ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာ
ပန်းသေပန်းညှိုးရောဂါ ဆိုသည်မှာ လိင်ဆက်ဆံရန်အတွက် လုံလောက်သော လိင်တံတောင်မတ်မှုကို မရရှိနိုင်ခြင်း သို့မဟုတ် ကြာရှည်မထိန်းထားနိုင်ခြင်းကို ဆိုလိုပါသည်၊၊ ပန်းသေပန်းညှိုးဖြစ်ခြင်းကို မည်သည့်အသက်အရွယ်တွင်မဆို ပုံမှန်အခြေအနေတစ်ခုဟု မသတ်မှတ်သင့်ကြောင်း သိထားရန် အရေးကြီးပြီး ၎င်းနှင့်အတူ လိင်စိတ်ဆန္ဒနည်းပါးခြင်း၊၊ ပြီးမြောက်မှုနှင့် သုတ်လွှတ်မှုဆိုင်ရာ အခက်အခဲများကဲ့သို့သော လိင်မှုရေးရာ စိန်ခေါ်မှုများလည်း တွဲဖက်ပါရှိနိုင်ပါသည်၊၊
ပန်းသေပန်းညှိုးရောဂါ စွဲမြဲစွာဖြစ်ပွားနေခြင်းသည် စိတ်ဖိစီးမှု မြင့်မားလာခြင်း၊၊ မိမိကိုယ်ကိုယ် ယုံကြည်မှု လျော့နည်းလာခြင်းနှင့် အိမ်ထောင်ရေး သို့မဟုတ် ချစ်သူနှင့် ဆက်ဆံရေးတွင် ပြဿနာများ ဖြစ်ပေါ်ခြင်းစသည့် ဆိုးကျိုးများကို ဖြစ်စေနိုင်ပါသည်၊၊ ဤရောဂါသည် ကုသမှုခံယူရန် လိုအပ်သော နောက်ကွယ်မှ ကျန်းမာရေး အခြေအနေတစ်ခုရှိနေခြင်းကို ညွှန်ပြနေနိုင်သကဲ့သို့ နှလုံးရောဂါဖြစ်နိုင်ခြေရှိသော အချက်တစ်ခုအဖြစ်လည်း ရှိနေနိုင်ပါသည်၊၊ ထိုသို့သောအခြေအနေများတွင် လူနာများသည် လိင်တံတောင်မတ်ရန် သို့မဟုတ် တောင်မတ်မှုကို ထိန်းထားရန် အခက်အခဲများ ခံစားရနိုင်ပါသည်၊၊
အမျိုးသားများသည် တစ်ခါတစ်ရံတွင် လိင်တံတောင်မတ်ရန် အခက်အခဲများ ခံစားရနိုင်ပြီး ၎င်းသည် အကြောင်းရင်း အမျိုးမျိုးကြောင့် ဖြစ်နိုင်ပါသည်၊၊ ၎င်းတို့တွင် အရက်အလွန်အကျွံ သောက်ခြင်း၊၊ စိတ်ဖိစီးမှု မြင့်မားခြင်း၊၊ ပေါင်းသင်းဆက်ဆံရေးတွင် ပဋိပက္ခဖြစ်ခြင်း သို့မဟုတ် အလွန်အမင်း ပင်ပန်းနွမ်းနယ်ခြင်းတို့ ပါဝင်ပါသည်၊၊
တောင်မတ်မှု မရရှိနိုင်ခြင်းသည် စုစုပေါင်းကြိုးစားမှု၏ ၂၀ ရာခိုင်နှုန်းအောက်သာ ဖြစ်ပါက ပုံမှန်မဟုတ်ဟု မဆိုနိုင်ဘဲ များသောအားဖြင့် ကုသမှုခံယူရန် မလိုအပ်ပါ၊၊ သို့သော် ၅၀ ရာခိုင်နှုန်းထက်ပို၍ တောင်မတ်ရန် ပျက်ကွက်နေပါက ပြဿနာရှိနေကြောင်း ပြသနေပြီး ကုသမှုခံယူရန် လိုအပ်ပါသည်၊၊ နာတာရှည် ပန်းသေပန်းညှိုးရောဂါသည် အရွယ်ရောက်ပြီး အမျိုးသား ၁၀ ဦးတွင် ၁ ဦးခန့်၌ ဖြစ်ပွားလေ့ရှိပါသည်၊၊
အကယ်၍ တစ်ဦးတစ်ယောက်သည် ပန်းသေပန်းညှိုးဖြစ်နေသည်ကို စိုးရိမ်ပါက မည်မျှပင် ရှက်ရွံ့နေပါစေ ကျန်းမာရေးစောင့်ရှောက်သူနှင့် ဆွေးနွေးသင့်ပါသည်၊၊ ဤရောဂါ၏ နောက်ကွယ်မှ အကြောင်းရင်းကို ကုသခြင်းဖြင့် တစ်ခါတစ်ရံတွင် ရောဂါပျောက်ကင်းသွားနိုင်ပါသည်၊၊ အခြားသော အခြေအနေများတွင်မူ ဆေးဝါးများ သို့မဟုတ် တိုက်ရိုက်ကုသသည့် နည်းလမ်းများ လိုအပ်နိုင်ပါသည်၊၊
ရောဂါလက္ခဏာများ
ပန်းသေပန်းညှိုးရောဂါ၏ လက္ခဏာများတွင် လိင်တံတောင်မတ်ရန် ခက်ခဲခြင်း၊၊ တောင်မတ်မှုကို ထိန်းထားရန် ခက်ခဲခြင်းနှင့် လိင်စိတ်ဆန္ဒ လျော့နည်းလာခြင်းတို့ ပါဝင်နိုင်ပါသည်၊၊
အကယ်၍ လူနာသည် ၎င်း၏ တောင်မတ်မှုအပေါ် စိုးရိမ်ပူပန်မှုရှိလျှင် သို့မဟုတ် သုတ်စောခြင်း၊၊ သုတ်လွှတ်ရန် အချိန်ကြာမြင့်ခြင်းကဲ့သို့သော လိင်မှုဆိုင်ရာ ပြဿနာများ ခံစားနေရပါက ဆေးကုသမှု ခံယူရန် အကြံပြုပါသည်၊၊ ပန်းသေပန်းညှိုးရောဂါသည် ဆီးချိုရောဂါ၊၊ နှလုံးရောဂါ သို့မဟုတ် အခြားသော ကျန်းမာရေး အခြေအနေများနှင့် ဆက်စပ်နေနိုင်ပါသည်၊၊ ထို့ကြောင့် နောက်ကွယ်မှ ကျန်းမာရေး ပြဿနာများကို ရှာဖွေဖော်ထုတ်နိုင်ရန် ကျန်းမာရေး အကဲဖြတ်မှု ခံယူခြင်းသည် အလွန်အရေးကြီးပါသည်၊၊
အကြောင်းရင်းများ
အမျိုးသားများ လိင်စိတ်နိုးကြွမှုဖြစ်စဉ်သည် ဦးနှောက်၊ ဟော်မုန်း၊ စိတ်ခံစားမှု၊ အာရုံကြော၊ ကြွက်သားနှင့် သွေးကြောများ အားလုံး ပါဝင်ပတ်သက်နေသော ရှုပ်ထွေးသည့် လုပ်ငန်းစဉ်တစ်ခု ဖြစ်ပါသည်၊၊ ၎င်းတို့အနက် တစ်ခုခုတွင် အခက်အခဲရှိပါက ပန်းသေပန်းညှိုးရောဂါကို ဖြစ်စေနိုင်ပါသည်၊၊ စိတ်ဖိစီးမှုနှင့် စိတ်ကျန်းမာရေး ပြဿနာများသည်လည်း ဤရောဂါကို ဖြစ်စေနိုင်သကဲ့သို့ ပို၍လည်း ဆိုးရွားစေနိုင်ပါသည်၊၊
တစ်ခါတစ်ရံတွင် ပန်းသေပန်းညှိုးရောဂါသည် စိတ်ပိုင်းဆိုင်ရာနှင့် ရုပ်ပိုင်းဆိုင်ရာ ပြဿနာများ ပေါင်းစပ်ခြင်းကြောင့် ဖြစ်ပေါ်တတ်ပါသည်၊၊ ဥပမာအားဖြင့် လိင်ပိုင်းဆိုင်ရာ တုံ့ပြန်မှုကို ဟန့်တားသော သာမန်ရုပ်ပိုင်းဆိုင်ရာ ပြဿနာလေးတစ်ခုကြောင့် တောင်မတ်မှုကို ထိန်းထားနိုင်ပါ့မလားဟူသော စိုးရိမ်စိတ် ဖြစ်ပေါ်လာနိုင်ပါသည်၊၊ ထိုသို့သော စိုးရိမ်ပူပန်မှုက ပန်းသေပန်းညှိုးရောဂါကို ဖြစ်စေခြင်း သို့မဟုတ် ပိုမိုဆိုးရွားစေခြင်းတို့ကို ဖြစ်စေနိုင်ပါသည်၊၊
- ရုပ်ပိုင်းဆိုင်ရာ အကြောင်းရင်းများ။ ပန်းသေပန်းညှိုးရောဂါသည် ရုပ်ပိုင်းဆိုင်ရာ ပြဿနာတစ်ခုခုကြောင့် ဖြစ်ပွားခြင်းမှာ အဖြစ်များပါသည်၊၊ အဖြစ်များသော အကြောင်းရင်းများတွင် အောက်ပါတို့ ပါဝင်ပါသည်၊၊
- နှလုံးရောဂါများ၊၊
- သွေးကြောများ ကျဉ်းခြင်း သို့မဟုတ် ပိတ်ဆို့ခြင်း၊၊
- သွေးတွင်း အဆီဓာတ် မြင့်မားခြင်း၊၊
- သွေးတိုးရောဂါ၊၊
- ဆီးချိုရောဂါ သို့မဟုတ် သွေးတွင်းသကြားဓာတ် မြင့်မားခြင်း၊၊
- အဝလွန်ခြင်း၊၊
- သွေးတိုးခြင်း၊၊ အင်ဆူလင် မြင့်မားခြင်း၊၊ ဗိုက်ခေါက်ထွက်ခြင်းနှင့် အဆီဓာတ်များခြင်းတို့ ပါဝင်သော ဇီဝကမ္မဖြစ်စဉ်ဆိုင်ရာ ရောဂါစု၊၊
- ကျားဟော်မုန်း နည်းပါးခြင်း၊၊
- ပါကင်ဆန်ရောဂါ၊၊
- အာရုံကြောစနစ်ဆိုင်ရာ ရောဂါ (Multiple sclerosis)၊၊
- သတ်မှတ်ထားသော ဆေးဝါးအချို့၊၊
- ဆေးလိပ်သောက်ခြင်း သို့မဟုတ် အရက်သောက်ခြင်း၊၊
- လိင်တံအတွင်း အမာရွတ်တစ်ရှူးများ ဖြစ်ပေါ်စေသော ရောဂါ (Peyronie’s disease)၊၊
- အိပ်စက်မှုဆိုင်ရာ ပြဿနာများ၊၊
- ဆီးကျိတ်ကြီးခြင်း သို့မဟုတ် ဆီးကျိတ်ကင်ဆာအတွက် ကုသမှုများ၊၊
- ခါးရိုးဆစ် သို့မဟုတ် ဆီးခုံပိုင်းဆိုင်ရာ ထိခိုက်ဒဏ်ရာများ သို့မဟုတ် ခွဲစိတ်မှုများ၊၊
- စိတ်ပိုင်းဆိုင်ရာ အကြောင်းရင်းများ။ လိင်တံတောင်မတ်ရန် ဖြစ်ပေါ်လာသော ရုပ်ပိုင်းဆိုင်ရာ ဆင့်ကဲဖြစ်စဉ်များ သို့မဟုတ် လိင်စိတ်နိုးကြွမှု ခံစားချက်များကို ဦးနှောက်က အဓိက ထိန်းချုပ်ပါသည်၊၊ အောက်ပါအချက်များသည် ပန်းသေပန်းညှိုးရောဂါကို ဖြစ်စေနိုင်ခြင်း သို့မဟုတ် ထိခိုက်စေနိုင်ခြင်းတို့ ပြုလုပ်နိုင်ပါသည်၊၊
- စိုးရိမ်ပူပန်ခြင်း၊ စိတ်ဓာတ်ကျခြင်း သို့မဟုတ် အခြားသော စိတ်ကျန်းမာရေးဆိုင်ရာ ပြဿနာများ၊၊
- စိတ်ဖိစီးမှု၊၊
- စိတ်ဖိစီးမှု၊ ဆက်သွယ်မှု အားနည်းခြင်း သို့မဟုတ် အခြားသော ကိစ္စရပ်များကြောင့် ဖြစ်ပေါ်လာသော ပေါင်းသင်းဆက်ဆံရေး ပြဿနာများ၊၊
ဖြစ်နိုင်ခြေရှိသော အကြောင်းအချက်များ
လူတစ်ဦးသည် အသက်ကြီးလာသည်နှင့်အမျှ တောင်မတ်မှု အားနည်းလာခြင်း သို့မဟုတ် တောင်မတ်ရန် အချိန်ကြာမြင့်လာခြင်းတို့မှာ ထူးဆန်းသောအရာ မဟုတ်ပါ၊၊ ထို့ပြင် တောင်မတ်စေရန်နှင့် ထိန်းထားနိုင်ရန် လိင်တံကို တိုက်ရိုက် လှုံ့ဆော်မှုများ ပိုမိုလိုအပ်လာနိုင်ပါသည်၊၊ ပန်းသေပန်းညှိုးရောဂါ ဖြစ်ပွားနိုင်ခြေကို မြင့်မားစေသော အချက်များမှာ၊၊
- ကျန်းမာရေး အခြေအနေများ။ အထူးသဖြင့် ဆီးချိုရောဂါ သို့မဟုတ် နှလုံးရောဂါရှိသော လူနာများ၊၊
- ဆေးလိပ်။ ဆေးလိပ်သည် သွေးပြန်ကြောနှင့် သွေးလွှတ်ကြောများအတွင်း သွေးစီးဆင်းမှုကို လျှော့ချပေးသောကြောင့် အချိန်ကြာလာသည်နှင့်အမျှ ပန်းသေပန်းညှိုးဖြစ်စေသော နာတာရှည် ကျန်းမာရေး ပြဿနာများကို ဖြစ်ပေါ်စေနိုင်ပါသည်၊၊
- မူးယစ်ဆေးနှင့် အရက် အသုံးပြုခြင်း။ အထူးသဖြင့် အချိန်ကြာမြင့်စွာ အသုံးပြုလာသူများ၊၊
- အဝလွန်ခြင်း။ ကိုယ်အလေးချိန် ပုံမှန်ထက် များနေသော လူနာများ၊၊
- အချို့သော ဆေးကုသမှုများ။ ဆီးကျိတ်ခွဲစိတ်မှု သို့မဟုတ် ကင်ဆာအတွက် ဓာတ်ရောင်ခြည် ကုသမှုများ၊၊
- ထိခိုက်ဒဏ်ရာများ။ အထူးသဖြင့် တောင်မတ်မှုကို ထိန်းချုပ်ပေးသော အာရုံကြော သို့မဟုတ် သွေးလွှတ်ကြောများကို ထိခိုက်စေသော မတော်တဆမှုများ၊၊
- ဆေးဝါးများ။ စိတ်ကျရောဂါကုဆေးများ၊၊ ဓာတ်မတည့်မှုကုဆေးများ၊၊ သွေးတိုးဆေးများ၊၊ အကိုက်အခဲပျောက်ဆေးများနှင့် ဆီးကျိတ်ပြဿနာအတွက် ဆေးဝါးများ၊၊
- စိတ်ပိုင်းဆိုင်ရာ အခြေအနေ။ စိတ်ဖိစီးမှု၊၊ စိုးရိမ်ပူပန်မှု သို့မဟုတ် စိတ်ဓာတ်ကျခြင်းကဲ့သို့သော စိတ်ကျန်းမာရေးဆိုင်ရာ ပြဿနာများ၊၊
ရောဂါရှာဖွေခြင်း
ပန်းသေပန်းညှိုးရောဂါ (ED) သည် ဖြစ်ပွားရသည့် အကြောင်းရင်းများစွာ ရှိနိုင်သောကြောင့် ကျန်းမာရေးစောင့်ရှောက်သူသည် ရောဂါကို ရှာဖွေဖော်ထုတ်ရန်နှင့် အကြောင်းရင်းကို ဆုံးဖြတ်ရန် စစ်ဆေးမှုများစွာကို ပြုလုပ်နိုင်ပါသည်၊၊ ပန်းသေပန်းညှိုးရောဂါအတွက် ထိရောက်သော ကုသမှုသည် အကြောင်းရင်းကို တိကျစွာ သိရှိပြီးမှသာ ဖြစ်နိုင်ပါသည်၊၊
ကျန်းမာရေးစောင့်ရှောက်သူသည် လူနာ၏ ကိုယ်ခန္ဓာကို စစ်ဆေးခြင်းနှင့် ကျန်းမာရေးရာဇဝင်ဆိုင်ရာ မေးခွန်းများကို ဖြေကြားချက်များအပေါ်တွင်သာ မူတည်၍ ဤရောဂါကို ရောဂါရှာဖွေပြီး ကုသမှုလမ်းညွှန်ချက်များကို အကြံပြုနိုင်သည့် အခြေအနေများစွာ ရှိပါသည်၊၊
နောက်ကွယ်မှ ပြဿနာများကို ရှာဖွေရန် စစ်ဆေးမှုများတွင် အောက်ပါတို့ ပါဝင်နိုင်ပါသည်၊၊
- ကိုယ်ခန္ဓာကို စစ်ဆေးခြင်း။ ၎င်းတွင် လိင်တံနှင့် ဝှေးစေ့တို့ကို အနီးကပ် စစ်ဆေးခြင်းနှင့် အာရုံခံစားမှု ရှိ၊ မရှိ သိရှိနိုင်ရန် အာရုံကြောများကို စစ်ဆေးခြင်းတို့ ပါဝင်နိုင်ပါသည်၊၊
- စိတ်ပိုင်းဆိုင်ရာ အကဲဖြတ်ခြင်း။ စိတ်ဓာတ်ကျခြင်းနှင့် ပန်းသေပန်းညှိုးဖြစ်စေနိုင်သည့် အခြားသော စိတ်ပိုင်းဆိုင်ရာ အကြောင်းရင်းများကို စစ်ဆေးရန် ကျန်းမာရေးစောင့်ရှောက်သူက မေးခွန်းအချို့ကို မေးမြန်းနိုင်ပါသည်၊၊
- သွေးစစ်ခြင်း။ နှလုံးရောဂါ၊ ဆီးချိုရောဂါ၊ ကျားဟော်မုန်း နည်းပါးခြင်းနှင့် အခြားသော ကျန်းမာရေး အခြေအနေများကို ရှာဖွေဖော်ထုတ်ရန် သွေးနမူနာကို ဓာတ်ခွဲခန်းသို့ ပို့ဆောင်စစ်ဆေးနိုင်ပါသည်၊၊
- ဆီးစစ်ခြင်း။ ဆီးကို စစ်ဆေးခြင်းဖြင့် ပရိုတင်း၊ သကြားဓာတ်နှင့် ကျားဟော်မုန်း ပမာဏ အစရှိသည့် အချက်အလက်များစွာကို သိရှိနိုင်ပါသည်၊၊ ထိုဓာတ်ပစ္စည်းများ ပုံမှန်မဟုတ်ဘဲ တိုင်းတာရရှိခြင်းသည် ကျားဟော်မုန်းချို့တဲ့ခြင်း၊ ဆီးချိုရောဂါ၊ ကျောက်ကပ်ရောဂါ သို့မဟုတ် ပန်းသေပန်းညှိုးဖြစ်စေနိုင်သည့် မည်သည့်အခြေအနေမျိုးကိုမဆို ညွှန်ပြနေနိုင်ပါသည်၊၊
- အာထရာဆောင်း။ ၎င်းတွင် လိင်တံသို့ သွေးထောက်ပံ့ပေးသော သွေးကြောများပေါ်တွင် ကိရိယာတစ်ခုကို အသုံးပြု၍ စစ်ဆေးခြင်း ပါဝင်ပါသည်၊၊ ၎င်းသည် လူနာတွင် သွေးစီးဆင်းမှုဆိုင်ရာ ပြဿနာများ ရှိ၊ မရှိကို ကျန်းမာရေးစောင့်ရှောက်သူက ဆုံးဖြတ်နိုင်ရန် ဗီဒီယိုပုံရိပ်တစ်ခုကို ထုတ်ပေးပါသည်၊၊
- ပန်းသေပန်းညှိုးရောဂါရှိသူများတွင် သွေးစီးဆင်းမှုကို အကဲဖြတ်ရန်နှင့် သွေးပြန်ကြော ယိုစိမ့်မှု၊ သွေးကြောကျဉ်းခြင်း သို့မဟုတ် တစ်ရှူးများ အမာရွတ်ဖြစ်ခြင်းတို့ကို ရှာဖွေရန် အာထရာဆောင်းကို အသုံးပြုနိုင်ပါသည်၊၊ ဤစစ်ဆေးမှုကို လိင်တံတောင်မတ်နေချိန် (များသောအားဖြင့် တောင်မတ်စေသော ဆေးထိုးသွင်းခြင်းဖြင့် ပြုလုပ်သည်) နှင့် ပျော့ပြောင်းနေချိန် နှစ်မျိုးလုံးတွင် လုပ်ဆောင်ပါသည်၊၊
- အာရုံကြော တုံ့ပြန်မှု စစ်ဆေးခြင်း (Bulbocavernous reflex)။ ဤစစ်ဆေးမှုသည် လိင်တံအာရုံကြော၏ ခံစားမှုကို တိုင်းတာခြင်း ဖြစ်ပါသည်၊၊ ကျန်းမာရေးစောင့်ရှောက်သူက လိင်တံထိပ်ကို ညှစ်လိုက်သည့်အခါ စအိုဝသည် ချက်ချင်းကျုံ့သွားရပါမည်၊၊ တုံ့ပြန်မှု ကြန့်ကြာနေပါက အာရုံကြောလုပ်ဆောင်ချက် ချို့ယွင်းနေသည်ဟု ဆိုနိုင်ပါသည်၊၊
- ညဘက် လိင်တံတောင်မတ်မှု စစ်ဆေးခြင်း (NPT)။ ဤစစ်ဆေးမှုသည် အမျိုးသားတစ်ဦး အိပ်ပျော်နေစဉ်အတွင်း တောင်မတ်မှုကို အကဲဖြတ်ခြင်း ဖြစ်ပါသည်၊၊ အမျိုးသားတစ်ဦးသည် အိပ်ပျော်နေစဉ်အတွင်း များသောအားဖြင့် ငါးကြိမ်မှ ခြောက်ကြိမ်အထိ တောင်မတ်မှုကို ခံစားရလေ့ရှိပါသည်၊၊ ဤသို့ တောင်မတ်မှုမရှိခြင်းသည် အာရုံကြောလုပ်ဆောင်ချက် သို့မဟုတ် လိင်တံသို့ သွေးစီးဆင်းမှုဆိုင်ရာ ပြဿနာတစ်ခုခုကြောင့် ဖြစ်နိုင်ပါသည်၊၊အားအမျိုးမျိုးရှိသော ပလတ်စတစ်ကွင်း သုံးကွင်းကို လိင်တံတွင် ပတ်ထားခြင်းဖြင့် ဤနည်းလမ်းကို လုပ်ဆောင်ပါသည်၊၊ မည်သည့်ကွင်း ပြတ်သွားသနည်း ဆိုသည့်အပေါ် မူတည်၍ တောင်မတ်မှု လုပ်ဆောင်ချက်ကို အကဲဖြတ်ပါသည်၊၊ အခြားနည်းလမ်းတစ်ခုမှာ လိင်တံထိပ်နှင့် အောက်ခြေတွင် သားရေကွင်းများ ပတ်ထားခြင်း ဖြစ်ပါသည်၊၊ အကယ်၍ ညဘက်တွင် လိင်တံတောင်မတ်လာပါက ထိုကွင်းများသည် ဆန့်ထွက်သွားပြီး လိင်တံ၏ လုံးပတ်ပြောင်းလဲမှုကို တိုင်းတာပါသည်၊၊
- အာရုံကြော တုန်ခါမှု တိုင်းတာခြင်း (Penile biothesiometry)။ ဤစစ်ဆေးမှုသည် အာရုံကြောလုပ်ဆောင်ချက်နှင့် အာရုံခံစားမှုကို အကဲဖြတ်ရန် လျှပ်စစ်သံလိုက်တုန်ခါမှုကို အသုံးပြုပါသည်၊၊ ဤတုန်ခါမှုများအပေါ် အာရုံခံစားနိုင်စွမ်း လျော့နည်းနေခြင်းသည် အာရုံကြောများ ပျက်စီးနေသည့် လက္ခဏာ ဖြစ်နိုင်ပါသည်၊၊
- ဆေးထိုး၍ စစ်ဆေးခြင်း (Vasoactive injection)။ ဤစစ်ဆေးမှုတွင် အထူးဖော်စပ်ထားသော ဆေးရည်များကို ထိုးသွင်းခြင်းဖြင့် တောင်မတ်မှုကို ဖြစ်ပေါ်စေပြီး သွေးကြောများကို ကျယ်စေကာ လိင်တံအတွင်းသို့ သွေးများ ဝင်ရောက်စေပါသည်၊၊
- လိင်တံအတွင်း အရည်သွင်း ဖိအားတိုင်းတာခြင်း (Dynamic infusion cavernosometry)။ သွေးပြန်ကြော ယိုစိမ့်မှုရှိသော ပန်းသေပန်းညှိုးရောဂါရှိသူ အမျိုးသားများတွင် ဤစစ်ဆေးမှုကို ပြုလုပ်ပါသည်၊၊ ဤစစ်ဆေးမှုတွင် သတ်မှတ်ထားသော အရည်ပမာဏကို လိင်တံအတွင်းသို့ ထည့်သွင်းပါသည်၊၊ တောင့်တင်းသော တောင်မတ်မှု ရရှိစေရန်အတွက် အရည်ကို မည်သည့်နှုန်းဖြင့် သွင်းရမည်နည်းကို တွက်ချက်ခြင်းဖြင့် ကျန်းမာရေးစောင့်ရှောက်သူများသည် သွေးပြန်ကြောယိုစိမ့်မှု အတိုင်းအတာကို အကဲဖြတ်နိုင်ပါသည်၊၊
- လိင်တံသွေးကြော ဓာတ်မှန်ရိုက်ခြင်း (Cavernosography)။ ဤစစ်ဆေးမှုတွင် လိင်တံအတွင်းသို့ ဆေးရည်တစ်မျိုး ထိုးသွင်းခြင်း ပါဝင်ပြီး အထက်ပါ ဖိအားတိုင်းတာခြင်း စစ်ဆေးမှုနှင့် တွဲဖက်လုပ်ဆောင်ပါသည်၊၊ ထို့နောက် လိင်တံကို ဓာတ်မှန်ရိုက်ခြင်းဖြင့် သွေးပြန်ကြော ယိုစိမ့်မှုကို မြင်တွေ့နိုင်ပါသည်၊၊
- သွေးလွှတ်ကြော ဓာတ်မှန်ရိုက်ခြင်း (Arteriography)။ သွေးကြော ပြန်လည်ပြုပြင်ခြင်း ခွဲစိတ်မှု ပြုလုပ်ရန် လိုအပ်သူများတွင် ဤစစ်ဆေးမှုကို ပြုလုပ်ပါသည်၊၊ ဓာတ်မှန်ရိုက်နိုင်ရန်အတွက် ပျက်စီးနေသည်ဟု ယူဆရသော သွေးလွှတ်ကြောအတွင်းသို့ ဆေးရည်တစ်မျိုးကို ထိုးသွင်းခြင်း ဖြစ်ပါသည်၊၊
ကုသခြင်း
ကျန်းမာရေးစောင့်ရှောက်သူ၏ အဓိကအာရုံစိုက်မှုမှာ ပန်းသေပန်းညှိုးရောဂါကို ဖြစ်စေနိုင်သော သို့မဟုတ် ပိုမိုဆိုးရွားစေနိုင်သော ကျန်းမာရေးအခြေအနေများအတွက် လူနာက သင့်လျော်သော ကုသစောင့်ရှောက်မှု ရရှိစေရန် ဖြစ်ပါသည်၊၊
ရောဂါဖြစ်ပွားရသည့် နောက်ကွယ်မှ အကြောင်းရင်းများ၊ ပြင်းထန်မှုနှင့် အခြေအနေပေါ်မူတည်၍ လူနာတွင် ရွေးချယ်စရာ ကုထုံးများစွာ ရှိနိုင်ပါသည်၊၊ ကျန်းမာရေးစောင့်ရှောက်သူသည် လူနာ၏ စိတ်ကြိုက်ရွေးချယ်မှုကို ထည့်သွင်းစဉ်းစားပေးမည်ဖြစ်ပြီး ကုသမှုတစ်ခုချင်းစီနှင့် ဆက်စပ်နေသော ဘေးထွက်ဆိုးကျိုးများနှင့် အကျိုးကျေးဇူးများကို ရှင်းပြပေးပါလိမ့်မည်၊၊ ကုသမှုရွေးချယ်ရာတွင် လူနာ၏အဖော် (ဇနီး သို့မဟုတ် ချစ်သူ) ၏ သဘောထားကလည်း လွှမ်းမိုးမှု ရှိနိုင်ပါသည်၊၊
- သောက်ဆေးများ။ အမျိုးသားအများစုအတွက် သောက်ဆေးများသည် ပန်းသေပန်းညှိုးရောဂါအတွက် ထိရောက်သော ကုသမှုဖြစ်ပါသည်၊၊ ၎င်းတို့တွင် ဆီလ်ဒင်နာဖေးလ် (Viagra)၊ တာဒါလာဖေးလ် (Adcirca, Cialis)၊ ဗာဒီနာဖေးလ် (Levitra, Staxyn) နှင့် အာဗာနာဖေးလ် (Stendra) တို့ ပါဝင်ပါသည်၊၊နိုက်ထရစ်အောက်ဆိုဒ် (Nitric oxide) သည် ခန္ဓာကိုယ်မှ သဘာဝအတိုင်း ထုတ်လုပ်ပေးသော ဓာတ်ပစ္စည်းဖြစ်ပြီး လိင်တံအတွင်းရှိ ကြွက်သားများကို လျော့ကျစေပါသည်၊၊ အထက်ပါ ဆေးလေးမျိုးစလုံးသည် ထိုဓာတ်ပစ္စည်း၏ အာနိသင်ကို မြှင့်တင်ပေးရန် လုပ်ဆောင်ပါသည်၊၊ သွေးစီးဆင်းမှု တိုးလာသည့် ရလဒ်ကြောင့် လူနာသည် လိင်ပိုင်းဆိုင်ရာ လှုံ့ဆော်မှုအပေါ် တုံ့ပြန်သည့်အနေဖြင့် လိင်တံတောင်မတ်မှုကို ရရှိနိုင်ပါသည်၊၊ဤဆေးလုံးများထဲမှ တစ်မျိုးကို သောက်လိုက်ရုံဖြင့် လိင်တံချက်ချင်း တောင်မတ်လာမည်ဟု အာမမခံနိုင်ပါ၊၊ လိင်တံအာရုံကြောများမှ နိုက်ထရစ်အောက်ဆိုဒ် ထွက်လာစေရန် လိင်ပိုင်းဆိုင်ရာ လှုံ့ဆော်မှု လိုအပ်ပါသည်၊၊ ဤဆေးများသည် ထိုအချက်ပြမှုကို အားကောင်းစေပြီး အချို့သူများတွင် ပုံမှန်တောင်မတ်မှု လုပ်ဆောင်ချက်ကို ပြန်လည်ရရှိစေပါသည်၊၊ ဤသောက်ဆေးများသည် ကာမအားဆေးများ မဟုတ်သလို စိတ်လှုပ်ရှားမှုကိုလည်း ဖြစ်ပေါ်စေခြင်း မဟုတ်ကြောင်း သိထားရန် အရေးကြီးပါသည်၊၊ ထို့ပြင် ပုံမှန်အတိုင်း တောင်မတ်နိုင်သော အမျိုးသားများအတွက် ဤဆေးများမှာ မလိုအပ်ပါ၊၊ဆရာဝန်သည် သင်၏ သီးခြားအခြေအနေများပေါ် မူတည်၍ သင့်အတွက် အထိရောက်ဆုံးဖြစ်မည့် ဆေးဝါးကို အကဲဖြတ် ဆုံးဖြတ်ပေးပါလိမ့်မည်၊၊ လူတိုင်းသည် ပန်းသေပန်းညှိုး ကုသဆေးများကို တုံ့ပြန်မှု မရှိနိုင်ကြောင်းနှင့် ဆီးချိုရောဂါ သို့မဟုတ် ဆီးကျိတ်ခွဲစိတ်မှုကဲ့သို့သော အခြေအနေများက ဆေး၏ ထိရောက်မှုကို လျော့ကျစေနိုင်ကြောင်း သတိပြုရန် လိုအပ်ပါသည်၊၊ထို့အပြင် ရင်ဘတ်အောင့်ခြင်း (Angina) အတွက် အသုံးများသော နိုက်ထရိတ် (Nitrate) ပါဝင်သော ဆေးဝါးများ (ဥပမာ- Nitroglycerin, Isosorbide mononitrate, Isosorbide dinitrate) ကို ပန်းသေပန်းညှိုးကုဆေးများနှင့် တွဲသုံးပါက အန္တရာယ်ရှိနိုင်ပါသည်၊၊ အကယ်၍ သင့်တွင် နှလုံးရောဂါ သို့မဟုတ် နှလုံးပျက်စီးခြင်း ရှိနေလျှင် သို့မဟုတ် သွေးဖိအား အလွန်နည်းနေလျှင် (သွေးပေါင်ကျခြင်း) အချို့သော ဆေးဝါးများသည် ဘေးထွက်ဆိုးကျိုးများ ဖြစ်စေနိုင်ပြီး ထိုသို့သောအခြေအနေများတွင် အန္တရာယ်ရှိသည်ဟု ယူဆနိုင်ပါသည်၊၊
- အခြားသော ဆေးဝါးများတွင် အောက်ပါတို့ ပါဝင်နိုင်ပါသည်။
- ဆေးတောင့်ထည့်ခြင်း (Alprostadil urethral suppository)။ ဤကုသမှုတွင် အယ်လ်ပရိုစတေးလ် (Alprostadil) ဆေးတောင့်ငယ်လေးကို လိင်တံထိပ်ရှိ ဆီးလမ်းကြောင်းအတွင်းသို့ ထည့်သွင်းခြင်း ဖြစ်ပါသည်၊၊ လူနာသည် အထူးပြုလုပ်ထားသော ကိရိယာကို အသုံးပြု၍ ဆေးတောင့်ကို ဆီးလမ်းကြောင်းအတွင်းသို့ ထည့်ရပါသည်၊၊ဆေးအာနိသင် ထိရောက်ပါက များသောအားဖြင့် ၁၀ မိနစ်အတွင်း တောင်မတ်လာပြီး မိနစ် ၃၀ မှ ၆၀ ကြား ကြာရှည် ခံလေ့ရှိပါသည်၊၊
- ကိုယ်တိုင်ဆေးထိုးခြင်း (Alprostadil self-injection)။ ဤလုပ်ငန်းစဉ်တွင် အလွန်သေးငယ်သော အပ်ကို အသုံးပြု၍ လိင်တံ၏ ဘေးဘက် သို့မဟုတ် အောက်ခြေသို့ ဆေးထိုးသွင်းခြင်း ဖြစ်ပါသည်၊၊ တစ်ခါတစ်ရံတွင် အခြားရောဂါများအတွက် သုံးသော ဆေးဝါးများကို လိင်တံထိုးဆေးအဖြစ် တစ်မျိုးတည်း သို့မဟုတ် ပေါင်းစပ်၍ အသုံးပြုတတ်ပါသည်၊၊ ဆေးနှစ်မျိုး သို့မဟုတ် သုံးမျိုး ပေါင်းစပ်ထားသော ဆေးများကို Bimix သို့မဟုတ် Trimix ဟု ခေါ်ဆိုလေ့ရှိပါသည်၊၊ထိုးဆေးတစ်ကြိမ်၏ ပမာဏကို တောင်မတ်မှု တစ်နာရီထက် မပိုစေရန် ဖော်စပ်ထားပါသည်၊၊ အလွန်သေးသွယ်သော အပ်ကို အသုံးပြုသည့်အတွက် ဆေးထိုးသည့်နေရာတွင် နာကျင်မှု ခံစားရလေ့ မရှိပါ၊၊
- ကျားဟော်မုန်း အစားထိုးခြင်း။ အချို့သူများတွင် ကျားဟော်မုန်း (Testosterone) နည်းပါးခြင်းက ပန်းသေပန်းညှိုးရောဂါကို ပိုမိုရှုပ်ထွေးစေနိုင်ပါသည်၊၊ ဤအခြေအနေတွင် ဟော်မုန်းအစားထိုး ကုထုံးကို ပထမအဆင့်အနေဖြင့် သို့မဟုတ် အခြားကုသမှုများနှင့် တွဲဖက်၍ ညွှန်ကြားနိုင်ပါသည်၊၊
အချို့သောအခြေအနေများတွင် ဆေးဝါးများ မထိရောက်လျှင် သို့မဟုတ် မသင့်တော်လျှင် ကျန်းမာရေးစောင့်ရှောက်သူက အခြားကုသမှု နည်းလမ်းများကို အကြံပြုနိုင်ပါသည်၊၊ ၎င်းတို့မှာ၊၊
- လေဟာနယ်စုပ်စက် (Penis pumps)။ ၎င်းသည် လက်ဖြင့် သို့မဟုတ် ဘက်ထရီဖြင့် မောင်းနှင်သော စုပ်စက်ပါရှိသည့် ပြွန်ချောင်းအလွတ် ဖြစ်ပါသည်၊၊ လိင်တံကို ပြွန်အတွင်းသို့ ထည့်ပြီးနောက် စုပ်စက်ကို အသုံးပြု၍ ပြွန်အတွင်းရှိ လေကို ဖယ်ထုတ်ရပါသည်၊၊ ၎င်းသည် လေဟာနယ်ကို ဖြစ်ပေါ်စေပြီး လိင်တံအတွင်းသို့ သွေးများ စီးဝင်လာစေပါသည်၊၊သွေးများ ပြန်မထွက်စေရန်နှင့် တောင်မတ်မှုကို ထိန်းထားရန်အတွက် လူနာသည် လိင်တံအောက်ခြေတွင် တင်းကျပ်သော ကွင်းတစ်ခုကို ပတ်ရပါသည်၊၊ ထို့နောက် စုပ်စက်ကို ဖယ်ထုတ်နိုင်ပါသည်၊၊အကယ်၍ ဤနည်းလမ်းသည် လူနာနှင့် သင့်တော်ပါက ကျန်းမာရေးစောင့်ရှောက်သူသည် သတ်မှတ်ထားသော အမျိုးအစားတစ်ခုကို အကြံပြုခြင်း သို့မဟုတ် ညွှန်ကြားခြင်း ပြုလုပ်ပါလိမ့်မည်၊၊ ထိုသို့ပြုလုပ်ခြင်းဖြင့် စိတ်ချရသော ကုမ္ပဏီမှ ထုတ်လုပ်ပြီး လူနာ၏ လိုအပ်ချက်နှင့် ကိုက်ညီကြောင်း အတည်ပြုနိုင်မည် ဖြစ်ပါသည်၊၊
- လိင်တံအတွင်း အချောင်းထည့်ခြင်း (Penile implants)။ ဤလုပ်ငန်းစဉ်တွင် လိင်တံ၏ ဘေးတစ်ဖက်တစ်ချက်စီအတွင်းသို့ ကိရိယာများကို ခွဲစိတ်ထည့်သွင်းခြင်း ဖြစ်ပါသည်၊၊ ဤအချောင်းများကို ပျော့ပြောင်းသော အမျိုးအစား သို့မဟုတ် လေဖြည့်၍ရသော အမျိုးအစားများဖြင့် ပြုလုပ်ထားပါသည်၊၊ လေဖြည့်၍ရသော အမျိုးအစားကို သုံးခြင်းဖြင့် လူနာသည် မည်သည့်အချိန်တွင်၊ မည်မျှကြာကြာ တောင်မတ်မှုကို ရယူမည်ကို ထိန်းချုပ်နိုင်ပါသည်၊၊ ပျော့ပြောင်းသော အချောင်းများကို သုံးပါက လိင်တံသည် အမြဲတမ်း တောင့်တင်းနေမည်ဖြစ်သော်လည်း လိုသလို ကွေးညွှတ်နိုင်ပါသည်၊၊ယေဘုယျအားဖြင့် ဤနည်းလမ်းကို ပထမအဆင့် ကုသမှုအဖြစ် အကြံပြုလေ့မရှိဘဲ အခြားရွေးချယ်စရာများကို အရင်စမ်းသပ်လေ့ရှိပါသည်၊၊ သို့သော် အခြားကုထုံးများဖြင့် မအောင်မြင်သူများတွင် ဤနည်းလမ်းသည် စိတ်ကျေနပ်မှု အလွန်မြင့်မားကြောင်း တွေ့ရပါသည်၊၊ ခွဲစိတ်မှုတိုင်းကဲ့သို့ပင် ပိုးဝင်ခြင်းစသည့် နောက်ဆက်တွဲ ပြဿနာများ ရှိနိုင်ကြောင်း သိထားရန် လိုအပ်ပါသည်၊၊ အကယ်၍ လူနာသည် ဆီးလမ်းကြောင်း ပိုးဝင်နေပါက ဤခွဲစိတ်မှုကို မပြုလုပ်သင့်ပါ၊၊
- လေ့ကျင့်ခန်းလုပ်ခြင်း။ လတ်တလော သုတေသနများအရ အထူးသဖြင့် အသင့်အတင့်မှ ပြင်းထန်သော အေရိုးဗစ် လေ့ကျင့်ခန်းများသည် ပန်းသေပန်းညှိုးရောဂါအပေါ် ကောင်းကျိုးသက်ရောက်မှု ရှိကြောင်း ပြသနေပါသည်၊၊ ပုံမှန် လေ့ကျင့်ခန်းလုပ်ခြင်းသည် ပန်းသေပန်းညှိုးဖြစ်နိုင်ခြေကို လျှော့ချပေးနိုင်ပြီး ကိုယ်လက်လှုပ်ရှားမှု ပိုမိုလုပ်ဆောင်ခြင်းဖြင့် ဖြစ်နိုင်ခြေကို ပိုမိုလျော့ကျစေနိုင်ပါသည်၊၊
- စိတ်ပိုင်းဆိုင်ရာ နှစ်သိမ့်ဆွေးနွေးခြင်း။ အကယ်၍ ပန်းသေပန်းညှိုးဖြစ်ခြင်းသည် စိတ်ဖိစီးမှု၊၊ စိုးရိမ်ပူပန်မှု သို့မဟုတ် စိတ်ဓာတ်ကျခြင်းတို့ကြောင့် ဖြစ်ပါက သို့မဟုတ် ဤရောဂါကြောင့် စိတ်ဖိစီးမှုနှင့် အိမ်ထောင်ရေး ပဋိပက္ခများ ဖြစ်ပေါ်နေပါက ကျန်းမာရေးစောင့်ရှောက်သူသည် လူနာ သို့မဟုတ် ၎င်း၏အဖော်အား စိတ်ပညာရှင် သို့မဟုတ် အကြံပေးပုဂ္ဂိုလ်နှင့် တွေ့ဆုံရန် အကြံပြုနိုင်ပါသည်၊၊
