ជំងឺមហារីកសរសៃឈាម

ទិដ្ឋភាពទូទៅ

ជំងឺមហារីកសរសៃឈាម (Angiosarcoma) មានប្រភពដើមចេញពីស្រទាប់កោសិកានៃសរសៃឈាមក្នុងប្រព័ន្ធរបត់ឈាម និងប្រព័ន្ធទឹករងៃ។ សរសៃទឹករងៃជួយពង្រឹងប្រព័ន្ធស៊ាំរបស់យើង ដោយវាជួយរាងកាយក្នុងការកម្ចាត់ចោលនូវសារធាតុដែលមិនចង់បាន ដូចជាបាក់តេរី វីរុស និងកាកសំណល់ផ្សេងៗ

ផ្នែកណាមួយនៃរាងកាយក៏អាចរងផលប៉ះពាល់ដោយជំងឺមហារីកដ៏កម្រប្រភេទនេះដែរ។ ស្បែកនៅតំបន់ក្បាល និងក គឺជាកន្លែងដែលមានហានិភ័យខ្ពស់បំផុតក្នុងការវិវត្តទៅជាជំងឺមហារីកសរសៃឈាម។ តំបន់ដែលមិនសូវជួបប្រទះញឹកញាប់រួមមាន ស្បែកសុដន់ និងសរីរាង្គមួយចំនួននៅក្នុងរាងកាយដូចជា ថ្លើម និងបេះដូង។ មហារីកនេះក៏អាចកើតមានផងដែរនៅលើតំបន់ដែលធ្លាប់ទទួលការព្យាបាលដោយកាំរស្មីពីមុនមក

មានការព្យាបាលជាច្រើនសម្រាប់ជំងឺមហារីកសរសៃឈាម រួមមាន ការវះកាត់ ការព្យាបាលដោយកាំរស្មី និងការព្យាបាលដោយគីមី។ គ្រូពេទ្យនឹងជ្រើសរើសជម្រើសដ៏ល្អបំផុតសម្រាប់អ្នក ដោយផ្អែកលើតំបន់ដែលរងផលប៉ះពាល់ដោយមហារីក

រោគសញ្ញា

សញ្ញា និងរោគសញ្ញានៃជំងឺមហារីកសរសៃឈាមមានភាពខុសប្លែកគ្នា អាស្រ័យលើទីតាំងដែលដុំសាច់ស្ថិតនៅ៖

ជំងឺមហារីកសរសៃឈាមដែលប៉ះពាល់ដល់ស្បែក

ជំងឺមហារីកសរសៃឈាមច្រើនតែត្រូវបានរកឃើញនៅលើស្បែកក្បាល និងក ជាពិសេសនៅលើស្បែកក្បាលផ្ទាល់តែម្តង។ រោគសញ្ញារួមមាន៖

• មានស្នាមលើស្បែកដូចជាស្នាមជាំ
• ស្នាមដូចស្នាមជាំនោះចាប់ផ្តើមរីកធំទៅៗ
• ស្នាមនោះអាចនឹងហូរឈាមនៅពេលមានការអេះ ឬប៉ះទង្គិច
• មានការហើមស្បែកនៅជុំវិញតំបន់នោះ

ជំងឺមហារីកសរសៃឈាមដែលប៉ះពាល់ដល់សរីរាង្គ

ប្រភេទនេះច្រើនតែបង្កឱ្យមានការឈឺចាប់ ដោយសារវាប៉ះពាល់ដល់សរីរាង្គក្នុងដូចជា ថ្លើម ឬបេះដូង។ វាក៏អាចបង្កជារោគសញ្ញាផ្សេងៗទៀត ផ្អែកលើទីតាំងដែលវាស្ថិតនៅ

ក្នុងករណីមានរោគសញ្ញាដែលនៅតែបន្តកើតមាន និងគួរឱ្យព្រួយបារម្ភ សូមប្រញាប់ពិគ្រោះជាមួយគ្រូពេទ្យ

មូលហេតុ

រហូតមកដល់ពេលនេះ គេមិនទាន់រកឃើញមូលហេតុច្បាស់លាស់នៃជំងឺមហារីកសរសៃឈាមនៅឡើយទេ។ ទោះជាយ៉ាងណាក៏ដោយ កត្តាមួយចំនួនត្រូវបានរកឃើញថាមានចំណែកបង្កឱ្យមានជំងឺនេះ

មហារីកប្រភេទនេះអាចបណ្តាលមកពីការកើនឡើងខ្លាំងខុសធម្មតានៃកោសិកាមិនប្រក្រតីនៅក្នុងតំបន់ណាមួយ ដែលអាចរីករាលដាលទៅបំផ្លាញជាលិកា ឬសរីរាង្គធម្មតានៅតំបន់ផ្សេងទៀត

ការប្រមូលផ្តុំនៃកោសិកាមហារីកទាំងនេះ អាចបណ្តាលមកពីការប្រែប្រួល ឬការបំប្លែងខ្លួននៃកោសិកានៅក្នុងស្រទាប់សរសៃឈាម ឬសរសៃទឹករងៃ។ ការបំប្លែងខ្លួននេះធ្វើឱ្យកោសិកាបន្តពូជដោយគ្មានការគ្រប់គ្រង និងមិនងាយស្លាប់ទៅវិញ ដែលវាខុសប្លែកពីកោសិកាធម្មតា ដែលនឹងស្លាប់ទៅវិញក្នុងរយៈពេលជាក់លាក់ណាមួយ

កត្តាហានិភ័យ

មានកត្តាជាច្រើនដែលចូលរួមចំណែកបង្កឱ្យមានជំងឺមហារីកសរសៃឈាម រួមមាន៖

• ការព្យាបាលដោយវិទ្យុសកម្ម៖ ប្រភេទនៃការព្យាបាលនេះអាចបង្កើនហានិភ័យនៃជំងឺមហារីកសរសៃឈាម ទោះបីជាវាកម្រកើតឡើងក៏ដោយ
• ការខូចខាតសរសៃទឹករងៃ និងការហើម៖ ដែលបណ្តាលមកពីការវះកាត់យកកូនកណ្តុរចេញ ការឆ្លងមេរោគ ឬមូលហេតុផ្សេងៗទៀត
• ការប៉ះពាល់នឹងសារធាតុគីមីមួយចំនួន៖ ដូចជា vinyl chloride និង arsenic ដែលអាចបង្កើនហានិភ័យនៃជំងឺមហារីកសរសៃឈាមក្នុងថ្លើម
• ជំងឺដែលបង្កឡើងដោយបញ្ហាសេនេទិច ឬការប្រែប្រួលហ្សែន៖ ដូចជា ជំងឺ neurofibromatosis, រោគសញ្ញា Maffucci, រោគសញ្ញា Klippel-Trenaunay ក៏ដូចជាការប្រែប្រួលនៃហ្សែន BRCA1 និង BRCA2