កុំមើលស្រាលការខាំ ឬខ្វាចរបស់សត្វព្រោះ ជំងឺឆ្កែឆ្កួត អាចគំរាមកំហែងដល់អាយុជីវិត
ជំងឺឆ្កែឆ្កួត ជំងឺដ៏គ្រោះថ្នាក់មួយ នៅពេលដែលវីរុសប៉ះពាល់ […]
Table of Contents
- ជំងឺស្ទះសរសៃឈាមក្នុងពោះវៀន (Intestinal Ischemia) កើតឡើងដោយសារឈាមហូរទៅចិញ្ចឹមពោះវៀនមិនគ្រប់គ្រាន់។ វាអាចកើតឡើងភ្លាមៗ ឬបន្តិចម្តងៗ ហើយអាចកើតមានទាំងនៅក្នុងពោះវៀនតូច និងពោះវៀនធំ
- រោគសញ្ញានៃជំងឺស្ទះសរសៃឈាមក្នុងពោះវៀន ដែលគួរប្រុងប្រយ័ត្ន រួមមាន ឈឺពោះធ្ងន់ធ្ងរ ឬឈឺចាប់ភ្លាមៗ ដោយអាចមានអមដោយការបន្ទោរបង់មានឈាម ចង្អោរ ក្អួត រាគ ឬហើមពោះ
- មូលហេតុអាចមានច្រើនយ៉ាង មានចាប់តាំងពី ការស្ទះកំណកឈាម ត្បៀតសរសៃឈាម រហូតដល់សម្ពាធឈាមទាប ឬការបាត់បង់ជាតិទឹកក្នុងរាងកាយធ្ងន់ធ្ងរ។ ដោយកត្តាហានិភ័យនឹងកើនឡើងចំពោះអ្នកដែលមានជំងឺបេះដូង និងសរសៃឈាមបេះដូង
- ប្រសិនបើទុកចោលរហូតដល់ពោះវៀនរងការខូចខាត អាចបណ្តាលឱ្យកើតមានកោសិកាស្លាប់ ធ្លុះពោះវៀន ឬការឆ្លងមេរោគធ្ងន់ធ្ងរ។ ដូច្នេះគួរប្រញាប់ទៅជួបគ្រូពេទ្យនៅពេលមានរោគសញ្ញាមិនប្រក្រតី ជាពិសេសរោគសញ្ញាឈឺពោះធ្ងន់ធ្ងរដែលកើតឡើងភ្លាមៗ
ជំងឺស្ទះសរសៃឈាមក្នុងពោះវៀន គឺជាអ្វី?
ជំងឺស្ទះសរសៃឈាមក្នុងពោះវៀន គឺជាស្ថានភាពដែលពោះវៀនទទួលឈាម និងអុកស៊ីសែនមិនគ្រប់គ្រាន់។ វាអាចកើតឡើងបានទាំងនៅក្នុងពោះវៀនតូច និងពោះវៀនធំ ដោយមានទាំងប្រភេទស្រួចស្រាវដែលកើតឡើងយ៉ាងរហ័ស និងប្រភេទរ៉ាំរ៉ៃដែលកើតឡើងបន្តិចម្តងៗ។ ប្រសិនបើស្ថានភាពខ្វះឈាមនេះធ្ងន់ធ្ងរ ឬអូសបន្លាយរយៈពេលយូរ អាចធ្វើឱ្យកោសិកាពោះវៀនរងការខូចខាត ឬស្លាប់បាន
រោគសញ្ញានៃជំងឺស្ទះសរសៃឈាមក្នុងពោះវៀនដែលគួរកត់សម្គាល់
រោគសញ្ញានឹងខុសៗគ្នាទៅតាមទីតាំង និងកម្រិតធ្ងន់ធ្ងរនៃស្ថានភាពខ្វះឈាម។ អ្នកជំងឺខ្លះមានរោគសញ្ញាភ្លាមៗ ខណៈពេលដែលអ្នកជំងឺខ្លះទៀតមានរោគសញ្ញាកើនឡើងបន្តិចម្តងៗ
រោគសញ្ញាជំងឺស្ទះសរសៃឈាមក្នុងពោះវៀនស្រួចស្រាវ
រោគសញ្ញាចម្បងនៃជំងឺស្ទះសរសៃឈាមក្នុងពោះវៀនស្រួចស្រាវ គឺការឈឺពោះភ្លាមៗ ឬឈឺចាប់ធ្ងន់ធ្ងរខុសប្រក្រតី ដោយអាចមាន ចង្អោរ ក្អួត រាគ មានអារម្មណ៍ចង់បន្ទោរបង់ភ្លាមៗ ឬបន្ទោរបង់មានឈាមអមជាមួយ។ ចំណុចសង្កេតសំខាន់គឺ អ្នកជំងឺអាចឈឺពោះធ្ងន់ធ្ងរ ប៉ុន្តែនៅក្នុងដំណាក់កាលដំបូង គ្រូពេទ្យអាចនៅមិនទាន់ពិនិត្យឃើញភាពមិនប្រក្រតីនៅតំបន់ពោះច្រើនឡើយ។ នៅពេលស្ថានភាពខ្វះឈាមកាន់តែធ្ងន់ធ្ងរ ការចុកឈឺ ហើមពោះ ឬពោះរឹងនឹងស្តែងចេញកាន់តែច្បាស់
អាការៈឈឺពោះធ្ងន់ធ្ងរដែលកើតឡើងភ្លាមៗត្រូវបានចាត់ទុកជាស្ថានភាពអាសន្ន ដែលគួរប្រញាប់ទៅមន្ទីរពេទ្យភ្លាមៗ ព្រោះប្រសិនបើការស្ទះសរសៃឈាមក្នុងពោះវៀនក្នុងរយៈពេលយូរ អាចធ្វើឱ្យកោសិកាពោះវៀនរងការខូចខាត ឬស្លាប់បាន
រោគសញ្ញាជំងឺស្ទះសរសៃឈាមក្នុងពោះវៀនរ៉ាំរ៉ៃ
រោគសញ្ញាជាធម្មតាវិវត្តបន្តិចម្តងៗ ដោយអ្នកជំងឺអាចមានអាការៈឈឺពោះបន្ទាប់ពីញ៉ាំអាហារជាប្រចាំ។ ដូច្នេះទើបអ្នកជំងឺមួយចំនួនអាចញ៉ាំបានតិច ឬជៀសវាងការញ៉ាំអាហារទាំងស្រុងដោយសារខ្លាចឈឺពោះ ដែលនាំឱ្យស្រកទម្ងន់ដោយអចេតនា
ឈឺពោះអមដោយការបន្ទោរបង់មានឈាម
អាការៈឈឺពោះអមដោយការបន្ទោរបង់មានឈាម ឬមានឈាមលាយក្នុងលាមក គឺជាសញ្ញាមួយទៀតដែលគួរប្រុងប្រយ័ត្ន ដោយសារឈាមទៅចិញ្ចឹមពោះវៀនមិនគ្រប់គ្រាន់អាចធ្វើឱ្យភ្នាសពោះវៀនរងការខូចខាត ជាពិសេសនៅពេលកើតឡើងនៅលើពោះវៀនធំ។ ទោះជាយ៉ាងណាក៏ដោយ រោគសញ្ញាបន្ទោរបង់មានឈាមអាចកើតឡើងពីមូលហេតុជាច្រើន ដូច្នេះមិនអាចបញ្ជាក់ពីអាការៈតែមួយមុខថាជាជំងឺស្ទះសរសៃឈាមក្នុងពោះវៀននោះទេ គួរទទួលការពិនិត្យដើម្បីស្វែងរកមូលហេតុឱ្យបានច្បាស់លាស់
រោគសញ្ញាឈឺពោះបែបណាដែលគួរប្រញាប់ទៅជួបគ្រូពេទ្យ?
គួរទទួលការពិនិត្យឱ្យបានឆាប់ ប្រសិនបើមានអាការឈឺពោះធ្ងន់ធ្ងរ ឬកើតឡើងភ្លាមៗ ជាពិសេសនៅពេលអាការៈឈឺកាន់តែខ្លាំងឡើងៗ ឬមានការបន្ទោរបង់មានឈាម ក្អួតខ្លាំង ងងឹតមុខ វង្វេងវង្វាន់ ឬសន្លប់រួមជាមួយ។ អាការៈទាំងនេះមិនមែនមានន័យថាតែងតែជាស្ថានភាពខ្វះឈាមទៅចិញ្ចឹមពោះវៀនជានិច្ចនោះទេ ប៉ុន្តែអាចជាសញ្ញានៃស្ថានភាពអាសន្នក្នុងពោះដែលចាំបាច់ត្រូវទទួលការពិនិត្យ និងការព្យាបាលយ៉ាងត្រឹមត្រូវ
វេជ្ជបណ្ឌិត LT.COL. DR. CHANYAWAT SANGSOMWONG ឯកទេសខាងវះកាត់ពោះវៀនធំ និងទ្វារបាត នៅមន្ទីរពេទ្យអន្តរជាតិវេជ្ជថានី បានណែនាំថា អាការៈឈឺពោះ ឬបន្ទោរបង់មានឈាមអាចកើតចេញពីមូលហេតុជាច្រើន ដូច្នេះមិនគួរសន្និដ្ឋានថាគ្រាន់តែជាការពុលអាហារ ឬរលាកពោះវៀននោះទេ។ ជាពិសេសនៅពេលអាការឈឺមានកម្រិតធ្ងន់ធ្ងរ កើតឡើងភ្លាមៗ ឬមានកត្តាហានិភ័យផ្នែកបេះដូង និងសរសៃឈាមបេះដូងរួមជាមួយ គួរទទួលបានការពិនិត្យដើម្បីស្វែងរកមូលហេតុឱ្យបានច្បាស់លាស់
មូលហេតុនៃជំងឺស្ទះសរសៃឈាមក្នុងពោះវៀន
ជំងឺស្ទះសរសៃឈាមក្នុងពោះវៀនអាចកើតឡើងពីមូលហេតុជាច្រើន ទាំងការកកស្ទះ ឬការរួមតូចនៃសរសៃឈាមដែលទៅចិញ្ចឹមពោះវៀន រួមទាំងស្ថានភាពដែលធ្វើឱ្យលំហូរឈាមរត់ទៅចិញ្ចឹមពោះវៀនថយចុះ។ មូលហេតុដែលជួបប្រទះញឹកញាប់ រួមមាន៖
- កំណកឈាមស្ទះសរសៃឈាមដែលទៅចិញ្ចឹមពោះវៀន ដុំកំណកឈាមអាចកកើតឡើងនៅបរិវណបេះដូង ឬសរសៃឈាមផ្នែកផ្សេងទៀត រួចរបូតទៅស្ទះសរសៃឈាមដែលទៅចិញ្ចឹមពោះវៀន បណ្តាលឱ្យកើតមានស្ថានភាពខ្វះឈាមភ្លាមៗ
- ត្បៀតសរសៃឈាម ការកកកុញជាតិខ្លាញ់ និងកំណកកំបោរនៅតាមជញ្ជាំងសរសៃឈាម ធ្វើឱ្យសរសៃឈាមរួមតូច និងអាចបណ្តាលឱ្យកើតមានរោគសញ្ញារ៉ាំរ៉ៃ ជាពិសេសអាការឈឺពោះបន្ទាប់ពីញ៉ាំអាហារ
- កំណកឈាមស្ទះក្នុងសរសៃវ៉ែនក្នុងពោះវៀន ធ្វើឱ្យឈាមមិនអាចបង្ហូរចេញពីពោះវៀនបានស្រួល រហូតអាចបណ្តាលឱ្យកើតមានការកកស្ទះឈាម និងហើមពោះវៀន
- សម្ពាធឈាម ឬលំហូរឈាមថយចុះខ្លាំង ដូចជា ស្ថានភាព Shock មុខងារបេះដូងមិនប្រក្រតី ឬការឆ្លងរោគធ្ងន់ធ្ងរ ទោះបីជាគ្មានការកកស្ទះសរសៃឈាម ក៏អាចធ្វើឱ្យពោះវៀនខ្វះឈាមបានដែរ
- ស្ថានភាពខ្វះជាតិទឹកក្នុងរាងកាយធ្ងន់ធ្ងរ អាចធ្វើឱ្យបរិមាណឈាមក្នុងរាងកាយ និងសម្ពាធឈាមថយចុះ រហូតប៉ះពាល់ដល់លំហូរឈាម ជាពិសេសចំពោះអ្នកដែលមានកត្តាហានិភ័យផ្សេងទៀតរួមជាមួយ
- ថ្នាំមួយចំនួន ជាពិសេសថ្នាំដែលមានផលប៉ះពាល់ដល់ការកន្ត្រាក់នៃសរសៃឈាម អាចបង្កើនហានិភ័យនៃជំងឺស្ទះសរសៃឈាមក្នុងពោះវៀនចំពោះអ្នកជំងឺមួយចំនួន។ ការប្រើប្រាស់ ឬកែសម្រួលកម្រិតថ្នាំគួរតែធ្វើឡើងតាមការណែនាំរបស់គ្រូពេទ្យ
តើនរណាខ្លះដែលមានហានិភ័យ?
ជំងឺស្ទះសរសៃឈាមក្នុងពោះវៀនត្រូវបានជួបប្រទះច្រើននៅក្នុងក្រុមដែលមានកត្តាហានិភ័យពាក់ព័ន្ធនឹងបេះដូង សរសៃឈាម និងការកកើតកំណកឈាម ដូចជា៖
- មនុស្សវ័យចំណាស់
- ជំងឺបេះដូង និងជំងឺចង្វាក់បេះដូងលោតមិនប្រក្រតី
- ជំងឺសរសៃឈាម ឬជំងឺក្រិនសរសៃឈាម
- សម្ពាធឈាមឡើងខ្ពស់ (លើសឈាម)
- ជំងឺទឹកនោមផ្អែម
- ជាតិខ្លាញ់ក្នុងឈាមខ្ពស់
- ការជក់បារី
- ប្រវត្តិធ្លាប់មានបញ្ហាស្ទះកំណកឈាម
- ស្ថានភាពឈាមកកងាយ
(ការមានកត្តាហានិភ័យទាំងនេះ មិនមែនមានន័យថានឹងកើតមានជំងឺស្ទះសរសៃឈាមក្នុងពោះវៀនជានិច្ចនោះទេ ហើយអ្នកដែលគ្មានកត្តាហានិភ័យច្បាស់លាស់ ក៏អាចកើតមានស្ថានភាពនេះបានដូចគ្នា)
ជំងឺស្ទះសរសៃឈាមក្នុងពោះវៀនមានគ្រោះថ្នាក់កម្រិតណា?
ប្រសិនបើឈាមរត់ទៅចិញ្ចឹមពោះវៀនមិនគ្រប់គ្រាន់ក្នុងរយៈពេលយូរ កោសិកាពោះវៀនអាចរងការខូចខាតរហូតកើតជាកោសិកាស្លាប់ ឬពោះវៀនធ្លុះ ធ្វើឱ្យបាក់តេរី និងវត្ថុនៅក្នុងពោះវៀនលេចធ្លាយចូលទៅក្នុងពោះ ហើយនាំទៅរកការឆ្លងមេរោគធ្ងន់ធ្ងរបាន។ ក្នុងករណីដែលមានរោគសញ្ញាធ្ងន់ធ្ងរ អាចបណ្តាលឱ្យកើតមានស្ថានភាព Shock ឬប៉ះពាល់ដល់ការធ្វើការនៃសរីរាង្គផ្សេងៗ ដែលអាចគ្រោះថ្នាក់ដល់ជីវិត។ ការពិនិត្យស្វែងរក និងទទួលការព្យាបាលយ៉ាងត្រឹមត្រូវទាន់ពេលវេលា ទើបជារឿងសំខាន់បំផុតក្នុងការកាត់បន្ថយហានិភ័យនៃផលវិបាកផ្សេងៗ
ការពិនិត្យវិនិច្ឆ័យជំងឺស្ទះសរសៃឈាមក្នុងពោះវៀន
ដោយសាររោគសញ្ញានៃជំងឺស្ទះសរសៃឈាមក្នុងពោះវៀនអាចស្រដៀងគ្នាទៅនឹងជំងឺផ្សេងទៀតក្នុងប្រហោងពោះ គ្រូពេទ្យនឹងពិចារណាលើលក្ខណៈនៃរោគសញ្ញា ប្រវត្តិសុខភាព និងកត្តាហានិភ័យ ដើម្បីជ្រើសរើសវិធីសាស្ត្រពិនិត្យដែលសមស្របទៅតាមរោគសញ្ញា និងកម្រិតប្រញាប់ប្រញាល់របស់អ្នកជំងឺម្នាក់ៗ ដូចជា៖
- ការសាកសួរប្រវត្តិ និងពិនិត្យរាងកាយ ដើម្បីវាយតម្លៃទីតាំង និងលក្ខណៈនៃអាការឈឺចាប់ រួមទាំងរោគសញ្ញាមិនប្រក្រតី និងជំងឺប្រចាំកាយ
- ការពិនិត្យឈាម ដើម្បីវាយតម្លៃភាពមិនប្រក្រតីដែលប្រហែលជាកើតមានរួមជាមួយជំងឺស្ទះសរសៃឈាមក្នុងពោះវៀនដូចជា ការរលាក ឬការឆ្លងរោគ ដោយលទ្ធផលឈាមនឹងត្រូវយកមកប្រើប្រាស់ប្រកបជាមួយរោគសញ្ញា និងការពិនិត្យផ្សេងៗទៀត
- CT scan ពោះ គឺជាការថតកាំរស្មីអ៊ិចកុំព្យូទ័រដើម្បីមើលរូបភាពពោះវៀន និងសរីរាង្គខាងក្នុងប្រហោងពោះ ជួយវាយតម្លៃភាពមិនប្រក្រតី និងផលវិបាកដែលអាចកើតមាន
- ការថតកាំរស្មីអ៊ិច CT Angiography គឺជាការស្កេន CT ដែលផ្តោតលើការមើលឃើញសរសៃឈាម ដោយប្រើសារធាតុពណ៌ដើម្បីជួយឪ្យអាចមើលឃើញសរសៃឈាមដែលផ្គត់ផ្គង់ពោះវៀនបានកាន់តែច្បាស់ និងដើម្បីរកមើលតំបន់ដែលអាចមានការស្ទះ ឬរួមតូច
- ការឆ្លុះពោះវៀនធំ គឺជានីតិវិធីមួយដើម្បីពិនិត្យស្រទាប់ពោះវៀនដោយផ្ទាល់ ដើម្បីរកមើលភាពមិនប្រក្រតី ប្រសិនបើវេជ្ជបណ្ឌិតយល់ថាចាំបាច់
ការព្យាបាលជំងឺស្ទះសរសៃឈាមក្នុងពោះវៀន
គ្រូពេទ្យនឹងពិចារណាវិធីសាស្ត្រព្យាបាលទៅតាមមូលហេតុ ទីតាំងដែលកើតមានបញ្ហា លទ្ធផលនៃការពិនិត្យ និងកម្រិតធ្ងន់ធ្ងរនៃជំងឺចំពោះអ្នកជំងឺម្នាក់ៗ។ ដោយអ្នកជំងឺខ្លះអាចព្យាបាលបានដោយមិនបាច់វះកាត់ ខណៈពេលដែលអ្នកជំងឺខ្លះទៀតអាចនឹងត្រូវទទួលបានការព្យាបាលដើម្បីបើកសរសៃឈាម ឬធ្វើការវះកាត់ប្រសិនបើពោះវៀនរងការខូចខាតធ្ងន់ធ្ងរ។ គោលការណ៍នៃការព្យាបាលអាចរួមមាន៖
- ការផ្តល់សេរ៉ូមតាមសរសៃឈាម
- ការកែសម្រួលស្ថានភាពសម្ពាធឈាមទាប ឬស្ថានភាព Shock
- ការព្យាបាលការឆ្លងរោគ ឬជំងឺដែលជាមូលហេតុរួម
- ការផ្តល់ថ្នាំប្រឆាំងការកកឈាមចំពោះអ្នកជំងឺដែលសមស្រប
- ការធ្វើនីតិវិធីតាមបំពង់សុង Catheter ដើម្បីបើកសរសៃឈាម ឬបូមយកកំណកឈាមចេញក្នុងករណីខ្លះ
- ការពង្រីកសរសៃឈាម ឬដាក់ស្តេន (Stent) ចំពោះអ្នកជំងឺមួយចំនួន
- ការវះកាត់ ដើម្បីកែសម្រួលការកកស្ទះ ឬស្តារលំហូរឈាមឡើងវិញ
- ការកាត់ពោះវៀនផ្នែកដែលកើតមានកោសិកាស្លាប់ ឬរងការខូចខាតធ្ងន់ធ្ងរចេញ
សរុប
ជំងឺស្ទះសរសៃឈាមក្នុងពោះវៀន គឺជាស្ថានភាពដែលគួរតែទទួលការពិនិត្យវិនិច្ឆ័យ និងការព្យាបាលយ៉ាងត្រឹមត្រូវ និងសមស្រប ព្រោះប្រសិនបើពោះវៀនខ្វះឈាមធ្ងន់ធ្ងរ ឬអូសបន្លាយពេលវេលាយូរ អាចធ្វើឱ្យកោសិកាពោះវៀនរងការខូចខាត និងបង្កឱ្យកើតមានផលវិបាកដែលគ្រោះថ្នាក់បាន
ប្រសិនបើមានអាការៈឈឺពោះធ្ងន់ធ្ងរ ឬកើតឡើងភ្លាមៗ ជាពិសេសនៅពេលមានការបន្ទោរបង់មានឈាម ក្អួតខ្លាំង ឬមានរោគសញ្ញាមិនប្រក្រតីផ្សេងទៀតរួមជាមួយ មិនគួររង់ចាំមើលអាការដោយខ្លួនឯងនោះទេ គួរតែទទួលការពិនិត្យដើម្បីស្វែងរកមូលហេតុ និងទទួលការពព្យាបាលដែលសមស្របជាបន្ទាន់
សំណួរដែលសួរជាញឹកញាប់
តើជំងឺស្ទះសរសៃឈាមក្នុងពោះវៀនអាចព្យាបាលបានដែរឬទេ?
អ្នកជំងឺមួយចំនួនជាសះស្បើយបានល្អបន្ទាប់ពីការព្យាបាល។ លទ្ធផលអាស្រ័យលើមូលហេតុ ភាពធ្ងន់ធ្ងរ និងវិសាលភាពនៃការខូចខាតពោះវៀន។ ការធ្វើរោគវិនិច្ឆ័យ និងការព្យាបាលចាប់តាំងពីដំបូង និងសមស្របកាត់បន្ថយហានិភ័យនៃផលវិបាកធ្ងន់ធ្ងរបានយ៉ាងច្រើន
តើការវះកាត់ចាំបាច់សម្រាប់មនុស្សគ្រប់គ្នាដែរឬទេ?
មិនចាំបាច់ទេ។ អ្នកជំងឺមួយចំនួនអាចត្រូវបានព្យាបាលដោយថ្នាំ ការផ្តល់សារធាតុរាវ ឬនីតិវិធីដើម្បីកែតម្រូវបញ្ហាសរសៃឈាម។ ទោះជាយ៉ាងណាក៏ដោយ ប្រសិនបើពោះវៀនកើតកោសិកាស្លាប់ ពោះវៀនធ្លុះ ឬផលវិបាកធ្ងន់ធ្ងរកើតឡើង អាចចាំបាច់ត្រូវធ្វើការវះកាត់ដើម្បីយកផ្នែកដែលខូចខាតនៃពោះវៀនចេញ
តើបន្ទោរបង់មានឈាមជារោគសញ្ញានៃជំងឺស្ទះសរសៃឈាមក្នុងពោះវៀនដែរឬទេ?
បន្ទោរបង់មានឈាមគឺជារោគសញ្ញាមួយដែលអាចកើតឡើងនៅក្នុងជំងឺស្ទះសរសៃឈាមក្នុងពោះវៀន ប៉ុន្តែវាក៏អាចបណ្តាលមកពីស្ថានភាពផ្សេងទៀតផងដែរ។ ប្រសិនបើអ្នកជួបប្រទះការឈឺចាប់ពោះធ្ងន់ធ្ងរ ឬភ្លាមៗ អមដោយលាមកមានឈាម អ្នកគួរតែស្វែងរកការព្យាបាលពីគ្រូពេទ្យដើម្បីកំណត់មូលហេតុ
តើការទទួលទានទឹកមិនគ្រប់គ្រាន់អាចបណ្តាលឱ្យមានស្ថានភាពនេះបានដែរឬទេ?
ការទទួលទានទឹកមិនគ្រប់គ្រាន់មិនបណ្តាលឱ្យមានជំងឺពោះវៀនខ្សោយដោយផ្ទាល់ទេ ប៉ុន្តែការខ្សោះជាតិទឹកធ្ងន់ធ្ងរអាចបន្ថយបរិមាណឈាម និងសម្ពាធឈាម ដែលនាំឱ្យមានការផ្គត់ផ្គង់ឈាមទៅកាន់ពោះវៀនមិនគ្រប់គ្រាន់ ជាពិសេសចំពោះបុគ្គលដែលមានកត្តាហានិភ័យផ្សេងទៀត
តើមានឱកាសនៃការកើតឡើងវិញបន្ទាប់ពីការព្យាបាលដែរឬទេ?
មានឱកាសនៃការកើតឡើងវិញ ប្រសិនបើមូលហេតុមូលដ្ឋាន ឬកត្តាហានិភ័យពាក់ព័ន្ធនៅតែបន្ត ដូចជាជំងឺសរសៃឈាមបេះដូង ចង្វាក់បេះដូងលោតញាប់ ឬស្ថានភាពដែលធ្វើឱ្យកំណកឈាមទំនងជាកើតឡើង។ ដូច្នេះ ការគ្រប់គ្រងស្ថានភាពដែលមានស្រាប់ និងការអនុវត្តតាមការណែនាំនៃការព្យាបាលរបស់វេជ្ជបណ្ឌិតរបស់អ្នក គឺមានសារៈសំខាន់ណាស់
Medically Reviewed by
Readers’ Rating
0.0 out of 5 stars (based on 0 reviews)
