រោគសញ្ញានៃការឈឺចាប់សរសៃពួរនិងសាច់ដុំ

ការធ្វើរោគវិនិច្ឆ័យ

ក្នុងកំឡុងពេលពិនិត្យរាងកាយ គ្រូពេទ្យរបស់អ្នកអាចនឹងសង្កត់ថ្នមៗដោយប្រើម្រាមដៃលើតំបន់ដែលមិនស្រណុកសុខស្រួល ដើម្បីពិនិត្យរកមើលចំណុចតឹងណែនទាំងឡាយ។ ចំណុចរំញោចការឈឺចាប់ អាចត្រូវបានសង្កត់តាមរបៀបជាក់លាក់ណាមួយ ដើម្បីដាស់ឱ្យមានការឆ្លើយតបជាក់លាក់។ ជាឧទាហរណ៍ អ្នកអាចនឹងមានអារម្មណ៍កន្ត្រាក់ភ្នក់ៗនៅក្នុងសាច់ដុំរបស់អ្នក។

មូលហេតុនៃការឈឺសាច់ដុំអាចមានភាពខុសប្លែកគ្នាយ៉ាងខ្លាំង។ ដើម្បីទាត់ចោលនូវមូលហេតុដទៃទៀតនៃការឈឺចាប់សាច់ដុំ គ្រូពេទ្យរបស់អ្នកអាចនឹងណែនាំឱ្យធ្វើការពិនិត្យ និងការព្យាបាលបន្ថែម។

ការព្យាបាល

ការប្រើប្រាស់ឱសថ ការចាក់ថ្នាំចំចំណុចរំញោចឈឺចាប់ ឬការព្យាបាលដោយចលនា ត្រូវបានប្រើប្រាស់ជាញឹកញាប់សម្រាប់ការព្យាបាលរោគសញ្ញានៃការឈឺចាប់សរសៃពួរនិងសាច់ដុំ។ ការធ្វើលំហាត់ប្រាណត្រូវបានចាត់ទុកថាជាផ្នែកមួយដ៏សំខាន់នៃកម្មវិធីព្យាបាលណាក៏ដោយ ប៉ុន្តែវាមិនទាន់មានភស្តុតាងច្បាស់លាស់ណាមួយដែលបង្ហាញថាការព្យាបាលមួយមានប្រសិទ្ធភាពជាងការព្យាបាលមួយទៀតនោះទេ។ ចូរពិភាក្សាជាមួយគ្រូពេទ្យរបស់អ្នកអំពីជម្រើសនានា និងវគ្គព្យាបាលដែលអ្នកពេញចិត្ត។ ដើម្បីទទួលបានការធូរស្រាលពីការឈឺចាប់ អ្នកប្រហែលជាត្រូវសាកល្បងយុទ្ធសាស្ត្រខុសៗគ្នាជាច្រើន។

ឱសថ

ជំងឺឈឺចាប់សរសៃពួរនិងសាច់ដុំ ត្រូវបានព្យាបាលដោយប្រើប្រាស់ឱសថដូចខាងក្រោម៖

• ថ្នាំបំបាត់ការឈឺចាប់៖ មនុស្សមួយចំនួនអាចទទួលបានអត្ថប្រយោជន៍ពីការប្រើប្រាស់ថ្នាំបំបាត់ការឈឺចាប់ដែលទិញបានដោយគ្មានវេជ្ជបញ្ជា ដូចជា Ibuprofen និង Naproxen sodium។ ឬមួយ គ្រូពេទ្យរបស់អ្នកអាចនឹងណែនាំថ្នាំបំបាត់ការឈឺចាប់ដែលមានកម្រិតខ្លាំងជាងនេះ។ ថ្នាំខ្លះត្រូវបានផ្តល់ជូនជាទម្រង់បន្ទះបិទលើស្បែកដែលអ្នកត្រូវបិទវា។
• ថ្នាំប្រឆាំងការបាក់ទឹកចិត្ត៖ ថ្នាំប្រឆាំងការបាក់ទឹកចិត្តមានច្រើនទម្រង់ខុសៗគ្នា ដែលអាចជួយសម្រាលការឈឺចាប់បាន។ ថ្នាំអាមីទ្រីបទីលីន ហាក់ដូចជាជួយកាត់បន្ថយការឈឺចាប់ និងជួយឱ្យគេងលក់ស្រួលសម្រាប់អ្នកជំងឺឈឺចាប់សរសៃពួរនិងសាច់ដុំមួយចំនួន។
• ថ្នាំបន្ធូរអារម្មណ៍ ឬថ្នាំរំងាប់អារម្មណ៍៖ ថ្នាំ Clonazepam ត្រូវបានប្រើប្រាស់ដើម្បីព្យាបាលការថប់បារម្ភ និងការគេងមិនលក់ដែលជួនកាលអាចកើតមានរួមគ្នាជាមួយជំងឺឈឺចាប់សរសៃពួរនិងសាច់ដុំ។ វាត្រូវតែប្រើប្រាស់ដោយការប្រុងប្រយ័ត្នខ្ពស់ ព្រោះវាអាចបណ្តាលឱ្យងងុយដេក និងអាចញៀនដកខ្លួនមិនរួច។

ការព្យាបាលដោយចលនា

ផ្អែកលើសញ្ញា និងរោគសញ្ញារបស់អ្នក គ្រូពេទ្យឯកទេសព្យាបាលដោយចលនាអាចរៀបចំផែនការដើម្បីជួយអ្នកក្នុងការគ្រប់គ្រងការឈឺចាប់។ ដើម្បីព្យាបាលរោគសញ្ញានៃការឈឺចាប់សរសៃពួរនិងសាច់ដុំដោយប្រើការព្យាបាលដោយចលនារួមមាន៖

• ការទាញសន្ធឹងសាច់ដុំ៖ ដើម្បីជួយសម្រាលការឈឺចាប់នៅក្នុងសាច់ដុំដែលរងផលប៉ះពាល់ គ្រូពេទ្យព្យាបាលដោយចលនាអាចណែនាំអ្នកតាមរយៈលំហាត់ទាញសន្ធឹងងាយៗមួយចំនួន។ គ្រូពេទ្យព្យាបាលដោយចលនាអាចនឹងលាបសារធាតុស្ពឹកនៅលើស្បែករបស់អ្នក ប្រសិនបើអ្នកមានអារម្មណ៍ឈឺចាប់ត្រង់ចំណុចរំញោចឈឺចាប់នៅពេលកំពុងទាញសន្ធឹង។
• ការម៉ាស្សា៖ សាច់ដុំដែលរងរបួសរបស់អ្នកអាចនឹងត្រូវម៉ាស្សាដោយគ្រូពេទ្យព្យាបាលដោយចលនា ដើម្បីជួយគ្រប់គ្រងការឈឺចាប់។ ដើម្បីសម្រាលការតឹងណែន គ្រូពេទ្យព្យាបាលដោយចលនាអាចម៉ាស្សាសាច់ដុំរបស់អ្នកដោយប្រើក្បាច់រឹតវែងៗ ឬផ្តល់សម្ពាធលើចំណុចជាក់លាក់ណាមួយនៅលើសាច់ដុំរបស់អ្នក។
• ការបណ្តុះបណ្តាលឥរិយាបថរាងកាយ៖ ការឈឺចាប់សរសៃពួរនិងសាច់ដុំអាចត្រូវបានសម្រាល ជាពិសេសការឈឺចាប់ត្រង់ក តាមរយៈការកែតម្រូវឥរិយាបថរាងកាយរបស់អ្នកឱ្យបានត្រឹមត្រូវ។ អ្នកអាចបង្ការការប្រើប្រាស់សាច់ដុំណាមួយហួសកម្លាំង ដោយការធ្វើលំហាត់ប្រាណដែលពង្រឹងសាច់ដុំនៅជុំវិញចំណុចរំញោចឈឺចាប់របស់អ្នក។
• ការព្យាបាលដោយរលកសំឡេង៖ ការព្យាបាលប្រភេទនេះប្រើប្រាស់រលកសំឡេងដើម្បីផ្តល់កម្តៅដល់រាងកាយ និងជម្រុញលំហូរឈាម ដែលអាចជួយដល់សាច់ដុំដែលរងផលប៉ះពាល់ដោយសារជំងឺឈឺចាប់សរសៃពួរនិងសាច់ដុំឱ្យឆាប់ជាសះស្បើយ។
• កម្តៅ៖ ការប្រើប្រាស់កម្តៅដើម្បីបន្ធូរសាច់ដុំ និងកាត់បន្ថយភាពមិនស្រណុកសុខស្រួល អាចធ្វើទៅបានដោយការប្រើប្រាស់បន្ទះស្អំក្ដៅ ឬការងូតទឹកក្ដៅឧណ្ហៗ។

នីតិវិធីប្រើប្រាស់ម្ជុល

ការឈឺចាប់អាចត្រូវបានកាត់បន្ថយដោយការចាក់ថ្នាំស្តេរ៉ូអ៊ីត ឬសារធាតុស្ពឹកចូលទៅក្នុងចំណុចរំញោចឈឺចាប់។ ចំពោះមនុស្សមួយចំនួន ការគ្រាន់តែដាក់បញ្ចូលម្ជុលទៅក្នុងចំណុចរំញោចឈឺចាប់ ក៏ជួយសម្រាលការតឹងណែននៅក្នុងសាច់ដុំបានដែរ។ វិធីសាស្ត្រនេះ ដែលត្រូវបានគេស្គាល់ផងដែរថាជា ការចាក់ម្ជុលស្ងួតរួមមានការចាក់បញ្ចូលម្ជុលដដែលៗទៅក្នុង និងនៅក្បែរចំណុចរំញោចឈឺចាប់។ អ្នកជំងឺឈឺចាប់សរសៃពួរនិងសាច់ដុំដែលទទួលបានការព្យាបាលដោយចាក់ម្ជុលវិទ្យាសាស្ត្រហាក់ដូចជាទទួលបានអត្ថប្រយោជន៍ពីវាផងដែរក្នុងករណីខ្លះ។

Doctors who treat this condition