ဦးနှောက်အတွင်း သွေးခဲခြင်း

အကျဉ်းချုပ်အကြောင်းအရာ

ဦးနှောက်အတွင်း သွေးခဲခြင်းဆိုသည်မှာ ဦးခေါင်းခွံအတွင်း သွေးများ စုပုံလာသည့် အခြေအနေဖြစ်ပြီး များသောအားဖြင့် ဦးနှောက်အတွင်းရှိ သွေးကြောပေါက်ခြင်း သို့မဟုတ် ဦးခေါင်းထိခိုက်ဒဏ်ရာရခြင်းတို့ကြောင့် ဖြစ်ပွားတတ်ပါသည်။ သွေးသည် ဦးနှောက်တစ်ရှူးများအတွင်း သို့မဟုတ် ဦးခေါင်းခွံအောက်တွင် စုပုံလာနိုင်ပြီး ဦးနှောက်ကို ဖိအားပေးကာ အောက်ဆီဂျင် ရောက်ရှိမှုကို တားဆီးတတ်ပါသည်။ ဦးနှောက်သည် အောက်ဆီဂျင်နှင့် အာဟာရဓာတ်များ ထောက်ပံ့ပေးရန် သွေးကြောကွန်ရက်ကို အမှီပြုနေရသဖြင့် အောက်ဆီဂျင်သည် ဦးနှောက်ကောင်းမွန်စွာ အလုပ်လုပ်ရန်အတွက် အလွန်အရေးကြီးပါသည်။ အကယ်၍ ဦးနှောက်သည် သုံး မိနစ်မှ လေး မိနစ်ထက်ပို၍ အောက်ဆီဂျင် ပြတ်လပ်သွားပါက နာဗ်ဆဲလ်များ သေဆုံးနိုင်ပြီး ၎င်းတို့ထိန်းချုပ်ထားသော လုပ်ငန်းဆောင်တာများ ချို့ယွင်းသွားနိုင်ပါသည်။

ဦးနှောက်အတွင်း သွေးယိုစီးမှု၏ ပြင်းထန်မှုနှင့် နောက်ဆက်တွဲ အကျိုးဆက်များကို ဖြစ်ပွားရသည့် အကြောင်းရင်း၊ ဦးခေါင်းခွံအတွင်း သွေးယိုသည့်နေရာ၊ သွေးယိုစိမ့်မှု ပမာဏ၊ သွေးစတင်ယိုစီးချိန်မှ ဆေးကုသမှု ခံယူချိန်အထိ ကြာမြင့်ချိန်၊ လူနာ၏ အသက်နှင့် အထွေထွေ ကျန်းမာရေး အခြေအနေ စသည့် အချက်များအပေါ် မူတည်၍ ဆုံးဖြတ်ပါသည်။ ဦးနှောက်ဆဲလ်များသည် တစ်ကြိမ် ပျက်စီး သို့မဟုတ် သေဆုံးသွားပါက ပြန်လည် ဖြစ်ပေါ်လာနိုင်ခြင်း မရှိသည်ကို သတိပြုရန် အရေးကြီးပါသည်။ ထို့ကြောင့် ဦးနှောက်အတွင်း သွေးယိုစီးခြင်းမှ ဖြစ်ပေါ်လာသော ပျက်စီးမှုများသည် ကြီးမားနိုင်ပြီး ရုပ်ပိုင်းဆိုင်ရာ၊ သိမြင်နားလည်မှုဆိုင်ရာနှင့် လုပ်ငန်းဆောင်တာဆိုင်ရာ စွမ်းဆောင်ရည်များကို ချို့ယွင်းစေနိုင်ပါသည်။ ဦးနှောက်အတွင်း သွေးခဲခြင်းကို အရေးပေါ် အခြေအနေအဖြစ် ကုသရပါမည်။

ရောဂါလက္ခဏာများ

ဦးနှောက်အတွင်း သွေးခဲခြင်း၏ လက္ခဏာများသည် ထိခိုက်မိသော ဦးနှောက်နေရာအပေါ် မူတည်၍ ကွဲပြားပါသည်။ ဖြစ်ရပ်အများစုတွင် လက္ခဏာများသည် ဦးခေါင်းထိခိုက်မိပြီးချင်း ချက်ချင်း ပေါ်လာနိုင်သကဲ့သို့ ရက်သတ္တပတ်များ သို့မဟုတ် လပေါင်းများစွာ ကြာမှလည်း ပေါ်လာနိုင်ပါသည်။ ဦးခေါင်းထိခိုက်မိပြီးနောက် ခဏတာ ပုံမှန်အတိုင်း ပြန်ဖြစ်သွားသည့် အချိန်ကာလလည်း ရှိနိုင်ပါသည်။

ဦးနှောက်အပေါ် ဖိအားသည် အချိန်ကြာလာသည်နှင့်အမျှ တိုးလာသောအခါ ကနဦး လက္ခဏာများ ပေါ်လာနိုင်ပါသည်။ သို့သော် ဦးနှောက်အတွင်း သို့မဟုတ် ဦးနှောက်နှင့် ဦးခေါင်းခွံကြား ကျဉ်းမြောင်းသော နေရာလွတ်တွင် သွေးများ ပိုမိုပြည့်လာသည်နှင့်အမျှ အခြားသော လက္ခဏာများ ပေါ်ပေါက်လာနိုင်ပါသည်။

ဦးနှောက်အတွင်း သွေးခဲခြင်းတွင် ယေဘုယျအားဖြင့် အောက်ပါ လက္ခဏာများ ရှိနိုင်ပါသည်—

• ပြင်းထန်သော ခေါင်းကိုက်ခြင်း သို့မဟုတ် အချိန်ကြာလာသည်နှင့်အမျှ ပိုမိုဆိုးရွားလာသော ခေါင်းကိုက်ခြင်း
• အန်ခြင်းနှင့် ပျို့ခြင်း
• မျက်နှာ၊ လက် သို့မဟုတ် ခြေထောက်များ ထုံကျင်ခြင်း၊ ကျဉ်ခြင်း သို့မဟုတ် လေဖြတ်ခြင်း (များသောအားဖြင့် ခန္ဓာကိုယ်၏ တစ်ခြမ်းတည်းတွင် ဖြစ်တတ်ပါသည်)
• ငိုက်မြည်းခြင်းနှင့် သတိလစ်ခြင်း ပိုမိုဆိုးရွားလာခြင်း
• မူးဝေခြင်း သို့မဟုတ် စိတ်ရှုပ်ထွေးခြင်း
• မျက်သူငယ်အိမ် အရွယ်အစား မညီခြင်း
• စကားပြော ပုံမှန်မဟုတ်ခြင်း သို့မဟုတ် စကားဗလုံးဗထွေးဖြစ်ခြင်း
• နုန်းချိခြင်း
• တက်ခြင်း
• သတိမေ့သွားခြင်း
• အသက်ရှူရခက်ခဲခြင်းနှင့် နှလုံးခုန်နှုန်း မမှန်ခြင်း
• အမြင်အာရုံ ဆုံးရှုံးခြင်း သို့မဟုတ် ကြည့်ရခက်ခဲခြင်း
• ဟန်ချက်ညီမှု သို့မဟုတ် ပေါင်းစပ်ညှိနှိုင်းမှုဆိုင်ရာ ပြဿနာများ

ဦးနှောက်အတွင်း သွေးခဲခြင်းသည် ချက်ချင်း အာရုံစိုက်ရန် လိုအပ်သော ပြင်းထန်သည့် ဆေးဘက်ဆိုင်ရာ အခြေအနေတစ်ခု ဖြစ်နိုင်ပါသည်။ အကယ်၍ သင်သည် ဦးခေါင်းကို ရိုက်မိပြီးနောက် သတိလစ်ခြင်း၊ အမြဲတမ်း ခေါင်းကိုက်ခြင်း၊ ပျို့အန်ခြင်း၊ အားနည်းခြင်း၊ အမြင်အာရုံ ဝေဝါးခြင်း သို့မဟုတ် ယိုင်နဲ့ခြင်း စသည့် လက္ခဏာတစ်ရပ်ရပ် ခံစားရပါက ဆေးကုသမှု ချက်ချင်း ခံယူပါ။

သိသာထင်ရှားသော လက္ခဏာများ မရှိပါက ထိုသူ၏ ရုပ်ပိုင်း၊ စိတ်ပိုင်း သို့မဟုတ် စိတ်ခံစားမှုဆိုင်ရာ ပြောင်းလဲမှုများကို တစ်ဦးဦးက စောင့်ကြည့်ပေးရန် အကြံပြုပါသည်။ တစ်ခါတစ်ရံတွင် ဦးခေါင်းထိခိုက်မှုကြောင့် ဖြစ်ပေါ်လာသော မှတ်ဉာဏ်ချို့ယွင်းမှုကြောင့် ထိုသူသည် ထိခိုက်မိသည်ကို မေ့သွားနိုင်ပါသည်။ အကယ်၍ တစ်ဦးတစ်ယောက်သည် အစပိုင်းတွင် ပုံမှန်ဟု ထင်ရသော်လည်း ရုတ်တရက် သတိလစ်သွားပါက ၎င်းတို့သည် အရေးပေါ် ဆေးကုသမှု လိုအပ်ပါသည်။ ရောဂါကို စောစီးစွာ ကုသနိုင်လေ အသက်ရှင်နိုင်ခြေ ပိုများလေ ဖြစ်ပါသည်။

ဖြစ်ပွားရခြင်း အကြောင်းရင်းများ

ဦးနှောက်အတွင်း သွေးယိုစီးခြင်းတွင် အကြောင်းရင်း အများအပြား ရှိပြီး များသောအားဖြင့် ချော်လဲခြင်း၊ မော်တော်ကား မတော်တဆဖြစ်ခြင်း၊ အားကစားလုပ်ရင်း ထိခိုက်ခြင်း သို့မဟုတ် ဦးခေါင်းကို အခြားနည်းလမ်းဖြင့် ထိခိုက်မိခြင်းတို့ကြောင့် ဦးခေါင်းဒဏ်ရာ ရရှိခြင်းတို့ ပါဝင်ပါသည်။ သွေးတိုးခြင်းသည် သွေးကြောနံရံများကို အားနည်းစေပြီး ယိုစိမ့်ခြင်း သို့မဟုတ် ပေါက်ထွက်ခြင်းတို့ကို ဖြစ်စေနိုင်သဖြင့် ဦးနှောက်အတွင်း သွေးယိုစီးမှုကို ဖြစ်စေနိုင်ပါသည်။

အပြင်ပန်းတွင် ပြတ်ရှဒဏ်ရာ၊ အညိုအမည်းစွဲခြင်း သို့မဟုတ် အခြားမြင်သာသော ပျက်စီးမှုများ မရှိသော်လည်း ပြင်းထန်သော ဒဏ်ရာ ရရှိနိုင်ပါသည်။ အသက်ကြီးသူများတွင် သာမန်ဦးခေါင်းထိခိုက်မှုလေးကပင် သွေးခဲခြင်းကို ဖြစ်စေနိုင်ပါသည်။ အထူးသဖြင့် သွေးကျဲဆေး သို့မဟုတ် အက်စပရင်ကဲ့သို့သော ဆေးဝါးများ သုံးစွဲနေသူများတွင် ပိုမိုဖြစ်ပွားနိုင်ပါသည်။

ဦးနှောက်အတွင်း သွေးခဲခြင်းကို ပိုမိုနားလည်စေရန် အမျိုးအစား အမျိုးမျိုးကို ဦးစွာ သိရှိရန် လိုအပ်ပါသည်။ သွေးခဲခြင်းကို သုံး မျိုး ခွဲခြားထားပါသည်— ဦးနှောက်အမြှေးပါးအောက် သွေးခဲခြင်း၊ ဦးနှောက်အမြှေးပါးအပေါ် သွေးခဲခြင်းနှင့် ဦးနှောက်တစ်ရှူးအတွင်း သွေးခဲခြင်းတို့ ဖြစ်ပါသည်။

• ဦးနှောက်အမြှေးပါးအောက် သွေးခဲခြင်း။ ။ ဦးနှောက်အမြှေးပါးအောက် သွေးခဲခြင်းဆိုသည်မှာ ဦးနှောက်နှင့် အပြင်ဘက်ဆုံး အလွှာကြားတွင် သွေးကြောများ ပေါက်ထွက်သည့် အခြေအနေ ဖြစ်ပါသည်။ ယိုစိမ့်လာသော သွေးများသည် ဦးနှောက်တစ်ရှူးအပေါ် ဖိအားပေးနိုင်သော သွေးခဲမှုကို ဖြစ်ပေါ်စေပြီး ကုသမှုမခံယူပါက အသက်ရှူရခက်ခဲခြင်း၊ လေဖြတ်ခြင်းနှင့် သေဆုံးခြင်းတို့အထိ ဖြစ်စေနိုင်ပါသည်။ ဦးနှောက် ရေရှည်ပျက်စီးမှုကို ရှောင်ရှားရန် လက္ခဏာများ ပေါ်လာသည်နှင့် ဆေးကုသမှု ခံယူသင့်ပါသည်။ ဦးနှောက်အမြှေးပါးအောက် သွေးခဲနိုင်ခြေသည် အသက်ကြီးသူများ၊ အထူးသဖြင့် သွေးကျဲဆေး မှန်မှန်သောက်သူများ သို့မဟုတ် အရက်အလွန်အကျွံ သောက်သူများတွင် ပိုမိုမြင့်မားပါသည်။ဦးနှောက်အမြှေးပါးအောက် သွေးခဲခြင်းကို သုံး မျိုး ခွဲခြားထားပါသည်—
• ပြင်းထန်အဆင့်။ ။ ပြင်းထန်အဆင့် သွေးခဲခြင်းသည် အန္တရာယ်အရှိဆုံး အမျိုးအစားဖြစ်ပြီး လက္ခဏာများသည် ပြင်းထန်ကာ ဦးခေါင်းထိခိုက်ပြီးချင်း ချက်ချင်း ပေါ်လာတတ်ပါသည်။ လျင်မြန်စွာ ရောဂါရှာဖွေ ကုသခြင်း မပြုပါက သတိလစ်ခြင်း၊ လေဖြတ်ခြင်း သို့မဟုတ် သေဆုံးခြင်းတို့ ဖြစ်နိုင်ပါသည်။
• အသင့်အတင့်အဆင့်။ ။ အသင့်အတင့်အဆင့် လက္ခဏာများသည် များသောအားဖြင့် ထိခိုက်မိပြီး နာရီပိုင်းမှ ရက်ပိုင်းအတွင်း ပေါ်လာတတ်ပြီး ဦးနှောက်တုန်ခါမှုနှင့်အတူ ဖြစ်ပွားနိုင်ပါသည်။
• နာတာရှည်အဆင့်။ ။ နာတာရှည် သွေးခဲခြင်းသည် အသက်ကြီးသူများတွင် ပိုမိုအဖြစ်များပြီး သွေးယိုစီးမှုသည် နှေးကွေးသဖြင့် ရက်သတ္တပတ်များ သို့မဟုတ် လပေါင်းများစွာ ကြာမှ လက္ခဏာများ ပေါ်လာနိုင်ပါသည်။ ဤအမျိုးအစားသည် သာမန်ဦးခေါင်းထိခိုက်မှုများမှပင် ဖြစ်နိုင်ပြီး ပြောင်းလဲမှုများသည် သိသာခြင်းမရှိဘဲ အလွန်နှေးကွေးသဖြင့် လူနာကိုယ်တိုင် သို့မဟုတ် မိတ်ဆွေ သူငယ်ချင်းများနှင့် မိသားစုဝင်များက သတိမထားမိနိုင်ပါ။
• ဦးနှောက်အမြှေးပါးအပေါ် သွေးခဲခြင်း။ ။ ဤအမျိုးအစားသည် ဦးနှောက်ကို ဖုံးအုပ်ထားသော အလွှာ၏ အပြင်ဘက်မျက်နှာပြင်နှင့် ဦးခေါင်းခွံကြားတွင် သွေးကြောပေါက်ထွက်သောအခါ ဖြစ်ပေါ်ပါသည်။ ထိုသို့ဖြစ်သောအခါ သွေးများသည် ပေါက်ထွက်နေသော သွေးကြောမှ ထွက်လာပြီး အလွှာနှင့် ဦးခေါင်းခွံကြားတွင် စုပုံကာ ဦးနှောက်တစ်ရှူးကို ဖိအားပေးသည့် အလုံးအခဲတစ်ခု ဖြစ်ပေါ်စေပါသည်။ ထိခိုက်ဒဏ်ရာရခြင်းသည် ဤအမျိုးအစား ဖြစ်ပွားရခြင်း၏ အဖြစ်အများဆုံး အကြောင်းရင်း ဖြစ်ပါသည်။ အချို့သူများသည် ထိခိုက်မိပြီးနောက် သတိရနေနိုင်သော်လည်း အများစုမှာ ထိခိုက်မိပြီးနောက် ချက်ချင်း ငိုက်မြည်းခြင်း သို့မဟုတ် သတိလစ်ခြင်းများ ဖြစ်တတ်ပါသည်။ အကယ်၍ ဦးနှောက်အတွင်းရှိ သွေးလွှတ်ကြောတစ်ခု ထိခိုက်ပါက အသက်အန္တရာယ် ရှိနိုင်သဖြင့် အရေးပေါ် ဆေးကုသမှု လိုအပ်ပါသည်။
• ဦးနှောက်တစ်ရှူးအတွင်း သွေးခဲခြင်း။ ။ ဤအမျိုးအစားသည် ဦးနှောက်တစ်ရှူးများအတွင်း သွေးများ စုပုံလာသောအခါ ဖြစ်ပေါ်ပါသည်။ ၎င်းကို ဦးခေါင်းထိခိုက်ဒဏ်ရာရခြင်း၊ သွေးတိုးခြင်း၊ သွေးကြောဖောင်းခြင်း၊ သွေးလွှတ်ကြောနှင့် သွေးပြန်ကြောကြား ဆက်သွယ်မှုဆိုင်ရာ မွေးရာပါ ချို့ယွင်းချက်များ သို့မဟုတ် အကျိတ်များ စသည့် အချက်အမျိုးမျိုးကြောင့် ဖြစ်စေနိုင်ပါသည်။ အချို့သော ရောဂါများသည်လည်း ဦးနှောက်အတွင်း အလိုအလျောက် သွေးယိုစီးမှုကို ဖြစ်စေနိုင်ပါသည်။ ဦးခေါင်းထိခိုက်ဒဏ်ရာ ရရှိသည့် အခြေအနေများတွင် ဦးနှောက်တစ်ရှူးအတွင်း သွေးခဲခြင်းများစွာ ဖြစ်ပေါ်နိုင်ပါသည်။