ជំងឺមហារីកថង់ទឹកប្រមាត់

ការធ្វើរោគវិនិច្ឆ័យ

• ការពិនិត្យឈាម ត្រូវបានធ្វើឡើងដើម្បីវាយតម្លៃមុខងារថ្លើម។ ការពិនិត្យនេះនឹងជួយសម្រួលដល់គ្រូពេទ្យក្នុងការស្វែងរកមូលហេតុនៃរោគសញ្ញានានា
• ការពិនិត្យតាមរយៈរូបភាព ដូចជា ការថតអេកូ (Ultrasound), ការស្កេនស៊ីធី (CT scan) និងការថត MRI នឹងបង្ហាញរូបភាពនៃថង់ទឹកប្រមាត់

ប្រសិនបើត្រូវបានធ្វើរោគវិនិច្ឆ័យឃើញថាមានជំងឺមហារីកថង់ទឹកប្រមាត់ គ្រូពេទ្យចាំបាច់ត្រូវវាយតម្លៃដំណាក់កាលនៃជំងឺ ព្រោះដំណាក់កាលនេះនឹងកំណត់ពីការព្យាករណ៍រោគ និងជម្រើសនៃការព្យាបាលដែលសមស្របសម្រាប់អ្នកជំងឺ

ខាងក្រោមនេះគឺជាវិធីសាស្ត្រដែលប្រើដើម្បីកំណត់ដំណាក់កាលនៃជំងឺមហារីកថង់ទឹកប្រមាត់៖

• ការវះកាត់រុករក (Exploratory surgery): ជាវិធីសាស្ត្រដែលត្រូវបានណែនាំដើម្បីពិនិត្យផ្នែកខាងក្នុងនៃពោះ រកមើលសញ្ញាណាមួយដែលបង្ហាញថា មហារីកប្រមាត់បានរីករាលដាល។ ក្នុងការវះកាត់ដោយប្រើឧបករណ៍ចោះ (Laparoscopic procedure) កាមេរ៉ាតូចមួយនឹងត្រូវបញ្ចូលទៅក្នុងពោះតាមរយៈមុខរបួសតូចមួយ ដើម្បីពិនិត្យមើលសរីរាង្គនៅក្បែរថង់ទឹកប្រមាត់
• ការពិនិត្យបំពង់ទឹកប្រមាត់: ធ្វើឡើងដោយការចាក់ថ្នាំពណ៌ទៅក្នុងបំពង់ទឹកប្រមាត់។ បន្ទាប់មករូបភាពដែលថ្នាំពណ៌នោះឆ្លងកាត់នឹងត្រូវកត់ត្រាទុក ដើម្បីមើលពីការស្ទះ ឬការរួមតូចនៃបំពង់ទឹកប្រមាត់។ ការថត MRI ផ្លូវទឹកប្រមាត់ (MRCP) និងការឆ្លុះផ្លូវទឹកប្រមាត់ និងលំពែង (ERCP) អាចនឹងត្រូវបានប្រើប្រាស់ក្នុងវិធីសាស្ត្រនេះ
• ការធ្វើតេស្សរូបភាពផ្សេងៗទៀត: ការស្កេនជាបន្តបន្ទាប់ដើម្បីកំណត់ថា តើមហារីកបានរីករាលដាល (Metastasized) ឬនៅមានតែក្នុងថង់ទឹកប្រមាត់។ ការស្កេន CT និង MRI នៃពោះ និងទ្រូង ជាទូទៅត្រូវបានធ្វើឡើង
  ទិន្នន័យដែលប្រមូលបានពីការធ្វើតេស្តខាងលើនឹងជួយវាយតម្លៃដំណាក់កាលនៃមហារីក។ លេខរ៉ូម៉ាំងចាប់ពី 0 ដល់ IV គឺជាការបញ្ជាក់ពីដំណាក់កាលនៃជំងឺមហារីកថង់ទឹកប្រមាត់។ ដំណាក់កាលទាបបំផុតគឺនៅពេលដែលមហារីកស្ថិតនៅតែស្រទាប់ខាងក្នុងនៃថង់ទឹកប្រមាត់។ ក្នុងដំណាក់កាលទី IV ឬដំណាក់កាលធ្ងន់ធ្ងរ មហារីកបានរីករាលដាលទៅកាន់ផ្នែកផ្សេងៗនៃរាងកាយ

ការព្យាបាល

ដំណាក់កាលនៃមហារីក ស្ថានភាពសុខភាព និងចំណូលចិត្តរបស់អ្នកជំងឺ គឺជាកត្តាកំណត់ជម្រើសនៃការព្យាបាល។ គោលបំណងចម្បងនៃការព្យាបាលគឺដើម្បីកម្ចាត់មហារីកប្រមាត់ឱ្យអស់ និងការពារជំងឺកុំឱ្យរីករាលដាល

ការវះកាត់

• • ការវះកាត់យកថង់ទឹកប្រមាត់ចេញ (Cholecystectomy): នៅពេលដែលជំងឺមហារីកថង់ទឹកប្រមាត់ស្ថិតក្នុងដំណាក់កាលដំបូង និងមានតែនៅក្នុងថង់ទឹកប្រមាត់ ជំងឺនេះអាចព្យាបាលបានដោយការវះកាត់យកថង់ទឹកប្រមាត់ចេញ
  • ការវះកាត់យកថង់ទឹកប្រមាត់ និងផ្នែកខ្លះនៃថ្លើមចេញ: ប្រសិនបើមហារីកបានរីករាលដាលដល់ថ្លើម គ្រូពេទ្យអាចនឹងត្រូវវះកាត់យកថង់ទឹកប្រមាត់ រួមទាំងផ្នែកខ្លះនៃថ្លើម និងបំពង់ទឹកប្រមាត់ដែលនៅជុំវិញនោះចេញ

ក្នុងករណីដែលជំងឺមហារីកថង់ទឹកប្រមាត់មានទំហំតូចខ្លាំង ហើយអាចយកចេញអស់ដោយការវះកាត់ ការព្យាបាលបន្ថែមអាចមិនចាំបាច់ឡើយ។ ប្រសិនបើនៅមានកោសិកាមហារីកបន្ទាប់ពីវះកាត់ ការព្យាបាលដោយគីមី ឬវិធីផ្សេងទៀតនឹងត្រូវបានពិចារណា

ការព្យាបាលដោយប្រើថ្នាំគីមី

ការព្យាបាលដោយគីមីប្រើប្រាស់ថ្នាំដើម្បីសម្លាប់កោសិកាមហារីក។ ថ្នាំគីមីអាចផ្តល់ឱ្យតាមរយៈសរសៃឈាម ឬការលេប។ វាត្រូវបានណែនាំជាជម្រើសព្យាបាលនៅពេលដែលមានឱកាសថា មហារីកប្រមាត់នៅសេសសល់ក្រោយការវះកាត់

ការព្យាបាលដោយវិទ្យុសកម្ម

គឺជាការប្រើប្រាស់កាំរស្មីថាមពលខ្លាំងដូចជា កាំរស្មីអ៊ិច (X-rays) និងប្រូតុង ដើម្បីកម្ទេចកោសិកាមហារីក។ វិទ្យុសកម្មត្រូវបានបញ្ចេញចេញពីម៉ាស៊ីនដែលនៅជុំវិញរាងកាយ ខណៈពេលដែលអ្នកជំងឺគេងនៅលើគ្រែពេទ្យ។ ការរួមបញ្ចូលគ្នារវាងការព្យាបាលដោយវិទ្យុសកម្ម និងគីមី អាចត្រូវបានប្រើប្រសិនបើមហារីកមិនត្រូវបានយកចេញអស់ក្រោយការវះកាត់។ ការព្យាបាលដោយវិទ្យុសកម្ម ក៏ជួយគ្រប់គ្រងការឈឺចាប់ផងដែរ ប្រសិនបើការវះកាត់មិនមែនជាជម្រើស

ការព្យាបាលដោយថ្នាំគោលដៅ

ការព្យាបាលដោយថ្នាំគោលដៅ នឹងទៅវាយប្រហារលើចំណុចទទួល (Receptors) ជាក់លាក់ដែលមាននៅក្នុងកោសិកាមហារីក។ កោសិកាមហារីកនឹងងាប់នៅពេលថ្នាំនេះទៅរារាំងចំណុចទទួលទាំងនោះ។ ការព្យាបាលនេះច្រើនតែជាជម្រើសសម្រាប់អ្នកជំងឺមហារីកប្រមាត់ដំណាក់កាលចុងក្រោយ

ការព្យាបាលដោយប្រព័ន្ធភាពស៊ាំ

គឺជាការប្រើប្រាស់ថ្នាំដើម្បីជួយដល់ប្រព័ន្ធភាពស៊ាំក្នុងការប្រយុទ្ធប្រឆាំងនឹងមហារីក។ ជាធម្មតា កោសិកាមហារីកបង្កើតប្រូតេអ៊ីនម្យ៉ាងដែលធ្វើឱ្យប្រព័ន្ធភាពស៊ាំពិបាកវាយប្រហារវា។ ការព្យាបាលដោយប្រព័ន្ធភាពស៊ាំមានប្រសិទ្ធភាពដោយការទៅរំខានដល់ដំណើរការធម្មជាតិទាំងនោះ ដើម្បីឱ្យប្រព័ន្ធភាពស៊ាំស្គាល់ថាកោសិកាមហារីកជាកោសិកាគ្រោះថ្នាក់។ វាច្រើនតែជាជម្រើសសម្រាប់ជំងឺមហារីកថង់ទឹកប្រមាត់ដំណាក់កាលធ្ងន់ធ្ងរ

Doctors who treat this condition