သားအိမ်ခေါင်းမလုံခြင်း

ရောဂါရှာဖွေခြင်း

ကိုယ်ဝန်မဆောင်မီအချိန်တွင် သားအိမ်ခေါင်းမလုံခြင်း ရှိ၊ မရှိ ကြိုတင်ခန့်မှန်းနိုင်သော ယုံကြည်စိတ်ချရသည့် စစ်ဆေးမှုမျိုး မရှိပါသဖြင့် သားအိမ်ခေါင်းမလုံခြင်းအတွက် စစ်ဆေးမှုများကို ကိုယ်ဝန်ဆောင်နေစဉ်အတွင်းသာ လုပ်ဆောင်နိုင်သောကြောင့် အထူးသဖြင့် ပထမဆုံးအကြိမ် ကိုယ်ဝန်ဆောင်သူများအတွက် စိန်ခေါ်မှုများ ရှိနေပါသည်။ ဤရောဂါကို အဖြေရှာနိုင်ရန် သင့်ဆရာဝန် သို့မဟုတ် ကျန်းမာရေးစောင့်ရှောက်မှုအဖွဲ့က သင့်တွင် ခံစားရသော လက္ခဏာများနှင့် ဆေးမှတ်တမ်းများအကြောင်း မေးမြန်းပါလိမ့်မည်။ ဒုတိယ သုံးလပတ်အတွင်း ကိုယ်ဝန်ပျက်ကျဖူးသည့် ရာဇဝင် သို့မဟုတ် အချိန်မတိုင်မီ ကလေးမွေးဖွားဖူးသည့် ရာဇဝင်များအပြင် သင်ပြုလုပ်ခဲ့ဖူးသော သားအိမ်ခေါင်းဆိုင်ရာ ကုသမှုများရှိပါက ပွင့်ပွင့်လင်းလင်း ပြောပြရန် အရေးကြီးပါသည်။ အောက်ပါအချက်များရှိနေပါက သားအိမ်ခေါင်းမလုံခြင်းဟု သတ်မှတ်နိုင်ပါသည်။

• ယခင်ကိုယ်ဝန်ဆောင်စဉ်က နာကျင်မှုမရှိဘဲ သားအိမ်ခေါင်းပွင့်လာခြင်းနှင့် ဒုတိယ သုံးလပတ်အတွင်း ကလေးမွေးဖွားဖူးသည့် ရာဇဝင်ရှိခြင်း။
• ကိုယ်ဝန် ၂၄ ပတ်မတိုင်မီ သားအိမ်ခေါင်း သိသိသာသာပွင့်လာခြင်းနှင့် ပါးလွှာလာခြင်းတို့ ရှိနေခြင်း ဖြစ်ပါသည်။ သားအိမ်ခေါင်းပါးလွှာခြင်းဆိုသည်မှာ သားအိမ်ခေါင်း ပျော့ပြောင်းပြီး ပါးသွားခြင်းကို ဆိုလိုပါသည်။ ထိုပြောင်းလဲမှုများသည် နာကျင်စွာ သားအိမ်ညှစ်ခြင်းမရှိဘဲ ဖြစ်ပေါ်နိုင်ပြီး မိန်းမကိုယ်မှ သွေးဆင်းခြင်း၊ ပိုးဝင်ခြင်း သို့မဟုတ် ရေမြွှာပေါက်ခြင်းတို့နှင့်အတူ ဖြစ်ပွားနိုင်ပါသည်။

ဒုတိယ သုံးလပတ်အတွင်း သားအိမ်ခေါင်းမလုံခြင်းကို အဖြေရှာရန် အောက်ပါတို့ ပါဝင်နိုင်ပါသည်။

• သားဖွားမီးယပ်စစ်ဆေးခြင်း။ ။ ဆရာဝန်သည် သားအိမ်ခေါင်းပေါက်မှတစ်ဆင့် ရေမြွှာအိတ်ကို စမ်းသပ်၍ သိနိုင်ခြင်း ရှိ၊ မရှိ စစ်ဆေးပါလိမ့်မည်။ အကယ်၍ ရေမြွှာအိတ်နံရံသည် သားအိမ်ခေါင်းလမ်းကြောင်း သို့မဟုတ် မိန်းမကိုယ်အတွင်းသို့ ရောက်ရှိနေပါက သားအိမ်ခေါင်း စတင်ပွင့်နေပြီဖြစ်ကြောင်း ဖော်ပြနေပါသည်။ လိုအပ်ပါက ဆရာဝန်သည် သားအိမ်ညှစ်ခြင်းရှိ၊ မရှိကိုလည်း စောင့်ကြည့်နိုင်ပါသည်။
• ဓာတ်ခွဲခန်းစစ်ဆေးမှုများ။ ။ ရေမြွှာအိတ်သည် သားအိမ်ခေါင်းအပြင်ဘက်သို့ ရောက်ရှိနေသည့် အခြေအနေများတွင် ပိုးဝင်ခြင်း ရှိ၊ မရှိ သိနိုင်ရန် ထပ်မံစစ်ဆေးမှုများ လိုအပ်နိုင်ပါသည်။ ၎င်းတွင် ရေမြွှာရည်ဖောက်ထုတ်စစ်ဆေးခြင်းဟုခေါ်သော လုပ်ငန်းစဉ်မှတစ်ဆင့် ရေမြွှာရည်နမူနာယူ၍ ရေမြွှာအိတ်နှင့် ရေမြွှာရည်အတွင်း ပိုးဝင်ခြင်း ရှိ၊ မရှိ စစ်ဆေးခြင်း ပါဝင်နိုင်ပါသည်။
• မိန်းမကိုယ်မှတစ်ဆင့် အာထရာဆောင်း ရိုက်ခြင်း။ ။ ၎င်းတွင် ပါးလွှာသော ကိရိယာငယ်တစ်ခုကို မိန်းမကိုယ်အတွင်း ထည့်သွင်း၍ မျက်နှာပြင်ပေါ်တွင် ပုံရိပ်များဖော်ထုတ်ခြင်း ပါဝင်ပါသည်။ ထိုနည်းလမ်းသည် သားအိမ်ခေါင်း၏ အလျားကို တိုင်းတာရန်နှင့် အပြင်သို့ ထွက်နေသော တစ်ရှူးများ ရှိ၊ မရှိ သိနိုင်ရန် ကူညီပေးပါသည်။

လက်ရှိအချိန်တွင် ကိုယ်ဝန်မဆောင်မီ သားအိမ်ခေါင်းမလုံနိုင်ခြေကို ကြိုတင်ခန့်မှန်းနိုင်သော ယုံကြည်စိတ်ချရသည့် စစ်ဆေးမှုများ မရှိသေးပါ။ သို့သော် ကိုယ်ဝန်မဆောင်မီ လုပ်ဆောင်သော အောထရာဆောင်း သို့မဟုတ် သံလိုက်ဓာတ်မှန်ကဲ့သို့သော အချို့သော စစ်ဆေးမှုများသည် သားအိမ်ခေါင်းမလုံခြင်းကို ဖြစ်စေနိုင်သည့် မွေးရာပါ သားအိမ်ပြဿနာများကို ရှာဖွေဖော်ထုတ်ရန် အထောက်အကူဖြစ်နိုင်ပါသည်။

ကုသခြင်း

သားအိမ်ခေါင်းမလုံခြင်းအတွက် ကုသမှုနှင့် စီမံခန့်ခွဲမှုဆိုင်ရာ နည်းလမ်းအမျိုးမျိုးတွင် အောက်ပါတို့ ပါဝင်ပါသည်။

• ပရိုဂျက်စတီရုန်း ဟော်မုန်းဖြည့်စွက်ခြင်း။ ။ အကယ်၍ သင့်တွင် အချိန်မတိုင်မီ မွေးဖွားဖူးသည့် ရာဇဝင်မရှိသော်လည်း သားအိမ်ခေါင်းတိုနေပါက မိန်းမကိုယ်မှတစ်ဆင့် ပရိုဂျက်စတီရုန်းဆေး သုံးစွဲခြင်းက အချိန်မတိုင်မီ မွေးဖွားနိုင်ခြေကို လျှော့ချပေးနိုင်ပါသည်။ ဤဆေးကို ဂျဲလ် သို့မဟုတ် မိန်းမကိုယ်ထည့်ဆေးပုံစံဖြင့် ရရှိနိုင်ပြီး နေ့စဉ် မိန်းမကိုယ်အတွင်း ထည့်သွင်းအသုံးပြုရပါသည်။
• အောထရာဆောင်း အကြိမ်ကြိမ်ရိုက်ခြင်း။ ။ အချိန်မတိုင်မီ စောစီးစွာ မွေးဖွားဖူးသည့် ရာဇဝင်ရှိသူများ သို့မဟုတ် သားအိမ်ခေါင်းမလုံနိုင်ခြေ မြင့်မားသူများသည် သားအိမ်ခေါင်းအလျားကို အောထရာဆောင်း ဖြင့် မကြာခဏ စောင့်ကြည့်စစ်ဆေးမှု ခံယူရနိုင်ပါသည်။ ဤစောင့်ကြည့်စစ်ဆေးမှုကို ပုံမှန်အားဖြင့် ကိုယ်ဝန် ၁၆ ပတ်မှ ၂၄ ပတ်အတွင်း နှစ်ပတ်တစ်ကြိမ် လုပ်ဆောင်လေ့ရှိပါသည်။ အကယ်၍ သားအိမ်ခေါင်းပွင့်လာခြင်း သို့မဟုတ် တိုလာခြင်း လက္ခဏာများ တွေ့ရှိပါက သားအိမ်ခေါင်းချုပ်ခြင်းကို အကြံပြုနိုင်ပါသည်။
• သားအိမ်ခေါင်းချုပ်ခြင်း။ ။ ဤလုပ်ငန်းစဉ်တွင် သားအိမ်ခေါင်းကို လုံအောင် ပြန်လည်ချုပ်ပေးခြင်း ပါဝင်ပါသည်။ ချုပ်ရိုးများကို ပုံမှန်အားဖြင့် ကိုယ်ဝန်နောက်ဆုံးလတွင် သို့မဟုတ် ကလေးမွေးခါနီးအချိန်တွင် ပြန်လည်ဖြုတ်ပေးလေ့ရှိပါသည်။ အကယ်၍ ကိုယ်ဝန်ဆောင်သည်မှာ ၂၄ ပတ်မပြည့်သေးဘဲ စောစီးစွာ မွေးဖွားဖူးသည့် ရာဇဝင်ရှိပြီး အောထရာဆောင်း တွင် သားအိမ်ခေါင်း ပြောင်းလဲမှုများ တွေ့ရှိပါက သားအိမ်ခေါင်းချုပ်ခြင်းကို စဉ်းစားနိုင်ပါသည်။ အချို့သောအခြေအနေများတွင် သားအိမ်ခေါင်းပွင့်သည့် လက္ခဏာများ မပြမီ ကြိုတင်ကာကွယ်သောအားဖြင့် သားအိမ်ခေါင်းချုပ်ပေးခြင်းကိုလည်း ပြုလုပ်လေ့ရှိပါသည်။ ၎င်းကို ကိုယ်ဝန် ၁၄ ပတ်မတိုင်မီတွင် လုပ်ဆောင်လေ့ရှိပါသည်။ သို့သော် အချိန်မတိုင်မီ မွေးဖွားနိုင်ခြေရှိသူတိုင်းအတွက် အထူးသဖြင့် အမြွှာကိုယ်ဝန်ဆောင်ထားသူများအတွက် ဤနည်းလမ်းကို အကြံမပြုပါ။ သားအိမ်ခေါင်းချုပ်ခြင်း၏ ကောင်းကျိုးနှင့် ဆိုးကျိုးများကို ဆရာဝန်နှင့် ဆွေးနွေးတိုင်ပင်ရန် အလွန်အရေးကြီးပါသည်။
• မိန်းမကိုယ်ထောက်ကိရိယာ။ ။ သားအိမ်ကို ထောက်ပံ့ပေးရန်နှင့် နေရာတကျရှိနေစေရန် မိန်းမကိုယ်အတွင်းသို့ ကိရိယာတစ်ခု ထည့်သွင်းခြင်းဖြစ်ပြီး ၎င်းသည် သားအိမ်ခေါင်းအပေါ် ကျရောက်သော ဖိအားကို လျှော့ချပေးနိုင်ပါသည်။ သို့သော် သားအိမ်ခေါင်းမလုံခြင်းကို ကုသရာတွင် ဤကိရိယာ၏ ထိရောက်မှုကို အတည်ပြုနိုင်ရန် နောက်ထပ် သုတေသနပြုချက်များစွာ လိုအပ်ပါသည်။

Doctors who treat this condition