ပါးစပ်ကြမ်းပြင်ကင်ဆာ (ခံတွင်းကင်ဆာ)

ရောဂါရှာဖွေခြင်း (Diagnosis)

ပါးစပ်ကြမ်းပြင်ကင်ဆာကို ရောဂါရှာဖွေရန်အတွက် အောက်ပါစစ်ဆေးမှုများကို ပြုလုပ်နိုင်ပါသည်

• ကိုယ်ခန္ဓာကို စစ်ဆေးခြင်း (Physical examination): ဆရာဝန်သည် လူနာ၏ ရောဂါလက္ခဏာများ၊ ဆေးမှတ်တမ်းများကို မေးမြန်းခြင်းနှင့် ကိုယ်ခန္ဓာကို စမ်းသပ်စစ်ဆေးခြင်းများ ပြုလုပ်မည်ဖြစ်သည်။
• အသားစယူစစ်ဆေးခြင်း (Tissue biopsy): ပါးစပ်ကြမ်းပြင်ရှိ ကင်ဆာဟု သံသယရှိသော တစ်ရှူးနမူနာကို ရယူ၍ ကင်ဆာဆဲလ် ရှိမရှိ ဓာတ်ခွဲခန်းသို့ ပို့ဆောင်စစ်ဆေးမည်ဖြစ်သည်။
• ပုံရိပ်ဖော် စစ်ဆေးခြင်းများ (Imaging tests): ကင်ဆာ၏ ပမာဏနှင့် ပျံ့နှံ့မှုရှိမရှိ သိရှိနိုင်ရန် စီတီစကင် (CT scan)၊ အမ်အာအိုင် (MRI) နှင့် PET scan တို့ကို ပြုလုပ်ရန် အကြံပြုနိုင်ပါသည်။
• ကျွမ်းကျင်ပညာရှင်များနှင့် တိုင်ပင်ဆွေးနွေးခြင်း: ရောဂါအခြေအနေကို သုံးသပ်နိုင်ရန် အာဟာရဆိုင်ရာ ကျွမ်းကျင်သူ၊ စကားပြောကုထုံး ပညာရှင်နှင့် အစာမျိုခြင်းဆိုင်ရာ ကုထုံးပညာရှင်များနှင့် တိုင်ပင်ရန် အကြံပြုနိုင်ပါသည်။

ကုသမှု (Treatment)

ပါးစပ်ကြမ်းပြင်ကင်ဆာအတွက် အောက်ပါကုသမှုနည်းလမ်းများ ရှိပါသည် –

• ခွဲစိတ်ကုသခြင်း (Surgery): ကင်ဆာကျိတ်ကို ဖယ်ရှားရန် ခွဲစိတ်မှု ပြုလုပ်နိုင်ပြီး ခွဲစိတ်မှုပမာဏမှာ ကင်ဆာ၏ အရွယ်အစား၊ အမျိုးအစား၊ တည်နေရာနှင့် ပျံ့နှံ့မှုအပေါ်တွင် မူတည်ပါသည်။ ထို့ပြင် ပြန်ရည်ကျိတ်များသို့ ပျံ့နှံ့မှုရှိပါက ၎င်းတို့ကိုလည်း ဖယ်ရှား၍ ဓာတ်ခွဲစစ်ဆေးမည်ဖြစ်သည်။
• ဓာတ်ရောင်ခြည်ဖြင့် ကုသခြင်း (Radiation therapy): X-ray သို့မဟုတ် ပရိုတွန် (Protons) ကဲ့သို့သော စွမ်းအားမြင့် လှိုင်းများကို အသုံးပြု၍ ကင်ဆာဆဲလ်များကို ဖျက်ဆီးခြင်းဖြစ်သည်။ ကင်ဆာအကျိတ် သေးငယ်ပါက ဤနည်းလမ်းကို အသုံးပြုနိုင်ပြီး ခွဲစိတ်မှုအပြီး ကျန်ရှိသော ကင်ဆာဆဲလ်များကို သတ်ရန်လည်း အသုံးပြုနိုင်ပါသည်။
• ဆေးသွင်းကုသခြင်း (Chemotherapy): ကင်ဆာဆဲလ်များကို သတ်ရန် ဆေးဝါးများ အသုံးပြုခြင်းဖြစ်သည်။ အများအားဖြင့် ခွဲစိတ်မှုအပြီး ကျန်ရှိနေသော ကင်ဆာဆဲလ်များကို သတ်ရန် သို့မဟုတ် ဓာတ်ရောင်ခြည်ဖြင့် ကုသခြင်းနှင့် တွဲဖက်၍ အသုံးပြုပါသည်။
• Photodynamic therapy: ကင်ဆာဆဲလ်များကို လေဆာ (စွမ်းအားမြင့် အလင်းလှိုင်း) ဖြင့် အလွယ်တကူ ဖျက်ဆီးနိုင်ရန် ဆေးဝါးများကို အသုံးပြု၍ ဆဲလ်များ အားနည်းသွားအောင် ပြုလုပ်ခြင်းဖြစ်သည်။
• ပြန်လည်ပြုပြင်ခြင်းဆိုင်ရာ ခွဲစိတ်မှု (Reconstructive surgery): အချို့သော အခြေအနေများတွင် ပါးစပ်၏ လုပ်ဆောင်ချက်များကို ဆက်လက်ထိန်းသိမ်းနိုင်ရန် ကင်ဆာအကျိတ် အနေအထားပေါ် မူတည်၍ ပုံသဏ္ဍာန် ပြန်လည်ပြုပြင်သည့် ခွဲစိတ်မှု ပြုလုပ်နိုင်ပါသည်။
• ပြန်လည်သန်စွမ်းရေး ကုထုံးများ (Rehabilitation): ခွဲစိတ်မှု သို့မဟုတ် ဓာတ်ရောင်ခြည် ကုသမှုများအပြီး ခန္ဓာကိုယ်၏ လုပ်ဆောင်ချက်များနှင့် အခြေခံလိုအပ်ချက်များ ပြန်လည်ကောင်းမွန်လာစေရန် စကားပြောကုထုံး၊ အစာမျိုကုထုံး၊ အစားအသောက်ဆိုင်ရာ ကုထုံး၊ ကာယကုထုံး (Physical therapy) နှင့် လုပ်ငန်းခွင်ဆိုင်ရာ ကုထုံး (Occupational therapy) တို့ လိုအပ်နိုင်ပါသည်။

Doctors who treat this condition