ဘိုကင်တင်ရန်
ဆရာ၀◌န်နဲ့တွေ့ဆုံရန်အကျဉ်းချုပ်အကြောင်းအရာ
အူသိမ်၏ အစိတ်အပိုင်းတစ်ခုကဲ့သို့သော တစ်ရှူးများသည် ဝမ်းဗိုက်ကြွက်သားရှိ အားနည်းသောနေရာမှတစ်ဆင့် တိုးထွက်လာသောအခါ ပေါင်ခြံအူကျွံခြင်း ဖြစ်ပေါ်လာပါသည်။ သင် ချောင်းဆိုးခြင်း၊ ကိုယ်ကိုကိုင်းညွတ်ခြင်း သို့မဟုတ် လေးလံသောအရာများကို မခြင်းတို့ ပြုလုပ်သည့်အခါ ဖောင်းကြွနေသောနေရာတွင် နာကျင်မှု ဖြစ်ပေါ်နိုင်ပါသည်။ သို့သော်လည်း အူကျွံခြင်း အများစုမှာ နာကျင်မှု မရှိတတ်ပါ။
ပေါင်ခြံအူကျွံခြင်းသည် အန္တရာယ်မရှိသော်လည်း ၎င်းဘာသာ ပြန်မကောင်းပါက အသက်အန္တရာယ်ရှိသော နောက်ဆက်တွဲပြဿနာများ ဖြစ်လာနိုင်ပါသည်။ အကယ်၍ အူကျွံသောနေရာမှာ နာကျင်လာခြင်း သို့မဟုတ် ကြီးထွားလာခြင်းရှိပါက ဆရာဝန်က ခွဲစိတ်ရန် အကြံပြုနိုင်ပါသည်။ ပေါင်ခြံအူကျွံခြင်းကို ခွဲစိတ်ကုသခြင်းဖြင့် ပြန်လည်ပြုပြင်နိုင်ပါသည်။
ရောဂါလက္ခဏာများ
ပေါင်ခြံအူကျွံခြင်း၏ လက္ခဏာများတွင် အောက်ပါတို့ ပါဝင်ပါသည်-
- ဆီးခုံအရိုးပေါ်တွင် ဖောင်းကြွနေခြင်း (မတ်တပ်ရပ်နေချိန်၊ အထူးသဖြင့် ချောင်းဆိုးခြင်း သို့မဟုတ် ညှစ်ခြင်းတို့ ပြုလုပ်ချိန်တွင် ပိုမိုထင်ရှားလာတတ်ပါသည်)
- ဖောင်းကြွနေသောနေရာ အနီးတစ်ဝိုက်တွင် ပူရှိန်းရှိန်းဖြစ်ခြင်း သို့မဟုတ် နာကျင်ခြင်း
- ကိုယ်ကိုကိုင်းခြင်း၊ ချောင်းဆိုးခြင်း သို့မဟုတ် အလေးမခြင်းတို့ ပြုလုပ်စဉ် ပေါင်ခြံတွင် နာကျင်ခြင်း သို့မဟုတ် မသက်မသာဖြစ်ခြင်း
- ပေါင်ခြံတွင် လေးလံနေခြင်း သို့မဟုတ် တစ်ခုခုက ဆွဲထားသကဲ့သို့ ခံစားရခြင်း
- ပေါင်ခြံတွင် ဖိအားတစ်ခုခု ခံစားရခြင်း သို့မဟုတ် အားနည်းနေသကဲ့သို့ ခံစားရခြင်း
- တိုးထွက်နေသော အူမှာ ဝှေးစေ့အိတ်အတွင်းသို့ ကျဆင်းသွားသောအခါ ဝှေးစေ့တစ်ဝိုက်တွင် နာကျင်ခြင်းနှင့် ရောင်ရမ်းခြင်းတို့ တစ်ခါတစ်ရံ ဖြစ်ပေါ်နိုင်ပါသည်။
ကလေးငယ်များတွင် တွေ့ရသော လက္ခဏာများ
မွေးရာပါ ဝမ်းဗိုက်နံရံ အားနည်းခြင်းကြောင့် မွေးကင်းစကလေးများနှင့် ကလေးငယ်များတွင် ပေါင်ခြံအူကျွံခြင်း ဖြစ်ပွားတတ်ပါသည်။ အချို့သောအခြေအနေများတွင် ကလေးငိုခြင်း၊ ချောင်းဆိုးခြင်း သို့မဟုတ် ဝမ်းသွားရန် အားစိုက်ရခြင်းတို့ ရှိမှသာ အူကျွံခြင်းကို မြင်တွေ့ရတတ်ပါသည်။ အသက်ကြီးသော ကလေးများတွင်မူ ချောင်းဆိုးခြင်း၊ ဝမ်းသွားစဉ် အားစိုက်ခြင်း သို့မဟုတ် အချိန်ကြာမြင့်စွာ မတ်တပ်ရပ်နေခြင်းတို့ ပြုလုပ်သည့်အခါ အူကျွံခြင်းမှာ ပိုမိုထင်ရှားလာနိုင်ပါသည်။
သတိပြုရန် လက္ခဏာများ
အကယ်၍ သင်သည် အူကျွံနေသောနေရာကို ပြန်၍ တွန်းထည့်၍ မရပါက အူလမ်းကြောင်းမှာ ဝမ်းဗိုက်နံရံတွင် တစ်ဆို့သွားနိုင်ပါသည်။ ထိုသို့ တစ်ဆို့နေသော အူသည် သွေးစီးဆင်းမှု ပြတ်တောက်သွားနိုင်ပြီး ၎င်းကို အရေးပေါ်အခြေအနေ ဟု ခေါ်ဆိုပါသည်။ အကယ်၍ အဆိုပါ အခြေအနေကို မကုသပါက အသက်အန္တရာယ် ရှိနိုင်ပါသည်။
အရေးပေါ် ပေါင်ခြံအူကျွံခြင်း၏ သတိပေးလက္ခဏာများတွင် အောက်ပါတို့ ပါဝင်ပါသည်-
- ရုတ်တရက် ပြင်းထန်စွာ နာကျင်လာပြီး အချိန်တိုအတွင်း ပိုမိုဆိုးရွားလာခြင်း
- ဝမ်းသွား၍မရခြင်း သို့မဟုတ် လေမလည်ခြင်း
- အူကျွံ၍ ဖောင်းနေသောနေရာမှာ အရောင်ရင့်လာခြင်း၊ ခရမ်းရောင် သို့မဟုတ် နီမြန်းလာခြင်း
- ပျို့ခြင်း၊ အန်ခြင်း သို့မဟုတ် နှစ်မျိုးလုံး ဖြစ်ခြင်း
- ဖျားခြင်း
အကယ်၍ အူကျွံနေသောနေရာမှာ နီမြန်းခြင်း၊ ခရမ်းရောင် သို့မဟုတ် အရောင်ရင့်လာခြင်း သို့မဟုတ် အရေးပေါ်အခြေအနေ၏ အခြားလက္ခဏာများကို သတိပြုမိပါက အရေးပေါ် ဆေးကုသမှု ခံယူပါ။
အကယ်၍ သင့်ဆီးခုံအရိုး၏ ဘေးတစ်ဖက်တစ်ချက်တွင် နာကျင်သော သို့မဟုတ် ထင်ရှားသော ဖောင်းကြွမှုကို တွေ့ရှိပါက ဆရာဝန်ထံ သွားရောက်ပြသပါ။ မတ်တပ်ရပ်လိုက်ခြင်းက ဖောင်းကြွမှုကို ပိုမိုထင်ရှားစေမည်ဖြစ်ပြီး ထိုနေရာပေါ်သို့ လက်တင်ကြည့်ပါကလည်း စမ်းသပ်သိရှိနိုင်ပါသည်။
အကြောင်းရင်းများ
အချို့သော ပေါင်ခြံအူကျွံခြင်းများ၏ အကြောင်းရင်းကို တိကျစွာ မသိရှိရပါ။ အခြားအခြေအနေများတွင် အောက်ပါတို့ကြောင့် ဖြစ်ပွားနိုင်ပါသည်-
- ကိုယ်ဝန်ဆောင်ခြင်း
- ပြင်းထန်သော လှုပ်ရှားမှုများ ပြုလုပ်ခြင်း
- နာတာရှည် ချောင်းဆိုးခြင်း သို့မဟုတ် နှာချေခြင်း
- ဝမ်းဗိုက်အတွင်း ဖိအားများလာခြင်း
- ဆီးသွားခြင်း သို့မဟုတ် ဝမ်းသွားခြင်းတွင် အလွန်အမင်း ညှစ်ရခြင်း
- အချိန်ကြာမြင့်စွာ မတ်တပ်ရပ်ရသော အလုပ်များ လုပ်ကိုင်ခြင်း
- အသက်ကြီးလာခြင်းကြောင့် တစ်ရှူးများ အားနည်းလာခြင်း
- မွေးရာပါ ဝမ်းဗိုက်နံရံ အားနည်းခြင်း
- မျိုးဗီဇအရ တစ်ရှူးများ၏ ကြံ့ခိုင်မှု မတူညီခြင်း
အခြေအနေအတော်များများတွင် မွေးရာပါ ဝမ်းဗိုက်ကြွက်သားနံရံ အားနည်းခြင်းကြောင့် ပေါင်ခြံအူကျွံခြင်း ဖြစ်ပွားတတ်ပါသည်။ အခြားသော အူကျွံခြင်းများမှာမူ အသက်ကြီးလာခြင်း၊ ပြင်းထန်စွာ လေ့ကျင့်ခန်းလုပ်ခြင်း သို့မဟုတ် ဆေးလိပ်သောက်ခြင်းကြောင့် ချောင်းဆိုးခြင်းတို့ကြောင့် ကြွက်သားများ အားနည်းလာကာ နောက်ပိုင်းမှ ဖြစ်ပေါ်လာခြင်း ဖြစ်ပါသည်။
ထို့အပြင် ထိခိုက်ဒဏ်ရာရခြင်း သို့မဟုတ် ဝမ်းဗိုက်ခွဲစိတ်မှု ပြုလုပ်ပြီးနောက်တွင်လည်း ဝမ်းဗိုက်နံရံများ အားနည်းသွားနိုင်ပါသည်။
အမျိုးသားများတွင်မူ ဝှေးစေ့ကြိုး သွားသော ပေါင်ခြံလမ်းကြောင်းမှာ အားနည်းသောနေရာ ဖြစ်လေ့ရှိပါသည်။ အမျိုးသမီးများတွင်မူ သားအိမ်ကို ထိန်းထားပေးသော အရွတ်တည်ရှိသည့် ပေါင်ခြံလမ်းကြောင်းတစ်ဝိုက်ရှိ တစ်ရှူးများတွင် အူကျွံခြင်း ဖြစ်ပွားနိုင်ပါသည်။
အန္တရာယ်ရှိသော အချက်များ
အောက်ပါအချက်များကြောင့် ပေါင်ခြံအူကျွံခြင်း ဖြစ်နိုင်ခြေ ပိုများပါသည်-
- အသားဖြူသူများ
- အမျိုးသားဖြစ်ခြင်း (အမျိုးသားများသည် အမျိုးသမီးများထက် ရှစ်ဆခန့် ပိုမိုဖြစ်ပွားနိုင်ခြေ ရှိပါသည်)
- အသက်ကြီးလာခြင်း (အသက်ကြီးလာသည်နှင့်အမျှ ကြွက်သားများ အားနည်းလာပါသည်)
- မျိုးရိုးလိုက်ခြင်း (မိဘ သို့မဟုတ် မောင်နှမများတွင် ဤဝေဒနာ ခံစားဖူးခြင်း)
- နာတာရှည် ချောင်းဆိုးခြင်း (ဆေးလိပ်သောက်ခြင်းကြောင့် ဖြစ်သော ချောင်းဆိုးခြင်း)
- နာတာရှည် ဝမ်းချုပ်ခြင်း (ဝမ်းသွားသည့်အခါ ညှစ်ရခြင်း)
- ယခင်က ပေါင်ခြံအူကျွံဖူးခြင်း သို့မဟုတ် ခွဲစိတ်ဖူးခြင်း (ကလေးဘဝက ဖြစ်ဖူးလျှင်ပင် နောက်တစ်ကြိမ် ဖြစ်နိုင်ခြေ ပိုများပါသည်)
- လမစေ့ဘဲ မွေးခြင်းနှင့် မွေးကင်းစ ကိုယ်အလေးချိန် နည်းခြင်း
- ကိုယ်ဝန်ဆောင်ခြင်း (ကိုယ်ဝန်ဆောင်စဉ် ဝမ်းဗိုက်ကြွက်သားများ အားနည်းသွားနိုင်ပြီး ဝမ်းဗိုက်အတွင်း ဖိအားကို တိုးလာစေနိုင်ပါသည်)
ရောဂါရှာဖွေခြင်း
ပုံမှန်အားဖြင့် ဆရာဝန်သည် ပေါင်ခြံရှိ ဖောင်းကြွနေသောနေရာကို စမ်းသပ်စစ်ဆေးခြင်းဖြင့် ရောဂါရှာဖွေနိုင်ပါသည်။ အူကျွံခြင်းမှာ ပိုမိုထင်ရှားစေရန်အတွက် သင့်ကို မတ်တပ်ရပ်ခိုင်းပြီး ချောင်းဆိုးခိုင်းခြင်း သို့မဟုတ် ညှစ်ခိုင်းခြင်းများ ပြုလုပ်နိုင်ပါသည်။
အကယ်၍ ရောဂါရှာဖွေမှုမှာ မသေချာပါက ဆရာဝန်သည် ဝမ်းဗိုက် အော်ထရာဆောင်း (Ultrasound)၊ ကွန်ပျူတာဓာတ်မှန် (CT) သို့မဟုတ် သံလိုက်ဓာတ်မှန် (MRI) ကဲ့သို့သော ပုံရိပ်ဖော် စစ်ဆေးမှုများကို ပြုလုပ်ရန် တောင်းဆိုနိုင်ပါသည်။
ကုသခြင်း
အကယ်၍ သင့်အူကျွံခြင်းမှာ သေးငယ်ပြီး သင့်ကို အနှောင့်အယှက် မပေးပါက ဆရာဝန်က အခြေအနေကို စောင့်ကြည့်ရန် အကြံပြုနိုင်ပါသည်။ အူကျွံခြင်းကို ထိန်းပေးသော အထူးဝတ်စုံ ကို ဝတ်ဆင်ခြင်းက လက္ခဏာများကို သက်သာစေနိုင်သော်လည်း ၎င်းကို စနစ်တကျ ဝတ်ဆင်ရန် လိုအပ်သောကြောင့် ဆရာဝန်နှင့် အရင်တိုင်ပင်ပါ။ ကလေးငယ်များတွင် ခွဲစိတ်ရန် မညွှန်ကြားမီ ဆရာဝန်သည် လက်ဖြင့်ဖိ၍ အူကို ပြန်သွင်းပေးသည့် နည်းလမ်းကို အသုံးပြုနိုင်ပါသည်။
နာကျင်ခြင်း သို့မဟုတ် ကြီးထွားလာသော အူကျွံခြင်းများအတွက် မသက်မသာဖြစ်မှုကို လျှော့ချရန်နှင့် ပြင်းထန်သော နောက်ဆက်တွဲပြဿနာများကို ကာကွယ်ရန် ခွဲစိတ်မှု ပြုလုပ်ရန် လိုအပ်လေ့ရှိပါသည်။
ခွဲစိတ်မှုတွင် အဓိကအားဖြင့် ခွဲစိတ်ရာအကြီးဖြင့် ကုသခြင်းနှင့် မှန်ပြောင်းကြည့်၍ ကုသခြင်း ဟူ၍ နှစ်မျိုးရှိပါသည်။
ခွဲစိတ်ရာအကြီးဖြင့် ကုသခြင်း
ဤခွဲစိတ်မှုတွင် ပေါင်ခြံ၌ ခွဲစိတ်ရာတစ်ခု ပြုလုပ်ပြီး ခွဲစိတ်ဆရာဝန်က ထိုးထွက်နေသော တစ်ရှူးများကို ဝမ်းဗိုက်အတွင်းသို့ ပြန်သွင်းပေးပါသည်။ ထို့နောက် ပေါက်နေသောနေရာကို ချုပ်ရိုးများဖြင့် ပိတ်ပေးပြီး ပိုမိုခိုင်ခံ့စေရန် အထူးပိုက်ကွန် ကို အသုံးပြုလေ့ရှိပါသည်။ နောက်ဆုံးတွင် ခွဲစိတ်ရာကို ပြန်လည်ချုပ်ပေးပါသည်။
ခွဲစိတ်မှုအပြီးတွင် သင့်ကို တတ်နိုင်သမျှ မြန်မြန် လမ်းလျှောက်ရန် တိုက်တွန်းပါလိမ့်မည်။ သို့သော် ပုံမှန်လုပ်ငန်းဆောင်တာများကို ပြန်လည်လုပ်ဆောင်နိုင်ရန် ရက်သတ္တပတ် အနည်းငယ် ကြာနိုင်ပါသည်။
မှန်ပြောင်းကြည့်၍ ကုသခြင်း
ဤခွဲစိတ်မှုတွင် ဆရာဝန်သည် သင့်ဝမ်းဗိုက်၌ သေးငယ်သော အပေါက်လေးများ ပြုလုပ်၍ မှန်ပြောင်း သို့မဟုတ် စက်ရုပ်လက်တံများကို အသုံးပြုကာ ကုသခြင်း ဖြစ်ပါသည်။ အတွင်းအင်္ဂါများကို ကောင်းမွန်စွာ မြင်တွေ့နိုင်ရန် ဝမ်းဗိုက်အတွင်းသို့ လေထည့်ပေးပါလိမ့်မည်။
သေးငယ်သော ကင်မရာပါသည့် ပြွန်ကို အပေါက်တစ်ခုမှ ထည့်သွင်းပြီး ကျန်အပေါက်ငယ်များမှတစ်ဆင့် ခွဲစိတ်ကိရိယာများကို အသုံးပြုကာ အူကျွံခြင်းကို အထူးပိုက်ကွန်ဖြင့် ပြုပြင်ပေးပါသည်။
ဤနည်းလမ်းဖြင့် ကုသသော လူနာများသည် ခွဲစိတ်ပြီးနောက် နာကျင်မှုနည်းခြင်း၊ အမာရွတ်နည်းခြင်းနှင့် အနာကျက်မြန်ခြင်းတို့ကို ခံစားရနိုင်ပါသည်။
ယခင်က ခွဲစိတ်ရာအကြီးဖြင့် ကုသပြီးမှ အူပြန်ကျွံသောသူများအတွက် ဤမှန်ပြောင်းကြည့် ကုသနည်းမှာ အလွန်အကျိုးရှိပါသည်။ ထို့အပြင် ပေါင်ခြံနှစ်ဖက်စလုံးတွင် အူကျွံနေသူများအတွက်လည်း သင့်တော်သော နည်းလမ်းဖြစ်ပါသည်။
ဤနည်းလမ်းတွင်လည်း ပုံမှန်လှုပ်ရှားမှုများ ပြန်လည်ပြုလုပ်နိုင်ရန် ရက်သတ္တပတ် အနည်းငယ် ကြာနိုင်ပါသည်။
