ရင်သားရောင်ရမ်းခြင်း

ရောဂါရှာဖွေခြင်း

ရှားပါးသော ရင်သားကင်ဆာအမျိုးအစားဖြစ်သည့် “ရောင်ရမ်းရင်သားကင်ဆာ (Inflammatory breast cancer)” သည်လည်း အစပိုင်းတွင် နီမြန်းရောင်ရမ်းတတ်သဖြင့် ရင်သားရောင်ရမ်းခြင်း (Mastitis) နှင့် ဆင်တူနိုင်ပါသည်။ ထို့ကြောင့် တိကျသော ရောဂါအမည်ဖော်ထုတ်ရန် အောက်ပါလုပ်ငန်းစဉ်များကို ဆောင်ရွက်ပါလိမ့်မည် –

• ကိုယ်ခန္ဓာကို စမ်းသပ်စစ်ဆေးခြင်း (Physical Examination): ကျန်းမာရေးစောင့်ရှောက်မှုပေးသူသည် ရင်သားကို စမ်းသပ်စစ်ဆေးမည်ဖြစ်ပြီး နီမြန်းခြင်း၊ နာကျင်ခြင်း၊ ပူနွေးနေခြင်း၊ နို့ရည်များပိတ်ပြီး တင်းခြင်းနှင့် ရောင်ရမ်းခြင်း လက္ခဏာများကို အာရုံစိုက်ကြည့်ရှုပါမည်။ ထို့အပြင် နို့သီးခေါင်း ထိခိုက်ဒဏ်ရာရမှု ရှိ၊ မရှိကိုလည်း မှတ်သားပါလိမ့်မည်။
• ပိုးမွေးမြူ၍ စစ်ဆေးခြင်း (Culture test): ပြင်းထန်သော ပိုးဝင်မှုများတွင် အထိရောက်ဆုံးဖြစ်မည့် ပိုးသတ်ဆေးကို ရွေးချယ်နိုင်ရန် မိခင်နို့နမူနာကို ရယူ၍ ဓာတ်ခွဲခန်းတွင် ပိုးမွေးမြူစစ်ဆေးနိုင်ပါသည်။
• ပုံရိပ်ဖော် စစ်ဆေးမှုများ (Imaging Test): ကင်ဆာကြောင့်ဖြစ်သော ရောင်ရမ်းမှု ဟုတ်၊ မဟုတ် သေချာစေရန် ရင်သားဓာတ်မှန် (Mammography) သို့မဟုတ် အာထရာဆောင်း (Ultrasound) ရိုက်ရန် အကြံပြုနိုင်ပါသည်။
• အသားစယူ စစ်ဆေးခြင်း (Biopsy): ပိုးသတ်ဆေးပတ်လည်အောင် သောက်ပြီးသော်လည်း လက္ခဏာများ မပျောက်ကင်းပါက ရင်သားကင်ဆာကြောင့် မဟုတ်ကြောင်း သေချာစေရန် အသားစယူစစ်ဆေးမှု ပြုလုပ်ရန် လိုအပ်နိုင်ပါသည်။

ကုသခြင်း

ကုသမှု၏ ရည်ရွယ်ချက်မှာ ရောင်ရမ်းမှုကို လျှော့ချရန်၊ နာကျင်မှုကို သက်သာစေရန်နှင့် ပိုးဝင်မှုကို ကာကွယ်ရန် ဖြစ်သည်။ ကုသမှုတွင် အောက်ပါတို့ ပါဝင်နိုင်သည် –

• ပိုးသတ်ဆေးများ (Antibiotics): ပိုးဝင်ခြင်းအတွက် ပုံမှန်အားဖြင့် ၁၀ ရက်ကြာ ပိုးသတ်ဆေးသောက်ရန် လိုအပ်ပါသည်။ ရောဂါပြန်မဖြစ်စေရန် ဆေးပတ်လည်အောင် သောက်ရန် အလွန်အရေးကြီးသည်။ ပိုးသတ်ဆေးသောက်သော်လည်း လက္ခဏာများ ဆက်ရှိနေပါက ဆရာဝန်နှင့် ပြန်လည်ပြသရန် လိုအပ်သည်။
• အကိုက်အခဲပျောက်ဆေးများ (Pain relievers): နာကျင်မအီမသာဖြစ်မှုကို သက်သာစေရန် Acetaminophen သို့မဟုတ် Ibuprofen ကဲ့သို့သော ဆေးများကို သုံးစွဲနိုင်ပါသည်။

ရင်သားရောင်ရမ်းနေစဉ်အတွင်း မိခင်နို့ဆက်တိုက်ခြင်းသည် ဘေးကင်းရုံသာမက ပိုးဝင်မှုကို သက်သာစေရန်ပင် အထောက်အကူပြုသည်။ ရုတ်တရက် နို့ဖြတ်လိုက်ခြင်းက လက္ခဏာများကို ပိုမိုဆိုးရွားသွားစေနိုင်ပါသည်။ ထို့ကြောင့် သင်၏ကျန်းမာရေးအတွက် မိခင်နို့ကို ဆက်လက်တိုက်ကျွေးရန် အကြံပြုပါသည်။
နို့တိုက်နည်းစနစ်များကို ပြုပြင်ပြောင်းလဲရန် အောက်ပါအချက်များကို လုပ်ဆောင်နိုင်ပါသည် –

• နို့ရည်များ ပိတ်ပြီးတင်းခြင်းကို ရှောင်ကြဉ်ခြင်း: ရင်သားမတင်းမီ ပုံမှန်နှင့် မကြာခဏ နို့တိုက်ကျွေးပါ။
• ကလေးနို့ငုံနည်းစနစ် မှန်ကန်ပါစေ: ကလေးသည် ရင်သားကို စနစ်တကျ ငုံမိစေရန် ဂရုစိုက်ပါ။ ရင်သားလွန်စွာ တင်းနေပါက နို့မတိုက်မီ နို့ရည်အနည်းငယ်ကို လက်ဖြင့် ညှစ်ထုတ်ထားခြင်းဖြင့် ကလေးနို့ငုံရ လွယ်ကူစေပါသည်။
• နို့တိုက်နေစဉ် သို့မဟုတ် နို့ညှစ်နေစဉ် ရင်သားကို နှိပ်နယ်ပေးခြင်း: နို့ရည်စီးဆင်းမှု ကောင်းမွန်စေရန် ရောဂါဖြစ်နေသော နေရာမှ နို့သီးခေါင်းဘက်သို့ ခပ်ဖွဖွ နှိပ်နယ်ပေးပါ။
• နို့ရည်ကို ကုန်စင်အောင် ထုတ်ခြင်း: နို့တိုက်တိုင်း နို့ရည်ကုန်စင်အောင် ထုတ်ပါ။ နို့မတိုက်မီ ရင်သားကို ရေနွေးဝတ်ဖြင့် ကပ်ပေးခြင်းက နို့ထွက်ရခက်သော နေရာများအတွက် အကူအညီဖြစ်စေပါသည်။
• နာကျင်နေသောဘက်မှ အရင်တိုက်ခြင်း: ကလေးဗိုက်ဆာနေချိန်တွင် နာကျင်နေသော သို့မဟုတ် တင်းနေသော ရင်သားဘက်မှ အရင်တိုက်ပါ။ ၎င်းသည် နို့ရည်ကုန်စင်စေရန် ပိုမိုထိရောက်ပါသည်။
• နို့တိုက်သည့် ပုံစံအမျိုးမျိုးကို စမ်းသပ်ကြည့်ခြင်း: မိခင်ရော ကလေးပါ သက်သောင့်သက်သာအရှိဆုံးနှင့် အထိရောက်ဆုံးဖြစ်မည့် နို့တိုက်ပုံစံကို ရှာဖွေစမ်းသပ်ပါ။

Doctors who treat this condition