ជំងឺត្បៀតសរសៃឈាមខួរក្បាល យល់ដឹងពីសញ្ញាព្រមាន ពិនិត្យរោគសញ្ញាដែលមិនគួរមើលរំលង

ជំងឺត្បៀតសរសៃឈាមខួរក្បាល អាចកើតឡើងចំពោះមនុស្សគ្រប់គ្នា ជាពិសេសអ្នកដែលមានជំងឺប្រចាំកាយ ឬមានួទម្លាប់រស់នៅដែលបង្កើនហានិភ័យ។ នៅពេលចាប់ផ្តើមមានរោគសញ្ញាដូចជាស្ពឹក ខ្សោយមួយចំហៀងខ្លួន ឬមិនអាចនិយាយបាន មិនគួរត្រូវបានមើលរំលងឡើយ ព្រោះទាំងនេះអាចជាសញ្ញានៃជំងឺត្បៀតសរសៃឈាមខួរក្បាលដែលត្រូវការការព្យាបាលដែលលឿនបំផុតតាមដែលអាចធ្វើទៅបាន

• ជំងឺត្បៀតសរសៃឈាមខួរក្បាល កើតឡើងនៅពេលដែលខួរក្បាលមិនបានទទួលឈាម និងអុកស៊ីសែនគ្រប់គ្រាន់ ដែលនាំឱ្យមានដំណើរការខុសប្រក្រតីនៃប្រព័ន្ធសរសៃប្រសាទ
• រោគសញ្ញាលេចឡើងភ្លាមៗ រួមមានភាពទន់ខ្សោយនៃដៃជើង ឬស្ពឹកមួយចំហៀងខ្លួន វៀចមុខ និយាយមិនច្បាស់ មិនអាចនិយាយបាន បញ្ហាការមើលឃើញ ឬការដើរមិនស្ថិតស្ថេរ។ ប្រសិនបើអ្នកជួបប្រទះរោគសញ្ញាណាមួយក្នុងចំណោមទាំងនេះ អ្នកគួរតែទៅមន្ទីរពេទ្យជាបន្ទាន់ ព្រោះការព្យាបាលទាន់ពេលវេលាជួយបង្កើនឱកាសនៃការជាសះស្បើយបានយ៉ាងច្រើន
• ជំងឺត្បៀតសរសៃឈាមខួរក្បាលបណ្តាលមកពីសរសៃឈាមរួមតូច ឬស្ទះ ដែលអាចបង្កមកពីការប្រមូលផ្តុំជាតិខ្លាញ់ កំណកឈាម ឬស្ថានភាពសុខភាពមួយចំនួន
• ការរក្សាសុខភាពល្អ ដូចជាការញ៉ាំអាហារដែលមានសុខភាពល្អ ការហាត់ប្រាណ ការឈប់ជក់បារី និងការគ្រប់គ្រងស្ថានភាពសុខភាពមូលដ្ឋាន អាចជួយកាត់បន្ថយហានិភ័យនៃជំងឺត្បៀតសរសៃឈាមខួរក្បាលបាន

ជំងឺត្បៀតសរសៃឈាមខួរក្បាល គឺជាអ្វី

ជំងឺត្បៀតសរសៃឈាមខួរក្បាលកើតឡើងនៅពេលដែលសរសៃឈាមដែលផ្គត់ផ្គង់ឈាមទៅខួរក្បាលរួមតូច ឬស្ទះ ដែលបណ្តាលឱ្យឈាម និងអុកស៊ីសែនទៅចិញ្ចឹមខួរក្បាលមិនគ្រប់គ្រាន់។ នៅពេលដែលខួរក្បាលខ្វះឈាម កោសិកាខួរក្បាលចាប់ផ្តើមខូចខាត ដែលនាំឱ្យមានភាពមិនប្រក្រតីនៅក្នុងប្រព័ន្ធសរសៃប្រសាទ ដូចជា ការធ្វើចលនា ការទទួលដឹងលឺ ការនិយាយ និងការមើលឃើញ

ការស្ទះសរសៃឈាមខួរក្បាលបណ្តាលមកពីអ្វី

ការស្ទះសរសៃឈាមខួរក្បាលកើតឡើងនៅពេលដែលខួរក្បាលមិនអាចទទួលបានឈាមគ្រប់គ្រាន់ដោយសារតែការរួមតូច ឬមានការស្ទះសរសៃឈាម ធ្វើឪ្យកោសិកាខួរក្បាលទទួលបានអុកស៊ីសែន និងសារធាតុចិញ្ចឹមតិចជាងមុន ដែលនាំឱ្យកោសិកាខួរក្បាលខូចខាត។ នេះអាចបណ្តាលមកពីកត្តាជាច្រើន រួមមាន៖

ការកកកុញជាតិខ្លាញ់នៅក្នុងសរសៃឈាម

ការប្រមូលផ្តុំនៃបន្ទះខ្លាញ់នៅក្នុងជញ្ជាំងសរសៃឈាមគឺជាដំណើរការកើតឡើងយឺតៗ។ នៅពេលដែលបន្ទះខ្លាញ់កកកុញកាន់តែច្រើន វានឹងធ្វើឱ្យសរសៃឈាមរួមតូច ដែលរារាំងលំហូរឈាម និងអាចនាំឱ្យមានការស្ទះសរសៃឈាមបាន

កំណកឈាមរារាំងលំហូរឈាម

កំណកឈាមអាចកើតឡើងនៅក្នុងសរសៃឈាមដែលមានភាពមិនប្រក្រតី ឬមានប្រភពមកពីកន្លែងផ្សេងទៀត ដូចជានៅក្នុងបេះដូង មុនពេលធ្វើដំណើរទៅកាន់ខួរក្បាល និងធ្វើការរារាំងលំហូរឈាម

ភាពមិនប្រក្រតីនៃកំណកឈាម

អ្នកដែលមានបញ្ហាការកកឈាមងាយខុសប្រក្រតី អាចមានឪកាសកើតកំណកឈាមងាយជាងមុន ដែលអាចទៅស្ទះសរសៃឈាមដែលផ្គត់ផ្គង់ទៅខួរក្បាលបាន

កត្តាដែលបង្កើនហានិភ័យ

លើសពីនេះ ជំងឺត្បៀតសរសៃឈាមខួរក្បាលក៏អាចបណ្តាលមកពីទម្លាប់រស់នៅដែលអាចបង្កើនល្បឿននៃការខូចសរសៃឈាម បង្កើនការប្រមូលផ្តុំជាតិខ្លាញ់ ឬជំរុញការបង្កើតកំណកឈាម ដូចជា៖

• ជំងឺលើសឈាម បណ្តាលឱ្យជញ្ជាំងសរសៃឈាមខូចខាត និងកាន់តែយ៉ាប់យ៉ឺនលឿនជាងមុន
• ជំងឺទឹកនោមផ្អែម បង្កើនហានិភ័យនៃការខូចខាតសរសៃឈាម និងការប្រមូលផ្តុំបន្ទះខ្លាញ់
• ជំងឺបេះដូង ជាពិសេសជំងឺចង្វាក់បេះដូងលោតញាប់  អាចបណ្តាលឱ្យកើតកំណកឈាមនៅក្នុងបេះដូង និងធ្វើដំណើរទៅស្ទះសរសៃឈាមនៅក្នុងខួរក្បាល
• ការជក់បារី ធ្វើឱ្យខូចជញ្ជាំងសរសៃឈាម និងបង្កើនឱកាសនៃការកកឈាមខុសប្រក្រតី
• ការទទួលទានគ្រឿងស្រវឹងច្រើនហួសប្រមាណ អាចប៉ះពាល់ដល់សម្ពាធឈាម និងសុខភាពបេះដូង
• ការខ្វះលំហាត់ប្រាណ បង្កើនហានិភ័យនៃការធាត់ ជំងឺទឹកនោមផ្អែម និងកម្រិតជាតិខ្លាញ់ក្នុងឈាមមិនប្រក្រតី
• ការទទួលទានអាហារដែលមានជាតិខ្លាញ់ឆ្អែត ឬសូដ្យូមខ្ពស់ជាប្រចាំ បង្កើនឱកាសនៃការប្រមូលផ្តុំជាតិខ្លាញ់ និងសម្ពាធឈាមខ្ពស់
• ការលើសទម្ងន់ ឬជំងឺធាត់ បង្កើនហានិភ័យនៃជំងឺផ្សេងៗដូចជាជំងឺលើសឈាម ជំងឺទឹកនោមផ្អែម និងជំងឺកូឡេស្តេរ៉ុលខ្ពស់ ដែលអាចប៉ះពាល់ដល់សុខភាពសរសៃឈាម និងបង្កើនហានិភ័យនៃជំងឺសរសៃឈាមខួរក្បាល

5 សញ្ញានៃ ជំងឺត្បៀតសរសៃឈាមខួរក្បាល រោគសញ្ញាលេចធ្លោដែលអ្នកអាចសង្កេតឃើញបាន

ជាទូទៅ រោគសញ្ញាដំបូងនៃជំងឺត្បៀតសរសៃឈាមខួរក្បាលកើតឡើងភ្លាមៗ។ លក្ខណៈនៃភាពមិនប្រក្រតីប្រែប្រួលអាស្រ័យលើទីតាំងនៃខួរក្បាលដែលរងផលប៉ះពាល់ រួមមាន៖

• ដៃឬជើងទន់ខ្សោយ ឬស្ពឹកមួយចំហៀងខ្លួន៖ អ្នកជំងឺមិនអាចលើកដៃ ឬជើងបានពេញលេញ មានអារម្មណ៍ទន់ខ្សោយ ឬមានអារម្មណ៍ស្ពឹកនៅម្ខាងនៃរាងកាយ
• វៀចមុខ៖ ភាពទន់ខ្សោយនៃសាច់ដុំមុខបណ្តាលឱ្យជ្រុងមាត់យារធ្លាក់
• ការនិយាយមិនច្បាស់ មិនអាចនិយាយបាន ឬពិបាកទំនាក់ទំនង៖ អ្នកជំងឺអាចនិយាយរអាក់ នឹកពាក្យនិយាយមិនត្រឹមត្រូវ ឬពិបាកយល់ការសន្ទនា
• ភាពមិនប្រក្រតីនៃការមើលឃើញ ដូចជាការមើលឃើញពីរជាន់ ការមើលឃើញព្រិលៗ ឬបាត់បង់ការមើលឃើញនៅក្នុងភ្នែកម្ខាង
• វិលមុខ ការដើរមិនស្ថិតស្ថេរ ឬបាត់បង់តុល្យភាព៖ អ្នកជំងឺអាចដើរមិនស្ថិតស្ថេរ មានអារម្មណ៍ញ័រ ឬពិបាករក្សាតុល្យភាពជាងធម្មតា

លោកវេជ្ជបណ្ឌិត DR. VONGKANOK KOWATANAMONGKON គ្រូពេទ្យឯកទេសជំងឺសរសៃប្រសាទនៅមន្ទីរពេទ្យអន្តរជាតិវេជ្ជថានី បានមានប្រសាសន៍ថា ជំងឺសរសៃឈាមខួរក្បាលចាំបាច់ត្រូវការធ្វើរោគវិនិច្ឆ័យយ៉ាងរហ័ស ពីព្រោះយុទ្ធសាស្ត្រព្យាបាល និងលទ្ធផលរបស់អ្នកជំងឺអាស្រ័យលើពេលវេលានៃការចាប់ផ្តើមការព្យាបាល

រោគសញ្ញានៃជំងឺត្បៀតសរសៃឈាមខួរក្បាល និងជំងឺដាច់សរសៃឈាមខួរក្បាល ខុសគ្នាយ៉ាងដូចម្តេច?

ជំងឺត្បៀតសរសៃឈាមខួរក្បាល (Ischemic Stroke) ខុសពីជំងឺដាច់សរសៃឈាមខួរក្បាល ទោះបីជារោគសញ្ញាអាចស្រដៀងគ្នាក៏ដោយ ប៉ុន្តែមូលហេតុ និងវិធីសាស្រ្តព្យាបាលរបស់វាមានភាពខុសគ្នាដូចខាងក្រោម៖

• ជំងឺត្បៀតសរសៃឈាមខួរក្បាល កើតឡើងនៅពេលដែលសរសៃឈាមដែលផ្គត់ផ្គង់ខួរក្បាលរួមតូច ឬស្ទះ ដែលបណ្តាលឱ្យការផ្គត់ផ្គង់ឈាម និងអុកស៊ីសែនទៅកាន់ខួរក្បាលមិនគ្រប់គ្រាន់។ ការព្យាបាលផ្តោតលើការបើកសរសៃឈាមដែលស្ទះ ដើម្បីស្តារលំហូរឈាមទៅកាន់ខួរក្បាលឱ្យបានលឿនតាមដែលអាចធ្វើទៅបាន
• ជំងឺដាច់សរសៃឈាមខួរក្បាល កើតឡើងនៅពេលដែលសរសៃឈាមនៅក្នុងខួរក្បាលបែក ដែលបណ្តាលឱ្យហូរឈាមនៅខាងក្នុងខួរក្បាល។ ដោយការព្យាបាលផ្តោតលើការគ្រប់គ្រងការហូរឈាម កាត់បន្ថយសម្ពាធក្នុងខួរក្បាល និងអាចពិចារណាវះកាត់ចំពោះអ្នកជំងឺមួយចំនួន

ការធ្វើរោគវិនិច្ឆ័យជំងឺត្បៀតសរសៃឈាមខួរក្បាល

គ្រូពេទ្យនឹងប្រើប្រាស់ការធ្វើតេស្តរួមបញ្ចូលគ្នាដើម្បីវាយតម្លៃរោគសញ្ញា បញ្ជាក់ពីជំងឺ កំណត់ទីតាំងនៃសរសៃឈាមមិនប្រក្រតី និងកំណត់មូលហេតុដែលពាក់ព័ន្ធ។ ការធ្វើតេស្តដែលអាចត្រូវបានប្រើរួមមាន៖

• ប្រវត្តិវេជ្ជសាស្ត្រ និងការពិនិត្យសរសៃប្រសាទ

វេជ្ជបណ្ឌិតនឹងសួរអំពីរោគសញ្ញា ពេលវេលានៃការចាប់ផ្តើមរោគសញ្ញា ស្ថានភាពវេជ្ជសាស្ត្រមូលដ្ឋាន និងកត្តាហានិភ័យ។ ការធ្វើតេស្តមុខងារសរសៃប្រសាទនឹងត្រូវបានធ្វើឡើង រួមទាំងការវាយតម្លៃចលនាអវយវៈ ការនិយាយ ការមើលឃើញ តុល្យភាព និងអារម្មណ៍ ដើម្បីវាយតម្លៃភាពមិនប្រក្រតីនៃខួរក្បាល

• ការស្កេនដោយកុំព្យូទ័រ (CT Scan)

ការស្កេននេះពិនិត្យមើលភាពមិនប្រក្រតីនៅក្នុងខួរក្បាល ជាពិសេសការបែងចែករវាងការហូរឈាមខួរក្បាល និងជំងឺខួរក្បាលដែលបណ្តាលមកពីជំងឺស្ទះសរសៃឈាម ដែលជួយវេជ្ជបណ្ឌិតធ្វើការសម្រេចចិត្តព្យាបាលសមស្រប

• ការថតរូបភាពអនុភាពម៉ាញេទិក (MRI)

ការធ្វើតេស្តនេះផ្តល់រូបភាពលម្អិតនៃជាលិកាខួរក្បាល ដែលជួយកំណត់ទីតាំងនៃការខូចខាតខួរក្បាលដែលបណ្តាលមកពីជំងឺស្ទះសរសៃឈាម វាយតម្លៃទំហំ និងភាពធ្ងន់ធ្ងរនៃការខូចខាត

• ការពិនិត្យសរសៃឈាមខួរក្បាល (CT Angiography ឬ MR Angiography)

ការធ្វើតេស្តនេះពិនិត្យមើលភាពមិនប្រក្រតីនៅក្នុងសរសៃឈាម ដូចជាការរួមតូច ឬការស្ទះ ដើម្បីរៀបចំផែនការព្យាបាល

• ការធ្វើតេស្តឈាម និងបេះដូងសម្រាប់ការរកមូលហេតុបន្ថែម

ការធ្វើតេស្តឈាមរកភាពមិនប្រក្រតីដែលអាចទាក់ទងនឹងជំងឺ ដូចជាកម្រិតជាតិស្ករក្នុងឈាម ជាតិខ្លាញ់ក្នុងឈាម និងជំងឺឈាម។ ការធ្វើតេស្តបេះដូងជួយកំណត់អត្តសញ្ញាណមូលហេតុដែលអាចធ្វើឪ្យកើតកំណកឈាម ដូចជាចង្វាក់បេះដូងលោតញាប់

គោលការណ៍ណែនាំសម្រាប់ការព្យាបាលជំងឺត្បៀតសរសៃឈាមខួរក្បាល

គោលការណ៍ណែនាំសម្រាប់ការព្យាបាលអាស្រ័យលើពេលវេលាចាប់ផ្តើមនៃរោគសញ្ញា ទីតាំងនៃសរសៃឈាមដែលស្ទះ និងភាពធ្ងន់ធ្ងរនៃជំងឺ។ គោលដៅគឺដើម្បីស្តារលំហូរឈាមទៅកាន់ខួរក្បាល កាត់បន្ថយការខូចខាត និងការពារការកើតឡើងវិញ។ មានវិធីសាស្រ្តព្យាបាលសំខាន់ៗចំនួនបីសម្រាប់ជំងឺត្បៀតសរសៃឈាមខួរក្បាល៖

ការព្យាបាលដោយថ្នាំរំលាយកំណកឈាម (rtPA)

ជាវិធីព្យាបាលសម្រាប់អ្នកជំងឺដែលមកដល់មន្ទីរពេទ្យក្នុងរយៈពេល 4.5 ម៉ោងបន្ទាប់ពីចាប់ផ្តើមមានរោគសញ្ញា ហើយត្រូវបានគេរកឃើញថាមានជំងឺស្ទះសរសៃឈាមខួរក្បាលដោយសារតែសរសៃឈាមក្នុងខួរក្បាលមានការស្ទះ ដោយគ្មានការហូរឈាមក្នុងខួរក្បាល។ ថ្នាំនេះប្រើដើម្បីរំលាយកំណកឈាម និងធ្វើអោយលំហូរឈាមប្រសើរឡើងវិញ

ការវះកាត់ទាញយកកំណកឈាមចេញ (Mechanical Thrombectomy)

បំពង់បូមតូចមួយត្រូវបានបញ្ចូលទៅក្នុងសរសៃឈាមដើម្បីយកកំណកឈាមដែលរារាំងលំហូរឈាមចេញ។ ជារឿយៗវាត្រូវបានធ្វើឡើងនៅពេលដែលអ្នកជំងឺមកដល់មន្ទីរពេទ្យក្នុងរយៈពេល 4-5 ម៉ោង ប៉ុន្តែមិនលើស 24 ម៉ោង ហើយសរសៃឈាមខួរក្បាលធំត្រូវបានស្ទះ ដើម្បីធ្វើឱ្យឈាមហូរត្រឡប់ទៅខួរក្បាលវិញ

ការព្យាបាលដោយការពង្រីកសរសៃឈាម (Cerebral Angioplasty with Stenting)

សម្រាប់ការព្យាបាលដោយការពង្រីកសរសៃឈាម វេជ្ជបណ្ឌិតនិងពិចារណាក្នុងករណីដែលរកឃើញថា សរសៃឈាម carotid ដែលជាសរសៃឈាមសំខាន់ដែលផ្គត់ផ្គង់ឈាមទៅខួរក្បាល មានការរួមតូច 50% ឬច្រើនជាងនេះ រួមជាមួយនឹងរោគសញ្ញានៃការខ្វិន ឬដាច់សរសៃឈាមខួរក្បាល ដូចជាភាពទន់ខ្សោយនៅអវយវៈ ជ្រុងមាត់ធ្លាក់ចុះ ឬវៀចមុខ រួមទាំងអ្នកជំងឺដែលគ្មានរោគសញ្ញា ប៉ុន្តែរកឃើញការត្បៀតដំណាក់កាលធ្ងន់ធ្ងរ និងមានហានិភ័យខ្ពស់នៃជំងឺសរសៃឈាមខួរក្បាល

វេជ្ជបណ្ឌិតនឹងបញ្ចូលបំពង់បូមតាមក្រលៀនទៅកាន់តំបន់ដែលត្បៀត បន្ទាប់មកបំប៉ោងប៉េងប៉ោងនិង/ឬដាក់សំណាញ់ដើម្បីរុញបន្ទះខ្លាញ់ និងកំណកកំបោរឪ្យជាប់នឹងជញ្ជាំងសរសៃឈាម ជួយបើកផ្លូវឆ្លងកាត់ដើម្បីឱ្យឈាមហូរទៅកាន់ខួរក្បាលបានកាន់តែងាយស្រួល

ការថែទាំខ្លួនឯងក្រោយមានជំងឺត្បៀតសរសៃឈាមខួរក្បាល

បន្ទាប់ពីព្យាបាលជំងឺត្បៀតសរសៃឈាមខួរក្បាលរួច អ្នកជំងឺគួរតែបន្តថែទាំសុខភាពបន្ត ដើម្បីកាត់បន្ថយហានិភ័យនៃការកើតជំងឺសរសៃឈាមខួរក្បាលឡើងវិញម្ដងទៀត ដោយគ្រប់គ្រងកត្តាដែលអាចបង្កើនហានិភ័យ និងការកែប្រែទម្លាប់នៃការរស់នៅ ដូចជា៖

• គ្រប់គ្រងសម្ពាធឈាម ជំងឺទឹកនោមផ្អែម និងកម្រិតកូឡេស្តេរ៉ុល

ការគ្រប់គ្រងស្ថានភាពសុខភាពដែលមានស្រាប់ឱ្យបានត្រឹមត្រូវជួយកាត់បន្ថយការខូចខាតដល់សរសៃឈាម និងកាត់បន្ថយហានិភ័យនៃការត្បៀត ឬការស្ទះសរសៃឈាមឡើងវិញ

• ជ្រើសរើសរបបអាហារដែលមានសុខភាពល្អ

កាត់បន្ថយអាហារដែលមានជាតិខ្លាញ់ឆ្អែត ស្ករ និងសូដ្យូមខ្ពស់ ហើយជ្រើសរើសអាហារដែលជំរុញសុខភាពសរសៃឈាមបេះដូង

• ហាត់ប្រាណជាប្រចាំ

វាជួយបង្កើនចរន្តឈាម គ្រប់គ្រងទម្ងន់ និងកាត់បន្ថយហានិភ័យនៃជំងឺដែលពាក់ព័ន្ធនឹងសរសៃឈាម

• ឈប់ជក់បារី និងកំណត់ការទទួលទានគ្រឿងស្រវឹង

វាជួយកាត់បន្ថយផលប៉ះពាល់លើសរសៃឈាម និងកាត់បន្ថយហានិភ័យនៃភាពមិនប្រក្រតីនៃចរន្តឈាម

• ពិនិត្យសុខភាពជាប្រចាំ និងអនុវត្តតាមការណែនាំរបស់គ្រូពេទ្យ

ការត្រួតពិនិត្យតាមដានរោគសញ្ញា ការគ្រប់គ្រងកត្តាពាក់ព័ន្ធ និងការកែតម្រូវការព្យាបាលសមស្របជាប្រចាំ

លើសពីនេះ អ្នកជំងឺមួយចំនួនអាចជួបប្រទះបញ្ហាធ្វើចលនា ការទំនាក់ទំនង ឬសកម្មភាពប្រចាំថ្ងៃ ដូចជាភាពទន់ខ្សោយនៅអវយវៈ ការនិយាយមិនច្បាស់ ឬអសមត្ថភាពក្នុងការអនុវត្តភារកិច្ចមួយចំនួនដូចពីមុន។ ការស្តារនីតិសម្បទាជាបន្តបន្ទាប់ជួយអ្នកជំងឺឱ្យមានគុណភាពជីវិតកាន់តែប្រសើរឡើង។ កម្មវិធីស្តារនីតិសម្បទាអាស្រ័យលើរោគសញ្ញារបស់បុគ្គលម្នាក់ៗ ហើយអាចរួមមាន៖

• ការព្យាបាលដោយចលនា ដើម្បីស្តារចលនា និងបង្កើនកម្លាំងរាងកាយ
• ហ្វឹកហាត់និយាយ និងហ្វឹកហាត់លេប សម្រាប់អ្នកដែលមានបញ្ហាទំនាក់ទំនង ឬពិបាកពិសារអាហារ

រោគសញ្ញានៃជំងឺត្បៀតសរសៃឈាមខួរក្បាល គឺជាសញ្ញាសំខាន់នៃកើតឡើងពីការផ្គត់ផ្គង់ឈាមមិនគ្រប់គ្រាន់ទៅកាន់ខួរក្បាល ដែលបណ្តាលឱ្យមានភាពមិនប្រក្រតីនៃប្រព័ន្ធសរសៃប្រសាទដូចជាភាពទន់ខ្សោយនៅអវយវៈ វៀចមុខ ការនិយាយមិនច្បាស់ ការរំខានដល់ការមើលឃើញ ឬការបាត់បង់តុល្យភាព។ ប្រសិនបើអ្នកជួបប្រទះរោគសញ្ញាទាំងនេះ សូមកុំរង់ចាំ សូមស្វែងរកការព្យាបាលពីគ្រូពេទ្យជាបន្ទាន់។ ការព្យាបាលភ្លាមៗបង្កើនឱកាសនៃការជាសះស្បើយយ៉ាងខ្លាំង និងកាត់បន្ថយការខូចខាតខួរក្បាល

សំណួរដែលសួរជាញឹកញាប់អំពីជំងឺត្បៀតសរសៃឈាមខួរក្បាល

Related Posts

See All

ការឈឺខ្នងប្រភេទណា ប្រឈមនឹង បញ្ហាលៀនឌីសគាបសរសៃប្រសាទ

បញ្ហាលៀនឌីសគាបសរសៃប្រសាទ គឺជាអ្វី? ឌីសឆ្អឹងខ្នងដើរតួដូច […]

អត្ថបទសុខភាព

ស្វែងយល់អំពីសារធាតុបង្កមហារីក៖ ការគំរាមកំហែងស្ងាត់ៗក្នុងជីវិតប្រចាំថ្ងៃដែលអ្នកត្រូវដឹង

នៅក្នុងជីវិតប្រចាំថ្ងៃដ៏មមាញឹករបស់យើង ជារឿយៗយើងមិនដឹងខ្ […]

អត្ថបទសុខភាព