦးနှောက်သွေးကြောပိတ်၍ လေဖြတ်ခြင်း၊၊ သွေးကြောဆိုင်ရာ သူငယ်ပြန်ရောဂါသည် လေဖြတ်ခြင်းကြောင့် ဖြစ်ပေါ်လာသော လက္ခဏာများထဲမှ တစ်ခုဖြစ်ပါသည်၊၊ သို့သော် လေဖြတ်ခြင်းတိုင်းတွင် သိသာသော လက္ခဏာများ မပြတတ်ပါ၊၊ လက္ခဏာမပြဘဲ လေဖြတ်ခြင်းများကလည်း သူငယ်ပြန်ရောဂါ ဖြစ်နိုင်ခြေကို မြင့်တက်စေပါသည်၊၊

သိသာထင်ရှားသည်ဖြစ်စေ၊ မသိသာသည်ဖြစ်စေ လေဖြတ်သည့်အကြိမ်အရေအတွက် များလာသည်နှင့်အမျှ သူငယ်ပြန်ရောဂါ ဖြစ်နိုင်ခြေမှာလည်း မြင့်တက်လာပါသည်၊၊ အကြိမ်ကြိမ် လေဖြတ်ခြင်းကြောင့် ဖြစ်ပေါ်လာသော သူငယ်ပြန်ရောဂါမှာ သွေးကြောဆိုင်ရာ သူငယ်ပြန်ရောဂါ ပုံစံတစ်ခု ဖြစ်ပါသည်၊၊

• ဦးနှောက်အတွင်း သွေးယိုစီးခြင်း၊၊ သွေးတိုးခြင်းကြောင့် သွေးကြောများ အားနည်းလာရာမှ ဦးနှောက်အတွင်း သွေးယိုစိမ့်မှု ဖြစ်ခြင်း သို့မဟုတ် အသက်ကြီးလာသည်နှင့်အမျှ သေးငယ်သော သွေးကြောများအတွင်း ပရိုတင်းဓာတ်များ စုပုံလာရာမှ သွေးကြောများ အားနည်းလာခြင်းတို့ကြောင့် ဖြစ်နိုင်ပါသည်၊၊
• ဦးနှောက်အတွင်းရှိ သွေးကြောများ ကျဉ်းခြင်း သို့မဟုတ် ထိခိုက်ပျက်စီးခြင်း၊၊ သွေးကြောများကို ကျဉ်းစေသည့် သို့မဟုတ် အမြဲတမ်း ထိခိုက်စေသည့် ရောဂါများကြောင့်လည်း ဤရောဂါ ဖြစ်ပွားနိုင်ပါသည်၊၊ ထိုပြဿနာများထဲတွင် အသက်ကြီးခြင်း၊ သွေးတိုးခြင်း၊ သွေးကြောမာခြင်းနှင့် ဆီးချိုရောဂါတို့ကြောင့် ဖြစ်ပေါ်လာသော ထိခိုက်မှုများ ပါဝင်ပါသည်၊၊

ဖြစ်နိုင်ခြေရှိသော အချက်များ

နှလုံးရောဂါ၊ လေဖြတ်ခြင်းနှင့် သွေးကြောဆိုင်ရာ သူငယ်ပြန်ရောဂါ ဖြစ်နိုင်ခြေရှိသော အချက်များမှာ တူညီနေတတ်ပါသည်၊၊

• အသက်ကြီးခြင်း၊၊ အသက်ကြီးလာသည်နှင့်အမျှ ဖြစ်နိုင်ခြေ ပိုများလာပါသည်၊၊ အသက် ၆၅ နှစ်မတိုင်မီတွင် ဤရောဂါမှာ အဖြစ်နည်းသော်လည်း အသက် ၉၀ ဝန်းကျင်တွင် ဖြစ်နိုင်ခြေ အလွန်မြင့်တက်လာပါသည်၊၊
• နှလုံးရောဂါ သို့မဟုတ် လေဖြတ်ဖူးသော ရာဇဝင်ရှိခြင်း၊၊ နှလုံးရောဂါ ခံစားဖူးပါက ဦးနှောက်အတွင်းရှိ သွေးကြောများတွင်လည်း ပြဿနာဖြစ်နိုင်ခြေ ပိုများပါသည်၊၊ လေဖြတ်ခြင်းကြောင့် ဖြစ်ပေါ်လာသော ဦးနှောက်ပျက်စီးမှုသည် သူငယ်ပြန်ရောဂါ ဖြစ်နိုင်ခြေကို သက်ရောက်စေပါသည်၊၊
• သွေးကြောအတွင်း အနည်စုခြင်း၊၊ ကိုလက်စထရောနှင့် အခြားသော ဓာတ်များ စုပုံလာခြင်းကြောင့် သွေးကြောများ ကျဉ်းလာကာ ဦးနှောက်သို့ သွေးထောက်ပံ့မှု လျော့နည်းသွားသဖြင့် ရောဂါဖြစ်နိုင်ခြေကို မြင့်တက်စေပါသည်၊၊
• သွေးတိုးခြင်း၊၊ သွေးတိုးသည့်အခါ ဦးနှောက်အတွင်းရှိ သွေးကြောများအပါအဝင် တစ်ကိုယ်လုံးရှိ သွေးကြောများပေါ်တွင် ဖိအားဖြစ်စေသဖြင့် ဦးနှောက်သွေးကြောဆိုင်ရာ ပြဿနာများကို ပိုမိုဖြစ်စေပါသည်၊၊
• ကိုလက်စထရော မြင့်မားခြင်း၊၊ မကောင်းသော ကိုလက်စထရော မြင့်မားခြင်းသည်လည်း ဤရောဂါဖြစ်နိုင်ခြေကို မြင့်တက်စေပါသည်၊၊
• ဆီးချိုရောဂါ၊၊ သွေးအတွင်း သကြားဓာတ် မြင့်မားခြင်းသည် တစ်ကိုယ်လုံးရှိ သွေးကြောများကို ပျက်စီးစေပါသည်၊၊ ဦးနှောက်သွေးကြောများ ပျက်စီးပါက လေဖြတ်ခြင်းနှင့် သူငယ်ပြန်ရောဂါ ဖြစ်နိုင်ခြေ တိုးလာပါသည်၊၊
• ဆေးလိပ်သောက်ခြင်း၊၊ ဆေးလိပ်သောက်ခြင်းသည် သွေးကြောများကို ပျက်စီးစေပြီး သွေးလှည့်ပတ်မှုဆိုင်ရာ ရောဂါများကို ဖြစ်စေပါသည်၊၊
• အဝလွန်ခြင်း၊၊ ကိုယ်အလေးချိန် များခြင်းသည် သွေးကြောဆိုင်ရာ ရောဂါများအတွက် ဖြစ်နိုင်ခြေရှိသော အချက်တစ်ခု ဖြစ်ပါသည်၊၊
• နှလုံးခုန် မမှန်ခြင်း၊၊ နှလုံးခုန် မမှန်သည့်အခါ နှလုံးအတွင်း သွေးခဲများ ဖြစ်ပေါ်စေနိုင်ပြီး ထိုသွေးခဲများသည် ဦးနှောက်အတွင်းရှိ သွေးကြောများဆီသို့ ရောက်ရှိကာ လေဖြတ်ခြင်း ဖြစ်နိုင်ခြေကို မြင့်တက်စေပါသည်၊၊