ရှေ့ပြေးလက္ခဏာပြ မိုင်ဂရိန်းရောဂါ

အကျဉ်းချုပ်အကြောင်းအရာ

အော်ရာဟုခေါ်သော ရှေ့ပြေးလက္ခဏာများ ပြသသည့် မိုင်ဂရိန်းရောဂါကို ဂန္ထဝင်မိုင်ဂရိန်းရောဂါဟုလည်း လူသိများပြီး အာရုံခံစားမှုဆိုင်ရာ ပြောင်းလဲမှုများ ဖြစ်ပေါ်ပြီးနောက် သို့မဟုတ် ဖြစ်ပေါ်နေစဉ်အတွင်း ပြင်းထန်စွာ ခေါင်းကိုက်ခြင်းကို ဆိုလိုပါသည်၊၊ အဆိုပါ အနှောင့်အယှက်များတွင် အလင်းရောင်များ လက်ကနဲဖြစ်ခြင်း၊ အမြင်အာရုံ ကွယ်ပျောက်သော အစက်အပြောက်များဖြစ်ခြင်းနှင့် အခြားအမြင်အာရုံ ပြောင်းလဲမှုများအပြင် လက် သို့မဟုတ် မျက်နှာတွင် စစ်ကနဲဖြစ်ခြင်းတို့ ပါဝင်နိုင်ပါသည်၊၊ ဤအခြေအနေသည် မိုင်ဂရိန်း ဝေဒနာ မစတင်မီ မိနစ် ၃၀ မှ ၆၀ အလိုတွင် ပေါ်လာနိုင်သလို ဝေဒနာ ခံစားနေရစဉ်အတွင်း၌လည်း ပေါ်လာနိုင်ပါသည်၊၊ မိုင်ဂရိန်း ဝေဒနာရှင်အားလုံးတွင် ဤကဲ့သို့သော ရှေ့ပြေးလက္ခဏာများ မပြတတ်ကြောင်းကို နားလည်ထားရန် အရေးကြီးပါသည်၊၊

ရှေ့ပြေးလက္ခဏာမပြသော သာမန်မိုင်ဂရိန်းရောဂါကိုလည်း ရှေ့ပြေးလက္ခဏာပြသော မိုင်ဂရိန်းရောဂါကဲ့သို့ပင် ကုသမှုများ ပေးပါသည်၊၊ မိုင်ဂရိန်းကို ကာကွယ်ရန် အသုံးပြုသော ဆေးဝါးများနှင့် ကိုယ်တိုင်ဂရုစိုက်သည့် နည်းလမ်းများကိုပင် ရှေ့ပြေးလက္ခဏာပြသော မိုင်ဂရိန်းရောဂါ မဖြစ်အောင် ကြိုးစားကာကွယ်ရန် အသုံးပြုနိုင်ပါသည်၊၊

မိုင်ဂရိန်း၏ ရှေ့ပြေးလက္ခဏာများသည် စိတ်မသက်မသာ ဖြစ်စေသော်လည်း အန္တရာယ် မရှိပါ၊၊ သို့သော် ၎င်းတို့သည် လေဖြတ်ခြင်းကဲ့သို့သော ပိုမိုပြင်းထန်သည့် ရောဂါလက္ခဏာများနှင့် ဆင်တူနိုင်ပါသည်၊၊ ထို့ကြောင့် တစ်ခုခု ထူးခြားနေသည်ဟု သံသယရှိပါက ဆေးဘက်ဆိုင်ရာ အကူအညီ ရယူရန် အလွန်အရေးကြီးပါသည်၊၊

ရောဂါလက္ခဏာများ

ယာယီ အမြင်အာရုံ ချို့ယွင်းခြင်း သို့မဟုတ် အခြားသော အနှောင့်အယှက်များသည် မိုင်ဂရိန်း၏ ရှေ့ပြေးလက္ခဏာများ ဖြစ်ကြပြီး ၎င်းတို့သည် ပြင်းထန်စွာ ခေါင်းကိုက်ခြင်း၊ ပျို့အန်ခြင်းနှင့် အလင်း သို့မဟုတ် အသံကို မခံနိုင်ခြင်း စသည့် အခြား မိုင်ဂရိန်း လက္ခဏာများ မပေါ်မီတွင် ဖြစ်ပေါ်လေ့ရှိပါသည်၊၊

မိုင်ဂရိန်း ရှေ့ပြေးလက္ခဏာသည် ပုံမှန်အားဖြင့် ခေါင်းမကိုက်မီ တစ်နာရီခန့်အလိုတွင် စတင်ပြီး တစ်နာရီထက်မနည်း ကြာတတ်ပါသည်၊၊ တစ်ခါတစ်ရံတွင် အထူးသဖြင့် အသက် ၅၀ ကျော်သူများ၌ ခေါင်းကိုက်ခြင်း မရှိဘဲ မိုင်ဂရိန်း ရှေ့ပြေးလက္ခဏာများသာ ဖြစ်ပေါ်နိုင်ပါသည်၊၊

အမြင်အာရုံဆိုင်ရာ လက္ခဏာများ

ရှေ့ပြေးလက္ခဏာပြသော မိုင်ဂရိန်း ဝေဒနာရှင် အများစုသည် အမြင်အာရုံ၏ အလယ်ဗဟိုမှ စတင်ပြီး အပြင်ဘက်သို့ ပြန့်ကားသွားတတ်သော ယာယီ အမြင်အာရုံ ချို့ယွင်းမှုများကို ခံစားရလေ့ရှိပါသည်၊၊ ၎င်းတို့တွင် အောက်ပါတို့ ပါဝင်နိုင်ပါသည်-

• အမြင်အာရုံ ချို့ယွင်းခြင်း သို့မဟုတ် အမြင် ကွယ်ပျောက်သွားခြင်း
• အလင်းရောင်များ လက်ကနဲ ဖြစ်ခြင်း
• ဂျီဩမေတြီ ပုံစံများဖြင့် ဝန်းရံထားတတ်သော အမြင်ကွယ် အစက်အပြောက်များ ဖြစ်ခြင်း
• အမြင်အာရုံထဲတွင် ကွေ့ကောက်နေသော အစင်းကြောင်းများ တဖြည်းဖြည်း လွင့်မျောနေခြင်း
• ကြယ်များ သို့မဟုတ် တလက်လက်တောက်ပနေသော အစက်အပြောက်များကို မြင်နေရခြင်း

အခြားသော အနှောင့်အယှက်များ

မိုင်ဂရိန်း ရှေ့ပြေးလက္ခဏာနှင့် ဆက်စပ်နေတတ်သော အခြားသော ခေတ္တခဏ အနှောင့်အယှက်များမှာ-

• စကားပြောရန် ခက်ခဲခြင်း
• ကြွက်သားများ အားနည်းခြင်း
• ထုံကျင်ခြင်း (၎င်းသည် ပုံမှန်အားဖြင့် မျက်နှာ၏ တစ်ခြမ်း သို့မဟုတ် လက်တစ်ဖက်တွင် စစ်ကနဲဖြစ်ခြင်းအဖြစ် ပေါ်ပေါက်လာပြီး ခြေလက်အင်္ဂါများသို့ တဖြည်းဖြည်း ပျံ့နှံ့သွားနိုင်ပါသည်)

ယာယီ အမြင်အာရုံ ကွယ်ပျောက်ခြင်း၊ စကားပြောရန် သို့မဟုတ် နားလည်ရန် ခက်ခဲခြင်း၊ သို့မဟုတ် ခန္ဓာကိုယ်၏ တစ်ခြမ်း အားနည်းသွားခြင်း စသည့် ရှေ့ပြေးလက္ခဏာပြသော မိုင်ဂရိန်း လက္ခဏာအသစ်များ ခံစားရပါက ဆရာဝန်နှင့် ချက်ချင်း တိုင်ပင်ပါ၊၊ လေဖြတ်ခြင်းနှင့် အခြား ပြင်းထန်သော ရောဂါများ မဟုတ်ကြောင်းကို ဆရာဝန်က သေချာစွာ စစ်ဆေးပေးရပါမည်၊၊

ဖြစ်ပွားရသည့် အကြောင်းရင်းများ

ဦးနှောက်အတွင်း ဖြတ်သန်းသွားသော လျှပ်စစ် သို့မဟုတ် ဓာတုလှိုင်းများကြောင့် မိုင်ဂရိန်း ရှေ့ပြေးလက္ခဏာများ ဖြစ်ပေါ်ရခြင်းဖြစ်ကြောင်း သက်သေအထောက်အထားများ ရှိပါသည်၊၊ သင် ခံစားရနိုင်သော လက္ခဏာ အမျိုးအစားသည် လျှပ်စစ် သို့မဟုတ် ဓာတုလှိုင်းများ ပြန့်နှံ့သွားသည့် ဦးနှောက်၏ အစိတ်အပိုင်းပေါ်တွင် မူတည်ပါသည်၊၊

အာရုံခံစားမှုများ၊ စကားပြောသည့် ဗဟိုချက်များ သို့မဟုတ် လှုပ်ရှားမှု ထိန်းချုပ်သည့် ဗဟိုချက်များရှိသော နေရာများတွင် ဤလျှပ်စစ် သို့မဟုတ် ဓာတုလှိုင်းများ ပေါ်လာနိုင်ပါသည်၊၊ အဖြစ်အများဆုံး ရှေ့ပြေးလက္ခဏာမှာ အမြင်အာရုံဆိုင်ရာ အော်ရာဖြစ်ပြီး လျှပ်စစ်လှိုင်းသည် အမြင်အာရုံဆိုင်ရာ ဦးနှောက်လွှာအတွင်း ဖြတ်သန်းသွားသောအခါ အမြင်အာရုံဆိုင်ရာ လက္ခဏာများအဖြစ် ပေါ်ပေါက်လာပါသည်၊၊

လျှပ်စစ်နှင့် ဓာတုလှိုင်းများသည် ဦးနှောက်ကို ထိခိုက်မှု မရှိစေဘဲ အာရုံကြောများ ပုံမှန်အလုပ်လုပ်နေချိန်တွင်လည်း ဖြစ်ပေါ်နိုင်ပါသည်၊၊

စိတ်ဖိစီးမှု၊ ပြင်းထန်သော အလင်းရောင်များ၊ အချို့သော အစားအစာများနှင့် ဆေးဝါးများ၊ အိပ်ချိန် အလွန်များခြင်း သို့မဟုတ် အလွန်နည်းခြင်းနှင့် ရာသီလာခြင်း စသည့် မိုင်ဂရိန်းကို ဖြစ်စေသော အကြောင်းရင်းများစွာသည် ရှေ့ပြေးလက္ခဏာပြသော မိုင်ဂရိန်းရောဂါကိုလည်း ဖြစ်ပေါ်စေနိုင်ပါသည်၊၊

ဖြစ်နိုင်ခြေရှိသော အချက်များ

ရှေ့ပြေးလက္ခဏာပြသော မိုင်ဂရိန်းရောဂါ ဖြစ်ပွားမှုကို တိုးမြင့်စေသည့် သီးခြားအချက်များ မရှိသော်လည်း မိသားစုအတွင်း မိုင်ဂရိန်းရောဂါ ရာဇဝင်ရှိသူများသည် ခေါင်းကိုက်ဝေဒနာကို ပိုမိုခံစားရလေ့ရှိသည်ကို တွေ့ရပါသည်၊၊ အမျိုးသားများထက် အမျိုးသမီးများတွင် မိုင်ဂရိန်းရောဂါ ပိုမိုအဖြစ်များပါသည်၊၊