ជំងឺងងុយគេងខ្លាំងដោយគ្មានមូលហេតុ

ការធ្វើរោគវិនិច្ឆ័យ

ដើម្បីធ្វើរោគវិនិច្ឆ័យជំងឺងងុយគេងខ្លាំងដោយគ្មានមូលហេតុ គ្រូពេទ្យជាច្រើននឹងសាកសួរអំពីមោគសញ្ញារបស់អ្នកជំងឺ និងពិនិត្យមើលប្រវត្តិវេជ្ជសាស្ត្រផ្ទាល់ខ្លួន។ ជារឿយៗ ការពិនិត្យរាងកាយក៏អាចត្រូវបានបញ្ចូលផងដែរ។ ដើម្បីបញ្ជាក់ពីស្ថានភាពជំងឺ ឬដកចេញនូវជំងឺផ្សេងទៀតដែលអាចជាប្រភពនៃរោគសញ្ញា អ្នកជំងឺអាចនឹងត្រូវធ្វើតេស្តមួយចំនួន

វាមានសារៈសំខាន់ណាស់ក្នុងការពិភាក្សាអំពីប្រវត្តិវេជ្ជសាស្ត្រគ្រួសារ និងថ្នាំដែលកំពុងប្រើប្រាស់។ ដើម្បីធ្វើរោគវិនិច្ឆ័យថាមានជំងឺងងុយគេងខ្លាំងដោយគ្មានមូលហេតុ អ្នកជំងឺត្រូវតែមានអាការៈងងុយគេងខ្លាំងកម្រិតខ្លាំងជាប្រចាំថ្ងៃ ក្នុងរយៈពេលយ៉ាងហោចណាស់បីខែ

ជំងឺនេះក៏អាចត្រូវបានធ្វើរោគវិនិច្ឆ័យដោយជំនួយពីវិធីសាស្ត្រទាំងនេះ៖

• មាត្រដ្ឋានវាស់ស្ទង់ការងងុយគេង Epworth (Epworth Sleepiness Scale): ដើម្បីកំណត់ថាតើការគេងមានឥទ្ធិពលយ៉ាងណាលើសកម្មភាពប្រចាំថ្ងៃ គ្រូពេទ្យអាចតម្រូវឱ្យអ្នកជំងឺវាយតម្លៃកម្រិតនៃការអស់កម្លាំងរបស់ពួកគេដោយប្រើបច្ចេកទេសនេះ
• កំណត់ហេតុនៃការគេង (Sleep diary): គ្រូពេទ្យអាចសុំឱ្យអ្នកជំងឺកត់ត្រាទុកនូវទម្លាប់នៃការគេង។ អ្នកជំងឺគួរតែកត់ត្រាម៉ោងចូលគេង និងម៉ោងភ្ញាក់ពីគេងប្រចាំថ្ងៃ ដើម្បីបង្ហាញពីទម្លាប់ និងបរិមាណនៃការគេង
• ការធ្វើតេស្តការគេង (Polysomnogram): អ្នកជំងឺត្រូវគេងមួយយប់នៅក្នុងមណ្ឌលពិនិត្យការគេង។ ក្នុងកំឡុងពេលអ្នកជំងឺគេង ម៉ាស៊ីននឹងកត់ត្រាចង្វាក់បេះដូង ទម្រង់ដង្ហើម ចលនាភ្នែក និងជើង សកម្មភាពខួរក្បាល និងកម្រិតអុកស៊ីសែនក្នុងឈាម
• ការធ្វើតេស្តពិនិត្យភាពងងុយគេងពេលថ្ងៃ (Multiple sleep latency test): អ្នកជំងឺត្រូវបានតម្រូវឱ្យគេងមួយភាំងៗជាច្រើនដងក្នុងមួយថ្ងៃ ហើយក្នុងអំឡុងពេលនោះ ការវាស់វែងនឹងត្រូវបានធ្វើឡើងដើម្បីបង្ហាញពីប្រភេទ និងដំណាក់កាលផ្សេងៗនៃការគេង។ ជាទូទៅ ការធ្វើតេស្ត Polysomnogram ត្រូវបានធ្វើឡើងនៅថ្ងៃបន្ទាប់ពីការធ្វើតេស្តនេះ

ការព្យាបាល

ជំងឺងងុយគេងខ្លាំងដោយគ្មានមូលហេតុ គឺជាជំងឺដំណេកដែលត្រូវបានកំណត់លក្ខណៈដោយងងុយគេងច្រើនពេកនៅពេលថ្ងៃ សូម្បីតែបន្ទាប់ពីគេងគ្រប់គ្រាន់ក៏ដោយ។ មូលហេតុពិតប្រាកដនៃស្ថានភាពនេះមិនទាន់ដឹងនៅឡើយទេ ប៉ុន្តែមានការព្យាបាលដែលអាចជួយគ្រប់គ្រងរោគសញ្ញា។ ការព្យាបាលទាំងនេះអាចរួមបញ្ចូលថ្នាំដែលជំរុញប្រព័ន្ធសរសៃប្រសាទ ដូចជាថ្នាំ modaphenil ដែលអាចជួយបង្កើនការប្រុងប្រយ័ត្ន និងកាត់បន្ថយការងងុយគេងនៅពេលថ្ងៃ។ ថ្នាំដទៃទៀតដែលអាចត្រូវបានចេញវេជ្ជបញ្ជារួមមាន sodium oxybate, clarithromycin និង methylphenidate។ ថ្មីៗនេះ ថ្នាំដែលមានផ្ទុក sodium oxybate ក្នុងកម្រិតទាបត្រូវបានអនុម័តដោយរដ្ឋបាលចំណីអាហារ និងឱសថសហរដ្ឋអាមេរិក (FDA) សម្រាប់ការព្យាបាលជំងឺងងុយគេងខ្លាំងដោយគ្មានមូលហេតុចំពោះមនុស្សពេញវ័យ។ បន្ថែមពីលើថ្នាំ ការផ្លាស់ប្តូររបៀបរស់នៅ ដូចជាការបង្កើតកាលវិភាគគេងពេលយប់ឱ្យស៊ីសង្វាក់គ្នា និងការជៀសវាងគ្រឿងស្រវឹង និងថ្នាំដទៃទៀតដែលអាចប៉ះពាល់ដល់ការគេង ក៏អាចជួយគ្រប់គ្រងរោគសញ្ញាបានដែរ

Doctors who treat this condition