បញ្ហាកោសិការក្នុងបំពង់ទឹកដោះលូតលាស់ខុសប្រក្រតី

ទិដ្ឋភាពទូទៅ

បញ្ហាកោសិការក្នុងបំពង់ទឹកដោះលូតលាស់ខុសប្រក្រតី (Atypical hyperplasia of the breast) គឺជាស្ថានភាពមុនមហារីក ដែលប៉ះពាល់ដល់កោសិកាសុដន់ ដោយវាត្រូវបានសម្គាល់តាមរយៈការមានវត្តមាននៃកោសិកាមិនធម្មតានៅក្នុងបំពង់ទឹកដោះ និងថង់ទឹកដោះ។

ទោះបីជាវាមិនទាន់ជាជំងឺមហារីកក៏ដោយ ប៉ុន្តែបញ្ហាកោសិការក្នុងបំពង់ទឹកដោះលូតលាស់ខុសប្រក្រតី បង្កើនហានិភ័យនៃការវិវត្តទៅជាជំងឺមហារីកសុដន់។ ប្រសិនបើកោសិកាមិនធម្មតាទាំងនេះនៅតែបន្តប្រមូលផ្តុំគ្នា និងកាន់តែមានសភាពមិនប្រក្រតីខ្លាំងឡើងតាមពេលវេលានោះ វាមានសក្តានុពលអាចវិវត្តទៅជាមហារីកសុដន់ដំណាក់កាលដំបូង ឬមហារីកសុដន់ដែលរីករាលដាល។

បុគ្គលដែលត្រូវបានធ្វើរោគវិនិច្ឆ័យឃើញថាមានបញ្ហាកោសិការក្នុងបំពង់ទឹកដោះលូតលាស់ខុសប្រក្រតី នឹងប្រឈមមុខនឹងការកើនឡើងនៃហានិភ័យនៃការវិវត្តទៅជាជំងឺមហារីកសុដន់នាពេលអនាគត។ ជាវិធានការការពារ គ្រូពេទ្យជំនាញតែងតែណែនាំឱ្យមានការពិនិត្យស្វែងរកមហារីកសុដន់ឱ្យបានម៉ត់ចត់បំផុត និងអាចចេញវេជ្ជបញ្ជាឱ្យប្រើប្រាស់ឱសថមួយចំនួនក្នុងគោលបំណងកាត់បន្ថយហានិភ័យនៃជំងឺមហារីកសុដន់។

រោគសញ្ញា

ជាធម្មតា បញ្ហាកោសិការក្នុងបំពង់ទឹកដោះលូតលាស់ខុសប្រក្រតី មិនបង្ហាញរោគសញ្ញាជាក់លាក់ណាមួយឡើយ ដែលធ្វើឱ្យវាពិបាកក្នុងការសម្គាល់ដោយមិនមានការពិនិត្យវេជ្ជសាស្ត្រ។ ប្រសិនបើអ្នកមានការព្រួយបារម្ភ ឬសញ្ញាណាមួយដែលរំខានដល់អ្នក វាជារឿងគួរឱ្យណែនាំឱ្យធ្វើការណាត់ជួបជាមួយគ្រូពេទ្យជាបន្ទាន់។ ស្ថានភាពនេះត្រូវបានរកឃើញញឹកញាប់បំផុតតាមរយៈការធ្វើកោសល្យវិច័យសុដន់ ដើម្បីពិនិត្យលើភាពមិនប្រក្រតីដែលរកឃើញតាមរយៈការថតម៉ាម៉ូក្រាម ឬអេកូសុដន់។ ជួនកាល ស្ថានភាពនេះក៏ត្រូវបានរកឃើញផងដែរ ក្នុងអំឡុងពេលធ្វើកោសល្យវិច័យដើម្បីពិនិត្យបញ្ហាសុដន់ផ្សេងៗ ដូចជាការមានដុំសាច់ ឬមានទឹកហូរចេញពីចុងសុដន់។

មូលហេតុ

ការវិវត្តនៃបញ្ហាកោសិការក្នុងបំពង់ទឹកដោះលូតលាស់ខុសប្រក្រតី មិនទាន់ត្រូវបានយល់ច្បាស់ពេញលេញនៅឡើយទេ។ ស្ថានភាពនេះកើតឡើងនៅពេលដែលមានភាពមិនប្រក្រតីនៃចំនួន ទំហំ រូបរាង លំនាំនៃការលូតលាស់ និងរូបរាងខាងក្រៅនៃកោសិកាសុដន់។ ប្រភេទជាក់លាក់នៃស្ថានភាពនេះ ត្រូវបានកំណត់ទៅតាមរូបរាងនៃកោសិកាមិនធម្មតាទាំងនោះ ដែលអាចបង្ហាញជាការលូតលាស់មិនធម្មតានៅក្នុងបំពង់ទឹកដោះ ឬការលូតលាស់មិនធម្មតានៅក្នុងថង់ទឹកដោះ។

បញ្ហាកោសិការក្នុងបំពង់ទឹកដោះលូតលាស់ខុសប្រក្រតី ត្រូវបានចាត់ទុកថាជាផ្នែកមួយនៃដំណើរផ្លាស់ប្តូរកោសិកាដ៏ស្មុគស្មាញ ដែលអាចឈានទៅរកការកើតជំងឺមហារីកសុដន់។ ការវិវត្តទៅជាមហារីកសុដន់ជាទូទៅរួមមានដំណាក់កាលដូចខាងក្រោម៖

• ការកើនឡើងកោសិកា៖ ការរំខានដល់ការវិវត្ត និងការលូតលាស់នៃកោសិកាធម្មតា បណ្តាលឱ្យមានការផលិតកោសិកាដែលមានរូបរាងធម្មតាច្រើនលើសលប់។
• ការលូតលាស់កោសិកាមិនធម្មតា៖ កោសិកាលើសកម្រិតចាប់ផ្តើមប្រមូលផ្តុំគ្នា និងបង្ហាញនូវលក្ខណៈមិនប្រក្រតី។
• មហារីកមិនទាន់រីករាលដាល៖ កោសិកាមិនធម្មតាបន្តវិវត្តរូបរាង និងបំបែកខ្លួនកាន់តែច្រើន រហូតក្លាយជាមហារីកដំណាក់កាលដំបូង។ ក្នុងដំណាក់កាលនេះ កោសិកាមហារីកស្ថិតនៅត្រឹមតែក្នុងបំពង់ទឹកដោះប៉ុណ្ណោះ។
• មហារីករីករាលដាល៖ កោសិកាមិនធម្មតាបន្តប្រមូលផ្តុំក្នុងបំពង់ទឹកដោះ បន្តបំបែកខ្លួន និងប្រែសំបកទៅជាកោសិកាមហារីក។ មហារីករីករាលដាលត្រូវបានសម្គាល់ដោយការរុករានចូលទៅក្នុងជាលិកាជុំវិញ សរសៃឈាម ឬប្រព័ន្ធទឹករងៃ។